دیہی ترقیات، زراعت اور کاشتکاروں کی فلاح و بہبود کے مرکزی وزیر جناب شیوراج سنگھ چوہان آئندہ روز (یکم دسمبر 2025 کو)نئی دہلی میں واقع سندر نرسری میں سرس آجیویکا فوڈ فیسٹیول 2025 کا افتتاح کریں گے۔ اس موقع پر خواتین و اطفال کی ترقی کی مرکزی وزیر محترمہ انپورنا دیوی مہمان ذی وقار کے طور پر موجود ہوں گی۔ دیہی ترقیات اور مواصلات کے وزیر مملکت جناب چندرشیکھر پیمسانی اور دیہی ترقیات کے وزیر مملکت جناب کملیش پاسوان بھی معزز مہمانان کے طور پر اس تقریب میں شرکت کریں گے۔

اس میلے میں دہلی کے شہری ایک مرتبہ پھر، سندر نرسری  میں بھارتی ثقافت اور کھانوں کی ایک شاندار جھلک دیکھیں گے۔ 25 ریاستوں کی تقریباً 300 لکھپتی دیدیاں (خواتین صنعت کار) اور سیلف ہیلپ گروپوں سے وابستہ خواتین  62 اسٹالوں کے ذریعہ سرس فوڈ فیسٹیول میں شرکت کر رہی ہیں۔ 9 دسمبر 2025 تک جاری رہنے والا یہ میلا سندر نرسری، بھارت اسکاؤٹس اینڈ گائڈس مارگ، نظام الدین، نزد ہمایوں کا مقبرہ، نئی دہلی میں منعقد کیا جا رہا ہے۔ یہ فوڈ فیسٹیول عوام الناس کے لیے صبح 11:30 سے رات 9:30 بجے تک کھلا رہے گا۔

سرس فوڈ فیسٹیول 2025 خواتین کی اختیارکاری کی ایک منفرد مثال ہے، جسے قومی راجدھانی میں پیش کیا جا رہا ہے۔ اس کا مقصد صرف عوام کو ملک کے متنوع کھانوں کی ثقافت سے متعارف کرانا نہیں بلکہ دیگر دیہی خواتین کو ترغیب فراہم کرانا بھی ہے۔ دیہی ترقیات کی وزارت کے فلیگ شپ پروگرام، قومی دیہی روزی روٹی مشن کے تحت ملک بھر کے سیلف ہیلپ گروپوں کی خواتین نے دیہی مصنوعات کی تیاری اور اپنی متعلقہ ریاستوں میں روایتی پکوان تیار کرنے میں مضبوط ہنرمندی پیدا کی ہے۔

سرس فوڈ فیسٹیول کے ذریعہ، دہلی اور ہمسایہ ریاستوں کے عوام  25 ریاستوں کی ثقافت اور ذائقوں کا سنگم ملاحظہ کر سکیں گے۔ انہیں ان ریاستوں کے سماجی تانے بانے کو جاننے، ان کے مشہور کھانوں اور ان کے ذائقے سے لطف اندوز ہونے  کا موقع بھی حاصل ہوگا۔ میلے کے 62 اسٹالوں میں سے 50 اسٹال کھانے پینے کی اشیاء فروخت کریں گے، جبکہ 12 اسٹال  فطری خوردنی مصنوعات پیش کریں گے۔

فوڈ فیسٹیول کا یہ ایڈیشن شائقین کو 500 سے زائد کھانوں سے لطف اندوز ہونے کا موقع فراہم کرے گا۔ ان پکوانوں میں ہماچلی سِڈو، اتراکھنڈ کی تندور چائے، جموں و کشمیر کے مشہور کلاری کلچے، حیدرآبادی دم بریانی، شمال مشرقی مومو، بنگالی تلی ہوئی مچھلی سمیت راجستھان کی کیر ساگری، گٹے کی سبزی،باجرے کی روٹی، بنگال کی ہلسا، فش کری، تلنگانہ کا چکن، کیرالہ کی مالابار بریانی، بہار کا لٹی چوکھا، پنجاب کا سرسوں کا ساگ اور مکے کی روٹی سمیت دیگر ریاستوں کے بہترین ذائقے دار پکوان دستیاب ہوں گے۔ اس میں ہریانہ، اروناچل پردیش، مہاراشٹر، کیرالہ، آسام، اترپردیش، اتراکھنڈ، گوا اور گجرات سمیت دیگر ریاستیں بھی حصہ لے رہی ہیں۔

**********

 (ش ح –ا ب ن)

U.No:2058