اختراع، دیہی صنعت اور کاروبار کے فروغ کی اسکیم (اَسپائر)، جسے وزارتِ ایم ایس ایم ای نافذ کر رہی ہے، کا مقصد دیہی علاقوں میں کاروباری سرگرمیوں اور ذریعۂ معاش کے مواقع کو فروغ دینا ہے۔ اس اسکیم کا بنیادی ہدف مہارتوں کی تربیت، انکیوبیشن اور مائیکرو کاروباری اداروں کی معاونت کے ذریعے روزگار کے مواقع پیدا کرنے کے لیے ایک سازگار ماحول فراہم کرنا ہے۔

اب تک ملک بھر میں 109 مقامی کاروباری انکیوبیٹرز منظور کیے جا چکے ہیں۔ اس اسکیم کے تحت مجموعی طور پر 1,16,726 مستفیدین کو تربیت دی گئی، جن میں سے 18,444 افراد خود روزگار اختیار کر چکے ہیں، 13,824 افراد کو اجرتی ملازمت حاصل ہوئی ہے اور 1,141 مائیکرو کاروباری ادارے قائم کیے گئے ہیں۔

وزارت نے 2022 سے زمرہ جاتی (درج فہرست ذاتیں / درج فہرست قبائل / دیگر پسماندہ طبقات / عمومی زمرہ) اور جنس کی بنیاد پر اعداد و شمار جمع کرنا شروع کیا۔ 2022 کے بعد تربیت حاصل کرنے والے 56,721 مستفیدین میں سے 27,970 خواتین ہیں، 8,365 کا تعلق درج فہرست ذاتوں سے ہے، اور 9,311 درج فہرست قبائل سے تعلق رکھتے ہیں۔

حکومت نے، دیگر اقدامات کے ساتھ ساتھ، خواتین اور درج فہرست ذاتوں و درج فہرست قبائل کے کاروباری افراد کو فروغ دینے کے لیے درج ذیل اقدامات کیے ہیں:

(i) ملک میں کاروباری افراد تک رسائی بڑھانے کے لیے، جن میں درج فہرست ذاتوں، درج فہرست قبائل اور خواتین شامل ہیں، وزارتِ ایم ایس ایم ای کے فیلڈ دفاتر ریاستوں اور مرکز کے زیرِ انتظام علاقوں کے ایم ایس ایم ای / صنعت محکموں اور دیگر شراکت دار اداروں،جیسے کریڈٹ گارنٹی ٹرسٹ برائے مائیکرو اور چھوٹے کاروبار، اسمال انڈسٹریز ڈیولپمنٹ بینک آف انڈیا، بینکوں اور ایم ایس ایم ای انجمنوں کے اشتراک سے مختلف پروگرام منعقد کرتے ہیں۔

(ii) وزارتِ ایم ایس ایم ای قومی درج فہرست ذات و درج فہرست قبائل ہَب اسکیم نافذ کر رہی ہے، جس کا مقصد درج فہرست ذاتوں اور قبائل کے کاروباری افراد کی صلاحیتوں میں اضافہ کرنا ہے۔ اس کے علاوہ وزیر اعظم حمایتی اسکیم کے تحت درج فہرست ذاتوں، درج فہرست قبائل اور خواتین کے لیے سپلائر/وینڈر ڈیولپمنٹ پروگرامز منعقد کیے جاتے ہیں۔ مرکزی عوامی شعبے کے ادارے بھی ایسے پروگرامز کا انعقاد کرتے ہیں۔

(iii) وزارتِ ایم ایس ایم ای نے 27 جون 2024 کو یشسونی مہم کا آغاز کیا، جس کا مقصد مختلف سرکاری اسکیموں کے بارے میں آگاہی پیدا کر کے خواتین کاروباری افراد کو بااختیار بنانا ہے، تاکہ انہیں رسمی نظام میں شمولیت، قرض تک رسائی، صلاحیت سازی اور رہنمائی (مینٹورشپ) حاصل ہو سکے۔

(iv) خواتین، درج فہرست ذاتوں اور درج فہرست قبائل کے نئے کاروبار شروع کرنے والے افراد کو دو کروڑ روپے تک کے مدتی قرضے فراہم کرنے کے لیے ایک نئی اسکیم کا اعلان مرکزی بجٹ 2025 میں کیا گیا ہے، جس کا مقصد ایم ایس ایم ایز کی ترقی اور فروغ ہے۔

(v) وزارتِ ایم ایس ایم ای پردھان منتری روزگار تخلیق پروگرام نافذ کر رہی ہے، جو قرض سے منسلک سبسڈی پر مبنی اسکیم ہے۔ اس کا مقصد غیر زرعی شعبے میں مائیکرو کاروباری ادارے قائم کر کے خود روزگار کے مواقع پیدا کرنا ہے، خاص طور پر روایتی ہنرمندوں اور دیہی و شہری بے روزگار نوجوانوں کی مدد کے ذریعے۔ اس اسکیم کے کل مستفیدین میں سے 39 فیصد خواتین ہیں، اور انہیں عمومی زمرے کے مائیکرو کاروباری اداروں کے مقابلے میں زیادہ سبسڈی (35 فیصد) فراہم کی جاتی ہے، جبکہ عمومی زمرے کے لیے یہ 25 فیصد تک ہے۔

(vi) وزارتِ ایم ایس ایم ای ایم ایس ایم ای چیمپئنز اسکیم بھی نافذ کر رہی ہے، جو ایک جامع نقطۂ نظر کے تحت مختلف اسکیموں کو یکجا، ہم آہنگ اور مربوط کرتی ہے۔ اس کا حتمی مقصد کاروباری اداروں کا انتخاب کر کے ان کے عمل کو جدید بنانا، ضیاع کم کرنا، کاروباری مسابقت کو مضبوط کرنا، اور انہیں قومی و عالمی سطح پر رسائی اور امتیاز حاصل کرنے میں مدد دینا ہے۔ اس اسکیم کے تین اجزا ہیں:

ایم ایس ایم ای پائیدار (زیڈ ای ڈی) سرٹیفکیشن اسکیم۔  ایم ایس ایم ای مسابقتی (لین) اسکیم۔ ایم ایس ایم ای اختراعی اسکیم (انکیوبیشن، ڈیزائن اور دانشورانہ املاک کے حقوق)

(vii) وزارتِ خرد، چھوٹے اور درمیانی درجے کے کاروبار نے ملک بھر میں 65 برآمدی سہولت مراکز قائم کیے ہیں، جن کا مقصد ایم ایس ایم ایز کو اپنی مصنوعات اور خدمات برآمد کرنے کے لیے رہنمائی اور عملی معاونت فراہم کرنا ہے۔ یہ مراکز ایم ایس ایم ای برآمد کنندگان کو مختلف اہم شعبوں میں جامع مدد فراہم کرتے ہیں، جن میں برآمدات سے متعلق اسکیموں اور مراعات کی معلومات، برآمدی ضوابط پر تربیت و ورکشاپس، برآمدی دستاویزات اور طریقۂ کار میں عملی رہنمائی، اور صنعتی انجمنوں، ریاستی حکومتوں اور ڈائریکٹوریٹ جنرل آف فارن ٹریڈ کے ساتھ رابطہ شامل ہے تاکہ ایم ایس ایم ایز کو سہولت فراہم کی جا سکے۔

یہ معلومات وزیرِ مملکت برائے خرد، چھوٹے اور درمیانی درجے کے کاروبار، محترمہ شوبھا کرندلاجے نے راجیہ سبھا میں ایک سوال کے تحریری جواب میں فراہم کیں۔

******

ش ح۔ ش ا ر۔ ول

Uno- 3295

(रिलीज़ आईडी: 2204884) आगंतुक पटल : 5