IITF 2025-ന്റെ കേന്ദ്രബിന്ദുവായി യുവാക്കൾ

ന്യൂഡൽഹിയിൽ നടക്കുന്ന 44-ാമത് ഇന്ത്യ അന്താരാഷ്ട്ര വ്യാപാര മേളയിൽ (IITF) “ഏക ഭാരതം ശ്രേഷ്ഠ ഭാരതം” എന്ന പ്രമേയം പവലിയനുകളിലൂടെയോ സാംസ്കാരിക പരിപാടികളിലൂടെയോ മാത്രമല്ല സജീവമാകുന്നത് — അവരുടെ സ്റ്റാളുകൾക്ക് പിന്നിൽ അഭിമാനത്തോടെ നിൽക്കുന്ന യുവ കരകൗശല വിദഗ്ധരുടെയും സംരംഭകരുടെയും മുഖങ്ങളിലൂടെയാണ്. ബിജ്‌നോർ മുതൽ മധുബനി വരെ, ആൽവാർ മുതൽ കച്ച് വരെ, കൂടാതെ മെഡിറ്ററേനിയൻ കടലിന് അക്കരെ ടുണീഷ്യയിൽ നിന്നുള്ളവർ പോലും; IITF 2025 എഡിഷൻ ഇന്ത്യയുടെയും ലോകത്തിന്റെയും സാമ്പത്തിക, സാംസ്കാരിക ഭൂമികയെ പുനർനിർമ്മിക്കുകയെന്ന അഭിലാഷമുള്ള ഒരു പുതിയ തലമുറയെ കാട്ടിത്തരുന്നു.

ഭാരത് മണ്ഡപത്തിന്റെ വിശാലമായ ഇടനാഴികളിൽ, ഈ യുവ പങ്കാളികൾ ഉൽപ്പന്നങ്ങൾ വിൽക്കുക മാത്രമല്ല ചെയ്യുന്നത്. അവർ കുടുംബ പൈതൃകങ്ങൾ മുന്നോട്ട് കൊണ്ടുപോകുന്നു, പരമ്പരാഗത കരകൗശലവസ്തുക്കൾക്ക് പുതുജീവൻ നൽകുന്നു, പുതിയ സാങ്കേതികവിദ്യകളിൽ പരീക്ഷിക്കുന്നു, സ്വന്തമായി സംരംഭകത്വ യാത്രകൾക്ക് രൂപം നൽകുന്നു.

അവരുടെ കഥകളിൽ, സൂക്ഷ്മ-ചെറുകിട-ഇടത്തരം സംരംഭങ്ങളുടെ (MSME) വളർച്ച, നൈപുണ്യ വികസനം, ഗ്രാമീണ ഉപജീവനമാർഗ്ഗങ്ങൾ, ആഗോള വിപണി ബന്ധങ്ങൾ എന്നിവ പ്രോത്സാഹിപ്പിക്കുന്ന നയങ്ങളുടെ ജീവസുറ്റ ആവിഷ്കാരങ്ങൾ കാണാം. ഈ ശ്രമങ്ങൾക്ക് പൂരകമായി, യുവജനങ്ങൾക്ക് നേതൃത്വപാടവം വളർത്താനും നൂതനാശയങ്ങൾ പിന്തുടരാനും അവരുടെ ഊർജ്ജം രാഷ്ട്ര നിർമ്മാണത്തിനായുള്ള അർത്ഥവത്തായ പ്രവർത്തനങ്ങളിലേക്ക് പരിവർത്തനം ചെയ്യാനും ഒരു സമർപ്പിത വേദി നൽകുന്ന ഇന്ത്യാ ഗവൺമെന്റിന്റെ സുപ്രധാന സംരംഭമാണ് മേരാ യുവ ഭാരത് (MY Bharat).

IITF 2025-ൽ, ഈ അഭിലാഷങ്ങൾ അവസരങ്ങളുമായി സന്ധിക്കുന്നു — യുവ ഇന്ത്യക്കാർക്ക് രാജ്യത്തിന്റെ ഭാവി രൂപപ്പെടുത്താൻ ഒരു ദേശീയ, അന്തർദേശീയ വേദി നൽകുന്നു.

ഉത്തർപ്രദേശിലെ ബിജ്‌നോറിൽ നിന്നുള്ള ശർക്കര സംരംഭകൻ

ഇന്ത്യയിലെ ഏറ്റവും വലിയ കരിമ്പ് ഉൽപ്പാദന ജില്ലകളിലൊന്നായ ബിജ്‌നോറിൽ നിന്നുള്ള 26-കാരനായ നമൻ ശർമ്മ, പാരമ്പര്യം ഉപേക്ഷിച്ച് പോകുന്നതിനു പകരം അത് മുന്നോട്ട് കൊണ്ടുപോകാൻ ദൃഢനിശ്ചയമുള്ള ഒരു പുതിയ തലമുറയെ പ്രതിനിധീകരിക്കുന്നു. ഒരു യുവ കാർഷിക സംരംഭകനാകാനുള്ള അദ്ദേഹത്തിന്റെ യാത്ര ലളിതമായ ഒരു ദൗത്യത്തോടെയാണ് ആരംഭിച്ചത്: “എനിക്ക് ശർക്കര വ്യവസായത്തെ ആധുനികവൽക്കരിക്കുകയും രാസവസ്തുക്കൾ ഇല്ലാത്ത പ്രകൃതിദത്ത ഉൽപ്പന്നങ്ങൾ നൽകുകയും വേണം.”

കരിമ്പ് കൃഷി ചെയ്യുന്ന കുടുംബത്തിൽ ജനിച്ച നമൻ, സമപ്രായക്കാർ വിദേശത്ത് പഠിക്കാൻ പോയപ്പോഴും തന്റെ മണ്ണിൽ വേരൂന്നി നിൽക്കാൻ ആഗ്രഹിച്ചു. 2021-ൽ നമൻ തന്റെ പ്രൈവറ്റ് ലിമിറ്റഡ് കമ്പനി ഔദ്യോഗികമായി രജിസ്റ്റർ ചെയ്തു, അതിനുമുമ്പ് തന്നെ 2018-ൽ അദ്ദേഹം പരീക്ഷണങ്ങൾ തുടങ്ങിയിരുന്നു.

അദ്ദേഹത്തിന്റെ ഇളയ സഹോദരനും (21) സഹോദരിയും (23) ആണ് ഇപ്പോൾ പ്രധാന ടീം അംഗങ്ങൾ. അവർ ഒരുമിച്ച് 15 ഫാക്ടറി തൊഴിലാളികൾക്കും പാക്കേജിംഗ് യൂണിറ്റിൽ 25 സ്ത്രീകൾക്കും തൊഴിൽ നൽകിക്കൊണ്ട് ഗ്രാമീണ ഉപജീവന അവസരങ്ങൾ സൃഷ്ടിക്കുന്നു.

ഇത് അദ്ദേഹത്തിന്റെ ആദ്യത്തെ IITF ആണ്, ഇവിടെയെത്തിയത് ആകസ്മികമായിരുന്നില്ല. ബിജ്‌നോർ മഹോത്സവം മുതൽ ബസന്ത് മഹോത്സവം വരെയുള്ള പ്രാദേശിക പരിപാടികളിൽ ലഭിച്ച മികച്ച പ്രതികരണങ്ങൾക്ക് ശേഷമാണ് ഇത് സംഭവിച്ചത്. ഇപ്പോൾ, അദ്ദേഹം കയറ്റുമതിയിൽ ശ്രദ്ധ കേന്ദ്രീകരിക്കുന്നു, കൂടാതെ തന്റെ യൂണിറ്റുകൾ വികസിപ്പിക്കുന്നതിനായി പ്രധാനമന്ത്രിയുടെ തൊഴിൽ ജനറേഷൻ പ്രോഗ്രാമിലേക്ക് (PMEGP) അപേക്ഷിക്കാനും തയ്യാറെടുക്കുകയാണ്.

പത്മശ്രീ പാരമ്പര്യം പേറുന്ന മധുബനി അവകാശി

ബിഹാർ പവലിയനിൽ, മധുബനി ചിത്രങ്ങളുടെ വർണ്ണശോഭ പെട്ടെന്ന് കണ്ണുകളെ ആകർഷിക്കുന്നു, ഈ പ്രദർശനത്തിന്റെ കേന്ദ്രബിന്ദു ബിഹാറിലെ ജിത്വാർപൂരിൽ നിന്നുള്ള 18 വയസുകാരനായ മധുരം കുമാർ ഝായാണ്. ഈ ഗ്രാമം ഈ കലാരൂപത്തിന് പേരുകേട്ടതാണ്.

അദ്ദേഹത്തിന്റെ മുത്തശ്ശി ഒരു സാധാരണ കലാകാരിയല്ല. പത്മശ്രീ ബൗവാ ദേവിയാണ് അവർ. ദേശീയ പുരസ്‌കാരം നേടിയ വ്യക്തിയും മിഥില പാരമ്പര്യത്തിലെ പ്രമുഖ വ്യക്തിത്വങ്ങളിൽ ഒരാളുമാണ്. മുത്തശ്ശിയുടെ കലാപരമായ കഴിവുകളും വൈദഗ്ധ്യവും കണ്ടാണ് മധുരം വളർന്നത്.

“എന്റെ മുത്തശ്ശി ചിത്രം വരയ്ക്കുമ്പോൾ, ഞാൻ അരികിലിരുന്ന് അവർ ആവശ്യപ്പെടുന്നതെല്ലാം കൊണ്ടുവന്നു കൊടുക്കുമായിരുന്നു. അവരുടെ കൈകൾ നോക്കിയാണ് ഞാൻ പഠിച്ചത്,” ആറാം വയസ്സിലെ തന്റെ ആദ്യകാല ഓർമ്മകൾ അയവിറക്കിക്കൊണ്ട് അദ്ദേഹം പറയുന്നു.

അദ്ദേഹത്തിന്റെ കലാജീവിതം നിരവധി സംസ്ഥാനങ്ങളിലേക്കും പ്രദർശനങ്ങളിലേക്കും അദ്ദേഹത്തെ എത്തിച്ചിട്ടുണ്ട്. തിരക്കിട്ട സമയക്രമങ്ങൾക്കിടയിലും മധുരം ഇപ്പോഴും പരീക്ഷകൾക്ക് തയ്യാറെടുക്കുകയാണ്. "മേള കഴിഞ്ഞാൽ ഞാൻ പഠനം തുടങ്ങും," അദ്ദേഹം ആത്മാർത്ഥമായി പറയുന്നു.

ദൃശ്യപരതയും ഒരു വ്യക്തിത്വബോധവും നൽകിയതിന് അദ്ദേഹം പവലിയന് നന്ദി പറയുന്നു: “എന്റെ ദാദി മാ കാരണമാണ് ​ഗവൺമെന്റ് ഞങ്ങൾക്ക് ഒരു പേരും ഒരു വേദിയും നൽകിയത്.”

മധുബനിയെ “എല്ലാ തെരുവുകളിലും എല്ലാ രാജ്യങ്ങളിലും” എത്തിക്കുക, കൂടാതെ, ഒരു ഐ.ആർ.എസ്. ഉദ്യോഗസ്ഥനാകുക അല്ലെങ്കിൽ ഇന്ത്യൻ നാവികസേനയിൽ ചേരുക എന്ന അദ്ദേഹത്തിന്റെ സ്വപ്നം തന്റെ കല പോലെ വിസ്തൃതമാണ്.

സാംസ്കാരിക പൈതൃകം കേവലം ഓർമ്മകളായല്ല, മറിച്ച് ജീവിക്കുന്ന, വളരുന്ന കലയായി യുവതലമുറ ഏറ്റെടുക്കുമ്പോൾ അത് തഴച്ചുവളരുമെന്നതിന്റെ ഓർമ്മപ്പെടുത്തലാണ് മധുരം.

കുടുംബ പാരമ്പര്യം ഉയർത്തിപ്പിടിക്കുന്ന യുവ കളിമൺപാത്ര വിദ​ഗ്ധ

രാജസ്ഥാൻ പവലിയനിൽ, ഊഷ്മളമായ വിളക്കുകളുടെ വെളിച്ചത്തിൽ തിളങ്ങുന്ന ടെറാക്കോട്ട പാത്രങ്ങളുടെ നിരകൾ. അക്കൂട്ടത്തിൽ മൃദുഭാഷിയാണെങ്കിലും ആത്മവിശ്വാസമുള്ള 20 വയസുകാരി കരിഷ്മ പർജാപത് നിൽക്കുന്നു, തന്റെ കുടുംബത്തിന്റെ ദീർഘകാലത്തെ മൺപാത്ര നിർമ്മാണ പാരമ്പര്യത്തെ അവൾ പ്രതിനിധീകരിക്കുന്നു.

“ഞങ്ങൾ കളിമണ്ണ് ഉടയ്ക്കുന്നു, അത് അലിയിക്കുന്നു, നനയ്ക്കുന്നു... എന്നിട്ട് എന്റെ അച്ഛൻ അതിന് രൂപം നൽകുകയും കളിമൺ ചൂളയിൽ വെച്ച് ചുട്ടെടുക്കുകയും ചെയ്യുന്നു,” ജീവിതകാലം മുഴുവൻ ഈ പ്രക്രിയ കണ്ടറിഞ്ഞ ഒരാളുടെ വ്യക്തതയോടെ അവൾ വിശദീകരിക്കുന്നു.

കരിഷ്മ ദൗസ ജില്ലയിൽ നിന്ന് ബി.എ. പഠിക്കുന്നു, അതേസമയം തന്റെ അച്ഛൻ, അമ്മ, സഹോദരി, കരകൗശല ജോലികൾ മുഴുവൻ സമയവും ചെയ്യുന്ന രണ്ട് തൊഴിലാളികൾ എന്നിവരെ പിന്തുണയ്ക്കുകയും ചെയ്യുന്നു. “ഞങ്ങൾ വീട്ടിലിരുന്ന് പഠിക്കുന്നു, പക്ഷേ ഞങ്ങൾ സഹായിക്കുകയും ചെയ്യും. ഇത് ഞങ്ങളുടെ കുടുംബത്തിന്റെ ജോലിയാണ്,” അവൾ പറയുന്നു.

വനിതാ ശാക്തീകരണ ഡയറക്ടറേറ്റാണ് അവരുടെ സ്റ്റാൾ സ്പോൺസർ ചെയ്യുന്നത്.“​ഗവൺമെന്റ് ഞങ്ങളിൽ നിന്ന് പണം വാങ്ങുന്നില്ല,” അവൾ സൂചിപ്പിക്കുന്നു. അപേക്ഷകൾ ക്ഷണിക്കുമ്പോഴെല്ലാം അവർ അപേക്ഷിക്കാറുണ്ട്, കൂടാതെ അവരുടെ കുടുംബത്തെ ഇതിനോടകം രണ്ടുതവണ തിരഞ്ഞെടുക്കപ്പെട്ടു.

കരിഷ്മയെ ഏറ്റവും കൂടുതൽ വേറിട്ടു നിർത്തുന്നത് പാരമ്പര്യത്തിനും ആധുനികതയ്ക്കും ഇടയിൽ സഞ്ചരിക്കാനുള്ള അവരുടെ അനായാസതയാണ്. ഉപഭോക്താക്കളെ സഹായിക്കുന്നു, സാങ്കേതിക വിദ്യകൾ വിശദീകരിക്കുന്നു, കോളേജ് ജീവിതം സന്തുലിതമാക്കിക്കൊണ്ട് തന്റെ കരകൗശലത്തെക്കുറിച്ച് സംസാരിക്കുന്നു എന്നതാണ്. ഇന്ത്യയിലെ കരകൗശല മേഖലയിൽ യുവതികളുടെ വർദ്ധിച്ചുവരുന്ന ദൃശ്യതയും സ്വാധീനവും അവരുടെ സാന്നിധ്യം പ്രതിഫലിപ്പിക്കുന്നു.

IITF-ൽ, അവളുടെ കുടുംബത്തിന്റെ ടെറാക്കോട്ട ശിൽപ്പങ്ങൾ വെറും ഉൽപ്പന്നങ്ങൾ മാത്രമല്ല, മറിച്ച് യുവത്വത്തിന്റെ കൈകളാൽ രൂപപ്പെടുത്തപ്പെടുകയും മുന്നോട്ട് കൊണ്ടുപോകപ്പെടുകയും ചെയ്യുന്ന രാജസ്ഥാൻ മണ്ണിലെ മുദ്രകളാണ്.

യുവതലമുറ മുന്നോട്ട് കൊണ്ടുപോകുന്ന 800 വർഷത്തെ പൈതൃകം

26‍ വയസുകാരനായ ലുഹാർ ജാവേദ് അബ്ദുല്ല തന്റെ കരകൗശലത്തെക്കുറിച്ച് സംസാരിക്കുമ്പോൾ, രാജ്യങ്ങളേക്കാൾ പഴക്കമുള്ള ഒരു ചരിത്രമാണ് അദ്ദേഹം വിവരിക്കുന്നത്. "ഞങ്ങളുടെ ജോലിക്ക് 800-900 വർഷം പഴക്കമുണ്ട്, എന്നാൽ ഞങ്ങളുടെ കുടുംബത്തിന്റെ ജോലിക്ക് ഏകദേശം 400 വർഷത്തെ പഴക്കമുണ്ട്."

ഗുജറാത്തിലെ കച്ചിൽ നിന്നുള്ള ജാവേദ് ചെമ്പ് മണികൾ ഉണ്ടാക്കുന്നു. ഒരുകാലത്ത് കന്നുകാലികളുടെ കഴുത്തിൽ കെട്ടിയിരുന്ന ഇന്ത്യൻ കൗബെൽസ് എന്നറിയപ്പെട്ടിരുന്ന ഇവ, ഇപ്പോൾ സംഗീതോപകരണങ്ങൾ, വിൻഡ് ചൈമുകൾ, ഡോർബെല്ലുകൾ എന്നിവയായി രൂപാന്തരപ്പെട്ടിരിക്കുന്നു.

അദ്ദേഹത്തിന്റെ കുടുംബ ബിസിനസ്സിൽ 20 പേർ ജോലി ചെയ്യുന്നു, അതിൽ കൂടുതലും സ്ത്രീകളാണ്. അവരുടെ ഉൽപ്പന്നങ്ങൾ ഇന്ത്യക്ക് പുറത്തേക്കും വ്യാപിച്ചിരിക്കുന്നു; ഒരു ബന്ധു അമേരിക്കയിലെ പ്രദർശനങ്ങളിൽ അവരുടെ കരകൗശല വസ്തുക്കൾ പതിവായി പ്രദർശിപ്പിക്കാറുണ്ട്, അവിടെ മികച്ച പ്രതികരണമാണ് ലഭിക്കുന്നത്.

പാരമ്പര്യത്തിൽ നിന്നുകൊണ്ട് നവീകരിക്കാൻ പഠിച്ച കലാകാര സമൂഹത്തെയാണ് ജാവേദ് പ്രതിനിധീകരിക്കുന്നത്. നൂറ്റാണ്ടുകൾ പഴക്കമുള്ള ലോഹനിർമ്മാണ വിദ്യകൾ നിലനിർത്തിക്കൊണ്ട് ആധുനിക ആവശ്യങ്ങൾക്കനുസരിച്ച് ഉൽപ്പന്നങ്ങൾ അവർ മാറ്റിയെടുക്കുന്നു. ജാവേദിനെ സംബന്ധിച്ചിടത്തോളം, IITF ഒരു കമ്പോളത്തേക്കാൾ ഉപരി ഒരു സാംസ്കാരിക വേദിയാണ്. അദ്ദേഹത്തിന്റെ സ്റ്റാളിലെ മൃദുവായി മുഴങ്ങുന്ന ഓരോ മണിയും, കച്ചിന്റെ ഗ്രാമീണ ചരിത്രത്തിന്റെ പ്രതിധ്വനികൾ വഹിക്കുന്നു, കരകൗശലത്തിന്റെ ഒരു യുവ സൂക്ഷിപ്പുകാരൻ പരിപാലിക്കുകയും പുതുക്കുകയും ചെയ്യുന്നു

അതിർത്തികൾക്കപ്പുറം: IITF അന്താരാഷ്ട്ര പവലിയനിലെ യുവമുഖങ്ങൾ

IITF 2025-ലെ അന്താരാഷ്ട്ര പവലിയൻ ഒരു ലോകം തന്നെയാണ്. ഈ വർഷം, 12 രാജ്യങ്ങൾ മേളയിൽ പങ്കെടുക്കുന്നു, ഈ മേള എങ്ങനെയാണ് ഒരു ആഗോള വിപണിയായി പരിണമിച്ചതെന്നും ഭൂഖണ്ഡങ്ങൾ തമ്മിൽ സംസ്കാരങ്ങളെയും കരകൗശലങ്ങളെയും യുവ സംരംഭകരെയും ബന്ധിപ്പിക്കുന്നതെന്നും അവർ ഒരുമിച്ച് പ്രദർശിപ്പിക്കുന്നു.

ഈ തിരക്കേറിയ വിദേശ സ്റ്റാളുകൾക്കിടയിൽ, ടുണീഷ്യയിൽ നിന്നുള്ള 26 വയസുകാരനായ അഹമ്മദ് ഷാഹിദ് നിൽക്കുന്നു, അദ്ദേഹം ഡൽഹിക്ക് വടക്കൻ ആഫ്രിക്കൻ കരകൗശലത്തിന്റെ വൈദഗ്ധ്യം സമ്മാനിക്കുന്നു. അദ്ദേഹത്തിന്റെ കൈകൊണ്ട് വരച്ച സെറാമിക്സ്, ഒലിവ് മരം കൊണ്ടുള്ള അടുക്കള ഉപകരണങ്ങൾ, വിളക്കുകൾ, അലങ്കാര വസ്തുക്കൾ എന്നിവ സന്ദർശകരെ ആകർഷിക്കുന്നു — അദ്ദേഹത്തിന്റെ സ്വന്തം നാടിന്റെ കരകൗശല പൈതൃകത്തെ പ്രതിഫലിപ്പിക്കുന്ന സൗന്ദര്യശാസ്ത്രമാണത്.

തന്റെ കുടുംബത്തിന്റെ കലാപരമായ കഴിവുകൾ പഠിച്ചാണ് അഹമ്മദ് വളർന്നത്, അച്ഛന്റെ പാരമ്പര്യം തുടരാൻ അദ്ദേഹം ആഗ്രഹിക്കുന്നു. ഇന്ന് അദ്ദേഹം ഒരു ചെറിയ കയറ്റുമതി കേന്ദ്രീകൃത സംരംഭം നടത്തുന്നു. ദീർഘകാല വ്യാപാര ബന്ധങ്ങൾ കെട്ടിപ്പടുക്കുക എന്ന പ്രതീക്ഷയിലാണ് അദ്ദേഹം. “ഇവിടെ ആളുകൾ ധാരാളം ചോദ്യങ്ങൾ ചോദിക്കുന്നു... ഞങ്ങൾ എങ്ങനെയാണ് സാധനങ്ങൾ ഉണ്ടാക്കുന്നതെന്ന് അവർ അറിയാൻ ആഗ്രഹിക്കുന്നു,” ഇന്ത്യൻ സന്ദർശകർ കാണിക്കുന്ന യഥാർത്ഥ ജിജ്ഞാസ ശ്രദ്ധിച്ച് അദ്ദേഹം പുഞ്ചിരിക്കുന്നു.

അന്താരാഷ്ട്ര പങ്കാളികളെ സംബന്ധിച്ചിടത്തോളം, IITF വെറും സന്ദർശക പ്രവാഹത്തേക്കാൾ കൂടുതലാണ് നൽകുന്നത്. പ്രാദേശിക അഭിരുചികൾ മനസ്സിലാക്കാനും മൊത്തക്കച്ചവടക്കാരെ കാണാനും അതിർത്തി കടന്നുള്ള സഹകരണങ്ങൾ കണ്ടെത്താനും ഇന്ത്യയുടെ വളരുന്ന കരകൗശല, ജീവിതശൈലി വിപണിയിൽ സ്വയം സ്ഥാനം ഉറപ്പിക്കാനുമുള്ള ഒരു കവാടമാണിത്.

മാറ്റത്തിന്റെ ചാലകശക്തിയായി യുവത്വം

IITF 2025, പവലിയനുകളിലൂടെ മാത്രമല്ല, മേളയ്ക്ക് ഊർജ്ജവും ലക്ഷ്യവും നൽകുന്ന യുവ പങ്കാളികളിലൂടെയും ഏക ഭാരതം ശ്രേഷ്ഠ ഭാരതം എന്ന ആശയത്തിന്റെ ശക്തമായ പ്രതിഫലനമായി നിലകൊള്ളുന്നു. ഈ യുവ സംരംഭകർ, കരകൗശല വിദഗ്ധർ, നൂതനാശയക്കാർ എന്നിവർ ഇന്ത്യയുടെ വൈവിധ്യത്തെ അതിന്റെ ഏറ്റവും ഊർജ്ജസ്വലമായ രൂപത്തിൽ പ്രതിനിധീകരിക്കുന്നു. അവരുടെ പ്രവർത്തനം പ്രാദേശിക അറിവിനെ ആധുനിക അഭിലാഷവുമായി സമന്വയിപ്പിക്കുന്നു. ഓരോ പ്രദേശത്തെയും കഴിവുകൾ തിരിച്ചറിയുകയും പരിപോഷിപ്പിക്കുകയും വളരാൻ ഇടം നൽകുകയും ചെയ്യുമ്പോൾ ഐക്യം എങ്ങനെ ശക്തമാകുമെന്ന് ഇത് വ്യക്തമാക്കുന്നു.

അവരുടെ സാന്നിധ്യത്തെ യഥാർത്ഥത്തിൽ പ്രാധാന്യമുള്ളതാക്കുന്നത് അത് പ്രതീകവൽക്കരിക്കുന്ന ശാക്തീകരണമാണ്. അവരിൽ പലർക്കും IITF അവരുടെ ആദ്യത്തെ പ്രധാന വേദിയാണ് — അവരുടെ കഴിവുകൾ പ്രദർശിപ്പിക്കാനും പുതിയ പ്രേക്ഷകരെ കാണാനും വിപണികളെ മനസ്സിലാക്കാനും ദേശീയ അന്തർദേശീയ തലങ്ങളിൽ അവരുടെ കരകൗശലത്തിന് മൂല്യം ലഭിക്കുന്നത് കാണാനുമുള്ള ഒരവസരം.

അവരുടെ കഥകളിൽ ഒരു ലളിതമായ സത്യം അടങ്ങിയിരിക്കുന്നു: യുവജനങ്ങളെ ശാക്തീകരിക്കപ്പെടുമ്പോഴാണ് — സ്വപ്നം കാണാനും സൃഷ്ടിക്കാനും നയിക്കാനും വേദികൾ നൽകുമ്പോഴാണ് — ഏക ഭാരതം ശ്രേഷ്ഠ ഭാരതം എന്ന ചൈതന്യം കൂടുതൽ ശക്തമാകുന്നത്. അവരുടെ യാത്രകൾ നമ്മെ ഓർമ്മിപ്പിക്കുന്നത്, ഇന്ത്യയുടെ പുരോഗതി വലിയ ഹാളുകളിലോ മഹത്തായ പവലിയനുകളിലോ മാത്രമല്ല രൂപപ്പെടുന്നത്, മറിച്ച് രാജ്യത്തിന്റെ കഥയെ രൂപപ്പെടുത്തുന്ന യുവ പൗരന്മാരുടെ നിശ്ചയദാർഢ്യത്തിലാണ്; അവർ ജീവസ്സുറ്റതാക്കുന്ന ഓരോ കരകൗശലത്തിലൂടെയും നവീകരണത്തിലൂടെയും ആശയത്തിലൂടെയുമാണ്.

Download in PDF

***

SK