2025-ம் ஆண்டு நாடாளுமன்ற குளிர்காலக் கூட்டத்தொடர் தொடர்பாக விவாதிக்க, மத்திய பாதுகாப்பு அமைச்சர் திரு ராஜ்நாத் சிங் தலைமையில் 2025 நவம்பர் 30 அன்று  புதுதில்லியில் உள்ள நாடாளுமன்ற வளாகத்தில் அரசியல் கட்சித் தலைவர்களின் கூட்டம் நடைபெற்றது. இந்தக் கூட்டத்திற்கு மத்திய நாடாளுமன்ற விவகாரங்கள் மற்றும் சிறுபான்மையினர் நலத்துறை அமைச்சர் திரு கிரண் ரிஜிஜு அழைப்பு விடுத்திருந்தார். இந்தக் கூட்டத்தில் மத்திய சுகாதாரம் மற்றும் குடும்ப நலன், ரசாயனம் மற்றும் உரங்கள் துறை அமைச்சர் திரு ஜெகத் பிரகாஷ் நட்டா, சட்டம் மற்றும் நீதித்துறை இணையமைச்சர் (தனிப்பொறுப்பு) திரு அர்ஜுன் ராம் மெக்வால், தகவல் ஒலிபரப்பு மற்றும் நாடாளுமன்ற விவகாரங்கள் துறை இணையமைச்சர் டாக்டர் எல். முருகன் ஆகியோரும் கலந்து கொண்டனர். இந்தக் கூட்டத்தில் அமைச்சர்கள் மற்றும்  36 அரசியல் கட்சிகளைச் சேர்ந்த மொத்தம் 50 தலைவர்கள் கலந்து கொண்டனர்.

கூட்டத்தில் திரு ராஜ்நாத் சிங் அறிமுக உரை நிகழ்த்தினார். அதன் பிறகு, நாடாளுமன்ற விவகாரங்கள் துறை அமைச்சர் திரு கிரண் ரிஜிஜு கூட்டத்தை நடத்தினார். 2025 நாடாளுமன்ற குளிர்காலக் கூட்டத்தொடர் டிசம்பர் 1, 2025 (திங்கட்கிழமை) தொடங்கி, டிசம்பர் 19, 2025 (வெள்ளிக்கிழமை) அன்று முடிவடையும் என்றும் அவர் தெரிவித்தார். 19 நாட்கள் நடைபெறும் கூட்டத்தொடரில் மொத்தம் 15 அமர்வுகள் நடைபெறும்.

இந்தக் கூட்டத்தொடரில் எடுத்துக் கொள்ளப்படுவதற்காக, உத்தேசமாக, 14 சட்ட  மற்றும் பிற அலுவல்கள் அடையாளம் காணப்பட்டுள்ளதாக திரு ரிஜிஜு மேலும் தெரிவித்தார்.

இரு அவைகளின் விதிகள்படி, வேறு எந்த முக்கியமான பிரச்சனையையும் விவாதிக்க அரசு தயாராக இருப்பதாகவும் நாடாளுமன்ற விவகாரங்கள்துறை அமைச்சர் தெரிவித்தார். வரவிருக்கும் நாடாளுமன்ற குளிர்காலக் கூட்டத்தொடரின் போது தாங்கள் எழுப்ப இருக்கும் பிரச்சனைகள் குறித்து பல்வேறு அரசியல் கட்சிகளின் தலைவர்கள் தங்கள் கருத்துக்களைத் தெரிவித்ததுடன், அரசுக்கு முழு ஒத்துழைப்பை வழங்குவதாக உறுதியளித்தனர்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2196539&reg=1&lang=1  

***

AD/RB/RK