അന്താരാഷ്ട്ര ഗീതാ മഹോത്സവം 2025 ൻ്റെ  ഭാഗമായി ഹരിയാനയിലെ കുരുക്ഷേത്രയിൽ ഇന്ന് സംഘടിപ്പിച്ച അഖില ഭാരതീയ ദേവസ്ഥാനം സമ്മേളനത്തിൽ ഉപരാഷ്ട്രപതി ശ്രീ സി.പി. രാധാകൃഷ്ണൻ മുഖ്യാതിഥിയായി പങ്കെടുത്തു.

"വേദങ്ങളുടെ നാട്" എന്നറിയപ്പെടുന്ന കുരുക്ഷേത്രയിലെ പുണ്യഭൂമിയിൽ നിൽക്കാൻ കഴിഞ്ഞതിൽ തനിക്ക് അതിയായ ചാരിതാർഥ്യമുണ്ടെന്ന് ചടങ്ങിൽ സംസാരിച്ച ഉപരാഷ്ട്രപതി പറഞ്ഞു.ഭഗവാൻ ശ്രീകൃഷ്ണൻ അർജുനന് ഭഗവദ്ഗീതയുടെ ദിവ്യജ്ഞാനം പകർന്നു കൊടുത്ത സ്ഥലമെന്ന നിലയിൽ ആയിരക്കണക്കിന് വർഷങ്ങളായി ഈ പുണ്യസ്ഥലം ആദരിക്കപ്പെടുന്നുവെന്ന് അദ്ദേഹം പറഞ്ഞു. അധർമ്മം എത്ര ശക്തമായിരുന്നാലും ആത്യന്തികമായ ജയം ധർമ്മത്തിനായിരിക്കും എന്ന ശാശ്വത സത്യത്തിൻ്റെ  ഓർമ്മപ്പെടുത്തലാണ് കുരുക്ഷേത്രമെന്ന് ഉപരാഷ്ട്രപതി പറഞ്ഞു.

ഭഗവദ്ഗീതയെ ഒരു മതഗ്രന്ഥം എന്നതിലുപരി 'നീതിപൂർവകമായ ജീവിതത്തിനും,ധീരമായ പ്രവർത്തനത്തിനും, പ്രബുദ്ധമായ ബോധത്തിനും മാർഗ്ഗദർശനം നൽകുന്ന സർവകാലിക ദിശാസൂചിക” എന്ന് ഉപരാഷ്ട്രപതി വിശേഷിപ്പിച്ചു.ധർമ്മ മാർഗ്ഗത്തിലൂടെ കർമ്മത്തിൽ ശ്രദ്ധ കേന്ദ്രീകരിക്കാനുള്ള ഭഗവാൻ ശ്രീകൃഷ്ണൻ്റെ  ആഹ്വാനം അർത്ഥപൂർണ്ണവും ലക്ഷ്യബോധമുള്ള ഒരു ജീവിതം നയിക്കുന്നതിനുള്ള താക്കോലാണെന്ന് അദ്ദേഹം ഊന്നിപ്പറഞ്ഞു.

ശക്തമായ വ്യക്തിത്വരൂപീകരണത്തിൻ്റെ  പ്രാധാന്യത്തെ പരാമർശിക്കവേ, സമ്പത്തിനേക്കാളും മറ്റ് ലൗകിക നേട്ടങ്ങളെക്കാളും വളരെ പ്രധാനം സ്വഭാവമാണെന്ന് അദ്ദേഹം പറഞ്ഞു. ലക്ഷ്യത്തിൻ്റെ  വ്യക്തതയിലും നീതിയോടുള്ള സമർപ്പണത്തിലുമാണ് ധാർമ്മിക ശക്തി ഉണ്ടാകുന്നതെന്ന് നമ്മെ ഓർമ്മപ്പെടുത്തുന്ന ഗീത ,മനുഷ്യരാശിയ്ക്ക്  സദ്‌ഗുണപൂർണ്ണവും അച്ചടക്കമുള്ളതുമായ ജീവിതം വളർത്തിയെടുക്കുന്നതിന് മാർഗ്ഗദർശനം നൽകുന്നുവെന്നും അദ്ദേഹം ചൂണ്ടിക്കാട്ടി.

ദ്രുതഗതിയിലുള്ള മാറ്റങ്ങളുടെ ഈ കാലഘട്ടത്തിൽ,വ്യക്തി,സമൂഹം,രാഷ്ട്രം എന്നിവയെ സമാധാനത്തിലേക്കും ഐക്യത്തിലേക്കും നയിക്കുന്നതിൽ ഗീതാസന്ദേശത്തിന് എന്നും പ്രസക്തിയുണ്ടെന്ന് ആവർത്തിച്ച ഉപരാഷ്ട്രപതി അതിൻ്റെ  സമകാലിക പ്രസക്തിയെ എടുത്തുപറഞ്ഞു.
 
പരിപാടിയുടെ വളർച്ചയെ അഭിനന്ദിക്കവേ,വർഷം തോറും ആഘോഷിക്കുന്ന ഗീതാജയന്തി കഴിഞ്ഞ ഒമ്പത് വർഷമായി ഒരു ആഗോള സാംസ്കാരിക- ആത്മീയ ആഘോഷമായി പരിണമിച്ചിട്ടുണ്ടെന്ന് അദ്ദേഹം പറഞ്ഞു. മഹോത്സവത്തെ അന്താരാഷ്ട്ര തലത്തിലേക്ക് ഉയർത്തിയതിനും ഹരിയാന സംസ്‌ഥാനത്തെ പുരോഗതിയുടെ പുതിയ നാഴികക്കല്ലുകളിലേക്ക് നയിച്ചതിനും ഹരിയാന സർക്കാരിനെയും മുഖ്യമന്ത്രി ശ്രീ നയാബ് സിംഗ് സൈനിയെയും ഉപരാഷ്ട്രപതി അഭിനന്ദിച്ചു.

ഭഗവാൻ കൃഷ്ണൻ്റെ  ദിവ്യഗുണങ്ങളും ശ്രീമദ് ഭഗവദ് ഗീതയുടെ ഉപദേശങ്ങളും, സനാതന ധർമ്മത്തിൻ്റെ  സമ്പന്നമായ സാംസ്കാരിക പാരമ്പര്യവും ഏതു പ്രായത്തിലുമുള്ള ആളുകൾക്കും പ്രാപ്യമായ രീതിയിൽ അവതരിപ്പിക്കുന്നതിൽ അന്താരാഷ്ട്ര ഗീതാ മഹോത്സവം നൽകിയ സംഭാവനകളിൽ ഉപരാഷ്ട്രപതി സംതൃപ്തി പ്രകടിപ്പിച്ചു.

നൂറ്റാണ്ടുകളായി ഭാരതത്തെ നിലനിർത്തുന്ന മൂല്യങ്ങളായ ധർമ്മം, കടമ, സ്വയം നിയന്ത്രണം,മികവിനായുള്ള പരിശ്രമം എന്നിവയെ ശക്തിപ്പെടുത്തുന്ന വേദിയായി ഗീതാമഹോത്സവത്തെ അദ്ദേഹം പ്രശംസിച്ചു. പ്രധാനമന്ത്രി ശ്രീ നരേന്ദ്ര മോദി ആവിഷ്കരിച്ച '2047 ൽ ആത്മനിർഭർ ഭാരതം,വികസിത ഭാരതം'എന്ന ദേശീയ കാഴ്ചപ്പാടിൻ്റെ  അടിത്തറയാണ് ഈ മൂല്യങ്ങളെന്നും അദ്ദേഹം പറഞ്ഞു.

 ഇന്ത്യയിലുടനീളം നിന്നുള്ള സന്യാസിമാരെയും പണ്ഡിതന്മാരെയും സാങ്കേതിക വിദഗ്ധരെയും കലാകാരന്മാരെയും സാംസ്കാരിക നേതാക്കളെയും ഒരുകുടക്കീഴിൽ അണിനിരത്തിക്കൊണ്ട് കുരുക്ഷേത്ര ഡെവലപ്മെൻ്റ്  ബോർഡും ഗീത നോളഡ്ജ് ഇൻസ്റ്റിറ്റ്യൂട്ടും സംയുക്തമായി സംഘടിപ്പിച്ച ഈ സമ്മേളനത്തെ ഉപരാഷ്ട്രപതി അഭിനന്ദിച്ചു. ഇത്തരം കൂട്ടായ്മകൾ സംവാദങ്ങളെ ആഴത്തിലാക്കുകയും സാംസ്കാരിക കൈമാറ്റങ്ങളെ ശക്തിപ്പെടുത്തുകയും ഭഗവദ് ഗീതയെ ദൂരസ്ഥമായ ഒരു ഗ്രന്ഥമെന്നതിലുപരി ധൈര്യം, വിനയം, ജ്ഞാനം എന്നിവയുടെ സജീവ മാർഗ്ഗദർശനമായി കാണാൻ യുവമനസുകളെ പ്രചോദിപ്പിക്കുകയും ചെയ്യുന്നുവെന്ന് ഉപരാഷ്ട്രപതി നിരീക്ഷിച്ചു.

 ഭഗവദ് ഗീതയുടെ ശാശ്വത ഉപദേശങ്ങളെ ഹൃദയത്തിൽ സ്വീകരിക്കണമെന്ന് സമ്മേളനത്തിൽ പങ്കെടുത്തവരോടു അഭ്യർത്ഥിച്ച ശ്രീ സി. പി. രാധാകൃഷ്ണൻ തൻ്റെ  പ്രസംഗം ഉപസംഹരിക്കവേ , ധാർമ്മിക ബോധത്തോടെ പ്രവർത്തിക്കുക, ജ്ഞാനം അന്വേഷിക്കുക, സമാധാനം സ്വീകരിക്കുക , മനുഷ്യകുലത്തിൻ്റെ  ക്ഷേമത്തിന് സംഭാവന നൽകുക എന്നീ സന്ദേശങ്ങളാണ് ഗീത നമ്മെ പഠിപ്പിക്കുന്നതെന്ന് ചൂണ്ടിക്കാട്ടി.

ഹരിയാന മുഖ്യമന്ത്രി ശ്രീ നയാബ് സിംഗ് സൈനി, സ്വാമി ജ്ഞാനാനന്ദ് ജി മഹാരാജ്, മറ്റ് വിശിഷ്ട വ്യക്തികൾ എന്നിവർ ചടങ്ങിൽ പങ്കെടുത്തു.

നേരത്തെ, കുരുക്ഷേത്രയിലെ മാ ഭദ്രകാളി ശക്തിപീഠ ക്ഷേത്രം സന്ദർശിച്ച ഉപരാഷ്ട്രപതി ശ്രീ സി.പി. രാധാകൃഷ്ണൻ അവിടെ പ്രാർത്ഥനകളും നടത്തി.

*********