#IFFIWood, 25 नोव्‍हेंबर 2025 

"बिंदूसागर हे फक्त एक नाव नाही; तर लाखो ओडिया लोकांच्या मनात जपली जाणारी एक भावना आहे. हिच भावना या चित्रपटाच्या अस्तित्वाचं कारण आहे. बिंदूसागर, एक पवित्र सरोवर जिथे एका बाजूला अंत्यसंस्कार तर दुसऱ्या बाजूला नवजात बालकांचे नामकरण विधी होतात, यातून जीवनाचे शुद्ध वर्तुळ प्रतिबिंबित होते. यात एक अद्वितीय ऊर्जा आहे, एक कालातीत वातावरण आहे, ज्याच्याशी प्रत्येक ओडिया हृदय सहजपणे जोडले जाते", असे दिग्दर्शक अभिषेक स्वैन यांनी 56 व्या इफ्फीमधील पत्रकार परिषदेत कलाकार आणि तांत्रिक पथकांच्या उपस्थितीत प्रसार माध्यमांशी संवाद साधताना सांगितले. 

ओडिया प्रेक्षकांसाठी एक खरा ओडिया चित्रपट तयार करणे, हा चित्रपट निर्मात्याचा दृष्टिकोन असल्याचे स्वैन यांनी सांगितले. स्वैर यांनी असा दावा केला की निर्माते शिलादित्य बोरा 'बिंदूसागर' या संकल्पनेशी आणि शीर्षकाशी त्वरित जोडले गेले. ओडिशामधील कला, संस्कृती आणि समृद्ध वारसा साजरा करत ही कथा आकर्षक, व्यावसायिक आणि हृदयस्पर्शी पद्धतीने पडद्यावर आणल्याबद्दल बोरा यांनी समाधान व्यक्त केले"

त्यांच्याकडून प्रेरणा घेत निर्माता बोरा म्हणाले, "आम्ही इफ्फीपासून आपला प्रवास सुरू करत आहोत आणि बिंदुसागरला इतकी सन्माननीय सुरुवात दिल्याबद्दल मी इफ्फीचे मनापासून आभार मानू इच्छितो."

"आता, बिंदुसागर का तयार झाला याबद्दल बोलू - अभिषेकने सुरुवातीला मला हिंदी चित्रपट बनवण्यासाठी संपर्क साधला. मी त्यांना फक्त एकच प्रश्न विचारला, 'तू ओडिशाचा आहेस, तिथले लोक तुला ओळखतात. मग ओडिया चित्रपट का बनवू नये?' मला नेहमीच असा चित्रपट बनवायचा होता ज्याच्याशी प्रत्येक ओडिया जोडला जाऊ शकेल - मग तो ओडिशातील कामगार वर्गातील व्यक्ती असो किंवा नासामध्ये काम करणारा ओडिया व्यावसायिक असो", असे बोरा यांनी सांगितले. 

त्यांनी सांगितले की आपल्याला हे शीर्षक लगेचच भावले. कारण यातून संपूर्ण जीवनचक्राचे दर्शन घडते. याबाबत अधिक तपशीलवार बोलताना त्यांनी सांगितले की, “बिंदूसागर हा एक विचारपूर्वक तयार केलेला चित्रपट आहे, जो प्रेक्षकांच्या हृदयाला स्पर्श करण्याच्या उद्देशाने बनवला गेला आहे. यावेळी हा चित्रपट ओडिशाच्या प्रत्येक कानाकोपऱ्यात पोहोचवायचा अशी माझी इच्छा होती आणि संगीत हा त्या दृष्टिने एक महत्त्वाचा भाग ठरला. आमच्या चित्रपटात आठ गाणी आहेत, त्यापैकी एकही जबरदस्तीने घुसवलेले किंवा जास्तीचे नाही. प्रत्येक गाणे कथा मांडणीत नैसर्गिकरित्या मिसळते. त्या अर्थाने, बिंदूसागर हा एक अतिशय संगीतमय चित्रपट देखील आहे.”

“एक कलाकार म्हणून, अर्थपूर्ण पात्र मिळणे नेहमीच छान वाटते. आणि अगदी प्रामाणिकपणे सांगायचे तर, एक महिला अभिनेत्री म्हणून, आपल्याला क्वचितच अशा भूमिका मिळतात ज्याद्वारे आपल्याला खरोखरच आपली अभिनयाची खरी ताकद दाखवण्याची संधी मिळते”, असे मत अभिनेत्री प्रकृती मिश्रा यांनी व्यक्त केले. बिंदूसागर ही आपल्यासाठी अशीच मोकळीक देणारी संधी ठरली, असेही त्यांनी सांगितले. “ग्लॅमर किंवा दिखाव्याची गरज न पडता, वास्तविक आणि प्रामाणिक पद्धतीने पडद्यावर उतरता आले हा माझ्यासाठी महत्त्वपूर्ण अनुभव होता” असेही त्या म्हणाल्या.

अभिनेते दीपानित दासमोहापात्रा यांनी उपस्थितांना सांगितले की, “मी स्वतःला दिग्दर्शकाचा अभिनेता मानतो कारण शेवटी, आपण दिग्दर्शकाचीच दृष्टी प्रत्यक्षात साकार करत असतो आणि आपण सर्वजण त्या मोठ्या चित्राचे भाग असतो. अभिषेक भाई अत्यंत स्थिर, स्पष्ट विचारांचे दिग्दर्शक आहेत आणि त्यामुळेच कामाचा अनुभव आणखी समाधानकारक झाला, असे ते म्हणाले. हा चित्रपट ओडिशाच्या प्रत्येक पैलूला सुंदरपणे टिपतो; आपली संस्कृती, आपल्या परंपरा, आपले अन्न, आपल्या भावना. आपल्या मुळांचे प्रामाणिकपणे प्रतिनिधित्व करणाऱ्या चित्रपटाचा भाग पुणे माझ्यासाठी खूप खास आहे” अशी भावना त्यांनी व्यक्त केली.

दिग्दर्शक स्वैन म्हणाले, “मला वैयक्तिकरित्या असे वाटते की दोन गोष्टी आपल्याला एक उद्योग म्हणून उभे राहण्यास खरोखर मदत करू शकतात: आपले संगीत आणि आपली चित्रीकरण स्थळे. ही आपली सर्वात मोठी ओळख आहे.” ओडिशाच्या सर्वोत्तम कलाकारांपैकी एक आणि अत्यंत लोकप्रिय गायक दिवंगत हुमेन सागर यांचे फक्त दहा दिवसांपूर्वी निधन झाले आहे आणि त्यांचे शेवटचे गाणे चित्रपटात आहे. त्यामुळे हा चित्रपट त्यांच्या स्मृतीला समर्पित करण्यात आला असल्याचे दिग्दर्शक स्वैन अधोरेखित केले.

त्यांनी संपूर्ण संकल्पना त्यांच्या एका ओळीत सारांशित केली, “बिंदूसागर म्हणजे चालता फिरता ओडिशा पर्यटन अनुभव.”

चित्रपटाचा सारांश:

भुवनेश्वरच्या प्राचीन मंदिरे आणि चक्रव्यूहासमान गल्ल्यांमध्ये, 22 वर्षीय श्रीजा लंडनहून तिच्या दिवंगत आईचे एक गूढ पत्र घेऊन येते. सागर, रामलीलाचा एक करिष्माई कलाकार, श्रीजाचा अनिच्छुक मार्गदर्शक बनतो आणि तिला पुरी या समुद्रकिनारी वसलेल्या शहराकडे घेऊन जातो. तिथे, तिची भेट तिचे दुरावलेले आजोबा रघुनाथ यांच्याशी होते, ज्यांनी दुःखामुळे जग आणि आपल्या कलेपासून स्वतःला दूर केले आहे. दरम्यान, कालिया, आपल्या मुलाच्या निधनामुळे निर्माण झालेल्या वेदनेने या पवित्र भूमीवर भटकत असतो. ओडिशाच्या जिवंत वारशाच्या पार्श्वभूमीवर उलगडणारी ही कथा विस्थापन, पुनर्शोध आणि कथा मांडणीच्या उपचाराक्षम शक्तीवर केंद्रित आहे. एकमेकांमध्ये गुंफलेल्या या कथांच्या माध्यमातून बिंदूसागर आपलेपणाचे क्षणभंगुर स्वरूपही प्रकट करतो.

संपूर्ण पत्रकार परिषद पाहण्यासाठी लिंक:

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Post Link: https://x.com/PIB_Panaji/status/1991438887512850647?s=20

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | गोपाळ चिप्पलकट्टी/श्रद्धा मुखेडकर/दर्शना राणे | IFFI 56