പ്രധാന വസ്തുതകൾ

• പരാതി പരിഹാര സമിതികളിലും ഉപദേശക സമിതികളിലും കൂടുതൽ പ്രാതിനിധ്യം നല്കുന്നതിലൂടെ  തൊഴിലിടങ്ങളിലെ  സ്ത്രീകളുടെ പങ്ക് തൊഴിൽ നിയമങ്ങൾ ശക്തിപ്പെടുത്തുന്നു.
• 26 ആഴ്ചത്തെ അവധി, ലളിതമായ സർട്ടിഫിക്കേഷൻ നടപടികൾ, മുലയൂട്ടാനുള്ള ഇടവേളകൾ, നിർബന്ധിത ശിശു പരിപാലന സൗകര്യം എന്നിവ പുതുക്കിയ പ്രസവ ആനുകൂല്യങ്ങളിൽ ഉൾപ്പെടുന്നു.
• സാധ്യമായ ഇടങ്ങളിലെല്ലാം പ്രസവാവധിക്ക് ശേഷം വീട്ടിലിരുന്ന് ജോലി ചെയ്യാനുള്ള ഓപ്ഷനുകളിലൂടെ സ്ത്രീകൾക്ക് അധിക സൗകര്യം ലഭിക്കുന്നു.
• വിവേചനം കർശനമായി നിരോധിക്കുകയും തുല്യ ജോലിക്ക് തുല്യ വേതനം ഉറപ്പാക്കുകയും ചെയ്യുന്നതിലൂടെ ഈ നിയമങ്ങൾ  ലിംഗസമത്വം ഉറപ്പാക്കുന്നു.

ആമുഖം

ഇന്ത്യയുടെ തൊഴിൽ ശക്തിയിലെ സുപ്രധാനവും വളർന്നുവരുന്നതുമായ വിഭാഗമാണ് സ്ത്രീകൾ. അവർക്കായി കൂടുതൽ ഉൾക്കൊള്ളുന്നതും സുരക്ഷിതവും അനുകൂലവുമായ തൊഴിൽ സാഹചര്യം സൃഷ്ടിക്കുന്നതിൽ പുതിയ തൊഴിൽ നിയമങ്ങൾ ഒരു സുപ്രധാന ചുവടുവയ്പ്പാണ്.

സമത്വം, പ്രസവ ആനുകൂല്യങ്ങൾ, തൊഴിലിടങ്ങളിലെ സുരക്ഷ, തീരുമാനമെടുക്കുന്ന സമിതികളിലെ പ്രാതിനിധ്യം എന്നിവയെക്കുറിച്ചുള്ള പുരോഗമനപരമായ വ്യവസ്ഥകൾ ഉൾക്കൊള്ളുന്ന ഈ നിയമങ്ങൾ, ഇന്നത്തെ സമ്പദ്‌വ്യവസ്ഥയുടെ ആവശ്യകതകൾ നിറവേറ്റുന്നതിനായി തൊഴിൽ നിയന്ത്രണങ്ങളെ ആധുനികവൽക്കരിക്കുന്നു. ഈ പരിഷ്കാരങ്ങൾ തൊഴിലാളികളായ സ്ത്രീകളുടെ അവകാശങ്ങൾ സംരക്ഷിക്കുക മാത്രമല്ല, തുല്യ പരിഗണന ഉറപ്പാക്കുകയും, രാത്രി ഷിഫ്റ്റുകളിലും അപകടകരമായ വ്യവസായങ്ങളിലും ഉൾപ്പെടെ എല്ലാ മേഖലകളിലുമുള്ള അവരുടെ പങ്കാളിത്തത്തെ പിന്തുണയ്ക്കുകയും ചെയ്യുന്നതിലൂടെ അവസരങ്ങൾ വിപുലീകരിക്കുകയും ചെയ്യുന്നു. ഈ നടപടികൾ ഒരുമിച്ച് സ്ത്രീകളുടെ സാമ്പത്തിക ശാക്തീകരണം ശക്തിപ്പെടുത്തുകയും കൂടുതൽ സ്ഥിരതയുള്ളതും ലിംഗ സമതുലിതവുമായ തൊഴിൽ ആവാസവ്യവസ്ഥയ്ക്ക് സംഭാവന നല്കുകയും ചെയ്യുന്നു.

പുതിയ തൊഴിൽ നിയമങ്ങൾ പ്രകാരം സ്ത്രീകൾക്ക്  ലഭിക്കുന്ന പ്രധാന ആനുകൂല്യങ്ങൾ താഴെപ്പറയുന്ന  വ്യവസ്ഥകൾ വ്യക്തമാക്കുന്നു :

പരാതി പരിഹാര സമിതിയിലെ സ്ത്രീകളുടെ പ്രാതിനിധ്യം

2020-ലെ ഇൻഡസ്ട്രിയൽ റിലേഷൻസ് കോഡ്, സ്ഥാപനത്തിലെ മൊത്തം തൊഴിലാളികളുടെ എണ്ണത്തിലുള്ളതിനേക്കാൾ കുറയാത്ത അനുപാതത്തിൽ  സ്ത്രീകളുടെ മതിയായ പ്രാതിനിധ്യം നിർബന്ധമാക്കുന്നു.

• തൊഴിലിടങ്ങളിലെ തർക്കപരിഹാരത്തിൽ വനിതാ തൊഴിലാളികളുടെ ന്യായമായ ശബ്ദം ഉണ്ടെന്ന് ഉറപ്പാക്കുന്നു.
• സ്ത്രീകളുടെ കാഴ്ചപ്പാടുകൾ പ്രശ്നങ്ങളെ കൂടുതൽ സമഗ്രമായും സംവേദനക്ഷമതയോടെയും പരിഹരിക്കാൻ സഹായിക്കുന്നു.
• സഹപ്രവർത്തകരുടെ പ്രതിനിധാനം, ആശങ്കകൾ ഉന്നയിക്കാൻ വനിതാ ജീവനക്കാർക്ക് കൂടുതൽ സുരക്ഷിതത്വം നല്കുന്നു.
• തൊഴിലിടങ്ങളിലെ പീഡനം, പ്രസവവുമായി ബന്ധപ്പെട്ട അവകാശങ്ങൾ, സുരക്ഷ തുടങ്ങിയ വിഷയങ്ങൾ കൂടുതൽ മികച്ച രീതിയിൽ കൈകാര്യം ചെയ്യാൻ കഴിയും.
• സന്തുലിതമായ പ്രാതിനിധ്യം നിഷ്പക്ഷത വളർത്തുകയും വിവേചനങ്ങളും സംഘർഷങ്ങളും കുറയ്ക്കുകയും ചെയ്യുന്നു.

പ്രസവ ആനുകൂല്യങ്ങൾ

സാമൂഹിക സുരക്ഷാ നിയമപ്രകാരം പ്രസവ ആനുകൂല്യങ്ങൾക്ക് അർഹത നേടണമെങ്കിൽ  പ്രതീക്ഷിക്കുന്ന പ്രസവത്തിന് തൊട്ടുമുമ്പുള്ള 12 മാസങ്ങളിൽ കുറഞ്ഞത് 80 ദിവസമെങ്കിലും സ്ഥാപനത്തിൽ  ആ സ്ത്രീ ജോലി ചെയ്തിരിക്കണം. അർഹരായ സ്ത്രീകൾക്ക് അവധി കാലയളവിൽ അവരുടെ ശരാശരി പ്രതിദിന വേതനത്തിന് തുല്യമായ പ്രസവാവധി ആനുകൂല്യം ലഭിക്കും. പ്രസവാവധിയുടെ പരമാവധി കാലയളവ് 26 ആഴ്ചയാണ്. അതിൽ 8 ആഴ്ച വരെയുള്ള അവധി, പ്രതീക്ഷിക്കുന്ന പ്രസവ തീയതിക്ക് മുമ്പ് എടുക്കാവുന്നതാണ്.

കൂടാതെ മൂന്ന് മാസത്തിൽ താഴെ പ്രായമുള്ള കുട്ടിയെ ദത്തെടുക്കുന്ന ഒരു സ്ത്രീക്ക്  അല്ലെങ്കിൽ ഒരു "കമ്മീഷനിംഗ് മദറിന് " (വാടക ഗർഭധാരണത്തിലൂടെ കുട്ടിയെ ജനിപ്പിക്കുന്ന ബയോളജിക്കൽ അമ്മ) ദത്തെടുക്കൽ  തീയതി മുതൽ അല്ലെങ്കിൽ കുട്ടിയെ കൈമാറിയ തീയതി മുതൽ 12 ആഴ്ച വരെ പ്രസവാവധി ആനുകൂല്യത്തിന് നിയമപരമായി അർഹതയുണ്ട്.

വർക്ക്‌ ഫ്രം ഹോം

ഒരു സ്ത്രീക്ക് നല്കിയിട്ടുള്ള ജോലി വീട്ടിലിരുന്ന് ചെയ്യാൻ സാധിക്കുന്ന തരത്തിലുള്ളതാണെങ്കിൽ, പ്രസവാവധി എടുത്തശേഷം, തൊഴിലുടമയും ജീവനക്കാരിയും പരസ്പരം സമ്മതിക്കുന്ന നിബന്ധനകൾക്കും കാലയളവിനും അനുസൃതമായി വീട്ടിലിരുന്ന് ജോലി ചെയ്യാൻ തൊഴിലുടമയ്ക്ക് അവരെ അനുവദിക്കാവുന്നതാണ്.

പ്രസവ സംബന്ധമായ സർട്ടിഫിക്കേഷൻ ലളിതമാക്കൽ

ഗർഭധാരണം, പ്രസവം, ഗർഭം അലസൽ, ഗർഭധാരണം അവസാനിപ്പിക്കൽ , ഗർഭനിരോധന ശസ്ത്രക്രിയ, അല്ലെങ്കിൽ അത്തരം സംഭവങ്ങളിൽ നിന്ന് ഉണ്ടാകുന്ന അസുഖങ്ങൾ  തുടങ്ങി പ്രസവവുമായി ബന്ധപ്പെട്ട അവസ്ഥകളുടെ തെളിവുകൾ താഴെപ്പറയുന്നവരിൽ നിന്ന് ലഭിക്കുന്ന സർട്ടിഫിക്കറ്റുകൾ  വഴി സമർപ്പിക്കാവുന്നതാണ്:

• രജിസ്റ്റർ ചെയ്ത മെഡിക്കൽ പ്രാക്ടീഷണർ,
• അംഗീകൃത സാമൂഹിക ആരോഗ്യ പ്രവർത്തക (ആശ)
• യോഗ്യതയുള്ള  ഓക്സിലിയറി നഴ്‌സ്, അല്ലെങ്കിൽ
• മിഡ്‌വൈഫ്.

ഈ വ്യവസ്ഥ, സാമൂഹിക സുരക്ഷാ നിയമ പ്രകാരം സർട്ടിഫിക്കേഷൻ പ്രക്രിയ ലളിതമാക്കുന്നു. 1961 ലെ മെറ്റേണിറ്റി ബെനിഫിറ്റ് ആക്ട് പ്രകാരം രജിസ്റ്റർ ചെയ്ത മെഡിക്കൽ പ്രാക്ടീഷണറിൽ നിന്നോ, ആശുപത്രിയിൽ നിന്നോ, മിഡ്‌വൈഫിൽ നിന്നോ മാത്രമേ ഇത് ലഭിക്കുമായിരുന്നുള്ളൂ.