مرکزی وزیر داخلہ اور تعاون جناب امت شاہ نے آج گجرات میں منسا میونسپلٹی کے مختلف ترقیاتی پروجیکٹوں کا افتتاح اور سنگ بنیاد رکھا۔ اس موقع پر مہسانہ پارلیمانی حلقہ سے  رکن پارلیمنٹ جناب  ہری بھائی پٹیل سمیت کئی معززین موجود تھے۔

مرکزی وزیر داخلہ اور تعاون نے اپنے خطاب میں کہا کہ وزیر اعظم جناب نریندر مودی کی قیادت میں گجرات سمیت پورے ملک میں ترقی اور جدید انفراسٹرکچر کی تعمیر کا ایک نیا دور شروع ہوا ہے۔ انہوں نے کہا کہ منسا کا خطہ انتہائی اہم اسٹریٹجک  مقام پر واقع ہے اور اس کی مجموعی ترقی کے لیے مسلسل کوششیں جاری ہیں۔ انہوں نے مزید کہا کہ گجرات حکومت نے منسا کے علاقے میں ایک بیراج پر کام شروع کر دیا ہے۔ اس کے علاوہ، رام پور-منسا کے علاقے میں دوسرا بیراج اور گاندھی نگر کے قریب تیسرا بیراج بنانے کا انتظام کیا گیا ہے تاکہ پانی کے جدید انتظام کے تحت عوام کو نقصان دہ فلورائیڈ آلودہ پانی سے نجات دلائی جا سکے اور آنے والی نسلیں بھی اس سے مستفید ہو سکیں۔

جناب امت شاہ نے کہا کہ منسا علاقہ میں ایک نیا سول اسپتال بنایا جائے گا۔ 2030 تک جدید ترین سہولیات سے آراستہ یہ 11 منزلہ اسپتال مکمل ہونے کے بعد کسی کو بھی علاج کے لیے منسا سے باہر جانے کی ضرورت نہیں پڑے گی۔ انہوں نے کہا کہ نیا سول ہسپتال بننے کے بعد ایس ڈی آرٹس اور بی آر کامرس  بی کیمپس کے اندر ایک میڈیکل کالج بھی شروع کیا جائے گا۔ جناب شاہ نے مزید کہا کہ منسا اور پلوائی کے درمیان ایک شاہراہ 110 کروڑ روپے کی لاگت سے تعمیر کی جائے گی، اور بلوا سے گوچریا تک ایک سڑک 100 کروڑ روپے کی لاگت سے بنائی جائے گی۔

جناب امت شاہ نے کہا کہ 11 تاریخ سے وزیر اعظم مودی نے ‘سومناتھ سوابھیمان پرو’ کا پورا سال شروع کیا ہے۔ ایک ہزار سال قبل شاندار سومناتھ مندر کو غزنی کے محمود نے مسمار کر دیا تھا اور اس کے بعد علاؤالدین خلجی، احمد شاہ، محمد بیگدہ، اورنگزیب اور دیگر لوگ اس مندر کو بار بار تباہ کرتے رہے، جب کہ ہمارے آباؤ اجداد اسے دوبارہ تعمیر کرتے رہے۔ تباہ کرنے والے تباہی پر یقین رکھتے تھے۔ تعمیر کرنے والے تخلیق پر یقین رکھتے تھے۔ ایک ہزار سال گزرنے کے بعد، تباہ کرنے والے کہیں غائب ہو گئے ہیں، لیکن سومناتھ مندر اب بھی سمندر کے کنارے کھڑا ہے۔

اس سومناتھ مندر کو سردار پٹیل، کے ایم منشی، جام صاحب اور ہمارے پہلے صدر ڈاکٹر راجندر پرساد جیسے عظیم لیڈروں نے عزم کے ساتھ دوبارہ تعمیر کیا تھا۔ اس عزم کے پیچھے مطلب یہ تھا کہ سومناتھ پر حملہ صرف مندر پر حملہ نہیں تھا، بلکہ ہمارے عقیدے، ہمارے مذہب اور ہماری عزت نفس پر حملہ تھا۔ اس کا جواب انتقامی کارروائی سے نہیں بلکہ عزت نفس کے تحفظ کے ذریعے ہو سکتا ہے۔ اور آج، ایک ہزاربرسوں  میں 16 بار تباہ ہونے کے بعد بھی سومناتھ مندر اپنے بلند و بالا زعفرانی پرچم کے ساتھ وہیں کھڑا ہے، اور وزیر اعظم مودی کی قیادت میں، وہاں ایک عظیم الشان سومناتھ کوریڈور بنایا جا رہا ہے۔

اس سے پوری دنیا کو یہ پیغام  جاتا ہے کہ سناتن دھرم، ہندوستانی ثقافت اور ہندوستان کے لوگوں کے عقیدے کو مٹانا اتنا آسان نہیں ہے - وہ سورج اور چاند کی طرح ابدی اور ناقابل فنا ہیں۔ سومناتھ مندر ہندوستان کے آستھا، یقین اور فخر کی علامت ہے۔ ہم آنے والے پورے سال کو‘سومناتھ سوابھیمان پرو’ کے طور پر منانے جا رہے ہیں، جس میں ہندوستان کی روح کو ہلانے، شعور بیدار کرنے اور سناتن دھرم کی جڑیں زمین میں گہرائی تک لے جانے کے لیے بہت سے پروگرام ہوں گے۔ یہ ‘سومناتھ سوابھیمان’ سال ہم سب کے لیے اہم ہے۔

مرکزی وزیر داخلہ اور تعاون نے جدید انفراسٹرکچر سے آراستہ اسپورٹس کمپلیکس کی تعمیر کے لیے گجرات حکومت کا شکریہ ادا کیا اور متعلقہ کلکٹر کو ہدایت دی کہ وہ اس بہترین جم کو نہ صرف کھلاڑیوں بلکہ منسا کے شہریوں کے لیے بھی کھولیں۔ انہوں نے کہا کہ وزیر اعظم مودی کی قیادت میں گجرات سمیت ملک بھر میں کھیلوں اور اسپورٹس کمپلیکس کے لیے متحرک ماحول بنایا گیا ہے۔ احمد آباد کو ایک کھیلوں کے شہر کے طور پر تیار کیا جا رہا ہے جو نہ صرف ہندوستان بلکہ پوری دنیا میں اپنی ایک الگ شناخت قائم کر رہا ہے۔

جناب امت شاہ نے کہا کہ 2030 میں منعقد ہونے والے دولت مشترکہ کھیلوں کے لیے 117 ممالک کے کھلاڑی احمد آباد آئیں گے۔اس کے علاوہ سن  دو ہزار انتیس  میں عالمی پولیس اور فائر سروس گیمز بھی احمد آباد میں منعقد ہوں گے۔انہوں نے کہا کہ 2036 کے اولمپک کھیلوں کی میزبانی احمد آباد میں کرانے کی کوششیں بھی کی جا رہی ہیں۔ وزیر داخلہ نے منسا کے علاقے کی ضلع انتظامیہ اور عوامی نمائندوں سے کہا کہ وہ اس بات کو یقینی بنائیں کہ قریبی اسکولوں اور کالجوں کے کھلاڑی ان کھیلوں کی سہولیات کو استعمال کرکے نہ صرف اپنے جسم، دماغ اور خود اعتمادی کو مضبوط کریں بلکہ گجرات، ملک اور دنیا میں اپنا نام روشن کریں۔

وزیر داخلہ نے کہا کہ احمد آباد کے جدید فائر اسٹیشن کی طرز پر اب منسا میں بھی ایک نیا فائر اسٹیشن مکمل ہو گیا ہے۔ اس کے علاوہ گجرات حکومت نے منسا کو ایک نیا سرکٹ ہاؤس اور ایک پولیس اسٹیشن بھی تحفے میں دیا ہے۔ انہوں نے کہا کہ گزشتہ چار برسوں میں 13 تالابوں کو آپس میں جوڑ کر ایک ایسا نظام بنایا گیا ہے جو سال بھر پانی کی دستیابی کو یقینی بنائے گا۔ چندرسر جھیل کی ترقی کی تعریف کرتے ہوئے جناب شاہ نے کہا کہ اس طرح کے انتظامات کو برقرار رکھنے کے لیے عوام کی شرکت بہت ضروری ہے۔ انہوں نے مزید کہا کہ ہمیں اپنے گاؤں اور قصبوں کو صاف ستھرا رکھنے کا عہد کرنا چاہیے اور اس کے لیے ہمارے نوجوانوں کو آگے آنا چاہیے۔

مرکزی وزیر داخلہ اور تعاون نے کہا کہ ہندوستان کے لوگوں نے یہ عہد کیا ہے کہ جب 2047 میں ملک کی آزادی کی صد سالہ منائی جائے گی تو ہندوستان دنیا بھر میں ہر میدان میں پہلے نمبر پر آئے گا۔ جناب شاہ نے کہا کہ انہیں یقین ہے کہ آنے والا دور ہندوستان کے نوجوانوں کا ہے۔ اپنے عزم، ذہانت اور حوصلے کے ساتھ ہندوستان کے نوجوانوں کو ملک کو دنیا میں اعلیٰ مقام پر لے جانا چاہیے اور پورے ملک کے ساتھ منسا کو بھی اس کوشش میں اپنا حصہ ڈالنا چاہیے۔

*****

ش ح – ظ  ا- ن  م

UR No. 555