ಸಾರ್ವಜನಿಕರ ಮುಂದೆ ಸತ್ಯಾಂಶಗಳನ್ನು ರಾಜಕೀಯ ಬಣ್ಣವಿಲ್ಲದೆ ಸ್ಪಷ್ಟವಾಗಿ ಇರಿಸುವುದು ಜವಾಬ್ದಾರಿಯುತ ಸರ್ಕಾರದ ಕರ್ತವ್ಯವಾಗಿದೆ, ವಿಶೇಷವಾಗಿ ನೀತಿಗಳು ಹಳ್ಳಿಗಳು, ಜೀವನೋಪಾಯಗಳು ಮತ್ತು ದೀರ್ಘಕಾಲೀನ ರಾಷ್ಟ್ರೀಯ ಫಲಿತಾಂಶಗಳ ಮೇಲೆ ನೇರ ಪ್ರಭಾವ ಬೀರಿದಾಗ ಇದು ಅತ್ಯಗತ್ಯ. ಈ ಉದ್ದೇಶದೊಂದಿಗೆ, ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ, ಭೂ ವಿಜ್ಞಾನ (ಸ್ವತಂತ್ರ ಉಸ್ತುವಾರಿ) ಹಾಗೂ ಪ್ರಧಾನಿಯವರ ಕಾರ್ಯಾಲಯ, ಸಿಬ್ಬಂದಿ, ಸಾರ್ವಜನಿಕ ಕುಂದುಕೊರತೆಗಳು, ಪಿಂಚಣಿ, ಪರಮಾಣು ಇಂಧನ ಮತ್ತು ಬಾಹ್ಯಾಕಾಶ ಖಾತೆಯ ರಾಜ್ಯ ಸಚಿವರಾದ ಡಾ. ಜಿತೇಂದ್ರ ಸಿಂಗ್ ಅವರು, ಜನಪ್ರಿಯವಾಗಿ ಜಿ-ರಾಮ್-ಜಿ ಎಂದು ಕರೆಯಲ್ಪಡುವ 'ವಿಕಸಿತ ಭಾರತ್ ಗ್ಯಾರಂಟಿ ಫಾರ್ ಎಂಪ್ಲಾಯ್ಮೆಂಟ್ ಅಂಡ್ ಲೈವ್ಲಿಹುಡ್ ಮಿಷನ್ (ಗ್ರಾಮೀಣ್)' ಕುರಿತು ಮಾಧ್ಯಮಗಳನ್ನು ಉದ್ದೇಶಿಸಿ ಮಾತನಾಡಿದರು. ಈ ಉಪಕ್ರಮವು ಕೇವಲ ಕಲ್ಪನೆ ಅಥವಾ ಅನುಮಾನಗಳ ಮೇಲೆ ನಿಂತಿಲ್ಲ, ಬದಲಿಗೆ ಪುರಾವೆ, ಅನುಭವ ಮತ್ತು ವಾಸ್ತವದ ನೆಲೆಗಟ್ಟಿನಲ್ಲಿ ರೂಪಿತವಾಗಿದೆ ಎಂದು ಅವರು ಒತ್ತಿಹೇಳಿದರು.

ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಡಾ. ಜಿತೇಂದ್ರ ಸಿಂಗ್ ಅವರು, ಹಿಂದಿನ ಸಾರ್ವಜನಿಕ ಉದ್ಯೋಗ ಕಾರ್ಯಕ್ರಮಗಳಿಂದ ಪಾಠಗಳನ್ನು ಕಲಿತು, ಜಿ-ರಾಮ್-ಜಿ ಅನ್ನು ಡಿಜಿಟಲ್ ಆಡಳಿತದ, ವಿಸ್ತೃತ ಮತ್ತು ಫಲಿತಾಂಶ-ಆಧಾರಿತ ಚೌಕಟ್ಟನ್ನಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಹೇಳಿದರು. ಪಾರದರ್ಶಕತೆ, ಹೊಣೆಗಾರಿಕೆ ಮತ್ತು ಆಸ್ತಿ ಸೃಜನೆಯನ್ನು ಸುಧಾರಿಸುವುದರ ಮೇಲೆ ಗಮನ ಹರಿಸಲಾಗಿದ್ದು, ಉದ್ಯೋಗ ಸೃಷ್ಟಿಯು ಅರ್ಥಪೂರ್ಣವಾಗಿ, ವಿಸ್ತರಿಸಬಹುದಾದ ರೀತಿಯಲ್ಲಿ ಮತ್ತು ಗ್ರಾಮೀಣ ಸಮುದಾಯಗಳಿಗೆ ನೇರವಾಗಿ ಪ್ರಯೋಜನಕಾರಿಯಾಗುವಂತೆ ನೋಡಿಕೊಳ್ಳಲಾಗುವುದು ಎಂದು ಅವರು ತಿಳಿಸಿದರು. ಕಾಮಗಾರಿಗಳು ಮತ್ತು ಹಣದ ಬಳಕೆಯ ಮೇಲೆ ನೈಜ ಸಮಯದ ಮೇಲ್ವಿಚಾರಣೆಯನ್ನು ಖಚಿತಪಡಿಸಿಕೊಳ್ಳಲು ಜಿಪಿಎಸ್-ಆಧಾರಿತ ಮೇಲ್ವಿಚಾರಣೆ ಮತ್ತು ಎಐ-ಚಾಲಿತ ಮಾದರಿಗಳಂತಹ ಆಧುನಿಕ ತಂತ್ರಜ್ಞಾನವನ್ನು ಈ ಮಿಷನ್ ಒಳಗೊಂಡಿದೆ ಎಂದು ಅವರು ಹೇಳಿದರು.

ಜಿ-ರಾಮ್-ಜಿ ಯ ಪ್ರಮುಖ ಸಾಮರ್ಥ್ಯಗಳಲ್ಲಿ ಒಂದಾದ ಸಮನ್ವಯ ವಿಧಾನದ ಬಗ್ಗೆ ವಿವರಿಸಿದ ಸಚಿವರು, ಈ ಹಿಂದೆ ಪ್ರತ್ಯೇಕವಾಗಿ ಜಾರಿಗೊಳಿಸಲಾಗುತ್ತಿದ್ದ ವಿವಿಧ ಸಾರ್ವಜನಿಕ ಕಾಮಗಾರಿಗಳನ್ನು ಇದು ಒಂದೆಡೆ ತರುತ್ತದೆ ಎಂದು ಹೇಳಿದರು. ಯೋಜನೆ, ಅನುಷ್ಠಾನ ಮತ್ತು ಫಲಿತಾಂಶಗಳನ್ನು ಸಮನ್ವಯಗೊಳಿಸುವ ಮೂಲಕ, ಕಾಮಗಾರಿಗಳ ಪುನರಾವರ್ತನೆ, ಹಣದ ದುರುಪಯೋಗ ಮತ್ತು ಅಲ್ಪಕಾಲಿಕ ಆಸ್ತಿಗಳ ಸೃಷ್ಟಿಯನ್ನು ತಡೆಗಟ್ಟುವುದು ಈ ಮಿಷನ್‌ ನ ಉದ್ದೇಶವಾಗಿದೆ; ಅದೇ ಸಮಯದಲ್ಲಿ ಜಲ ಭದ್ರತೆ, ಗ್ರಾಮೀಣ ಮೂಲಸೌಕರ್ಯ ಮತ್ತು ಕೃಷಿ ಕಾರ್ಮಿಕರ ಲಭ್ಯತೆಯಂತಹ ದೀರ್ಘಕಾಲೀನ ಅಗತ್ಯಗಳಿಗೆ ಇದು ಆದ್ಯತೆ ನೀಡುತ್ತದೆ. ಪ್ರತಿಯೊಂದು ಯೋಜನೆಯು ಸ್ಪಷ್ಟವಾಗಿ ವ್ಯಾಖ್ಯಾನಿಸಲಾದ ಫಲಿತಾಂಶಗಳೊಂದಿಗೆ ಸಂಯೋಜಿಸಲ್ಪಟ್ಟಿದ್ದು, ಸಾರ್ವಜನಿಕ ವೆಚ್ಚವು ಬಾಳಿಕೆ ಬರುವ ಸಮುದಾಯ ಆಸ್ತಿಗಳ ಸೃಷ್ಟಿಗೆ ಕಾರಣವಾಗುತ್ತದೆ ಎಂದು ಅವರು ಹೇಳಿದರು.

ಪ್ರಮುಖ ರಚನಾತ್ಮಕ ಸುಧಾರಣೆಗಳನ್ನು ಎತ್ತಿ ತೋರಿಸಿದ ಡಾ. ಜಿತೇಂದ್ರ ಸಿಂಗ್ ಅವರು, ಜೀವನೋಪಾಯದ ಭದ್ರತೆಯನ್ನು ಬಲಪಡಿಸುವ ಸರ್ಕಾರದ ಬದ್ಧತೆಯನ್ನು ಪ್ರತಿಬಿಂಬಿಸಲು ಖಾತರಿಪಡಿಸಿದ ವೇತನ ಉದ್ಯೋಗದ ದಿನಗಳನ್ನು 100 ರಿಂದ 125 ದಿನಗಳಿಗೆ ಹೆಚ್ಚಿಸಲಾಗಿದೆ ಎಂದು ಹೇಳಿದರು. ಅಸ್ತಿತ್ವದಲ್ಲಿಲ್ಲದ ಫಲಾನುಭವಿಗಳು ಮತ್ತು ನಕಲಿ ಉದ್ಯೋಗ ಕಾರ್ಡ್‌ ಗಳ ಬಗ್ಗೆ ದೀರ್ಘಕಾಲದಿಂದ ಇರುವ ಕಳವಳಗಳನ್ನು ಹೋಗಲಾಡಿಸಲು, ಇಡೀ ವ್ಯವಸ್ಥೆಯನ್ನು ದೃಢವಾದ ಪರಿಶೀಲನೆ ಮತ್ತು ನಿಯಂತ್ರಣಗಳೊಂದಿಗೆ ಡಿಜಿಟಲೀಕರಣಗೊಳಿಸಲಾಗಿದೆ. ಇದು ಪ್ರಯೋಜನಗಳು ನಿಜವಾದ ಕಾರ್ಮಿಕರನ್ನು ತಲುಪುವುದನ್ನು ಖಚಿತಪಡಿಸುತ್ತದೆ ಮತ್ತು ಸೋರಿಕೆಗಳನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುತ್ತದೆ ಎಂದು ಅವರು ಹೇಳಿದರು.

ಹಣಕಾಸಿನ ಶಿಸ್ತಿನ ಕುರಿತು ಮಾತನಾಡಿದ ಸಚಿವರು, ಜಿ-ರಾಮ್-ಜಿ ಉಪಕ್ರಮವು ಮಿತಿಯಿಲ್ಲದ, ಬೇಡಿಕೆ-ಆಧಾರಿತ ಹಂಚಿಕೆಯಿಂದ ದೂರ ಸರಿದು, ವಸ್ತುನಿಷ್ಠ ನಿಯತಾಂಕಗಳ ಆಧಾರದ ಮೇಲೆ ರಾಜ್ಯವಾರು ಪ್ರಮಾಣಿತ ಹಂಚಿಕೆಯ ಮಾದರಿಯನ್ನು ಅಳವಡಿಸಿಕೊಂಡಿದೆ ಎಂದು ತಿಳಿಸಿದರು. ನಿಧಿಯು ಕೇಂದ್ರ ಮತ್ತು ರಾಜ್ಯಗಳ ನಡುವೆ 60:40 ಅನುಪಾತದ ಹಂಚಿಕೆಯ ಮಾದರಿಯನ್ನು ಅನುಸರಿಸುತ್ತದೆ; ಈಶಾನ್ಯ ರಾಜ್ಯಗಳು, ಹಿಮಾಲಯದ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಅನ್ವಯವಾಗುವ ವಿಶೇಷ ಅವಕಾಶಗಳನ್ನು ನೀಡಲಾಗಿದೆ. ಈ ರಚನೆಯು ಹಣಕಾಸಿನ ಜವಾಬ್ದಾರಿಯನ್ನು ಉತ್ತೇಜಿಸುವುದು ಮಾತ್ರವಲ್ಲದೆ, ಅನುಷ್ಠಾನದಲ್ಲಿ ರಾಜ್ಯಗಳ ಮಾಲೀಕತ್ವ ಮತ್ತು ಹೊಣೆಗಾರಿಕೆಯನ್ನು ಹೆಚ್ಚಿಸುತ್ತದೆ ಎಂದು ಅವರು ಹೇಳಿದರು.

ಗ್ರಾಮೀಣ ಕಾರ್ಮಿಕರು ಕೃಷಿ ಚಟುವಟಿಕೆಗಳು ಮತ್ತು ಕೂಲಿ ಉದ್ಯೋಗದ ನಡುವೆ ಯಾವುದೇ ಅಡೆತಡೆಯಿಲ್ಲದೆ ಸಮತೋಲನ ಕಾಯ್ದುಕೊಳ್ಳಲು ಅನುವು ಮಾಡಿಕೊಡುವ ನಿಟ್ಟಿನಲ್ಲಿ, ಉದ್ಯೋಗದ ಕಾಮಗಾರಿಗಳನ್ನು ಸ್ಥಳೀಯ ಕೃಷಿ ಕ್ಯಾಲೆಂಡರ್‌ ಗೆ ಅನುಗುಣವಾಗಿ ರೂಪಿಸುವ ಪ್ರಾಮುಖ್ಯತೆಯನ್ನು ಡಾ. ಜಿತೇಂದ್ರ ಸಿಂಗ್ ಒತ್ತಿ ಹೇಳಿದರು. ನೈಸರ್ಗಿಕ ವಿಕೋಪಗಳಂತಹ ತುರ್ತು ಸಂದರ್ಭಗಳಲ್ಲಿ ಕಾಮಗಾರಿಗಳನ್ನು 60 ದಿನಗಳವರೆಗೆ ಸ್ಥಗಿತಗೊಳಿಸುವ ಅವಕಾಶ ಮತ್ತು ಕಾಲೋಚಿತ ನಮ್ಯತೆಯನ್ನು ಈ ಚೌಕಟ್ಟಿನಲ್ಲಿ ಅಳವಡಿಸಲಾಗಿದ್ದು, ಇದು ಸಂವೇದನಾಶೀಲತೆ ಮತ್ತು ಸ್ಥಿತಿಸ್ಥಾಪಕತ್ವ ಎರಡನ್ನೂ ಖಚಿತಪಡಿಸುತ್ತದೆ. ಈ ಮಿಷನ್ ಅಡಿಯಲ್ಲಿ ಕೂಲಿ ಪಾವತಿಯನ್ನು ಇನ್ನು ಮುಂದೆ ವಾರಕ್ಕೊಮ್ಮೆ ಮಾಡಲಾಗುವುದು, ಇದು ಕಾರ್ಮಿಕರ ಆದಾಯದ ಸ್ಥಿರತೆಯನ್ನು ಗಮನಾರ್ಹವಾಗಿ ಸುಧಾರಿಸಲಿದೆ ಎಂದು ಅವರು ತಿಳಿಸಿದರು.

ಈ ಮಿಷನ್‌ ನ ಹಿಂದಿನ ತತ್ವವನ್ನು ಪುನರುಚ್ಚರಿಸಿದ ಡಾ. ಜಿತೇಂದ್ರ ಸಿಂಗ್ ಅವರು, ಪ್ರಾಮಾಣಿಕ, ಪಾರದರ್ಶಕ ಮತ್ತು ಉತ್ಪಾದಕ ಉದ್ಯೋಗದ ಮೂಲಕ ಹಳ್ಳಿಗಳನ್ನು ಬಲಪಡಿಸುವುದು ಗ್ರಾಮೀಣ ಸಬಲೀಕರಣದ ಕುರಿತಾದ ಮಹಾತ್ಮ ಗಾಂಧೀಜಿಯವರ ದೃಷ್ಟಿಕೋನದ ಆಶಯಕ್ಕೆ ಸಂಪೂರ್ಣವಾಗಿ ಅನುಗುಣವಾಗಿದೆ ಎಂದು ಹೇಳಿದರು. ಈ ಮಿಷನ್ ಕೇವಲ ಸಾಂಕೇತಿಕ ಕ್ರಮಗಳಿಗಿಂತ ಹೆಚ್ಚಾಗಿ, ನೈಜ ಅಭಿವೃದ್ಧಿ ಮತ್ತು ಜವಾಬ್ದಾರಿಯುತ ಆಡಳಿತದ ಮೂಲಕ ಗ್ರಾಮಗಳನ್ನು ಸಬಲೀಕರಣಗೊಳಿಸುವುದರ ಮೇಲೆ ಗಮನ ಕೇಂದ್ರೀಕರಿಸುತ್ತದೆ ಎಂದು ಅವರು ತಿಳಿಸಿದರು.

ರಾಷ್ಟ್ರೀಯ ಹಿತಾಸಕ್ತಿಯ ದೃಷ್ಟಿಯಿಂದ ಜಿ-ರಾಮ್-ಜಿ ಕುರಿತಾದ ಸತ್ಯಾಂಶಗಳನ್ನು ವಸ್ತುನಿಷ್ಠವಾಗಿ ತಿಳಿಸಲು ಸರ್ಕಾರ ಬದ್ಧವಾಗಿದೆ ಎಂದು ಅವರು ಹೇಳಿದರು. ಯಾವುದೇ ರಾಜಕೀಯ ಪರಿಗಣನೆಗಳಿಗೆ ಒಳಗಾಗದೆ ಹಳ್ಳಿಗಳು, ಕಾರ್ಮಿಕರು ಮತ್ತು ದೇಶದ ಕಲ್ಯಾಣವನ್ನು ಕೇಂದ್ರಬಿಂದುವಾಗಿರಿಸಿಕೊಂಡು, ಲಭ್ಯವಾಗುವ ಪ್ರತಿಕ್ರಿಯೆಗಳು ಮತ್ತು ಸುಧಾರಣೆಗಳ ಮೂಲಕ ಈ ಮಿಷನ್ ನಿರಂತರವಾಗಿ ವಿಕಸನಗೊಳ್ಳಲಿದೆ ಎಂದು ಸಚಿವರು ತಿಳಿಸಿದರು.

 

*****

 

 

 

 

(रिलीज़ आईडी: 2214355) आगंतुक पटल : 9