વહીવટી સુધારણા અને જાહેર ફરિયાદ વિભાગ (DARPG)એ સુશાસન સપ્તાહ 2025 લોન્ચ કર્યું છે, જે 19 થી 25 ડિસેમ્બર દરમિયાન ઉજવવામાં આવશે. DARPG સચિવ રચના શાહે આજે દેશવ્યાપી ‘પ્રશાસન ગામ કી ઓર’ અભિયાન માટેની માર્ગદર્શિકા જાહેર કરી હતી. આ લોન્ચિંગ સાથે જ પાયાના સ્તરે સેવા વિતરણ પર મજબૂત ધ્યાન કેન્દ્રિત કરીને નાગરિક-કેન્દ્રીય શાસનને મજબૂત કરવાના ઉદ્દેશ્ય સાથે સપ્તાહભરના વહીવટી આઉટરીચની શરૂઆત થઈ છે.

લોન્ચિંગ ઇવેન્ટને સંબોધતા સચિવે જણાવ્યું હતું કે, દર વર્ષે 25 ડિસેમ્બરે પૂર્વ પ્રધાનમંત્રી અટલ બિહારી વાજપેયીની જન્મજયંતી નિમિત્તે ઉજવવામાં આવતું સુશાસન સપ્તાહ, વર્ષોથી માત્ર એક સ્મૃતિ મહોત્સવ મટીને એક કેન્દ્રિત અને ક્રિયા-લક્ષી શાસન પહેલ બની ગયું છે. તેમણે ભારપૂર્વક જણાવ્યું હતું કે સુશાસન માત્ર નીતિઓ અને સંસ્થાકીય માળખામાં જ નહીં, પરંતુ જાહેર સેવાઓ નાગરિકો સુધી કેટલી અસરકારક રીતે પહોંચે છે અને ફરિયાદોનું કેટલી જવાબદારીપૂર્વક નિવારણ કરવામાં આવે છે તેમાં પ્રતિબિંબિત થાય છે.

‘પ્રશાસન ગામ કી ઓર’ પહેલ સુશાસન સપ્તાહ અભિયાનનો મુખ્ય ભાગ બની રહી છે, જેમાં જિલ્લા વહીવટીતંત્રને ફરિયાદ નિવારણ અને જાહેર સેવા વિતરણમાં મોખરે રાખવામાં આવ્યું છે. માર્ગદર્શિકા મુજબ, દેશભરના જિલ્લા કલેક્ટરો તાલુકા, બ્લોક અને પંચાયત સ્તરે વિશેષ કેમ્પનું આયોજન કરશે, જેથી સ્થળ પર ફરિયાદ નિવારણ અને જાહેર સેવાઓના ઉત્તમ વિતરણ માટે અધિકારીઓ અને નાગરિકો વચ્ચે સીધો સંવાદ થઈ શકે. આ અભિયાન બે તબક્કામાં અમલમાં મૂકવામાં આવી રહ્યું છે — 11 થી 18 ડિસેમ્બર સુધીનો પ્રારંભિક તબક્કો, અને ત્યારબાદ 19 થી 25 ડિસેમ્બર દરમિયાન સુશાસન સપ્તાહનો અમલીકરણ તબક્કો.

અમલીકરણ તબક્કા દરમિયાન, જિલ્લાઓ વિશેષ કેમ્પ, CPGRAMS અને રાજ્ય ફરિયાદ પોર્ટલ દ્વારા ઉકેલાયેલી ફરિયાદો, સેવા વિતરણ અરજીઓનો નિકાલ, ઓનલાઇન સેવાઓનો વિસ્તાર અને સુશાસન પ્રથાઓના દસ્તાવેજીકરણ સહિતના મુખ્ય પરિમાણો પર દૈનિક પ્રગતિનો અહેવાલ આપશે. પ્રારંભિક તબક્કાના ભાગરૂપે, જિલ્લા કલેક્ટરો અને જિલ્લા મેજિસ્ટ્રેટોએ ફરિયાદ નિવારણ, સેવા વિતરણ અને શાસન પહેલ અંગેના જિલ્લા-સ્તરના ડેટા અભિયાન પોર્ટલ પર અપલોડ કરવાનું શરૂ કરી દીધું છે. CPGRAMS અને રાજ્ય ફરિયાદ પોર્ટલ દ્વારા અભિયાન સમયગાળાની શરૂઆત સુધી પ્રાપ્ત થયેલી ફરિયાદોને આ સપ્તાહ દરમિયાન સમયબદ્ધ નિવારણ માટે લેવામાં આવી રહી છે.

સુશાસન સપ્તાહ 2025ના પ્રારંભિક તબક્કા દરમિયાન, રાજ્યો અને જિલ્લાઓએ પહેલેથી જ માપી શકાય તેવી પ્રગતિ નોંધાવી છે. 17 ડિસેમ્બર, 2025ના દૈનિક પ્રગતિ અહેવાલ મુજબ, રાજ્ય ફરિયાદ પોર્ટલ દ્વારા કુલ 2,11,098 ફરિયાદોનું નિવારણ કરવામાં આવ્યું છે, જ્યારે સહભાગી જિલ્લાઓમાં 21,71,179 સેવા વિતરણ અરજીઓનો નિકાલ કરવામાં આવ્યો છે. આ ઉપરાંત જિલ્લા કક્ષાએ 330 વર્કશોપ અને ફરિયાદ નિવારણ કેમ્પનું આયોજન કરવામાં આવ્યું છે. પ્રારંભિક તબક્કાના પરિણામે સુશાસનની 137 શ્રેષ્ઠ પ્રથાઓ અને જાહેર ફરિયાદ નિવારણ સંબંધિત 21 દસ્તાવેજી સફળતાની વાર્તાઓ ઓળખવામાં આવી છે, જેનો અભિયાન દરમિયાન વ્યાપક પ્રસાર કરવામાં આવશે.

અભિયાનના આગામી તબક્કા તરીકે, 23 ડિસેમ્બર, 2025ના રોજ તમામ જિલ્લાઓમાં જિલ્લા-સ્તરના પ્રસાર વર્કશોપનું આયોજન કરવામાં આવશે. આ વર્કશોપ 'ડિસ્ટ્રિક્ટ @100' પરની ચર્ચાઓ, છેલ્લા પાંચ વર્ષમાં અમલમાં મુકાયેલી ઓછામાં ઓછી ત્રણ સુશાસન પહેલોની રજૂઆત અને નાગરિકો, શિક્ષણવિદો અને જિલ્લા કક્ષાના અધિકારીઓ સાથેના સંવાદ પર ધ્યાન કેન્દ્રિત કરશે. વર્કશોપમાં જિલ્લા વહીવટીતંત્ર દ્વારા પ્રેઝન્ટેશન, સ્થાનિક નવીનતાઓ પર ચર્ચા, પ્રશ્ન-જવાબ સત્રો અને અભિયાન પોર્ટલ પર શેર કરવા માટેની શ્રેષ્ઠ પ્રથાઓના દસ્તાવેજીકરણનો સમાવેશ થશે.

અગાઉની આવૃત્તિઓના પરિણામોનો ઉલ્લેખ કરતા, સચિવે નોંધ્યું હતું કે સુશાસન સપ્તાહ 2024માં દેશભરમાં 18 લાખથી વધુ જાહેર ફરિયાદોનો નિકાલ અને લગભગ ત્રણ કરોડ સેવા વિતરણ અરજીઓ પર પ્રક્રિયા કરવામાં આવી હતી, સાથે જ એક હજારથી વધુ સુશાસન પ્રથાઓ અને સેંકડો નવીનતા આધારિત સફળતાની વાર્તાઓનું દસ્તાવેજીકરણ થયું હતું. તેમણે કહ્યું કે આ પરિણામો પાયાના સ્તરે વહીવટી પ્રતિભાવમાં સુધારો દર્શાવે છે.

જિલ્લા વહીવટીતંત્રોને મિશન મોડમાં આ અભિયાન ચલાવવા વિનંતી કરતા, સચિવે સ્પષ્ટપણે નિર્ધારિત અને માપી શકાય તેવા પરિણામો માટે હાકલ કરી હતી. તેમણે કહ્યું કે રાજ્યો અને જિલ્લાઓ દ્વારા સતત જોડાણ એ સુનિશ્ચિત કરવા માટે મહત્વપૂર્ણ રહેશે કે અભિયાનના પરિણામે નાગરિકોને મૂર્ત લાભ મળે.

ફરિયાદ નિવારણ, સેવા વિતરણ અને નવીનતાઓના દસ્તાવેજીકરણમાં પહેલેથી જ ગતિ દેખાઈ રહી હોવાથી, અધિકારીઓએ જણાવ્યું હતું કે સુશાસન સપ્તાહ 2025 વિશ્વાસ-આધારિત અને સર્વસમાવેશક શાસનને વધુ મજબૂત બનાવશે તેવી અપેક્ષા છે, જે દેશભરની રોજિંદી વહીવટી પદ્ધતિઓમાં જવાબદારી અને ઉત્તરદાયિત્વને સ્થાપિત કરવાના પ્રયત્નોને વેગ આપશે.

મહારાષ્ટ્ર સરકારના મુખ્ય સચિવ દ્વારા સંબોધન કરવામાં આવ્યું હતું, જ્યારે બિહાર સરકારના મુખ્ય સચિવે પણ વિડિયો કોન્ફરન્સિંગ દ્વારા સભાને સંબોધિત કરી હતી. દેશના વિવિધ ભાગોના જિલ્લા વહીવટીતંત્રોએ પણ વિડિયો કોન્ફરન્સ દ્વારા લોન્ચિંગમાં ભાગ લીધો હતો, જે અભિયાન સાથે દેશવ્યાપી જોડાણ દર્શાવે છે. અધિક સચિવ પુનિત યાદવે કાર્યક્રમનું સંકલન અને સંચાલન કર્યું હતું અને તેમની ટિપ્પણીમાં તમામ સહભાગી અધિકારીઓને ‘પ્રશાસન ગામ કી ઓર’ પહેલમાં સક્રિયપણે ભાગ લેવા અને સુશાસન સપ્તાહ અભિયાનના સફળ અમલીકરણની ખાતરી કરવા સામૂહિક રીતે કામ કરવા વિનંતી કરી હતી.

SM/BS/GP/JD

(रिलीज़ आईडी: 2206788) आगंतुक पटल : 16