उपराष्ट्रपती कार्यालय
कुरुक्षेत्रमध्ये झालेल्या अखिल भारतीय देवस्थानम संमेलनाला उपराष्ट्रपती सी. पी. राधाकृष्णन यांनी संबोधित केले
प्रविष्टि तिथि:
30 NOV 2025 4:28PM by PIB Mumbai
आंतरराष्ट्रीय गीता महोत्सव 2025च्या निमित्ताने हरियाणातील कुरुक्षेत्र इथे आयोजित अखिल भारतीय देवस्थानम संम्मेलनात उपराष्ट्रपती सी. पी. राधाकृष्णन प्रमुख पाहुणे म्हणून सहभागी झाले होते.
या प्रसंगी बोलताना, उपराष्ट्रपती म्हणाले की, "वेदांची भूमी" अशी ओळख असणाऱ्या कुरुक्षेत्राच्या पवित्र भूमीवर उभे राहून बोलण्याचा सन्मान मला प्राप्त झाला आहे. भगवान श्रीकृष्णांनी अर्जुनाला भगवद्गीतेचे दिव्य ज्ञान दिले, ते स्थळ म्हणून हे स्थान हजारो वर्षांपासून पवित्र, आदरणीय मानले जात आहे, असे ते म्हणाले . अधर्म कितीही बळकट असला तरीही अधर्मावर शेवटी धर्माचाच विजय होत असल्याची एक कालातीत आठवण कुरुक्षेत्र करून देत असल्याचे त्यांनी सांगितले.
उपराष्ट्रपतींनी भगवद्गीता हा केवळ धार्मिक ग्रंथ नाही तर - "धार्मिक जीवन, धाडसी कृती आणि ज्ञानाची जाणीव यासाठीचा वैश्विक मार्गदर्शक" असल्याचे प्रतिपादन केले. धर्माच्या मार्गदर्शनाखाली कर्मावर लक्ष केंद्रित करण्याचे भगवान श्रीकृष्णाचे आवाहन हे अर्थपूर्ण आणि हेतूपूर्ण जीवन जगण्याची गुरुकिल्ली आहे यावर त्यांनी भर दिला.
वेगवान बदलाच्या काळात, गीता प्रत्येक व्यक्ती, समाज आणि राष्ट्रांना शांतता आणि सौहार्द यांचे मार्गदर्शन करत राहील अशी आशा व्यक्त करतानाच उपराष्ट्रपतींनी गीतेची चिरकाल प्रासंगिकता अधोरेखित केली.
शतकानुशतके भारताला टिकवून ठेवणारी मूल्ये- धर्म, कर्तव्य, स्वयंशिस्त आणि उत्कृष्टतेचा ध्यास यांना बळकटी देणारे व्यासपीठ म्हणून या महोत्सवाचे कौतुक केले. पंतप्रदान नरेंद्र मोदी यांच्या आत्मनिर्भर भारत आणि विकसित भारत@2047 या राष्ट्रीय दृष्टीकोनाचा पाया याच मूल्यांमध्ये असल्याचे त्यांनी सांगितले.
आपल्या भाषणाचा समारोप करताना, सी. पी राधाकृष्णन यांनी उपस्थितांना, नीतीमत्तापूर्ण वर्तणूक, ज्ञानप्राप्ती , शांततेचा स्वीकार आणि मानवतेच्या कल्याणासाठी योगदान देणे ही भगवद्गीतेची कालातीत शिकवण आत्मसात करण्याचे आवाहन केले.
***
सुषमा काणे/विजयालक्ष्मी साळवी साने/परशुराम कोर
***
सोशल मिडियावर आम्हाला फॉलो करा:
@PIBMumbai 
/PIBMumbai 
/pibmumbai 
pibmumbai[at]gmail[dot]com 
/PIBMumbai 
/pibmumbai
(रिलीज़ आईडी: 2196591)
आगंतुक पटल : 5