மத்திய சுகாதாரம் மற்றும் குடும்ப நலன், ரசாயனங்கள் மற்றும் உரத்  துறை அமைச்சர் திரு ஜே.பி. நட்டா, இன்று புதுதில்லியில் உள்ள டாக்டர் அம்பேத்கர் சர்வதேச மையத்தில் இந்திய மருந்தியல் ஆய்வறிக்கையின் 10-வது பதிப்பை வெளியிட்டார், இது மருந்துகளின் தரம், பாதுகாப்பு மற்றும் செயல்திறனை வலுப்படுத்துவதற்கான இந்தியாவின் தொடர்ச்சியான முயற்சிகளில் ஒரு குறிப்பிடத்தக்க சாதனையைக்  குறிக்கிறது.

புதிய பதிப்பை வெளியிட்ட திரு நட்டா, இந்திய மருந்தியல் ஆய்வறிக்கை , நாட்டில் மருந்துகளுக்கான அதிகாரப்பூர்வ தரநிலைப் புத்தகமாக செயல்படுகிறது என்றும், மருந்துகளுக்கான இந்தியாவின் ஒழுங்குமுறை கட்டமைப்பின் ஒரு மூலக்கல்லாக உள்ளது என்றும் கூறினார். 10-வது பதிப்பு அறிவியல் முன்னேற்றங்கள், உலகளாவிய சிறந்த நடைமுறைகள், மருந்து உற்பத்தி மற்றும் ஒழுங்குமுறையில் இந்தியாவின் வளர்ந்து வரும் தலைமையைப் பிரதிபலிக்கிறது என்றும் அவர் கூறினார்.

இந்திய மருந்தியல் ஆய்வறிக்கை -2026, 121 புதிய மோனோகிராஃப்களை இணைத்துள்ளதையும், மொத்த மோனோகிராஃப்களின் எண்ணிக்கையை 3,340 ஆக உயர்த்தியதையும் அவர் எடுத்துரைத்தார். காசநோய் எதிர்ப்பு, நீரிழிவு எதிர்ப்பு மற்றும் புற்றுநோய் எதிர்ப்பு மருந்துகள், இரும்புச் சத்துக்கள் உள்ளிட்ட முக்கிய சிகிச்சை பிரிவுகளில் பாதுகாப்பு கணிசமாக வலுப்படுத்தப்பட்டுள்ளதாகவும், இதன் மூலம் பல்வேறு தேசிய சுகாதாரத் திட்டங்களின் கீழ் பயன்படுத்தப்படும் மருந்துகளின் விரிவான தரப்படுத்தலை உறுதி செய்வதாகவும் அவர் கூறினார்.

சமீபத்திய ஆண்டுகளில், இந்திய மருந்தியல் தரநிலைகள் சர்வதேச அங்கீகாரத்தைப் பெற்றுள்ளன, ஏனெனில் இது இந்திய அரசின் சுகாதாரத் துறையின் கீழ் ஒரு மையப்படுத்தப்பட்ட நிகழ்ச்சி நிரலாக மாறியுள்ளது. இந்திய மருந்தியல் ஆய்வறிக்கை இப்போது உலகின் தெற்கின் 19 நாடுகளில் அங்கீகரிக்கப்பட்டுள்ளது என்பதை அமைச்சர்  குறிப்பிட்டார்.

இந்திய மருந்தியல் கண்காணிப்புத் திட்டத்தின் குறிப்பிடத்தக்க முன்னேற்றத்தையும் திரு நட்டா எடுத்துரைத்தார். உலக சுகாதார அமைப்பின் மருந்தியல் கண்காணிப்பு தரவுத்தளத்தில் 2009–2014-ம் ஆண்டில் பங்களிப்புகளின் அடிப்படையில் உலகளவில் 123-வது இடத்தில் இருந்த இந்தியா, தற்போது 2025-ம் ஆண்டில் உலகளவில் 8- வது இடத்திற்கு உயர்ந்துள்ளது என்று அவர் குறிப்பிட்டார். இந்த குறிப்பிடத்தக்க சாதனைக்காக ஐபிசி மற்றும் பிவிபிஐ குழுவைப் பாராட்டிய திரு நட்டா, வலுப்படுத்தப்பட்ட மருந்தியல் கண்காணிப்பு சூழல் அமைப்பு நோயாளி பாதுகாப்பு, தர உறுதி மற்றும் வலுவான ஒழுங்குமுறை கண்காணிப்புக்கான இந்தியாவின் நிலையான அர்ப்பணிப்பைப் பிரதிபலிக்கிறது என்று கூறினார்.

மருந்துகள் மற்றும் அழகுசாதனப் பொருட்கள் (இரண்டாவது திருத்தம்) விதிகள், 2020-ன் விதிகளின்படி, இந்திய மருந்தியல் 2026-ல் ரத்த மாற்ற மருத்துவம் தொடர்பான 20 ரத்தக் கூறுகள் முதன்முறையாக சேர்க்கப்பட்டுள்ளதை அவர்  சுட்டிக் காட்டினார்.

இந்திய மருந்தியல் ஆய்வறிக்கை 2026 மருந்து தரத் தரங்களை மேலும் வலுப்படுத்தும், இந்தியாவின் ஒழுங்குமுறை கட்டமைப்பை வலுப்படுத்தும் மற்றும் உலகளாவிய மருந்துத் துறையில் நாட்டின் நிலையை மேம்படுத்தும் என்று நம்பிக்கை தெரிவித்து, இந்திய மருந்தியல் ஆணையம் மற்றும் பத்தாவது பதிப்பை வெளியிடுவதில் ஈடுபட்டுள்ள அனைத்து பங்குதாரர்களையும் மத்திய அமைச்சர் மீண்டும் ஒருமுறை பாராட்டினார்.

இந்திய மருந்தியல் ஆய்வறிக்கை 2026, மருந்துத் தரங்களை மேலும் வலுப்படுத்தும், இந்தியாவின் ஒழுங்குமுறை கட்டமைப்பை வலுப்படுத்துவதுடன் உலகளாவிய மருந்துத் துறையில் நாட்டின் நிலையை மேம்படுத்தும் என்று நம்பிக்கை தெரிவித்தார்.

இந்திய மருந்து கட்டுப்பாட்டுத் துறைத் தலைவர் டாக்டர் ராஜீவ் சிங் ரகுவன்ஷி, சுகாதாரம் மற்றும் குடும்ப நல அமைச்சகத்தின் இணைச் செயலாளர் திரு. ஹர்ஷ் மங்களா, இந்திய மருந்தக ஆணையத்தின் செயலாளர் மற்றும் அறிவியல் இயக்குநர் டாக்டர் வி. கலைச்செல்வன் மற்றும் பிற முன்னணி தொழில் வல்லுநர்களும் இந்த நிகழ்வில் கலந்துகொண்டனர்.

Release ID: 2210754

***

TV/PKV/KR