ಗೌರವಾನ್ವಿತ ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವರಾದ ಡಾ. ಮನ್ಸುಖ್ ಮಾಂಡವೀಯ ಅವರು ಇಂದು ಒಟ್ಟು ₹120 ಕೋಟಿ ಹೂಡಿಕೆಯ ಆರು ಪ್ರಮುಖ ಕ್ರೀಡಾ ಮೂಲಸೌಕರ್ಯ ಯೋಜನೆಗಳಿಗೆ ವರ್ಚುವಲ್ ಆಗಿ ಶಂಕುಸ್ಥಾಪನೆ ನೆರವೇರಿಸಿದರು ಮತ್ತು ಕ್ರೀಡಾಪಟುಗಳ ಬೆಂಬಲಕ್ಕಾಗಿ ಎರಡು ಸೌಲಭ್ಯಗಳನ್ನು ಉದ್ಘಾಟಿಸಿದರು.

ಈ ಉಪಕ್ರಮಗಳು ಭಾರತದ ಕ್ರೀಡಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವಲ್ಲಿ ಒಂದು ಮಹತ್ವದ ಹೆಜ್ಜೆಯಾಗಿದ್ದು, ದೇಶಾದ್ಯಂತ ವಿಶ್ವದರ್ಜೆಯ, ಕ್ರೀಡಾಪಟು-ಕೇಂದ್ರಿತ ಮೂಲಸೌಕರ್ಯಗಳನ್ನು ಅಭಿವೃದ್ಧಿಪಡಿಸುವಲ್ಲಿ ಕೇಂದ್ರ ಸರ್ಕಾರದ ಬದ್ಧತೆಯನ್ನು ಪುನರುಚ್ಚರಿಸುತ್ತವೆ.

ಒಟ್ಟು ₹82 ಕೋಟಿ ವೆಚ್ಚದ ಆರು ಶಂಕುಸ್ಥಾಪನೆ ಯೋಜನೆಗಳನ್ನು ಖೇಲೋ ಇಂಡಿಯಾ ಯೋಜನೆ (Khelo India Scheme) ಅಡಿಯಲ್ಲಿ ಜಾರಿಗೊಳಿಸಲಾಗುತ್ತಿದೆ ಮತ್ತು ಇದಕ್ಕೆ ಭಾರತೀಯ ಕ್ರೀಡಾ ಪ್ರಾಧಿಕಾರವು (SAI) ಹೆಚ್ಚುವರಿ ಬೆಂಬಲ ನೀಡುತ್ತಿದೆ.

ಈ ಯೋಜನೆಗಳು ಈಶಾನ್ಯ ಮತ್ತು ಪೂರ್ವ ವಲಯಗಳು ಸೇರಿದಂತೆ ದೇಶಾದ್ಯಂತ ಭೌಗೋಳಿಕವಾಗಿ ಹರಡಿಕೊಂಡಿದ್ದು, ಸಮತೋಲಿತ ಮತ್ತು ಒಳಗೊಳ್ಳುವ ಕ್ರೀಡಾ ಮೂಲಸೌಕರ್ಯ ಅಭಿವೃದ್ಧಿಯನ್ನು ಖಚಿತಪಡಿಸುತ್ತವೆ.

ಇವುಗಳಲ್ಲಿ ಬೆಂಗಳೂರಿನ ಸಿಂಥೆಟಿಕ್ ಹಾಕಿ ಟರ್ಫ್ ನ ಮೇಲ್ದರ್ಜೆಗೆ ಏರಿಸುವುದು, ಪಟಿಯಾಲಾದಲ್ಲಿ ವಿವಿಧೋದ್ದೇಶ ಸಭಾಂಗಣದ ನಿರ್ಮಾಣ, ಭೋಪಾಲ್, ಗುವಾಹಟಿ ಮತ್ತು ಜಲ್ಪೈಗುರಿಯಲ್ಲಿ ಸಿಂಥೆಟಿಕ್ ಅಥ್ಲೆಟಿಕ್ ಟ್ರ್ಯಾಕ್ ಗಳ ನಿರ್ಮಾಣ ಹಾಗೂ ಭೋಪಾಲ್ ನಲ್ಲಿ ವಿವಿಧೋದ್ದೇಶ ಜೂಡೋ ಹಾಲ್ ನಿರ್ಮಾಣ ಸೇರಿವೆ.

ಶಂಕುಸ್ಥಾಪನೆಯ ಜೊತೆಗೆ, ಗೌರವಾನ್ವಿತ ಸಚಿವರು ಪಟಿಯಾಲಾದ NS NIS ನಲ್ಲಿ ಒಟ್ಟು ₹38 ಕೋಟಿ ಹೂಡಿಕೆಯೊಂದಿಗೆ ಪೂರ್ಣಗೊಂಡಿರುವ ಎರಡು ಕ್ರೀಡಾಪಟು ಬೆಂಬಲ ಸೌಲಭ್ಯಗಳನ್ನು ಉದ್ಘಾಟಿಸಿದರು.

ಇವುಗಳಲ್ಲಿ ಕ್ರೀಡಾಪಟುಗಳ ಪೌಷ್ಟಿಕಾಂಶದ ಸೇವೆಗಳನ್ನು ಬಲಪಡಿಸಲು ಕೇಂದ್ರೀಕೃತ ಅಡುಗೆಮನೆ ಮತ್ತು ಫುಡ್ ಕೋರ್ಟ್ ಒಳಗೊಂಡ ಊಟದ ಹಾಲ್ ಸೇರಿವೆ. ಹಾಗೆಯೇ ಅತ್ಯಾಧುನಿಕ 'ಇಂಟಿಗ್ರೇಟೆಡ್ ಸ್ಪೋರ್ಟ್ಸ್ ಸೈನ್ಸ್ ಸೆಂಟರ್' ಮತ್ತು 'ಕಂಡೀಷನಿಂಗ್ ಹಾಲ್'ಗಳನ್ನು ಸಹ ಒಳಗೊಂಡಿದ್ದು, ಇವು ಗಣ್ಯ ಕ್ರೀಡಾಪಟುಗಳಿಗೆ ವೈಜ್ಞಾನಿಕ ತರಬೇತಿ ಬೆಂಬಲ, ಪ್ರದರ್ಶನದ ವಿಶ್ಲೇಷಣೆ, ಪುನರ್ವಸತಿ ಮತ್ತು ಚೇತರಿಕೆಗೆ ಹೆಚ್ಚಿನ ಸಹಕಾರ ನೀಡಲಿವೆ.

ಎಲ್ಲಾ ಪಾಲುದಾರರ ಪ್ರಯತ್ನಗಳನ್ನು ಶ್ಲಾಘಿಸಿದ ಮತ್ತು ಆಸ್ತಿ ನಿರ್ವಹಣೆಯಲ್ಲಿ ಭಾರತೀಯ ಕ್ರೀಡಾ ಪ್ರಾಧಿಕಾರದ (SAI) ಜವಾಬ್ದಾರಿಯನ್ನು ಒತ್ತಿಹೇಳಿದ ಗೌರವಾನ್ವಿತ ಸಚಿವರು, "ದೇಶಾದ್ಯಂತ ಅನೇಕ ಕ್ರೀಡಾ ಮೂಲಸೌಕರ್ಯ ಯೋಜನೆಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ, ಆದರೆ SAI ಅಡಿಯಲ್ಲಿರುವ ಸೌಲಭ್ಯಗಳು ನಮ್ಮ ನೇರ ಜವಾಬ್ದಾರಿಯಾಗಿದೆ. ಈ ಆಸ್ತಿಗಳನ್ನು ಸರಿಯಾಗಿ ನಿರ್ವಹಿಸಬೇಕು, ಗರಿಷ್ಠ ಮಟ್ಟದಲ್ಲಿ ಬಳಸಿಕೊಳ್ಳಬೇಕು ಮತ್ತು ಸಾರ್ವಜನಿಕ ಹೂಡಿಕೆಯು ದೀರ್ಘಕಾಲೀನ ಮೌಲ್ಯವನ್ನು ಸೃಷ್ಟಿಸುವುದನ್ನು ಮುಂದುವರಿಸಲು ಸಾಧ್ಯವಿರುವ ಕಡೆಗಳಲ್ಲಿ ವಾಣಿಜ್ಯಿಕವಾಗಿಯೂ ಬಳಸಿಕೊಳ್ಳಬೇಕು" ಎಂದು ಹೇಳಿದರು.

ಜವಾಬ್ದಾರಿ ಮತ್ತು ಸಕಾಲಿಕ ವಿತರಣೆಗೆ ಒತ್ತು ನೀಡಿದ ಡಾ. ಮಾಂಡವೀಯ ಅವರು, ಈ ಮೂಲಸೌಕರ್ಯ ಯೋಜನೆಗಳು ನಿರಂತರ ಮೇಲ್ವಿಚಾರಣೆಗೆ ಒಳಪಡಲಿವೆ ಎಂದು ಎತ್ತಿ ತೋರಿಸಿದರು.

ಯೋಜನೆಗಳನ್ನು ತ್ವರಿತಗೊಳಿಸಲು ಮತ್ತು ನಿರ್ಮಿಸಲಾದ ಮೂಲಸೌಕರ್ಯಗಳನ್ನು ಕ್ರೀಡಾಪಟುಗಳ ಹಿತದೃಷ್ಟಿಯಿಂದ ಅತ್ಯುತ್ತಮವಾಗಿ ಬಳಸಿಕೊಳ್ಳುವುದನ್ನು ಖಚಿತಪಡಿಸಿಕೊಳ್ಳಲು, SAI ಮಟ್ಟದಲ್ಲಿ ಮಾಸಿಕ ಪ್ರಗತಿ ಪರಿಶೀಲನೆ ನಡೆಸಲಾಗುವುದು ಮತ್ತು ಸ್ವತಃ ತಾವೇ ವೈಯಕ್ತಿಕವಾಗಿ ತ್ರೈಮಾಸಿಕ ಪರಿಶೀಲನೆಗಳನ್ನು ನಡೆಸುವುದಾಗಿ ಅವರು ತಿಳಿಸಿದರು.

ಕ್ರೀಡಾ ಕ್ಷೇತ್ರದ ವಿಶಾಲವಾದ ನೀತಿ ಚೌಕಟ್ಟನ್ನು ಉಲ್ಲೇಖಿಸಿದ ಗೌರವಾನ್ವಿತ ಸಚಿವರು, ಮೂಲಸೌಕರ್ಯ ಅಭಿವೃದ್ಧಿ ಸೇರಿದಂತೆ ಭಾರತದ ಕ್ರೀಡಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಲು ಅನುಷ್ಠಾನದ ಪ್ರಮುಖ ಅಂಶಗಳನ್ನು ಒಳಗೊಂಡ 'ಖೇಲೋ ಇಂಡಿಯಾ ಮಿಷನ್' ಅನ್ನು ಕೇಂದ್ರ ಹಣಕಾಸು ಸಚಿವರು ಘೋಷಿಸಿರುವುದನ್ನು ಸ್ಮರಿಸಿದರು.

"2036ರ ವೇಳೆಗೆ ಭಾರತವನ್ನು ವಿಶ್ವದ ಅಗ್ರ 10 ಕ್ರೀಡಾ ರಾಷ್ಟ್ರಗಳಲ್ಲಿ ಒಂದನ್ನಾಗಿ ಮತ್ತು ದೇಶವು ಸ್ವಾತಂತ್ರ್ಯದ ಶತಮಾನೋತ್ಸವವನ್ನು ಆಚರಿಸುವ ಹೊತ್ತಿಗೆ ಅಗ್ರ ಐದರೊಳಗೆ ಸ್ಥಾನ ಪಡೆಯುವಂತೆ ಮಾಡುವ ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ದೂರದೃಷ್ಟಿಯನ್ನು ಸಾಕಾರಗೊಳಿಸಲು ನಾವೆಲ್ಲರೂ ಒಟ್ಟಾಗಿ ಶ್ರಮಿಸಬೇಕು" ಎಂದು ಡಾ. ಮಾಂಡವೀಯ ಹೇಳಿದರು.

ಕ್ರೀಡಾ ಸಾಮಗ್ರಿಗಳ ತಯಾರಿಕೆಗೆ ₹500 ಕೋಟಿ ಅನುದಾನವನ್ನು ನೀಡಲಾಗಿದೆ ಎಂದು ಅವರು ಇದೇ ವೇಳೆ ಒತ್ತಿಹೇಳಿದರು. ಇದು ದೇಶೀಯ ಉತ್ಪಾದನಾ ಸಾಮರ್ಥ್ಯವನ್ನು ಬಲಪಡಿಸುವುದಲ್ಲದೆ, ಸ್ವಾವಲಂಬಿ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕವಾದ ಕ್ರೀಡಾ ಪರಿಸರ ವ್ಯವಸ್ಥೆಯ ಬೆಳವಣಿಗೆಗೆ ಬೆಂಬಲ ನೀಡುತ್ತದೆ ಎಂದು ಅವರು ತಿಳಿಸಿದರು.

ದೇಶದಲ್ಲಿ ಬದಲಾಗುತ್ತಿರುವ ಕ್ರೀಡೆಯ ಪಾತ್ರದ ಬಗ್ಗೆ ಮಾತನಾಡಿದ ಡಾ. ಮಾಂಡವೀಯ ಅವರು, "ಇಂದು ಕ್ರೀಡೆಯು ಒಂದು ವೃತ್ತಿಯಾಗಿದೆ, ಆದ್ದರಿಂದ ಪ್ರತಿಭೆ ಗುರುತಿಸುವಿಕೆ ಮತ್ತು ಪೋಷಣೆಯನ್ನು ಬಲಪಡಿಸಬೇಕು. ಯುವ ಪ್ರತಿಭೆಗಳು ತಳಮಟ್ಟದಿಂದ ಉನ್ನತ ಹಂತಕ್ಕೆ ಪ್ರಗತಿ ಹೊಂದಲು ಅನುವು ಮಾಡಿಕೊಡುವ ವ್ಯವಸ್ಥೆ ಮತ್ತು ಅವಕಾಶಗಳನ್ನು ನಿರ್ಮಿಸುವಲ್ಲಿ ಸರ್ಕಾರವು ಒಂದು ಹೆಜ್ಜೆ ಮುಂದಿರಬೇಕು" ಎಂದು ತಿಳಿಸಿದರು.

ಕ್ರೀಡಾ ಮೂಲಸೌಕರ್ಯ ಅಭಿವೃದ್ಧಿಯು ದೇಶಾದ್ಯಂತ ಕ್ರೀಡಾಪಟುಗಳಿಗೆ ಸ್ಫೂರ್ತಿ ನೀಡಬೇಕು, ಆ ಮೂಲಕ ಭಾರತದ ಉನ್ನತ-ದಕ್ಷತೆಯ ಕ್ರೀಡಾ ವ್ಯವಸ್ಥೆಯನ್ನು ಬಲಪಡಿಸಬೇಕು ಮತ್ತು ರಾಷ್ಟ್ರದ ದೀರ್ಘಕಾಲೀನ ಕ್ರೀಡಾ ಗುರಿಗಳಿಗೆ ಅರ್ಥಪೂರ್ಣ ಕೊಡುಗೆ ನೀಡಬೇಕು ಎಂದು ಅವರು ಆಶಯ ವ್ಯಕ್ತಪಡಿಸಿದರು.

 

*****

(ಪ್ರಕಟಣೆ ಐ.ಡಿ.: 2222708) ವಿಸಿಟರ್ ಕೌಂಟರ್ : 8