પ્રધાનમંત્રી શ્રી નરેન્દ્ર મોદીની અધ્યક્ષતામાં કેન્દ્રીય કેબિનેટની મંજૂરી મળ્યા પછી, નાણા મંત્રાલયના આર્થિક બાબતોના વિભાગ (DEA) ના નાણાકીય સહયોગ સાથે, અટકેલા હાઉસિંગ પ્રોજેક્ટ્સને છેવાડાનું ધિરાણ પૂરું પાડવા માટે સરકાર સમર્થિત પહેલ તરીકે નવેમ્બર 2019 માં 'સ્પેશિયલ વિન્ડો ફોર એફોર્ડેબલ એન્ડ મિડ-ઈન્કમ હાઉસિંગ' (SWAMIH) ઇન્વેસ્ટમેન્ટ ફંડ શરૂ કરવામાં આવ્યું હતું.

મજબૂત સોદાબાજી અને શિસ્તબદ્ધ મૂડીના ઉપયોગને પ્રતિબિંબિત કરતા, આ ફંડે 5 ડિસેમ્બર 2025ના રોજ તેના રોકાણના સમયગાળાના અંત પહેલા તેની સમગ્ર રોકાણપાત્ર મૂડી પૂર્ણ રીતે ફાળવી દીધી છે. ફંડના પોર્ટફોલિયોમાં 30 શહેરોમાં 145થી વધુ પ્રોજેક્ટ્સનો સમાવેશ થાય છે, જે SWAMIH ને દેશમાં સૌથી મોટું રેસિડેન્શિયલ-કેન્દ્રિત સ્ટ્રેસ રિઝોલ્યુશન પ્લેટફોર્મ બનાવે છે.

આ ફંડ દ્વારા 1 લાખથી વધુ ઘરો પૂરા પાડવાની અપેક્ષા છે, જે 4 લાખથી વધુ લોકોને રાહત આપશે.

પ્રગતિ અને સિદ્ધિઓ:

• 15 ડિસેમ્બર 2025 સુધીમાં, 110 પ્રોજેક્ટ્સમાં આશરે 61,000 ઘરો સોંપવામાં આવ્યા છે. જેમાં પુનર્વસન/આર્થિક રીતે નબળા વર્ગ (EWS) શ્રેણી હેઠળના 7,000 થી વધુ યુનિટ્સનો સમાવેશ થાય છે.
• SWAMIHનું સંચાલન મજબૂત ગવર્નન્સ ધોરણો, સક્રિય એસેટ મેનેજમેન્ટ અને સખત દેખરેખ સાથે કરવામાં આવ્યું છે, જેના પરિણામે 55 સંપૂર્ણ એક્ઝિટ અને 44 આંશિક એક્ઝિટ મળી છે.
• SWAMIH ફંડે દેશભરના 127 પ્રોજેક્ટ્સમાં ₹37,400 કરોડથી વધુની મૂડી મુક્ત કરી છે, જેમાં 90 મિલિયન ચોરસ ફૂટથી વધુ વિસ્તાર વિકાસ હેઠળ છે, જેમાંથી 44% LIG અને MIG હાઉસિંગ ધરાવે છે.
• તેણે 36,000 થી વધુ કુશળ અને અકુશળ નોકરીઓ પેદા કરી છે, જેમાં 3,500 કાયમી નોકરીઓનો સમાવેશ થાય છે.
• આ ઉપરાંત, ફંડે જીએસટી, સરકારી લેણાં અને સ્ટેમ્પ ડ્યુટી દ્વારા કેન્દ્ર અને રાજ્યોને અંદાજે ₹6,900 કરોડથી વધુની આવકમાં યોગદાન આપ્યું છે.
• અટકેલા પ્રોજેક્ટ્સના પુનરુત્થાનથી 20 લાખ ટનથી વધુ સિમેન્ટ અને 5.5 લાખ મેટ્રિક ટન સ્ટીલની માંગ ઊભી થઈ છે.
• આ પ્રોજેક્ટ્સમાં ગ્રીન કવર તરીકે 1.06 લાખથી વધુ વૃક્ષો ઉમેરવામાં આવ્યા છે.
• ફંડે રોકાણકારોને ડ્રોન કેપિટલના લગભગ 50 ટકા પરત કર્યા છે, જે સામાજિક પ્રભાવ સાથે નાણાકીય સમજદારીને સંતુલિત કરવાની તેની ક્ષમતાને રેખાંકિત કરે છે.
• ફંડે ભારત સરકાર પાસેથી મેળવેલી ~ ₹7,000 કરોડની મૂડીમાંથી ~ ₹3,500 કરોડની રકમ પહેલેથી જ પરત કરી દીધી છે.

SWAMIH ઇન્વેસ્ટમેન્ટ ફંડ એ ઘર ખરીદનારાઓના હિતોનું રક્ષણ કરવા, હાઉસિંગ સેક્ટરને પુનર્જીવિત કરવા, રોજગારી પેદા કરવા અને એકંદર અર્થતંત્રને મજબૂત કરવા માટેની કેન્દ્ર સરકારની પ્રતિબદ્ધતાનું ઉદાહરણ છે.

SWAMIH ફંડ-2:

1 ફેબ્રુઆરી 2025 ના રોજ, કેન્દ્રીય નાણામંત્રીએ બજેટ 2025-26 માં જાહેરાત કરી હતી કે સરકાર, બેંકો અને ખાનગી રોકાણકારોના યોગદાન સાથે 'બ્લેન્ડેડ ફાઇનાન્સ ફેસિલિટી' તરીકે SWAMIH ફંડ-2 સ્થાપિત કરવામાં આવશે. ₹15,000 કરોડના આ ફંડનો હેતુ અન્ય 1 લાખ યુનિટ્સનું ઝડપી કામ પૂર્ણ કરવાનો રહેશે.

SWAMIH ફંડ વિશે

SWAMIH ઇન્વેસ્ટમેન્ટ ફંડનું સંચાલન સ્ટેટ બેંક ઓફ ઇન્ડિયાની પેટાકંપની SBI વેન્ચર્સ લિમિટેડ દ્વારા કરવામાં આવે છે અને તે સામાજિક પ્રભાવના રોકાણ પ્લેટફોર્મ તરીકે કાર્ય કરે છે. તે કાયદાકીય પડકારો, NPAs અથવા નબળા ડેવલપર બેલેન્સ શીટ દ્વારા પ્રભાવિત હોય તેવા મુશ્કેલીમાં મુકાયેલા રહેણાંક પ્રોજેક્ટ્સને છેવાડાનું ધિરાણ પૂરું પાડે છે.

ફંડે ભારત સરકાર, પીએસયુ બેંકો અને એલઆઈસીના સહયોગથી ₹15,531 કરોડનું કુલ ભંડોળ એકત્ર કર્યું છે, જેથી મુશ્કેલીમાં મુકાયેલા, બ્રાઉનફિલ્ડ અને RERA-રજિસ્ટર્ડ સસ્તા અને મધ્યમ આવકવાળા હાઉસિંગ પ્રોજેક્ટ્સને અગ્રતાના ધોરણે લોન ધિરાણ આપી શકાય. આનાથી પ્રોજેક્ટમાં વિલંબને કારણે EMI અને ભાડું બંને ચૂકવતા મધ્યમ વર્ગના પરિવારો પરનો આર્થિક બોજ ઓછો થયો છે.

SM/BS/GP/JD