ਇਸ ਮੌਕੇ 'ਤੇ, ਡੀਡੀਡਬਲਿਊਐੱਸ ਸਕੱਤਰ, ਸ਼੍ਰੀ ਅਸ਼ੋਕ ਕੇ.ਕੇ. ਮੀਣਾ ਨੇ ਜ਼ਿਲ੍ਹਾ ਟੀਮਾਂ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ ਅਤੇ ਉਨ੍ਹਾਂ ਨੂੰ ਸਮਰਪਣ ਅਤੇ ਭਾਈਚਾਰਕ ਭਾਗੀਦਾਰੀ ਨਾਲ ਸੇਵਾ ਪ੍ਰਦਾਨ ਕਰਨ ਨੂੰ ਮਜ਼ਬੂਤ ​​ਕਰਦੇ ਰਹਿਣ ਲਈ ਉਤਸ਼ਾਹਿਤ ਕੀਤਾ। ਉਨ੍ਹਾਂ ਨੇ ਪੇਂਡੂ ਪੀਣ ਵਾਲੇ ਪਾਣੀ ਦੀ ਸਪਲਾਈ ਵਿੱਚ ਬੁਨਿਆਦੀ ਢਾਂਚੇ ਦੇ ਨਿਰਮਾਣ ਤੋਂ ਸੇਵਾ ਪ੍ਰਦਾਨ ਕਰਨ ਵੱਲ ਵਧਣ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ, ਪੇਂਡੂ ਪੀਣ ਵਾਲੇ ਪਾਣੀ ਦੀ ਸਪਲਾਈ ਵਿੱਚ ਭਾਈਚਾਰਕ ਮਾਲਕੀ ਅਤੇ ਸੇਵਾ ਪ੍ਰਦਾਨ ਕਰਨ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਨੇ ਗ੍ਰਾਮ ਪੰਚਾਇਤਾਂ ਅਤੇ ਚੁਣੇ ਹੋਏ ਪ੍ਰਤੀਨਿਧੀਆਂ ਦੀ ਮਹੱਤਵਪੂਰਨ ਭੂਮਿਕਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ 73ਵੀਂ ਸੰਵਿਧਾਨਿਕ ਸੋਧ ਦੇ ਤਹਿਤ, ਪੀਣ ਵਾਲੇ ਪਾਣੀ ਦੀਆਂ ਪ੍ਰਣਾਲੀਆਂ ਦੇ ਸੰਚਾਲਨ ਅਤੇ ਰੱਖ-ਰਖਾਅ ਦੀ ਜ਼ਿੰਮੇਵਾਰੀ ਗ੍ਰਾਮ ਪੰਚਾਇਤ ਪੱਧਰ 'ਤੇ ਹੈ ਅਤੇ ਇਸ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਲਾਗੂ ਕੀਤਾ ਜਾਣਾ ਚਾਹੀਦਾ ਹੈ।

ਸ਼੍ਰੀ ਮੀਣਾ ਨੇ ਰਾਜਾਂ ਵਿੱਚ ਉੱਭਰ ਰਹੀ ਮਜ਼ਬੂਤ ​​ਭਾਈਚਾਰਕ ਭਾਗੀਦਾਰੀ ਦੀ ਸ਼ਲਾਘਾ ਕੀਤੀ, ਜਿਸ ਵਿੱਚ ਪ੍ਰਵਾਸੀ ਭਾਈਚਾਰਿਆਂ ਅਤੇ ਜਲ ਸੇਵਾਵਾਂ ਦਾ ਸਮਰਥਨ ਕਰਨ ਵਾਲੇ ਅੰਤਰਰਾਜੀ ਕਾਮੇ ਸ਼ਾਮਲ ਹਨ। ਉਨ੍ਹਾਂ ਕਿਹਾ ਕਿ ਇਹ ਭਾਈਚਾਰਕ-ਅਗਵਾਈ ਵਾਲਾ ਦ੍ਰਿਸ਼ਟੀਕੋਣ ਪ੍ਰੋਗਰਾਮ ਦੇ ਅਗਲੇ ਪੜਾਅ ਦੀ ਅਗਵਾਈ ਕਰੇਗਾ।

ਉਨ੍ਹਾਂ ਨੇ ਦੋ ਮੁੱਖ ਤਰਜੀਹਾਂ ' ਤੇ ਜ਼ੋਰ ਦਿੱਤਾ :

1. ਜਲ ਅਰਪਣ - 15 ਦਿਨਾਂ ਦੇ ਪਾਇਲਟ ਪ੍ਰੋਗਰਾਮ ਤੋਂ ਬਾਅਦ ਗ੍ਰਾਮ ਪੰਚਾਇਤਾਂ ਅਤੇ ਭਾਈਚਾਰਿਆਂ ਨੂੰ ਪੇਂਡੂ ਜਲ ਸਪਲਾਈ ਸਕੀਮਾਂ ਦਾ ਯੋਜਨਾਬੱਧ ਢੰਗ ਨਾਲ ਸੌਂਪਣਾ। ਉਨ੍ਹਾਂ ਨੇ ਜਲ ਅਰਪਣ ਨੂੰ ਹਰ ਸਾਲ "ਸਲਾਨਾ ਰੱਖ-ਰਖਾਅ ਪੰਦਰਵਾੜੇ" ਵਜੋਂ ਮਨਾਉਣ ਦੀ ਸਿਫਾਰਸ਼ ਕੀਤੀ ਤਾਂ ਜੋ ਰੋਕਥਾਮ ਵਾਲੇ ਰੱਖ-ਰਖਾਅ ਨੂੰ ਯਕੀਨੀ ਬਣਾਇਆ ਜਾ ਸਕੇ ਅਤੇ ਜਿੱਥੇ ਸਿਸਟਮ ਪਹਿਲਾਂ ਹੀ ਭਾਈਚਾਰੇ ਨੂੰ ਸੌਂਪੇ ਜਾ ਚੁੱਕੇ ਹਨ, ਉੱਥੇ ਭਾਈਚਾਰਕ ਮਾਲਕੀ ਨੂੰ ਮੁੜ ਸਥਾਪਿਤ ਕੀਤਾ ਜਾ ਸਕੇ।

2. ਜਲ ਸੇਵਾ ਮੁਲਾਂਕਣ - 100% ਹਰ ਘਰ ਜਲ ਐਲਾਨੇ ਗਏ ਪਿੰਡਾਂ ਵਿੱਚ ਪ੍ਰਦਰਸ਼ਨ ਦਾ ਯੋਜਨਾਬੱਧ ਸਵੈ-ਮੁਲਾਂਕਣ, ਸੇਵਾ ਦੀ ਗੁਣਵੱਤਾ ਅਤੇ ਨਿਰੰਤਰਤਾ ਨੂੰ ਯਕੀਨੀ ਬਣਾਇਆ ਜਾਵੇ।

ਉਨ੍ਹਾਂ ਜ਼ਿਲ੍ਹਾ ਕਲੈਕਟਰਾਂ ਨੂੰ ਵਿਆਪਕ ਗੋਦ ਲੈਣ ਲਈ ਚੰਗੀ ਤਰ੍ਹਾਂ ਦਸਤਾਵੇਜ਼ੀ ਤੌਰ 'ਤੇ ਤਿਆਰ ਕੀਤੇ ਗਏ ਵਧੀਆ ਅਭਿਆਸਾਂ ਨੂੰ ਸਾਂਝਾ ਕਰਨ ਲਈ ਵੀ ਉਤਸ਼ਾਹਿਤ ਕੀਤਾ।

ਐੱਨਜੇਜੇਐੱਮ ਦੀ ਡਿਪਟੀ ਸੈਕਟਰੀ, ਸ਼੍ਰੀਮਤੀ ਅੰਕਿਤਾ ਚੱਕਰਵਰਤੀ ਨੇ ਐੱਨਜੇਜੇਐੱਮ ਦੇ ਸੈਕਟਰੀ, ਵਧੀਕ ਸਕੱਤਰ ਅਤੇ ਮਿਸ਼ਨ ਡਾਇਰੈਕਟਰ, ਰਾਜਾਂ ਦੇ ਮਿਸ਼ਨ ਡਾਇਰੈਕਟਰਾਂ ਅਤੇ ਸਾਰੇ ਭਾਗੀਦਾਰ ਜ਼ਿਲ੍ਹਾ ਕਲੈਕਟਰਾਂ/ਜ਼ਿਲ੍ਹਾ ਮੈਜਿਸਟ੍ਰੇਟਾਂ ਦਾ 5ਵੇਂ ਜ਼ਿਲ੍ਹਾ ਕਲੈਕਟਰ ਪੇਅਜਲ ਸੰਵਾਦ ਵਿੱਚ ਸਵਾਗਤ ਕੀਤਾ। ਉਨ੍ਹਾਂ ਦੱਸਿਆ ਕਿ ਅੱਜ ਦੀ ਚਰਚਾ ਦਾ ਮੁੱਖ ਕੇਂਦਰ ਜਲ ਸੇਵਾਵਾਂ ਮੁਲਾਂਕਣ 'ਤੇ ਹੋਵੇਗਾ, ਜਿਸ ਦੀ ਸ਼ੁਰੂਆਤ ਮਾਣਯੋਗ ਜਲ ਸ਼ਕਤੀ ਮੰਤਰੀ ਦੁਆਰਾ 30 ਦਸੰਬਰ, 2025 ਨੂੰ ਕੀਤੀ ਗਈ ਸੀ।

ਡੀਡੀਡਬਲਿਊਐੱਸ ਦੁਆਰਾ ਜਲ ਸੇਵਾ ਮੁਲਾਂਕਣ 'ਤੇ ਪੇਸ਼ਕਾਰੀ

ਸੈਸ਼ਨ ਦੌਰਾਨ, ਐੱਨਜੇਜੇਐੱਮ ਦੀ ਡਿਪਟੀ ਸੈਕਟਰੀ, ਸ਼੍ਰੀਮਤੀ ਅੰਕਿਤਾ ਚੱਕਰਵਰਤੀ ਨੇ ਜਲ ਸੇਵਾਵਾਂ ਮੁਲਾਂਕਣ , ਜੋ ਕਿ ਜੇਜੇਐੱਮ ਦੇ ਤਹਿਤ ਇੱਕ ਗ੍ਰਾਮ ਪੰਚਾਇਤ-ਅਗਵਾਈ ਵਾਲਾ ਪ੍ਰਦਰਸ਼ਨ ਮੁਲਾਂਕਣ ਸਾਧਨ ਹੈ, ਬਾਰੇ ਇੱਕ ਵਿਸਤ੍ਰਿਤ ਪੇਸ਼ਕਾਰੀ ਦਿੱਤੀ । ਉਨ੍ਹਾਂ ਕਿਹਾ ਕਿ ਇਸ ਪਹਿਲਕਦਮੀ ਦਾ ਉਦੇਸ਼ ਪੰਚਾਇਤਾਂ ਨੂੰ ਤਿੰਨ ਮੁੱਖ ਮਾਪਦੰਡਾਂ 'ਤੇ ਪੀਣ ਵਾਲੇ ਪਾਣੀ ਦੀਆਂ ਪ੍ਰਣਾਲੀਆਂ ਦਾ ਮੁਲਾਂਕਣ ਕਰਨ ਦੇ ਯੋਗ ਬਣਾ ਕੇ ਸੇਵਾ ਪ੍ਰਦਾਨ ਕਰਨ ਨੂੰ ਮਜ਼ਬੂਤ ​​ਕਰਨਾ ਹੈ: ਸਪਲਾਈ ਦੀ ਨਿਯਮਿਤਤਾ, ਉਪਲਬਧਤਾ ਦੀ ਪੂਰਤੀ, ਅਤੇ ਪਾਣੀ ਦੀ ਗੁਣਵੱਤਾ।

ਸ਼੍ਰੀਮਤੀ ਅੰਕਿਤਾ ਚੱਕਰਵਰਤੀ ਨੇ ਜਲ ਸੇਵਾ ਮੁਲਾਂਕਣ ਦੀ ਪੜਾਅਵਾਰ ਪ੍ਰਕਿਰਿਆ ਬਾਰੇ ਦੱਸਿਆ ਅਤੇ ਭਾਗੀਦਾਰਾਂ ਨੂੰ ਪੰਚਾਇਤ ਸਕੱਤਰਾਂ ਲਈ ਮੁਲਾਂਕਣ ਨੂੰ ਪੂਰਾ ਕਰਨ ਲਈ ਈ-ਗ੍ਰਾਮ ਸਵਰਾਜ ਪੋਰਟਲ 'ਤੇ ਨੈਵੀਗੇਸ਼ਨ ਮਾਰਗ ਰਾਹੀਂ ਮਾਰਗਦਰਸ਼ਨ ਕੀਤਾ।

ਜਲ ਸੇਵਾਵਾਂ ਮੁਲਾਂਕਣ ਪ੍ਰਕਿਰਿਆ ਵਿੱਚ ਪੰਜ ਢਾਂਚਾਗਤ ਕਦਮ ਸ਼ਾਮਲ ਹਨ :

1. VWSC ਦੀ ਅਗਵਾਈ ਵਾਲੀ ਸੇਵਾ ਦੇ ਕੰਮਕਾਜ 'ਤੇ ਚਰਚਾ ।

2. ਪਾਰਦਰਸ਼ਿਤਾ ਅਤੇ ਸਮੂਹਿਕ ਮਾਲਕੀ ਲਈ ਗ੍ਰਾਮ ਸਭਾ ਦੀ ਪ੍ਰਵਾਨਗੀ ।

3. ਪੰਚਾਇਤ ਸਕੱਤਰਾਂ ਦੁਆਰਾ JJM IMIS ਪੰਚਾਇਤ ਡੈਸ਼ਬੋਰਡ 'ਤੇ ਡੇਟਾ ਐਂਟਰੀ ।

4. ਨਾਰੀ ਪੰਚਾਇਤ ਐਪ ਰਾਹੀਂ ਮੁਲਾਂਕਣ ਨਤੀਜਿਆਂ ਦੀ ਜਨਤਕ ਜਾਣਕਾਰੀ, ਜਿਸ ਵਿੱਚ 30 ਦਿਨਾਂ ਦੀ ਫੀਡਬੈਕ ਵਿੰਡੋ ਹੋਵੇਗੀ।

 5. ਯੋਜਨਾਬੰਦੀ ਅਤੇ ਸੁਧਾਰਾਤਮਕ ਕਾਰਵਾਈ ਲਈ ਜ਼ਿਲ੍ਹਾ ਅਤੇ ਰਾਜ ਪੱਧਰ 'ਤੇ ਸਮੇਕਿਤ ਰਿਪੋਰਟਿੰਗ ।

ਸ਼੍ਰੀਮਤੀ ਅੰਕਿਤਾ ਚੱਕਰਵਰਤੀ  ਨੇ ਦੱਸਿਆ ਕਿ ਜਲ ਸੇਵਾ ਮੁਲਾਂਕਣ ਦਾ ਮੌਜੂਦਾ ਚੱਕਰ ਉਨ੍ਹਾਂ ਗ੍ਰਾਮ ਪੰਚਾਇਤਾਂ 'ਤੇ ਲਾਗੂ ਹੁੰਦਾ ਹੈ ਜਿਨ੍ਹਾਂ ਨੂੰ 31 ਦਸੰਬਰ, 2020 ਨੂੰ ਜਾਂ ਇਸ ਤੋਂ ਪਹਿਲਾਂ ਹਰ ਘਰ ਜਲ ਐਲਾਨਿਆ ਗਿਆ ਸੀ, ਜਿਸ ਵਿੱਚ ਲਗਭਗ 1.17 ਲੱਖ ਪੰਚਾਇਤਾਂ ਸ਼ਾਮਲ ਹਨ। ਇਨ੍ਹਾਂ ਪੰਚਾਇਤਾਂ ਕੋਲ ਘੱਟੋ-ਘੱਟ ਇੱਕ ਸਾਲ ਦਾ ਕਾਰਜਸ਼ੀਲ ਤਜ਼ਰਬਾ ਹੈ, ਜੋ ਇੱਕ ਭਰੋਸੇਯੋਗ ਮੁਲਾਂਕਣ ਨੂੰ ਯਕੀਨੀ ਬਣਾਉਂਦਾ ਹੈ। ਯੋਗ ਪੰਚਾਇਤਾਂ ਦੀ ਸੂਚੀ JJM IMIS 'ਤੇ ਫਾਰਮ J8 ਵਿੱਚ ਉਪਲਬਧ ਹੈ ।

ਜਲ ਸੇਵਾਵਾਂ ਮੁਲਾਂਕਣ ਫ੍ਰੇਮਵਰਕ ਵਿੱਚ ਬੁਨਿਆਦੀ ਢਾਂਚਾ, ਸੇਵਾ-ਪੱਧਰ ਦੀਆਂ ਕਮੀਆਂ, ਸਰੋਤ ਸਥਿਰਤਾ, ਅਤੇ ਸੰਚਾਲਨ ਅਤੇ ਦੇਖਭਾਲ ਦੀ ਤਿਆਰੀ ਨਾਲ ਸਬੰਧਿਤ 23 ਮੁਲਾਂਕਣ ਪ੍ਰਸ਼ਨ ਸ਼ਾਮਲ ਹਨ । ਪਹਿਲਾ ਚੱਕਰ 26 ਜਨਵਰੀ, 2026 ਤੱਕ ਪੂਰਾ ਹੋਣਾ ਹੈ ।

ਸ਼੍ਰੀਮਤੀ ਅੰਕਿਤਾ ਚੱਕਰਵਰਤੀ ਨੇ ਅਧਿਕਾਰੀਆਂ ਨੂੰ ਪੰਚਾਇਤ ਸਕੱਤਰਾਂ ਲਈ ਟ੍ਰੇਨਿੰਗ, ਸਮੇਂ ਸਿਰ ਗ੍ਰਾਮ ਸਭਾ ਮੀਟਿੰਗਾਂ ਅਤੇ ਸਹੀ ਡੇਟਾ ਐਂਟਰੀ ਨੂੰ ਯਕੀਨੀ ਬਣਾਉਣ ਦੀ ਅਪੀਲ ਕੀਤੀ। ਜਲ ਸੇਵਾ ਮੁਲਾਂਕਣ ਸਬੂਤ-ਅਧਾਰਿਤ ਯੋਜਨਾਬੰਦੀ ਅਤੇ ਬਿਹਤਰ ਪੇਂਡੂ ਜਲ ਸੇਵਾ ਪ੍ਰਦਾਨ ਕਰਨ ਲਈ ਕਾਰਵਾਈਯੋਗ ਜਾਣਕਾਰੀ ਪ੍ਰਦਾਨ ਕਰਨਗੇ।

ਜ਼ਿਲ੍ਹਾ ਪੇਸ਼ਕਾਰੀਆਂ

ਹੇਠ ਲਿਖੇ ਜ਼ਿਲ੍ਹਿਆਂ ਨੇ ਆਪਣੀ ਪ੍ਰਗਤੀ ਅਤੇ ਖੇਤਰੀ ਅਭਿਆਸਾਂ ਨੂੰ ਪੇਸ਼ ਕੀਤਾ। ਹਰੇਕ ਪੇਸ਼ਕਾਰੀ ਸਬੰਧਿਤ ਜ਼ਿਲ੍ਹਾ ਕਲੈਕਟਰ/ ਡਿਪਟੀ ਕਮਿਸ਼ਨਰ/ਜ਼ਿਲ੍ਹਾ ਅਧਿਕਾਰੀਆਂ ਦੁਆਰਾ ਕੀਤੀ ਗਈ।

ਨਿਊਲੈਂਡ, ਨਾਗਾਲੈਂਡ : ਡਿਪਟੀ ਕਮਿਸ਼ਨਰ ਸ਼੍ਰੀਮਤੀ ਸਾਰਾ ਐੱਸ. ਜਮੀਰ ਨੇ ਦੱਸਿਆ ਕਿ ਜੇਜੇਐੱਮ ਤੋਂ ਪਹਿਲਾਂ, ਮਹਿਲਾਵਾਂ ਅਤੇ ਲ਼ੜਕੀਆਂ ਪਾਣੀ ਲਿਆਉਣ ਲਈ ਪਹਾੜੀ ਰਸਤਿਆਂ ਰਾਹੀਂ ਲੰਬੀ ਦੂਰੀ ਤੈਅ ਕਰਦੀਆਂ ਸਨ। WATSAN’s (ਜਲ ਅਤੇ ਸੈਨੀਟੇਸ਼ਨ ਕਮੇਟੀ) ਦੇ ਸਮਰਥਨ ਨਾਲ, ਭਾਈਚਾਰਕ ਭਾਗੀਦਾਰੀ ਨੇ ਪਾਈਪ ਰਾਹੀਂ ਪਾਣੀ ਦੀਆਂ ਯੋਜਨਾਵਾਂ ਦੇ ਕੁਸ਼ਲ ਸੰਚਾਲਨ ਅਤੇ ਰੱਖ-ਰਖਾਅ ਲਈ ਮਾਲਕੀ ਨੂੰ ਮਜ਼ਬੂਤ ​​ਕੀਤਾ। ਸਫਲਤਾ ਦੀਆਂ ਕਹਾਣੀਆਂ ਵਿੱਚ ਪਡਾਲਾ (ਯੇਹੋਖੁ) ਪਿੰਡ ਸ਼ਾਮਲ ਹਨ, ਜਿੱਥੇ ਨੌਜਵਾਨਾਂ ਅਤੇ ਮਹਿਲਾਵਾਂ ਨੇ ਸਰਗਰਮੀ ਨਾਲ ਹਿੱਸਾ ਲਿਆ, ਹੋਖੇਜ਼ੇ (Hokhezhe) ਪਿੰਡ, ਜਿੱਥੇ ਵਾਟਸਨ ਅਤੇ ਕੌਂਸਲ ਪ੍ਰਧਾਨ ਨੇ ਵਾਧੂ ਪਾਈਪਲਾਈਨ ਲਾਗਤ ਵਿੱਚ ਯੋਗਦਾਨ ਦਿੱਤਾ, ਅਤੇ ਇਜ਼ੇਵੀ ਪਿੰਡ, ਜਿੱਥੇ ਵਸਨੀਕ ਸੰਚਾਲਨ ਅਤੇ ਰੱਖ-ਰਖਾਅ ਲਈ ਪ੍ਰਤੀ ਮਹੀਨਾ  100 ਰੁਪਏ ਦਾ ਭੁਗਤਾਨ ਕਰਦੇ ਹਨ ।

ਪਲਵਲ , ਹਰਿਆਣਾ : ਜ਼ਿਲ੍ਹਾ ਕਲੈਕਟਰ ਡਾ. ਹਰੀਸ਼ ਕੁਮਾਰ ਵਸ਼ਿਸ਼ਟ ਨੇ ਵੱਡੀ ਮਾਤਰਾ ਵਿੱਚ ਪਾਣੀ ਦੀ ਸਪਲਾਈ ਲਈ ਰੇਨੀ ਵੈੱਲਜ਼ ਤਕਨਾਲੋਜੀ ਦੀ ਸ਼ੁਰੂਆਤ ਕੀਤੀ । ਇਸ ਤਕਨਾਲੋਜੀ ਨੇ ਫਲੋਰਾਈਡ ਪ੍ਰਦੂਸ਼ਣ ਦਾ ਮੁਕਾਬਲਾ ਕਰਨ ਵਿੱਚ ਮਦਦ ਕੀਤੀ ਅਤੇ ਗੁਣਵੱਤਾ ਵਾਲੇ ਪਾਣੀ ਦੀ ਸਪਲਾਈ ਨੂੰ ਯਕੀਨੀ ਬਣਾਇਆ। ਇਸ ਤਕਨਾਲੋਜੀ ਨੇ ਬਿਜਲੀ ਦੀ ਲਾਗਤ ਘਟਾ ਦਿੱਤੀ ਅਤੇ ਘੱਟ ਜ਼ਮੀਨ ਦੀ ਜ਼ਰੂਰਤ ਹੁੰਦੀ ਹੈ।

ਸਾਰੰਗਗੜ੍ਹ - ਬਿਲਾਈਗੜ੍ਹ , ਛੱਤੀਸਗੜ੍ਹ : ਕਲੈਕਟਰ ਅਤੇ ਜ਼ਿਲ੍ਹਾ ਮੈਜਿਸਟ੍ਰੇਟ ਡਾ. ਸੰਜੈ ਕਨੋਜੇ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸਖ਼ਤ IEC ਮੁਹਿੰਮਾਂ ਅਤੇ ਨਿਰੰਤਰ ਭਾਈਚਾਰਕ ਜਾਗਰੂਕਤਾ ਪਾਣੀ ਪ੍ਰਬੰਧਨ ਵਿੱਚ ਸਰਗਰਮ ਜਨਤਕ ਭਾਗੀਦਾਰੀ ਦੀ ਨੀਂਹ ਹਨ। ਉਨ੍ਹਾਂ ਨੇ 10 ਪਿੰਡਾਂ ਦੇ ਸਮੂਹਾਂ ਵਿੱਚ ਆਯੋਜਿਤ ਰਾਤ ਦੇ ਚੌਪਾਲ ਵਰਗੀਆਂ ਨਵੀਨਤਾਕਾਰੀ ਰਣਨੀਤੀਆਂ ਦਾ ਵਰਣਨ ਕੀਤਾ, ਜਿੱਥੇ ਭਾਈਚਾਰੇ ਦੇ ਮੈਂਬਰ ਫੀਡਬੈਕ ਸਾਂਝਾ ਕਰਦੇ ਹਨ ਅਤੇ ਸ਼ਿਕਾਇਤਾਂ ਦਾ ਤੁਰੰਤ ਹੱਲ ਕੀਤਾ ਜਾਂਦਾ ਹੈ। ਇਹ ਵਿਸ਼ਵਾਸ ਅਤੇ ਪਾਰਦਰਸ਼ਿਤਾ ਨੂੰ ਯਕੀਨੀ ਬਣਾਉਂਦਾ ਹੈ। ਸਿਖਲਾਈ ਪ੍ਰਾਪਤ ਜਲ ਵਾਹਿਨੀ ਮੈਂਬਰ ਨਿਯਮਿਤ ਤੌਰ 'ਤੇ ਫੀਲਡ ਟੈਸਟਿੰਗ ਕਿੱਟਾਂ (FTKs) ਦੀ ਵਰਤੋਂ ਕਰਕੇ ਪਾਣੀ ਦੀ ਗੁਣਵੱਤਾ ਦੀ ਜਾਂਚ ਕਰਕੇ ਅਤੇ ਪਿੰਡ-ਵਾਸੀਆਂ ਨੂੰ ਸੁਰੱਖਿਅਤ ਪਾਣੀ ਦੇ ਅਭਿਆਸਾਂ ਬਾਰੇ ਸਿੱਖਿਅਤ ਕਰਕੇ ਇੱਕ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਇਸ ਤੋਂ ਇਲਾਵਾ, ਜਲ ਸੰਘ ਵਾਹਿਨੀ ਨਾਮਕ ਸਵੈ-ਸਹਾਇਤਾ ਸਮੂਹ ਸ਼੍ਰਮਦਾਨ ਪਹਿਲਕਦਮੀਆਂ ਰਾਹੀਂ ਭੂਮੀ ਹੇਠਲੇ ਪਾਣੀ ਦੀ ਸੰਭਾਲ ਲਈ ਭਾਈਚਾਰਿਆਂ ਨੂੰ ਪ੍ਰੇਰਿਤ ਕਰਦੇ ਹਨ। ਇਹ ਸਮੂਹ, SBM-G ਅਤੇ MNREGA ਦੇ ਸਹਿਯੋਗ ਨਾਲ , ਮੈਜਿਕ ਪਿਟ ਅਤੇ ਸੋਕ ਪਿਟ ਦੇ ਨਿਰਮਾਣ ਦੀ ਅਗਵਾਈ ਕਰਦੇ ਹਨ।

ਮਹਿਬੂਬਨਗਰ, ਤੇਲੰਗਾਨਾ : ਕਲੈਕਟਰ ਅਤੇ ਜ਼ਿਲ੍ਹਾ ਮੈਜਿਸਟ੍ਰੇਟ, ਸ਼੍ਰੀਮਤੀ ਵਿਜੇਂਦਰ ਬੋਈ ਨੇ ਜ਼ਿਲ੍ਹੇ ਦੀ ਸੰਖੇਪ ਜਾਣਕਾਰੀ ਦਿੱਤੀ ਅਤੇ ਮਿਸ਼ਨ ਭਾਗੀਰਥ ਤਹਿਤ 24x7 ਗੁਣਵੱਤਾ ਵਾਲੀ ਪਾਣੀ ਦੀ ਸਪਲਾਈ ਨੂੰ ਯਕੀਨੀ ਬਣਾਉਣ ਲਈ ਕੀਤੀ ਗਈ ਪ੍ਰਗਤੀ ਸਾਂਝੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਵਾਟਰ ਟ੍ਰੀਟਮੈਂਟ ਪਲਾਂਟਾਂ (WTPs) 'ਤੇ ਟ੍ਰੀਟਮੈਂਟ ਲਈ ਬੈਕਵਾਟਰ ਪੰਪਿੰਗ ਜਾਂ ਗ੍ਰੈਵਿਟੀ ਦੁਆਰਾ ਖਿੱਚਿਆ ਜਾਂਦਾ ਹੈ। ਤੀਜੀ-ਧਿਰ ਨਿਰੀਖਣ ਏਜੰਸੀਆਂ (TPIAs) ਯੋਜਨਾਵਾਂ ਦੇ ਚਾਲੂ ਹੋਣ ਦਾ ਨਿਰੀਖਣ ਕਰਦੀਆਂ ਹਨ, ਜਦਕਿ ਗ੍ਰਾਮ ਪੰਚਾਇਤਾਂ ਨਵੇਂ ਬਣੇ ਘਰਾਂ ਲਈ ਟੈਪ ਕਨੈਕਸ਼ਨ ਯਕੀਨੀ ਬਣਾਉਂਦੀਆਂ ਹਨ। ਪਾਣੀ ਦੀ ਸਪਲਾਈ ਦੀ ਨਿਗਰਾਨੀ ਪਿੰਡ ਵਾਸੀਆਂ ਦੁਆਰਾ ਖੁਦ ਕੀਤੀ ਜਾਂਦੀ ਹੈ, ਜੋ ਕਿ ਭਾਈਚਾਰਕ ਮਾਲਕੀ ਨੂੰ ਉਤਸ਼ਾਹਿਤ ਕਰਦੀ ਹੈ। ਜ਼ਿਲ੍ਹੇ ਨੇ ਪ੍ਰਦਰਸ਼ਨ ਨੂੰ ਦਰਸਾਉਣ ਲਈ ਰੰਗ-ਕੋਡਿਡ ਪ੍ਰਣਾਲੀ—ਹਰਾ, ਪੀਲਾ ਅਤੇ ਲਾਲ—ਦੀ ਵਰਤੋਂ ਕਰਦੇ ਹੋਏ, ਪ੍ਰਤੀ ਵਿਅਕਤੀ ਪ੍ਰਤੀ ਦਿਨ 100 ਲੀਟਰ ਪਾਣੀ (LPCD) ਪ੍ਰਦਾਨ ਕਰਨ ਲਈ ਡਿਜੀਟਲ ਨਿਗਰਾਨੀ ਅਪਣਾਈ ਹੈ। ਖਾਸ ਤੌਰ 'ਤੇ, ਜ਼ਿਲ੍ਹੇ ਦੇ 90% ਪਿੰਡ ਗ੍ਰੀਨ ਜ਼ੋਨ ਵਿੱਚ ਆਉਂਦੇ ਹਨ, ਜੋ ਮਜ਼ਬੂਤ ​​ਲਾਗੂਕਰਨ ਅਤੇ ਭਾਈਚਾਰਕ ਭਾਗੀਦਾਰੀ ਦਾ ਪ੍ਰਦਰਸ਼ਨ ਕਰਦੇ ਹਨ।

ਇਹ ਪੇਸ਼ਕਾਰੀਆਂ, ਪ੍ਰਾਪਤੀਆਂ ਅਤੇ ਮੌਜੂਦਾ ਚੁਣੌਤੀਆਂ ਨੂੰ ਦਰਸਾਉਂਦੀਆਂ ਹਨ, ਹਰ ਘਰ ਜਲ ਦੇ ਤਹਿਤ ਵਿਕਾਸ ਨੂੰ ਤੇਜ਼ ਕਰਨ ਲਈ ਅਪਣਾਏ ਗਏ ਵੱਖ-ਵੱਖ ਤਰੀਕਿਆਂ ਨੂੰ ਉਜਾਗਰ ਕਰਦੀਆਂ ਹਨ।

ਆਪਣੇ ਸਮਾਪਤੀ ਭਾਸ਼ਣ ਵਿੱਚ, ਸ਼੍ਰੀ ਕੇ.ਕੇ. ਸੋਨ , ਏਐੱਸ ਐਂਡ ਐੱਮਡੀ , ਐੱਨਜੇਜੇਐੱਮ ਨੇ ਕਿਹਾ ਕਿ ਵਿਭਾਗ ਹਰੇਕ ਜ਼ਿਲ੍ਹਾ ਕਲੈਕਟਰ ਦੇ ਪੀਣ ਵਾਲੇ ਪਾਣੀ ਸੰਵਾਦ ਦੌਰਾਨ ਸਾਂਝੇ ਕੀਤੇ ਗਏ ਯਤਨਾਂ ਅਤੇ ਪੇਸ਼ਕਾਰੀਆਂ ਨੂੰ ਇੱਕ ਮਾਸਿਕ ਨਿਊਜ਼ਲੈਟਰ, ਜਲ ਜੀਵਨ ਸੰਵਾਦ ਵਿੱਚ ਦਰਜ ਕਰ ਰਿਹਾ ਹੈ, ਤਾਂ ਜੋ ਜ਼ਿਲ੍ਹੇ ਇੱਕ-ਦੂਜੇ ਦੇ ਤਜ਼ਰਬਿਆਂ ਤੋਂ ਸਿੱਖ ਸਕਣ। ਉਨ੍ਹਾਂ ਨੇ ਪੀਣ ਵਾਲੇ ਪਾਣੀ ਦੀ ਸੇਵਾ ਪ੍ਰਦਾਨ ਕਰਨ ਨੂੰ ਮਜ਼ਬੂਤ ​​ਕਰਨ ਵਿੱਚ ਜ਼ਿਲ੍ਹਿਆਂ ਦੁਆਰਾ ਦਿਖਾਈ ਗਈ ਮਜ਼ਬੂਤ ​​ਲੀਡਰਸ਼ਿਪ ਅਤੇ ਨਵੀਨਤਾਕਾਰੀ ਪਹੁੰਚ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਇਨ੍ਹਾਂ ਸਭ ਤੋਂ ਵਧੀਆ ਅਭਿਆਸਾਂ ਨੂੰ ਸਾਰੇ ਰਾਜਾਂ ਅਤੇ ਜ਼ਿਲ੍ਹਿਆਂ ਦੇ ਲਾਭ ਲਈ ਵਿਆਪਕ ਤੌਰ 'ਤੇ ਸਾਂਝਾ ਕੀਤਾ ਜਾਵੇਗਾ।

ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਜਲ ਜੀਵਨ ਮਿਸ਼ਨ ਹੁਣ ਬੁਨਿਆਦੀ ਢਾਂਚੇ ਦੀ ਸਿਰਜਣਾ ਤੋਂ ਸੇਵਾ ਪ੍ਰਦਾਨ ਕਰਨ ਵੱਲ ਇੱਕ ਸਪਸ਼ਟ ਤਬਦੀਲੀ ਦਰਸਾਉਂਦਾ ਹੈ, ਜਿਸ ਨੂੰ ਲਾਗੂ ਕਰਨ ਵਿੱਚ ਜ਼ਿਲ੍ਹਾ ਕਲੈਕਟਰ ਮੁੱਖ ਭੂਮਿਕਾ ਨਿਭਾਉਂਦੇ ਹਨ। ਜਲ ਸੇਵਾ ਆਂਕਲਣ ਦੀ ਮਹੱਤਤਾ 'ਤੇ ਜ਼ੋਰ ਦਿੰਦੇ ਹੋਏ, ਉਨ੍ਹਾਂ ਦੱਸਿਆ ਕਿ ਇਹ ਭਾਈਚਾਰਕ-ਅਗਵਾਈ ਵਾਲੀ ਸਵੈ-ਮੁਲਾਂਕਣ ਵਿਧੀ ਕਾਰਜਸ਼ੀਲਤਾ ਬਾਰੇ ਅਸਲ-ਸਮੇਂ ਦੀ ਜ਼ਮੀਨੀ-ਪੱਧਰੀ ਜਾਣਕਾਰੀ ਪ੍ਰਦਾਨ ਕਰੇਗੀ ਅਤੇ ਸਮੇਂ ਸਿਰ ਸੁਧਾਰਾਤਮਕ ਕਾਰਵਾਈ ਕਰਨ ਵਿੱਚ ਮਦਦ ਕਰੇਗੀ। ਉਨ੍ਹਾਂ ਨੇ ਸਾਰੇ ਜ਼ਿਲ੍ਹਿਆਂ ਨੂੰ ਜਨਵਰੀ ਤੱਕ ਜਲ ਸੇਵਾ ਮੁਲਾਂਕਣ ਪ੍ਰਕਿਰਿਆ ਨੂੰ ਪੂਰਾ ਕਰਨ, ਪੰਚਾਇਤ ਅਧਿਕਾਰੀਆਂ ਦੀ ਸਹੀ ਸਿਖਲਾਈ ਨੂੰ ਯਕੀਨੀ ਬਣਾਉਣ ਅਤੇ ਸਹੀ ਡੇਟਾ ਐਂਟਰੀ ਅਤੇ ਫੈਸਲੇ ਲੈਣ ਲਈ ਡੈਸ਼ਬੋਰਡਾਂ ਦੀ ਪ੍ਰਭਾਵਸ਼ਾਲੀ ਢੰਗ ਨਾਲ ਵਰਤੋਂ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਦੁਹਰਾਇਆ ਕਿ ਹਰ ਘਰ ਜਲ ਦੀਆਂ ਪ੍ਰਾਪਤੀਆਂ ਨੂੰ ਕਾਇਮ ਰੱਖਣ ਅਤੇ ਲੰਬੇ ਸਮੇਂ ਦੀ ਸੇਵਾ ਪ੍ਰਦਾਨ ਕਰਨ ਲਈ ਗ੍ਰਾਮ ਪੰਚਾਇਤਾਂ ਨੂੰ ਸਸ਼ਕਤ ਬਣਾਉਣ ਲਈ ਜ਼ਿਲ੍ਹਾ ਕਲੈਕਟਰਾਂ ਦੀ ਅਗਵਾਈ ਬਹੁਤ ਮਹੱਤਵਪੂਰਨ ਹੈ।

ਇਹ ਸੈਸ਼ਨ ਐੱਨਜੇਜੇਐੱਮ ਦੇ ਡਾਇਰੈਕਟਰ, ਸ਼੍ਰੀ ਯੋਗੇਂਦਰ ਕੁਮਾਰ ਸਿੰਘ ਦੇ ਧੰਨਵਾਦ ਪ੍ਰਸਤਾਵ ਨਾਲ ਸਮਾਪਤ ਹੋਇਆ। ਉਨ੍ਹਾਂ ਨੇ ਜ਼ਿਲ੍ਹਾ ਅਧਿਕਾਰੀਆਂ ਦੀ ਸਰਗਰਮ ਭਾਗੀਦਾਰੀ ਦਾ ਸਵਾਗਤ ਕੀਤਾ ਅਤੇ ਹਰ ਪੇਂਡੂ ਘਰ ਵਿੱਚ ਸੁਰੱਖਿਅਤ ਅਤੇ ਸਾਫ਼ ਪੀਣ ਵਾਲੇ ਪਾਣੀ ਨੂੰ ਯਕੀਨੀ ਬਣਾਉਣ ਵਿੱਚ ਰਾਜਾਂ ਦਾ ਸਮਰਥਨ ਕਰਨ ਲਈ ਡੀਡੀਡਬਲਿਊਐੱਸ ਦੀ ਵਚਨਬੱਧਤਾ ਨੂੰ ਦੁਹਰਾਇਆ।

ਜ਼ਿਲ੍ਹਾ ਕਲੈਕਟਰਾਂ ਦੇ ਪੀਣ ਵਾਲੇ ਪਾਣੀ ਬਾਰੇ ਗੱਲਬਾਤ ਦੇ 5ਵੇਂ ਐਡੀਸ਼ਨ ਵਿੱਚ ਦੇਸ਼ ਭਰ ਤੋਂ 1,500 ਤੋਂ ਵੱਧ ਭਾਗੀਦਾਰਾਂ ਨੇ ਹਿੱਸਾ ਲਿਆ। ਇਨ੍ਹਾਂ ਵਿੱਚ ਰਾਜਾਂ/ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੇ ਜ਼ਿਲ੍ਹਾ ਕਲੈਕਟਰ/ਡਿਪਟੀ ਕਮਿਸ਼ਨਰ/ਜ਼ਿਲ੍ਹਾ ਅਧਿਕਾਰੀ, ਮਿਸ਼ਨ ਡਾਇਰੈਕਟਰ ਅਤੇ ਰਾਜ ਮਿਸ਼ਨ ਟੀਮਾਂ ਸ਼ਾਮਲ ਸਨ।

***************

ਪੀਕੇ / ਕੇਸੀ / ਪੀਕੇ/ਐੱਸਐੱਸ/ ਏਕੇ