ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ‘ଭାରତ ଶକ୍ତି ସପ୍ତାହ-୨୦୨୬’ର ଉଦଘାଟନ ସମାରୋହକୁ ସମ୍ବୋଧିତ କରିଛନ୍ତି। ଏହି ଅବସରରେ ଶ୍ରୀ ମୋଦୀ କହିଛନ୍ତି ଯେ, ଶକ୍ତି ସପ୍ତାହର ଏହି ନୂତନ ସଂସ୍କରଣରେ ପ୍ରାୟ ୧୨୫ଟି ଦେଶର ପ୍ରତିନିଧି ଗୋଆରେ ଏକତ୍ରିତ ହୋଇଛନ୍ତି। ସମସ୍ତ ଅଂଶଗ୍ରହଣକାରୀଙ୍କୁ ସ୍ୱାଗତ କରି ପ୍ରତିନିଧିମାନେ ଶକ୍ତି-ସୁରକ୍ଷା ଏବଂ ସ୍ଥାୟୀ ଭବିଷ୍ୟତ ବିଷୟରେ ଆଲୋଚନା କରିବା ପାଇଁ ଭାରତ ଆସିଛନ୍ତି ବୋଲି ଉଲ୍ଲେଖ କରିଛନ୍ତି।

ଭାରତ ଶକ୍ତି ସପ୍ତାହ, ବହୁତ କମ ସମୟ ମଧ୍ୟରେ, ଆଲୋଚନା ଏବଂ କାର୍ଯ୍ୟ ପାଇଁ ଏକ ବିଶ୍ୱସ୍ତରୀୟ ମଞ୍ଚ ଭାବରେ ଉଭା ହୋଇଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଆଜି ଭାରତ ଶକ୍ତି କ୍ଷେତ୍ର ପାଇଁ ଅପାର ସୁଯୋଗର ଭୂମି। ସେ ଗୁରୁତ୍ୱାରୋପ କରିଛନ୍ତି ଯେ, ଭାରତ ହେଉଛି ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ଅର୍ଥନୀତି, ଯାହାର ଅର୍ଥ ହେଉଛି ଦେଶର ଶକ୍ତି ଉତ୍ପାଦର ଚାହିଦା ନିରନ୍ତର ବୃଦ୍ଧି ପାଉଛି। ସେ ଗୁରୁତ୍ୱାରୋପ କରିଛନ୍ତି ଯେ, ଭାରତ ବିଶ୍ୱ ଚାହିଦା ପୂରଣ କରିବା ପାଇଁ ମଧ୍ୟ ଉତ୍କୃଷ୍ଟ ସୁଯୋଗ ପ୍ରଦାନ କରୁଛି। ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ, ଭାରତ ବିଶ୍ୱର ପେଟ୍ରୋଲିୟମ ଉତ୍ପାଦର ଶୀର୍ଷ ପାଞ୍ଚ ରପ୍ତାନିକାରୀଙ୍କ ମଧ୍ୟରେ ଅନ୍ୟତମ, ଏହାର ରପ୍ତାନୀ ବ୍ୟାପକତା ୧୫୦ ରୁ ଅଧିକ ଦେଶକୁ ବିସ୍ତାରିତ। ସେ କହିଛନ୍ତି ଯେ, ଭାରତର ଏହି କ୍ଷମତା ସମସ୍ତଙ୍କ ପାଇଁ ବହୁତ ଲାଭଦାୟକ ହେବ। ସେ ଆହୁରି ଗୁରୁତ୍ୱାରୋପ କରିଛନ୍ତି ଯେ, ଶକ୍ତି ସପ୍ତାହ ପ୍ଲାଟଫର୍ମ ସହଭାଗୀତା ଅନୁସନ୍ଧାନ କରିବା ପାଇଁ ଏକ ଉତ୍କୃଷ୍ଟ ସ୍ଥାନ। ଏଥିସହିତ ପ୍ରଧାନମନ୍ତ୍ରୀ ସମସ୍ତ ଅଂଶଗ୍ରହଣକାରୀଙ୍କୁ ଶୁଭକାମନା ଜଣାଇଛନ୍ତି।

ପ୍ରଧାନମନ୍ତ୍ରୀ କହିଛନ୍ତି ଯେ, ତାଙ୍କର ବକ୍ତବ୍ୟ ପ୍ରଦାନ କରିବା ପୂର୍ବରୁ, ସେ ଏକ ପ୍ରମୁଖ ବିକାଶ ଉପରେ ଆଲୋକପାତ କରିବାକୁ ଇଚ୍ଛା ପ୍ରକାଶ କରୁଛନ୍ତି। ସେ ଉଲ୍ଲେଖ କରିଛନ୍ତି ଯେ, ଗତକାଲି ଭାରତ ଏବଂ ୟୁରୋପୀୟ ସଂଘ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଛି, ଯାହାକୁ ସାରା ବିଶ୍ୱର ଲୋକମାନେ "ସମସ୍ତ ଚୁକ୍ତିର ଜନନୀ" ବୋଲି କହୁଛନ୍ତି। ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ, ଏହି ଚୁକ୍ତି ଭାରତର ୧୪୦ କୋଟି ଲୋକ ଓ ୟୁରୋପୀୟ ରାଷ୍ଟ୍ରର ଲକ୍ଷ ଲକ୍ଷ ଲୋକଙ୍କ ପାଇଁ ଅପାର ସୁଯୋଗ ଆଣିଛି। ସେ କହିଛନ୍ତି ଯେ, ଏହା ବିଶ୍ୱର ଦୁଇଟି ବୃହତ ଅର୍ଥନୀତି ମଧ୍ୟରେ ସମନ୍ୱୟର ଏକ ଉଲ୍ଲେଖନୀୟ ଉଦାହରଣ। ଏହି ଚୁକ୍ତି ବିଶ୍ୱ ଜିଡିପିର ପ୍ରାୟ ୨୫ ପ୍ରତିଶତ ଏବଂ ବିଶ୍ୱ ବାଣିଜ୍ୟର ପ୍ରାୟ ଏକ ତୃତୀୟାଂଶ ପ୍ରତିନିଧିତ୍ୱ କରେ। ସେ ମନ୍ତବ୍ୟ ଦେଇଛନ୍ତି ଯେ, ବାଣିଜ୍ୟ ବ୍ୟତୀତ, ଏହି ଚୁକ୍ତି ଗଣତନ୍ତ୍ର ଓ ଆଇନର ଶାସନ ପ୍ରତି ସମାନ ପ୍ରତିବଦ୍ଧତାକୁ ସୁଦୃଢ଼ ​​କରୁଛି।

ଶ୍ରୀ ମୋଦୀ ସୂଚାଇଛନ୍ତି ଯେ, ୟୁରୋପୀୟ ସଂଘ ସହିତ ମୁକ୍ତ ବାଣିଜ୍ୟ ଚୁକ୍ତି ବ୍ରିଟେନ ଏବଂ ଇଏଫଟିଏ ସହିତ ଚୁକ୍ତିଗୁଡ଼ିକୁ ପରିପୂରକ କରି, ଏହାଦ୍ୱାରା ବାଣିଜ୍ୟ ଏବଂ ବିଶ୍ୱ ଯୋଗାଣ ଶୃଙ୍ଖଳା ଉଭୟକୁ ସୁଦୃଢ଼ ​​କରିବ। ଏହି ସଫଳତା ପାଇଁ ସେ ଭାରତର ଯୁବପିଢ଼ି ଓ ସମସ୍ତ ନାଗରିକଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଛନ୍ତି ଏବଂ ବୟନଶିଳ୍ପ, ରତ୍ନ ଅଳଙ୍କାର, ଚମଡା ଓ ଜୋତା ଭଳି କ୍ଷେତ୍ରରେ ନିୟୋଜିତ ବ୍ୟକ୍ତିମାନଙ୍କୁ ତାଙ୍କର ଶୁଭକାମନା ଜଣାଇ ସେ ଉଲ୍ଲେଖ କରିଛନ୍ତି ଯେ, ଏହି ଚୁକ୍ତିନାମା ସେମାନଙ୍କ ପାଇଁ ଅତ୍ୟନ୍ତ ଲାଭଦାୟକ ସାବ୍ୟସ୍ତ ହେବ। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ଏହି ବାଣିଜ୍ୟ ଚୁକ୍ତିନାମା କେବଳ ଭାରତରେ ଉତ୍ପାଦନକୁ ପ୍ରୋତ୍ସାହିତ କରିବ ନାହିଁ ବରଂ ସେବା କ୍ଷେତ୍ରକୁ ଆହୁରି ବିସ୍ତାର କରିବ। ସେ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ, ମୁକ୍ତ ବାଣିଜ୍ୟ ଚୁକ୍ତିନାମା ଭାରତରେ ବିଶ୍ୱସ୍ତରରେ ବ୍ୟବସାୟ ଏବଂ ନିବେଶକଙ୍କ ବିଶ୍ୱାସକୁ ସୁଦୃଢ଼ ​​କରିବ।

ଭାରତ ପ୍ରତ୍ୟେକ କ୍ଷେତ୍ରରେ ବିଶ୍ୱସ୍ତରୀୟ ସହଭାଗୀତା ଉପରେ ସକ୍ରିୟ ଭାବରେ କାର୍ଯ୍ୟ କରୁଛି ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ ମନ୍ତବ୍ୟ ଦେଇଛନ୍ତି ଯେ, କେବଳ ଶକ୍ତି କ୍ଷେତ୍ରରେ, ଶକ୍ତି ମୂଲ୍ୟ ଶୃଙ୍ଖଳର ବିଭିନ୍ନ କ୍ଷେତ୍ରରେ ବିପୁଳ ନିବେଶର ସୁଯୋଗ ରହିଛି। ଶ୍ରୀ ମୋଦୀ ଏହା ଉପରେ ଆଲୋକପାତ କରିଛନ୍ତି ଯେ, ଭାରତ ଏହାର ଅନୁସନ୍ଧାନ କ୍ଷେତ୍ରକୁ ଉଲ୍ଲେଖନୀୟ ଭାବରେ ଉନ୍ମୁକ୍ତ କରିଛି। ଏଥିସହିତ ସମୁଦ୍ର ମନ୍ଥନ ମିଶନ ଭାବରେ ପରିଚିତ ଗଭୀର ସମୁଦ୍ର ଅନୁସନ୍ଧାନ ପଦକ୍ଷେପ ବିଷୟରେ ମଧ୍ୟ ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ, ଏହି ଦଶନ୍ଧି ଶେଷ ସୁଦ୍ଧା ଭାରତ ତୈଳ ଏବଂ ଗ୍ୟାସ କ୍ଷେତ୍ରରେ ନିବେଶକୁ ୧୦୦ ବିଲିୟନ ଡଲାରକୁ ବୃଦ୍ଧି କରିବାକୁ ଲକ୍ଷ୍ୟ ରଖିଛି, ଯାହାର ଲକ୍ଷ୍ୟ ହେଉଛି ଅନୁସନ୍ଧାନ ପରିସରକୁ ଦଶ ଲକ୍ଷ ବର୍ଗ କିଲୋମିଟରକୁ ବିସ୍ତାର କରିବା। ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ଯେ, ୧୭୦ରୁ ଅଧିକ ବ୍ଲକ ପୂର୍ବରୁ ପ୍ରଦାନ କରାଯାଇଛି, ଏବଂ ଆଣ୍ଡାମାନ ଓ ନିକୋବର ଅବବାହିକା ପରବର୍ତ୍ତୀ ହାଇଡ୍ରୋକାର୍ବନ ସୁଯୋଗ ଭାବରେ ଉଭା ହେଉଛି।

ନିଷେଧ କ୍ଷେତ୍ର ହ୍ରାସ କରିବା ସମେତ ଅନୁସନ୍ଧାନ କ୍ଷେତ୍ରରେ ଅନେକ ସଂସ୍କାର ନିଆଯାଇଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଛନ୍ତି ଯେ, ଭାରତ ଶକ୍ତି ସପ୍ତାହର ପୂର୍ବ ସଂସ୍କରଣରେ ଦିଆଯାଇଥିବା ପରାମର୍ଶଗୁଡ଼ିକୁ ଆଇନ ଏବଂ ନିୟମ ପରିବର୍ତ୍ତନରେ ଅନ୍ତର୍ଭୁକ୍ତ କରାଯାଇଛି। ସେ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ, ଅନୁସନ୍ଧାନ କ୍ଷେତ୍ରରେ ନିବେଶ କରୁଥିବା କମ୍ପାନୀଗୁଡ଼ିକ ନିଶ୍ଚିତ ଭାବରେ ବର୍ଦ୍ଧିତ ଲାଭ ପାଇପାରିବେ।

ପ୍ରଧାନମନ୍ତ୍ରୀ ମୋଦୀ ଭାରତର ଆଉ ଏକ ସ୍ୱତନ୍ତ୍ର ଶକ୍ତି ଉପରେ ଆଲୋକପାତ କରିଛନ୍ତି, ଯାହା ଶକ୍ତି କ୍ଷେତ୍ରରେ ନିବେଶକୁ ଅତ୍ୟନ୍ତ ଲାଭଦାୟକ କରୁଛି। ସେ କହିଛନ୍ତି ଯେ, ଭାରତରେ ବିଶୋଧନ କ୍ଷମତା ବହୁତ ବଡ଼ ଏବଂ ବର୍ତ୍ତମାନ ଏହା ବିଶ୍ୱରେ ଦ୍ୱିତୀୟ ସ୍ଥାନରେ ଅଛି। ଶ୍ରୀ ମୋଦୀ ଜୋର ଦେଇ କହିଛନ୍ତି ଯେ, ଭାରତ ବିଶୋଧନ କ୍ଷମତାରେ ବିଶ୍ୱସ୍ତରରେ ଏକ ନମ୍ବର ଦେଶ ହୋଇପାରିବ। ସେ ଉଲ୍ଲେଖ କରିଛନ୍ତି ଯେ, ଭାରତର ବର୍ତ୍ତମାନ ବିଶୋଧନ କ୍ଷମତା ବାର୍ଷିକ ପ୍ରାୟ ୨୬୦ ଏମ୍‌ଏମ୍‌ଟି ରହିଛି ଏବଂ ଏହାକୁ ବାର୍ଷିକ ୩୦୦ ଏମ୍‌ଏମ୍‌ଟି ଅତିକ୍ରମ କରିବା ପାଇଁ ନିରନ୍ତର ପ୍ରୟାସ ଜାରି ରହିଛି। ଏହା ନିବେଶକମାନଙ୍କ ପାଇଁ ଏକ ପ୍ରମୁଖ ଲାଭ।

ଭାରତରେ ଏଲ୍‌ଏନ୍‌ଜି ଚାହିଦା ନିରନ୍ତର ବୃଦ୍ଧି ପାଉଛି ଏବଂ ଦେଶ ଏଲ୍‌ଏନ୍‌ଜି ମାଧ୍ୟମରେ ଏହାର ମୋଟ ଶକ୍ତି ଚାହିଦାର ୧୫ ପ୍ରତିଶତ ପୂରଣ କରିବାକୁ ଲକ୍ଷ୍ୟ ରଖିଛି, ପ୍ରଧାନମନ୍ତ୍ରୀ ସମଗ୍ର ଏଲ୍‌ଏନ୍‌ଜି ମୂଲ୍ୟ ଶୃଙ୍ଖଳରେ କାର୍ଯ୍ୟ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି ଏବଂ ଉଲ୍ଲେଖ କରିଛନ୍ତି ଯେ, ଭାରତ ପରିବହନ କ୍ଷେତ୍ରରେ ବଡ଼ ଧରଣର ପ୍ରୟାସ ଜାରି ରଖିଛି। ଶ୍ରୀ ମୋଦୀ କହିଛନ୍ତି ଯେ, ଭାରତ ଘରୋଇ ଭାବରେ ଏଲ୍‌ଏନ୍‌ଜି ପରିବହନକୁ ଦୃଷ୍ଟିରେ ରଖି ଆବଶ୍ୟକ ଜାହାଜ ନିର୍ମାଣ ପାଇଁ କାମ କରୁଛି, ଯାହା ସଦ୍ୟ ଆରମ୍ଭ ହୋଇଥିବା ୭୦,୦୦୦ କୋଟି ଟଙ୍କାର ଜାହାଜ ନିର୍ମାଣ କାର୍ଯ୍ୟକ୍ରମ ଦ୍ୱାରା ସମର୍ଥିତ। ସେ କହିଛନ୍ତି ଯେ, ଭାରତୀୟ ବନ୍ଦରଗୁଡ଼ିକରେ ଏଲ୍‌ଏନ୍‌ଜି ଟର୍ମିନାଲ ନିର୍ମାଣ ଏବଂ ପୁନଃଗ୍ୟାସିଫିକେସନ୍ ପ୍ରକଳ୍ପରେ ଅନେକ ନିବେଶ ସୁଯୋଗ ସୃଷ୍ଟି ହୋଇଛି।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି, ଭାରତକୁ ଏଲଏନଜି ପରିବହନ ପାଇଁ ଏକ ବିଶାଳ ପାଇପଲାଇନ ନେଟୱାର୍କର ଆବଶ୍ୟକତା ରହିଛି, ଯେଉଁଠାରେ ପୂର୍ବରୁ ଗୁରୁତ୍ୱପୂର୍ଣ୍ଣ ନିବେଶ ହୋଇସାରିଛି, କିନ୍ତୁ ବଡ଼ ଧରଣର ସୁଯୋଗ ଏବେ ବି ଉପଲବ୍ଧ। ସେ କହିଥିଲେ ଯେ, ସହରୀ ଗ୍ୟାସ ବଣ୍ଟନ ନେଟୱାର୍କ ପୂର୍ବରୁ ଅନେକ ଭାରତୀୟ ସହରରେ ପହଞ୍ଚି ସାରିଛି ଏବଂ ଦ୍ରୁତ ଗତିରେ ଅନ୍ୟ ସହରକୁ ବିସ୍ତାର ଲାଭ କରୁଛି, ଯାହା ଏହି କ୍ଷେତ୍ରକୁ ନିବେଶ ପାଇଁ ଅତ୍ୟନ୍ତ ଆକର୍ଷଣୀୟ କରୁଛି।

ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ, ଭାରତର ବିପୁଳ ଜନସଂଖ୍ୟା ଏବଂ ନିରନ୍ତର ବୃଦ୍ଧି ପାଉଥିବା ଅର୍ଥନୀତି ସହିତ, ପେଟ୍ରୋକେମିକାଲ୍ ଉତ୍ପାଦର ଚାହିଦା ବୃଦ୍ଧି ପାଇବ, ଯେଉଥିପାଇଁ ବ୍ୟାପକ ଶକ୍ତି ଭିତ୍ତିଭୂମିର ଆବଶ୍ୟକତା ରହିଛି। ସେ ଦୃଢ଼ ଭାବରେ କହିଛନ୍ତି ଯେ, ଏହି କ୍ଷେତ୍ରରେ ନିବେଶ ଯଥେଷ୍ଟ ଅଭିବୃଦ୍ଧି ଆଣିବ ଓ ନିବେଶକମାନଙ୍କ ପାଇଁ ଡାଉନଷ୍ଟ୍ରିମ୍ କାର୍ଯ୍ୟକଳାପରେ ମଧ୍ୟ ପ୍ରଚୁର ସୁଯୋଗ ରହିଛି।

"ଆଜିର ଭାରତ ସଂସ୍କାର ରୂପକ ଦ୍ରୁତଯାନରେ ବାହକ ହୋଇ ପ୍ରତ୍ୟେକ କ୍ଷେତ୍ରରେ ଦ୍ରୁତ ସଂସ୍କାର କରୁଛି" ବୋଲି ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି, ବିଶ୍ୱସ୍ତରୀୟ ସହଯୋଗ ପାଇଁ ଏକ ସ୍ୱଚ୍ଛ ଏବଂ ନିବେଶକ-ଅନୁକୂଳ ପରିବେଶ ସୃଷ୍ଟି କରିବା ସହିତ ଘରୋଇ ହାଇଡ୍ରୋକାର୍ବନକୁ ମଜଭୁତ କରିବା ପାଇଁ ସଂସ୍କାର କରାଯାଉଛି। ସେ କହିଛନ୍ତି, ଭାରତ ବର୍ତ୍ତମାନ ଶକ୍ତି ସୁରକ୍ଷାଠାରୁ ଆଗକୁ ଅଗ୍ରସର ହୋଇ ଶକ୍ତି ସ୍ୱାଧୀନତା ମିଶନ ଆଡ଼କୁ ଅଗ୍ରସର ହେଉଛି। ଭାରତ ସ୍ଥାନୀୟ ଚାହିଦା ପୂରଣ କରିବାକୁ ସକ୍ଷମ ଏକ ଶକ୍ତି କ୍ଷେତ୍ର ଇକୋସିଷ୍ଟମ ବିକଶିତ କରୁଛି ଏଥିସହିତ ସୁଲଭ ବିଶୋଧନ ଓ ପରିବହନ ସମାଧାନ ମାଧ୍ୟମରେ ରପ୍ତାନୀକୁ ବିଶ୍ୱ ପାଇଁ ଅତ୍ୟନ୍ତ ପ୍ରତିଯୋଗିତାମୂଳକ କରିଥାଏ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ଭାରତର ଶକ୍ତି କ୍ଷେତ୍ର ଦେଶର ଆକାଂକ୍ଷାର କେନ୍ଦ୍ରରେ ରହିଛି ଏବଂ ୫୦୦ ବିଲିୟନ ଡଲାର ମୂଲ୍ୟର ନିବେଶ ସୁଯୋଗ ପ୍ରଦାନ କରୁଛି। ସେ ବିଶ୍ୱ ସମ୍ପ୍ରଦାୟକୁ ବାର୍ତ୍ତା ଦେଇ କହିଥିଲେ ଯେ, ଆମ ଶକ୍ତି କ୍ଷେତ୍ର ଆମ ଆକାଂକ୍ଷାର କେନ୍ଦ୍ରବିନ୍ଦୁ, ଏଥିରେ ୫୦୦ ବିଲିୟନ ଡଲାର ନିବେଶ ସୁଯୋଗ ରହିଛି; ସେଥିପାଇଁ ମେକ୍ ଇନ୍ ଇଣ୍ଡିଆ, ନବସୃଜନ, ଭାରତରେ ନିବେଶ ଓ ଅଭିବୃଦ୍ଧିର ଗୁରୁତ୍ୱ ବଢ଼ିଛି।

ଏହି କାର୍ଯ୍ୟକ୍ରମରେ କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ଶ୍ରୀ ହରଦୀପ ସିଂହ ପୁରୀ, ଗୋଆର ମୁଖ୍ୟମନ୍ତ୍ରୀ ଶ୍ରୀ ପ୍ରମୋଦ ସାୱନ୍ତ ପ୍ରମୁଖ ଉପସ୍ଥିତ ଥିଲେ।

*****

MT