مرکزی وزیرِ خزانہ محترمہ نرملا سیتارمن کی جانب سے پیش کیا گیا مرکزی بجٹ 27–2026 کسانوں کو مناسب قیمتوں پر بروقت کھاد کی دستیابی کو یقینی بنانے کے لیے حکومت کے مسلسل عزم کی توثیق کرتا ہے۔ اس کے ساتھ ساتھ یہ بجٹ ملکی پیداوار کی حمایت اور غذائی اجزاء کے متوازن استعمال کو فروغ دینے پر بھی زور دیتا ہے، تاکہ زرعی شعبے کو پائیدار بنیادوں پر مضبوط کیا جا سکے۔

مالی سال 27–2026 کے لیے محکمۂ کھاد کو تقریباً 1.71 لاکھ کروڑ روپے کی خالص بجٹ الاٹمنٹ فراہم کی گئی ہے، جو عالمی منڈی میں کھاد کی قیمتوں میں اتار چڑھاؤ اور سپلائی میں خلل کے اثرات سے کسانوں کو محفوظ رکھنے پر حکومت کی توجہ کی عکاسی کرتی ہے۔

یوریا سبسڈی کے تحت ملکی پیداوار اور درآمد—دونوں کے لیے انتظام کیا گیا ہے تاکہ اندرونِ ملک دستیابی اور طلب کے درمیان خلا کو پُر کیا جا سکے، جبکہ کسانوں کے لیے قانونی طور پر مقررہ قیمتیں برقرار رہیں۔ سبسڈی کا یہ نظام پیدا کرنے والوں کو معقول منافع اور ملک بھر میں بلا تعطل فراہمی کو یقینی بناتا ہے۔

بجٹ میں نیوٹریئنٹ بیسڈ سبسڈی   اسکیم کے تحت فاسفیٹک اور پوٹاشک کھادوں—چاہے وہ ملکی ہوں یا درآمدی—کے لیے مسلسل تعاون بھی فراہم کیا گیا ہے۔ اس کا مقصد این پی کے غذائی اجزاء کے متوازن استعمال کو فروغ دینا، مٹی کی زرخیزی بہتر بنانا اور زرعی پیداوار میں اضافہ کرنا ہے۔

کھاد سبسڈی میں فائیدوں کی براہِ راست منتقلی نظام بدستور سبسڈی کی فراہمی کا ایک اہم ستون ہے، جو شفافیت، مؤثریت اور کھاد کی فروخت کی حقیقی وقت میں نگرانی کو یقینی بناتا ہے۔ اس کے ساتھ ہی فرٹیلائزر سبسڈی مینجمنٹ سسٹم کے لیے بھی انتظام کیا گیا ہے، جس میں نظام کے قیام اور آئی سی ٹی سے متعلق اخراجات شامل ہیں۔

مزید برآں، نامیاتی کھادوں کے فروغ کی پالیسی کے تحت مارکیٹ ڈیولپمنٹ اسسٹنس اور تحقیق و ترقی کے لیے معاونت فراہم کی گئی ہے، جو پائیدار اور ماحول دوست زراعت پر حکومت کے زور کو مضبوط کرتی ہے۔

مجموعی طور پر، بجٹ 2026–27 کسانوں کے مفادات کے تحفظ، کھاد کی سستی دستیابی، ملکی صلاحیت کو مضبوط بنانے اور غذائی اجزاء کے متوازن و پائیدار استعمال کے ذریعے مٹی کی زرخیزی میں بہتری کے لیے ہدفی اور شفاف سبسڈی معاونت کے حکومتی عزم کو نمایاں کرتا ہے۔

************

ش ح ۔   م  د ۔  م  ص

(U : 1382     )