#IFFIWood, 22 नोव्‍हेंबर 2025

56व्या भारतीय आंतरराष्ट्रीय चित्रपट महोत्सवात (IFFI) भारताच्या भाशीक आनी संस्कृतीक विविधतायेची परब मनयत इंडियन पॅनोरमा फीचर फिल्म्स विभागांत तीन प्रादेशिक चित्रपट दाखयले : कन्नड फिल्म “सू फ्रॉम सो, ओडिया फिल्म “मालिपुट मेलोडीज”, आनी बंगाली फिल्म “बिये फिये निये”. ह्या सिनेमाच्या दिग्दर्शक आनी निर्मात्यांनी आयज गोंयांत पत्रकार परिशदेंत प्रसार माध्यमां कडेन संवाद सादलो.

कन्नड चित्रपट "सु फ्रॉम सो": अंधश्रध्दा आनी बायलांच्या प्रस्नांक विनोदा वरवीं मुखार हाडप

दिग्दर्शक प्रकाश (जेपी तुमिनाद) आनी अभिनेतो शनील गौथम हांणी आपल्या “सु फ्रॉम सो” ह्या सिनेमाच्या प्रदर्शना उपरांत प्रसार माध्यमां कडेन संवाद सादलो.

तुळू नाट्य फाटभूंय आशिल्ल्या आनी पटकथा स्वता बरयल्ल्या प्रकाशान ही कथा आपल्या वैयक्तीक अणभवांचेर आदारिल्ली आशिल्ल्याचे सांगलें. मुखेल पात्र अशोक जो स्वताक पछाडलेलो आशिल्ल्याचे दाखयता हे ताच्या भुरगेपणांतल्या इश्टावेल्यान प्रेरित आसा. गंभीर समाजीक प्रस्न विनोद आनी मनरिजवणेच्या घटकां वांगडा सादर केल्यार प्रेक्षकां कडेन बरे तरेन जोडपाक मदत जाता अशें फिल्म निर्मात्याचें मत आसा. “सु फ्रॉम सो” आपल्या कथना वरवीं अंधश्रध्देचेर आंधळो विस्वास दवरपा आड एक खर संदेश दिता.  तशेंच, ह्या सिनेमांत बायलांच्या सुरक्षे संबंदीत प्रस्नांचेर उजवाड घाला आनी तांच्या सुरक्षेची जापसालदारकी फकत कुटुंबाचेर आसा काय पुराय समाजाचेर आसा अशें विचारलां.

अभिनेतो शनील गौतम जो गांवचो नायक रवि अण्णा साकारता हांणी सांगलें, हो चित्रपट प्रेक्षकांक अंधश्रद्धेक बळी पडूंक नाका असो संदेश दिता. मलयाळम सिनेमांतल्यान मेळिल्ल्या शैलीगत प्रभावांचो ताच्या सृजनशील पद्दतीचेर व्हड परिणाम जाला अशेंय प्रकाशान सांगलें.

ओडिया फिल्म “मालीपूत मेलोडीज”: ग्रामीण कोरापुटांतल्या कथांचो संग्रह

विशाल पटनायक दिग्दर्शित आनी कौशिक दास निर्मित ओडिया फिचर “मालीपूत मेलोडीज” लेगीत आयज दाखयलो. पत्रकार परिशदेंत उलयतना कोरापुट जिल्ह्यांतल्या पटनायक हांणी सांगलें, हो चित्रपट गांवगिऱ्या ओडिशाच्या कथांक, संस्कृतायेक आनी लोकांक अभिवादन. “आमकां आमच्यो कथा सांगपाक जाय आशिल्ल्यो ,” अशें, तांणी म्हळें. तशेच कोरापुटच्या कथानकांचेर आधारित कथासंग्रह म्हणून ही कल्पना कशी विकसित जाली तेंय ताणें सांगलें. पटनायक आनी संगीत दिग्दर्शक तोश नंदा सोडल्यार ह्या सिनेमांतले चडशे कलाकार ह्या उद्देगांत नवे आसात.   ह्या चित्रपटाची  निर्मिती अडेज वर्सां परस चड काळ चलली, ह्या काळांत अप्रशिक्षित थळाव्या कलाकारांक तांच्या भुमिके खातीर प्रशिक्षण दिलें.

मर्यादीत आधुनीक सुविधा आशिल्ल्या पयसुल्ल्या गांवांनी शुटींग केल्ल्या ह्या चित्रपटांत थळावी संस्कृताय, जेवण,निसर्गरम्य सुवाती आनी बोलचाली भाशेचेर भर दिला, जातूंत गांवगिरें जिवीत उबदार आनी विनोदी पद्धतीन प्रेक्षकां मेरेन पावता. सुमार २०% कलाकारांची नाट्य  फाटभूंय आसा, जाल्यार हेर सगळे कलाकार स्थानिक गावातले  आसात अशी म्हायती तांणी दिली.

बंगाली चित्रपट "बिये फिये निये": शारी मध्यमवर्गाच्या वास्तवाचेर समकालीन दृष्टिकोन

फ्रांसांतल्या एका चित्रपट महोत्सवात हालींच जूरी इनाम मेळोवपी दिग्दर्शक नील दत्ता हाचो बंगाली फिचर “बिये फिये निये”य आयज दाखयलो. निर्मातो आनी म्हालगडो चित्रपट निर्मातो अंजन दत्ता वांगडा ह्या पंगडान चित्रपटाच्या खाशेल्या सहकार्या  विशीं चर्चा केली.

फ्रेंच दिग्दर्शक फ्राँसॉ त्रुफो हाच्या “फिल्मां इश्ट तयार करतले आनी इश्टूच पळयतले ” ह्या तत्वाचो उल्लेख करून नील दत्तान सांगलें की ही कथा चार इश्टांनी एकठांय बरयल्या: स्वता, मुखेल अभिनेतो सावन चक्रवर्ती, सहाय्यक दिग्दर्शक उष्णक बासू आनी लायन निर्मातो अर्नब घोष. शारांतल्या मध्यमवर्गीय मिलेनियल्सच्या जिविताचें प्रामाणीक रितीन चित्रण करपाखातीर पटकथेंत जायते फावट सुदारणा जाली.

समकालीन बंगाली चित्रपटांत तांचे पिळगेचें प्रतिनिधित्व उणें आसा अशें नील दत्तान नदरेक हाडलें. लग्नाच्या विशयाचेर केंद्रित आशिल्ल्या “बिये फिये निये” ह्या चित्रपटात भारतीय लग्नांतल्या चडशे न उलयल्ल्या धुसरी वास्तवाचे प्रतिबिंब आसा. 

फिल्म निर्मिती प्रक्रियेंत आपणे हस्तक्षेप करूंक ना, फकत अर्थीक आदार दिलो आनी तरणाट्या पंगडाक पुराय सृजनशील स्वातंत्र्य दिले अशें नामनेचो अभिनेतो-दिग्दर्शक-संगीतकार आशिल्ल्या निर्मातो अंजन दत्तान सांगलें. मृणाल सेन हाच्या चित्रपटांतल्यान आपली कारकीर्द सुरू करून चड वेवसायीक चित्रपटांतल्यान पयस वचपाखातीर दिग्दर्शना कडेन वळपी अंजन दत्तान अर्थपूर्ण आनी वास्तववादी चित्रपटांक आदार दिवपाचें म्हत्व अधोरेखित केलें.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56