केंद्रीय ग्रामीण विकास, कृषी आणि शेतकरी कल्याण मंत्री शिवराज सिंह चौहान उद्या 1 डिसेंबर 2025 नवी दिल्लीतील सुंदर नर्सरी येथे सरस आजीविका फूड फेस्टिव्हल 2025 चे उद्घाटन करणार आहेत. या प्रसंगी, केंद्रीय महिला आणि बालविकास मंत्री अन्नपूर्णा देवी, सन्माननीय पाहुणे म्हणून उपस्थित राहतील.

या महोत्सवात, दिल्लीतील नागरिकांना भारतीय संस्कृती आणि पाककृतींची झलक पुन्हा एकदा अनुभवता येणार आहे. देशभरातील 25 राज्यांमधून सुमारे 300 'लखपती दीदी' (महिला उद्योजक) आणि स्वयं-सहाय्यता गटातील महिला 62 स्टॉल्सद्वारे सरस फूड फेस्टिव्हलमध्ये सहभागी होत आहेत. नवी दिल्लीतील हुमायूनच्या थडग्याजवळील निजामुद्दीन येथील भारत स्काउट्स अँड गाईड्स मार्गावरील सुंदर नर्सरी येथे आयोजित करण्यात आलेला हा महोत्सव 9 डिसेंबर 2025 पर्यंत सुरू राहील. हा फूड फेस्टिव्हल सकाळी 11:30 ते रात्री 9:30 पर्यंत पर्यटकांसाठी खुला असेल.

सरस फूड फेस्टिव्हल 2025 हे राष्ट्रीय राजधानीत महिला सक्षमीकरणाचे अद्वितीय उदाहरण आहे. त्याचा उद्देश केवळ देशाच्या वैविध्यपूर्ण खाद्य संस्कृतीची लोकांना ओळख करून देणे हा नसून इतर ग्रामीण महिलांना प्रेरणा देणे हादेखील आहे. ग्रामीण विकास मंत्रालयाचा प्रमुख कार्यक्रम, राष्ट्रीय ग्रामीण उपजीविका अभियानांतर्गत, देशभरातील स्वयं-साहाय्यता गटांमधील महिलांनी ग्रामीण उत्पादने तयार करण्यात, तसेच त्यांच्या संबंधित राज्यांमधील पारंपरिक पदार्थ तयार करण्यात विशेष कौशल्ये पारंगत केली आहेत.

सरस फूड फेस्टिव्हलच्या माध्यमातून, दिल्ली आणि शेजारील राज्यांमधील लोकांना 25 राज्यांमधील संस्कृती आणि चवींचा संगम पाहता येणार आहे. त्यांना या राज्यांच्या सामाजिक रचनेबद्दल जाणून घेण्याची, त्यांच्याकडील प्रसिद्ध पदार्थांचा शोध घेण्याची आणि त्यांच्या चवीचा आस्वाद घेण्याची संधीदेखील मिळणार आहे. महोत्सवातील 62 स्टॉल्सपैकी 50 स्टॉल्सवर ताजे अन्नपदार्थ, तर 12 स्टॉल्सवर नैसर्गिक खाद्यपदार्थ उपलब्ध असतील.***

***

सुषमा काणे/पर्णिका हेदवकर/परशुराम कोर

*** 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai