سائنس اور ٹیکنالوجی نیز ارضیاتی سائنسز کے مرکزی وزیر مملکت (آزادانہ چارج) ، اور وزیر اعظم کے دفتر، عملہ، عوامی شکایات، پنشن، جوہری توانائی اور خلاء کے وزیر مملکت ڈاکٹر جتیندر سنگھ نے آج اسرو کی ٹیم کو بلیو برڈ بلاک-2 مواصلاتی سیٹلائٹ لے جانے والے ایل وی ایم 3-ایم 6 مشن کے کامیاب لانچ پر مبارکباد دی۔  ایک پیغام میں، وزیر موصوف نے کہا کہ وزیر اعظم نریندر مودی کی دور اندیش قیادت میں، اسرو ایک کے بعد ایک  اہم سنگ میل حاصل کر رہا ہے، جس سے خلائی ٹیکنالوجی میں ہندوستان کی بڑھتی ہوئی طاقت، ساکھ اور عالمی حیثیت کی تصدیق ہوتی ہے ۔

اس رفتار کو آگے بڑھاتے ہوئے، ہندوستان نے ایل وی ایم 3-ایم 6 مشن کے کامیاب لانچ کے ساتھ ایک تاریخ ساز کارنامہ انجام دیا ہے ، جس نے کسی ہندوستانی لانچ گاڑی کے ذریعے لے جانے والے اب تک کے سب سے بھاری سیٹلائٹ کو اپنے مقررہ مدار میں پہنچا دیا۔  یہ مشن ہندوستان کی ہیوی لفٹ لانچ صلاحیتوں میں ایک اہم چھلانگ کی نشاندہی کرتا ہے اور بین الاقوامی تجارتی لانچ مارکیٹ میں ملک کی پوزیشن کو مزید مضبوط کرتا ہے۔

خلاء کے  محکمے کے سکریٹری اور خلائی تحقیق  کے بھارتی  ادارے(اسرو)کے چیئرمین ڈاکٹر وی نارائنن نے اعلان کیا کہ ایل وی ایم 3-ایم 6 لانچ وہیکل نے بہترین کارکردگی کا مظاہرہ کیا اور بلیو برڈ بلاک-2 مواصلاتی سیٹلائٹ کو اس کے مطلوبہ مدار میں درست طریقے سے داخل کیا ۔  انہوں نے کہا کہ یہ ہندوستانی سرزمین سے مقامی لانچر کا استعمال کرتے ہوئے لانچ کیا گیا سب سے بھاری سیٹلائٹ تھا اور ایل وی ایم 3 کا تیسرا مکمل تجارتی مشن تھا۔  انہوں نے مزید کہا کہ یہ مشن لانچ وہیکل کے شاندار اعتماد اور عالمی معیار کی کارکردگی کی عکاسی کرتا ہے، جس سے اسے عالمی خلائی شعبے میں بہترین زمرے میں شامل کیا گیا ہے۔

اس مشن پر نصب شدہ سیٹلائٹ، بلیو برڈ بلاک-2، اگلے سلسلے کے برج کا حصہ ہے جسے بغیر کسی خاص صارف کے سامان کی ضرورت کے براہ راست معیاری موبائل اسمارٹ فونز کو خلاء پر مبنی سیلولر براڈ بینڈ کنیکٹوٹی فراہم کرنے کے لیے ڈیزائن کیا گیا ہے ۔ یہ مشن نیو اسپیس انڈیا لمیٹڈ اور امریکہ میں قائم اے ایس ٹی اسپیس موبائل کے درمیان ایک تجارتی معاہدے کے تحت شروع کیا گیا ہے، جس میں جدید عالمی مواصلاتی مشنوں کے لیے ایک قابل اعتماد لانچ سروس فراہم کنندہ کے طور پر ہندوستان کے بڑھتے ہوئے کردار کو اجاگر کیا گیا ہے۔

لانچ وہیکل مارک-3 کی کامیاب پرواز کے ساتھ، ہندوستان نے ایک بار پھر پیچیدہ ہیوی لفٹ مشنوں میں اپنی تکنیکی پختگی کا مظاہرہ کیا ہے، جس سے مقامی لانچ سسٹم میں اعتماد کو تقویت ملی ہے اور عالمی سطح پر خلاء کے  میدان میں ملک کا قد مزید بلند ہوا ہے۔

***********

) ش ح –    م ع     -  ش ہ ب )

U.No. 3870