وزارتِ آیوش، حکومتِ ہند کے تحت مرکزی کونسل برائے آیورویدک سائنسز ریسرچ (سی سی آر اے ایس) نے آیوش میں مصنوعی ذہانت (اے آئی) سے متعلق اپنا انٹرن شپ پروگرام 30 جنوری کو کامیابی کے ساتھ اختتام کیا۔ یہ پروگرام 15 دسمبر سے منعقد کیا گیا تھا، جس کا مقصد آیوش تحقیق میں انفارمیشن ٹیکنالوجی اور ڈیٹا پر مبنی طریقۂ کار کے استعمال کو مضبوط بنانا تھا۔

انٹرن شپ کے لیے مجموعی طور پر 180 درخواستیں موصول ہوئیں، جن میں سے ایک منظم اسکریننگ عمل کے بعد 33 طلبہ کا انتخاب کیا گیا۔ منتخب انٹرنز کا تعلق بنیادی طور پر نئی دہلی اور اس کے آس پاس کے انجینئرنگ اداروں سے تھا۔ اس پروگرام کو اس انداز میں تیار کیا گیا تھا کہ آیوش نظام سے متعلق مختلف شعبوں میں مصنوعی ذہانت کے اطلاق پر عملی تربیت فراہم کی جا سکے۔

انٹرن شپ کے دوران شرکاء نے مصنوعی ذہانت پر مبنی متعدد منصوبوں پر کام کیا، جن میں طبی پودوں کی تحقیق، بایوانفارمیٹکس، پراکرتی اسیسمنٹ، میڈیکل امیجنگ، پوسچر ڈیٹیکشن اور مخطوطات کی آپٹیکل کریکٹر ریکگنیشن (او سی آر) شامل تھے۔ یہ منصوبے سی سی آر اے ایس کے وسیع تر مقاصد، یعنی ڈیجیٹل دستاویز سازی، شواہد کی تیاری اور روایتی علمی نظاموں کی ٹیکنالوجی کے ذریعے توثیق سے ہم آہنگ تھے۔

یہ پروگرام ایک تعاملی اور بین الشعبہ جاتی تعلیمی ماحول فراہم کرتا رہا، جس کے ذریعے انٹرنز کو روایتی آیوش تصورات کو جدید کمپیوٹیشنل آلات کے ساتھ یکجا کرنے کا موقع ملا۔ شعبہ جاتی ماہرین کی سرپرستی نے شرکاء میں جدّت، تنقیدی سوچ اور عملی مسئلہ حل کرنے کی صلاحیتوں کو فروغ دیا۔

یہ انٹرن شپ پروگرام نوجوان صلاحیتوں کو شامل کرنے اور آیوش تحقیق و ترقی میں جدید ٹیکنالوجیز کے استعمال کو فروغ دے کر صلاحیت سازی، جدّت اور ادارہ جاتی استحکام کے لیے سی سی آر اے ایس کے مسلسل عزم کی عکاسی کرتا ہے۔ توقع ہے کہ یہ اقدام ایک مضبوط تحقیقی ماحولیاتی نظام کی تشکیل میں معاون ثابت ہوگا اور شواہد پر مبنی اور ٹیکنالوجی سے تقویت یافتہ طریقۂ کار کے ذریعے آیوش کو مرکزی دھارے میں لانے کے طویل مدتی ویژن کی حمایت کرے گا۔

اس پروگرام کی ہم آہنگی ڈاکٹر راکیش نارائن وی۔ انچارج (آئی ٹی)، کے ساتھ مسٹر نمن گوئیل، مسٹر ساحل، ڈاکٹر گگن دیپ اور سی سی آر اے ایس ہیڈکوارٹر کے آئی ٹی سیل کے دیگر تکنیکی افسران نے انجام دی۔

اختتامی اجلاس سے پروفیسر رابنارائن آچاریہ، ڈائریکٹر جنرل (ڈی جی)، سی سی آر اے ایس نے خطاب کیا۔ اس موقع پر ڈاکٹر این۔ سری کانت، ڈپٹی ڈائریکٹر جنرل (ڈی ڈی جی)، سی سی آر اے ایس، کونسل کے سینئر افسران اور ریسرچ افسران موجود تھے۔ معزز شخصیات نے انٹرنز کی کاوشوں کو سراہا اور آیوش نظاموں میں شواہد پر مبنی تحقیق کو مضبوط بنانے کے لیے ابھرتی ہوئی ٹیکنالوجیز کی بڑھتی ہوئی اہمیت پر زور دیا۔

پروفیسر آچاریہ نے آیوش شعبے کی ترقی میں مصنوعی ذہانت کی اسٹریٹجک اہمیت کو اجاگر کیا اور اس سلسلے میں سی سی آر اے ایس کی جانب سے جاری اقدامات کا خاکہ پیش کیا۔ انہوں نے اس بات پر زور دیا کہ انٹرن شپ کے دوران تیار کی گئی ایپلی کیشنز کو باقاعدہ، منصوبہ جاتی طرزِ عمل کے تحت توثیق اور توسیع (اسکیلنگ) کے لیے آگے بڑھایا جانا چاہیے۔

******

ش ح۔ ش ا ر۔ ول

Uno-1342