اطلاعات و ٹیکنالوجی  کے مرکزی وزیر جناب اشونی ویشنو اور مرکزی وزیر مملکت جناب رونیت سنگھ موہالی میں سیمی کنڈکٹر لیبارٹری (ایس سی ایل) کا دورہ کرنے کے لیے پہنچے تاکہ کام کی پیش رفت اور جاری جدید کاری کی سرگرمیوں کا جائزہ لیا جاسکے۔

دورے کے دوران جناب اشونی ویشنوو نے اعلان کیا کہ حکومتِ ہند ایس سی ایل کو جدید بنانے اور وسعت دینے کے لیے 4,500 کروڑ روپے سرمایہ کاری کرے گی۔ وزیر موصوف نے یقین دہانی کراتے ہوئے کہا، "اس میں کوئی شک نہیں کہ ایس سی ایل موہالی کو جدید بنایا جائے گا اور اسے نجی ملکیت میں منتقل نہیں کیا جائے گا۔ ایک بڑی منزل آگے ہے، اور ہندوستان اس کے لیے تیار ہے۔"
وزیر موصوف ایس سی ایل موہالی میں ایک پروگرام کے دوران بات کر رہے تھے جہاں 17 تعلیمی اداروں کے طلباء کے ڈیزائن کردہ 28 چپس حوالے کیے گئے۔

ان چپس کو الیکٹرونک ڈیزائن آٹومیشن (ای ڈی اے) ٹولز کا استعمال کرتے ہوئے ڈیزائن کیا گیا ہے جو طلباء کو چپس سے اسٹارٹ اپ (سی 2 ایس) پروگرام کے حصے کے طور پر فراہم کیے گئے ہیں۔ اس کے ساتھ، اس پروگرام کے ایک حصے کے طور پر طلباء کی طرف سے ڈیزائن کردہ کل 56 چپس کو ایس سی ایل میں تیار کیا گیا ہے۔

وزیر موصوف نے سیمی کنڈکٹر پروسیس گیلری اور ابیوتھنم تربیتی بلاک کا بھی افتتاح کیا۔ سیمی کنڈکٹر پروسیس گیلری ایک صاف کمرے کی لیب کی نمائش کرتی ہے جو پرانی نسل کے فیبریکیشن آلات سے لیس ہے۔ یہ طلباء کو سیمی کنڈکٹر فیب اور اے ٹی ایم پی کی سہولت کا حقیقی احساس فراہم کرتا ہے۔ ابیوتھنم تربیتی بلاک میں آن لائن اور آف لائن سیمی کنڈکٹر ٹریننگ ماڈیول اور بر وقت آگ اور حفاضتی تربیت شامل ہے۔

ایس سی ایل موہالی کے لیے روڈ میپ

جناب  اشونی ویشنو نے کہا کہ وزیر اعظم نریندر مودی نے ایس سی ایل موہالی کے لیے ایک واضح روڈ میپ تیار کیا ہے، اور انہوں نے اہم وژن کے شعبوں کا خاکہ پیش کیا ہے۔

ایس سی ایل کو جدید خطوط پر اپ گریڈ کیا جائے گا اور حکومت 4500 کروڑ روپے کی سرمایہ کاری کرے گی۔ اس میں پیداواری صلاحیت میں بڑے پیمانے پر اضافہ شامل ہوگا، موجودہ سطح سے ویفرز کی 100 گنا پیداوار کا ہدف ہے۔

ایس سی ایل موہالی طلباء، محققین اور سٹارٹ اپس کو فیبریکیشن کی سہولیات فراہم کرتے ہوئے تعاون کرنا جاری رکھے گا جو ان کے چپ ڈیزائن کو اصلی سلکان میں بدل دیتے ہیں۔

عالمی پیمانے کے ای ڈی اے  آلات

ہندوستان ان چند ممالک میں سے ایک ہے جہاں تقریباً 300 یونیورسٹیوں کے طلباء حکومت کی مدد سے فراہم کردہ عالمی معیار کے ای ڈی اے  آلات کا استعمال کرتے ہوئے سیمی کنڈکٹر چپس ڈیزائن کر رہے ہیں۔ شری اشونی ویشنو نے کہا کہ یہ ماحولیاتی نظام دنیا میں منفرد ہے۔

انہوں نے اس بات کی تصدیق کی کہ ایس سی ایل ہنر کی نشوونما، اختراعات اور اسٹارٹ اپس کے لیے ایک پلیٹ فارم رہے گا۔ ایس سی ایل کی جانب سے اب تک فراہم کی جانے والی یہ فیبریکیشن سپورٹ مستقبل میں مزید بڑھے گی۔

ایس سی ایل کی مزید جدید کاری کے پروگرام کی حمایت کے لیے حکومت ہند نے پنجاب حکومت سے 25 ایکڑ اراضی الاٹ کرنے کی بھی درخواست کی ہے۔

اسٹریٹجک علاقوں میں آتم نربھرتا

وزیر موصوف نے مزید کہا کہ اسٹریٹجک شعبوں میں خود انحصاری ضروری ہے، اور ہندوستان دیسی چپ کی ترقی کے لیے ایک ماحولیاتی نظام بنائے گا۔

سی ڈی اے سی، ڈی آر ڈی او  اور دیگر تنظیموں پر مشتمل ایک مضبوط کنسورشیم سودیشی چپس کے ڈیزائن، مصنوعات کی ترقی اور مینوفیکچرنگ پر مل کر کام کرے گا۔

 

************

ش ح ۔     م د   ۔  م  ص

(U :    2005    )

(रिलीज़ आईडी: 2196060) आगंतुक पटल : 4