مرکزی وزیر برائے نئی اور قابلِ تجدید توانائی جناب پرہلاد جوشی نے آج متحدہ عرب امارات کے شہر ابوظہبی میں منعقدہ بین الاقوامی قابلِ تجدید توانائی ایجنسی کی سولہویں مجلسِ عام میں بھارت کا قومی بیان پیش کیا اور منصفانہ، مساوی، قابلِ استطاعت اور پائیدار عالمی توانائی منتقلی کے لیے بھارت کے مضبوط عزم کا اعادہ کیا۔

مجلس سے خطاب کرتے ہوئے مرکزی وزیر نے کہا کہ توانائی منتقلی کے حوالے سے بھارت کا نقطۂ نظر وسودھیو کٹمبکم — ایک زمین، ایک خاندان، ایک مستقبل کے اصول اور مساوات، شمولیت اور پالیسی کے استحکام پر مبنی طویل مدتی ویژن سے رہنمائی حاصل کرتا ہے۔ انہوں نے سن 2030 تک غیر معدنی ایندھن سے پانچ سو گیگاواٹ نصب شدہ بجلی صلاحیت حاصل کرنے اور سن 2070 تک خالص صفر اخراج کے ہدف کے لیے بھارت کے عزم کو دہرایا۔

ایک اہم سنگِ میل کو اجاگر کرتے ہوئے جناب جوشی نے بتایا کہ بھارت نے سن 2025 میں ہی غیر معدنی ایندھن کے ذرائع سے اپنی مجموعی نصب شدہ بجلی صلاحیت کا پچاس فیصد حاصل کر لیا ہے، جو پیرس معاہدے کے تحت مقررہ قومی عزم شدہ ہدف سے پانچ سال پہلے ہے۔ بھارت کی قابلِ تجدید توانائی صلاحیت 266 گیگاواٹ سے تجاوز کر چکی ہے، جس سے ملک دنیا میں قابلِ تجدید توانائی کے نفاذ کے رہنماؤں میں شامل ہو گیا ہے۔

مرکزی وزیر نے اس بات پر زور دیا کہ دنیا کی تیزی سے بڑھتی ہوئی بڑی توانائی منڈیوں میں شامل ہونے کے ناتے بھارت قابلِ اعتماد اور مضبوط برقی نظاموں کو ترجیح دے رہا ہے۔ اس مقصد کے لیے توانائی ذخیرہ کرنے کے حل تیزی سے نافذ کیے جا رہے ہیں، برقی جال کی جدید کاری کی جا رہی ہے، سبز توانائی راہداریوں کی ترقی ہو رہی ہے اور جدید نیلامی طریقۂ کار اختیار کیے جا رہے ہیں، جن میں مشترکہ اور ہمہ وقت قابلِ تجدید توانائی منصوبے شامل ہیں۔ انہوں نے شمسی، ہوائی، بیٹریوں اور برق پاش آلات سمیت صاف توانائی کی رسدی زنجیروں کو مضبوط بنانے اور گھریلو تیاری کے فروغ کے لیے بھارت کی کوششوں کو بھی نمایاں کیا، جو قومی خود انحصاری کے ساتھ ساتھ عالمی رسدی نظام کے تنوع میں بھی معاون ہیں۔

توانائی منتقلی کے عوامی مرکز ہونے پر زور دیتے ہوئے مرکزی وزیر نے گھریلو صارفین اور کسانوں کو بااختیار بنانے والے اہم پروگراموں کا ذکر کیا۔ وزیر اعظم سوریا گھر: مفت بجلی اسکیم کے تحت دو سال سے کم عرصے میں تقریباً پچیس لاکھ گھروں کو چھتوں پر شمسی توانائی کی تنصیبات سے فائدہ پہنچا ہے، جبکہ مارچ 2027 تک ایک کروڑ گھروں کو اس اسکیم کے تحت شامل کرنے کا ہدف مقرر ہے۔ وزیر اعظم کسان اُورجا سُرکشا ایوم اُتھان مہا ابھیان کے تحت تقریباً 21 لاکھ 70 ہزار کسانوں کو ڈیزل پمپوں کی جگہ شمسی پمپوں کی تنصیب اور زرعی فیڈروں کی شمسی کاری کے ذریعے فائدہ پہنچایا گیا ہے۔

مرکزی وزیر نے کہا کہ عالمی توانائی منتقلی کے لیے بے مثال سرمایہ کاری اور تعاون درکار ہوگا۔ صرف بھارت کو ہی سن 2030 تک تقریباً تین سو ارب امریکی ڈالر کی ضرورت متوقع ہے، جس سے قابلِ تجدید بجلی پیداوار، توانائی ذخیرہ، سبز ہائیڈروجن، برقی جال اور تیاری کے شعبوں میں وسیع مواقع پیدا ہوں گے۔ انہوں نے کہا کہ مستحکم پالیسیاں اور شفاف منڈیاں بھارت کو صاف توانائی میں سرمایہ کاری کے لیے بدستور ایک نہایت پرکشش مقام بنائے ہوئے ہیں۔

بین الاقوامی تعاون میں اضافے کی اپیل کرتے ہوئے جناب جوشی نے ٹیکنالوجی کی منتقلی، کم لاگت مالی وسائل تک رسائی، صلاحیت سازی اور معیاروں میں ہم آہنگی کی اہمیت پر زور دیا، بالخصوص ترقی پذیر ممالک کی مدد کے لیے، تاکہ وہ اپنی ترقیاتی امنگوں کو متاثر کیے بغیر قابلِ تجدید توانائی کو فروغ دے سکیں۔

بین الاقوامی قابلِ تجدید توانائی ایجنسی کے لیے بھارت کی مضبوط حمایت کا اعادہ کرتے ہوئے انہوں نے کہا کہ بھارت اپنے تجربات، اداروں اور فنی مہارت کو بانٹنے اور تمام رکن ممالک کے ساتھ قریبی تعاون کے لیے تیار ہے، خصوصاً کم ترقی یافتہ ممالک اور چھوٹے جزیرہ نما ترقی پذیر ممالک کے ساتھ، تاکہ عالمی قابلِ تجدید توانائی منتقلی کو تیز کیا جا سکے۔ مرکزی وزیر نے اس بات پر زور دیا کہ بھارت کی توانائی منتقلی صرف صلاحیت میں اضافے تک محدود نہیں، بلکہ یہ عوام، مواقع اور ایک مشترکہ پائیدار مستقبل سے جڑی ہوئی ہے۔

اس سے قبل مرکزی وزیر پرہلاد جوشی نے مجلسِ عام کے موقع پر منعقدہ اعلیٰ سطحی مکالمے ’’توانائی کے مستقبل کا ازسرِ نو تصور: مشترکہ خوشحالی کے لیے جرأت مندانہ ویژن‘‘ میں بھی شرکت کی۔ انہوں نے عوام کو مرکز بنانے والی توانائی منتقلی کے لیے بھارت کے عزم کا اعادہ کیا، جو مالیات، ٹیکنالوجی اور حکمرانی کے شعبوں میں مضبوط بین الاقوامی تعاون کے ذریعے آگے بڑھائی جا رہی ہے اور جس کا مقصد سب کے لیے مشترکہ خوشحالی کی فراہمی ہے۔ اس بات پر زور دیتے ہوئے کہ توانائی کی منتقلی کو مساوات اور شمولیت پر مبنی ایک عوامی تحریک بننا چاہیے، وزیر نے کہا کہ بھارت نے سن 2025 میں تقریباً پچاس گیگاواٹ قابلِ تجدید توانائی صلاحیت میں اضافہ کیا۔

مرکزی وزیر نے بین الاقوامی قابلِ تجدید توانائی ایجنسی کی صدارت سنبھالنے پر جمہوریۂ ڈومینیکن کو مبارک باد پیش کی اور نائب صدور کینیا، جزائرِ سلیمان، ہسپانیہ اور انٹیگوا و باربوڈا کے لیے نیک تمناؤں کا اظہار کیا۔ انہوں نے اس یقین کا اظہار کیا کہ ان کی قیادت کثیرالجہتی تعاون کو مزید مضبوط کرے گی اور پائیدار اور جامع عالمی توانائی منتقلی کو آگے بڑھائے گی۔

مرکزی وزیر نے متحدہ عرب امارات کی وزیر برائے ماحولیاتی تبدیلی اور ماحولیات ڈاکٹر آمنہ بنت عبداللہ الضحاک کے ساتھ بھی ملاقات کی، جس کا مقصد آب و ہوا سے متعلق اقدامات، صاف توانائی اور غذائی تحفظ کے شعبوں میں بھارت اور متحدہ عرب امارات کے تعاون کو مزید مضبوط بنانا تھا۔ اس گفتگو کے دوران دونوں فریقوں نے قابلِ تجدید توانائی، سرمایہ کاری اور اختراع میں بڑھتی ہوئی شراکت داری کا جائزہ لیا، جو سن 2014 سے 2024 کے درمیان طے پانے والی متعدد مفاہمتی یادداشتوں پر مبنی ہے اور متحدہ عرب امارات کے سن 2050 تک خالص صفر اخراج کے ہدف سے ہم آہنگ ہے۔ بات چیت میں قابلِ تجدید توانائی، غیر مرکزی توانائی حل، تیاری، توانائی ذخیرہ، ٹیکنالوجی تعاون اور مشترکہ مالیاتی نظام میں تعاون بڑھانے پر توجہ دی گئی، جس میں عوام کو مرکز بنانے والے، قابلِ توسیع اقدامات کے ذریعے توانائی کے تحفظ، مضبوطی اور طویل مدتی پائیداری کو فروغ دینے پر زور دیا گیا۔

بین الاقوامی قابلِ تجدید توانائی ایجنسی کے بارے میں

بین الاقوامی قابلِ تجدید توانائی ایجنسی ایک بین حکومتی ادارہ ہے جو ممالک کو پائیدار توانائی کے مستقبل کی جانب منتقلی میں مدد فراہم کرتا ہے، اور بین الاقوامی تعاون کے لیے ایک مرکزی پلیٹ فارم، امتیازی مرکز اور قابلِ تجدید توانائی سے متعلق پالیسی، ٹیکنالوجی، وسائل اور مالیاتی معلومات کے ذخیرے کے طور پر خدمات انجام دیتا ہے۔ اس وقت اس ادارے کے ایک سو ستر اراکین ہیں، جن میں ایک سو انہتر ممالک اور یورپی اتحاد شامل ہیں، جبکہ چودہ ممالک شمولیت کے مرحلے میں ہیں۔ بھارت بھی اس ادارے کے بانی اراکین میں شامل ہے۔

بین الاقوامی قابلِ تجدید توانائی ایجنسی کی مجلسِ عام کا سولہواں اجلاس اور اس سے متعلقہ نشستیں 10 سے 12 جنوری 2026 تک متحدہ عرب امارات کے شہر ابوظہبی میں منعقد ہو رہی ہیں۔ مجلسِ عام کا مرکزی موضوع ’’انسانیت کو توانائی فراہم کرنا: مشترکہ خوشحالی کے لیے قابلِ تجدید توانائی‘‘ ہے۔ اس اجلاس میں دنیا بھر کے رہنما اور توانائی سے متعلق فیصلہ ساز شریک ہوں گے، جو ممالک، خطوں اور عالمی سطح پر قابلِ تجدید توانائی کے فروغ میں تیزی لانے کے لیے حکمتِ عملیوں پر غور کریں گے اور اقتصادی شمولیت، مساوات اور انسانی فلاح و بہبود کو آگے بڑھانے کے لیے ضروری اقدامات کو اجاگر کریں گے۔

******

ش ح۔ ش ا ر۔ ول

Uno-421