ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ಗುಜರಾತ್‌ ನ ಭುಜ್‌ ನಲ್ಲಿ ನಡೆದ ಗಡಿ ಭದ್ರತಾ ಪಡೆಯ (ಬಿ.ಎಸ್‌.ಎಫ್) 'ವಜ್ರ ಮಹೋತ್ಸವ' ಸಮಾರಂಭವನ್ನು ಉದ್ದೇಶಿಸಿ ಮಾತನಾಡಿದರು. ಈ ಸಂದರ್ಭದಲ್ಲಿ ಗುಜರಾತ್‌ ನ ಉಪ ಮುಖ್ಯಮಂತ್ರಿ ಶ್ರೀ ಹರ್ಷ ಸಂಘವಿ, ಬಿ.ಎಸ್‌.ಎಫ್ ಮಹಾನಿರ್ದೇಶಕ ಶ್ರೀ ದಲ್ಜಿತ್ ಸಿಂಗ್ ಚೌಧರಿ ಮತ್ತು ಇತರ ಗಣ್ಯರು ಉಪಸ್ಥಿತರಿದ್ದರು.

ತಮ್ಮ ಭಾಷಣದಲ್ಲಿ ಶ್ರೀ ಅಮಿತ್ ಶಾ ಅವರು, 'ಕಳೆದ ಆರು ವರ್ಷಗಳಲ್ಲಿ ಬಿ.ಎಸ್‌.ಎಫ್ ಕೇವಲ ಭಾರತದ ಜನರಿಗಷ್ಟೇ ಅಲ್ಲ, ಇಡೀ ವಿಶ್ವಕ್ಕೇ ಒಂದು ವಿಷಯವನ್ನು ಮನವರಿಕೆ ಮಾಡಿಕೊಟ್ಟಿದೆ. ಅದೇನೆಂದರೆ, ಗಡಿಯಲ್ಲಿ ಬಿ.ಎಸ್‌.ಎಫ್ ಕಾವಲಿರುವವರೆಗೂ ಶತ್ರುಗಳು ಭಾರತದ ಒಂದಿಂಚು ಭೂಮಿಯ ಮೇಲೂ ಕಣ್ಣು ಹಾಕಲು ಸಾಧ್ಯವಿಲ್ಲ,' ಎಂದು ಹೇಳಿದರುದರು. ಬಿ ಎಸ್‌ ಎಫ್‌ ನ ವೀರ ಯೋಧರು ಅಸಾಧಾರಣ ಶೌರ್ಯ, ಕೌಶಲ್ಯ ಮತ್ತು ಪ್ರಾಣದ ಹಂಗು ತೊರೆದು ‘ಪ್ರಥಮ ರಕ್ಷಕರಾಗಿ’ ತಮ್ಮ ಜವಾಬ್ದಾರಿಯನ್ನು ನಿರ್ವಹಿಸಿದ್ದಾರೆ. ಅನೇಕರು ದೇಶಕ್ಕಾಗಿ ಅತ್ಯುನ್ನತ ಬಲಿದಾನವನ್ನೂ ನೀಡಿದ್ದಾರೆ. ದೇಶದ ಗೃಹ ಸಚಿವನಾಗಿ ಇದು ನನಗೆ ಅಪಾರ ಹೆಮ್ಮೆ ಮತ್ತು ಗೌರವದ ವಿಷಯವಾಗಿದೆ ಎಂದು ಅವರು ಹೇಳಿದರು. ಬಿ.ಎಸ್‌.ಎಫ್ ಸಿಬ್ಬಂದಿಯನ್ನುದ್ದೇಶಿಸಿ ಮಾತನಾಡಿದ ಶ್ರೀ ಶಾ, 'ಕೇವಲ ಪ್ರಧಾನ ಮಂತ್ರಿಯವರು ಮತ್ತು ಗೃಹ ಸಚಿವರು ಮಾತ್ರವಲ್ಲ, ಇಡೀ ರಾಷ್ಟ್ರವೇ ನಿಮ್ಮ ಶೌರ್ಯಕ್ಕೆ ಸೆಲ್ಯೂಟ್ ಮಾಡುತ್ತದೆ. ದೇಶದ ಜನರಿಗೆ ನಿಮ್ಮ ಸಾಮರ್ಥ್ಯದ ಮೇಲೆ ಅಚಲ ವಿಶ್ವಾಸವಿದೆ ಮತ್ತು ದೇಶವನ್ನು ರಕ್ಷಿಸುವ ನಿಮ್ಮ ಮುರಿಯದ ದೃಢ ಸಂಕಲ್ಪದಿಂದಾಗಿಯೇ ಜನರು ನೆಮ್ಮದಿಯಿಂದ ನಿದ್ರಿಸುತ್ತಿದ್ದಾರೆ. ಇದು ಯಾವುದೇ ಒಂದು ಪಡೆಗೆ ಅತ್ಯಂತ ಹೆಮ್ಮೆಯ ವಿಷಯವಾಗಿದೆ,' ಎಂದು ಬಣ್ಣಿಸಿದರು.

ದೇಶದ ಗಡಿಗಳನ್ನು ಅಭೇದ್ಯವಾಗಿ ಮತ್ತು ಸುರಕ್ಷಿತವಾಗಿ ಇರಿಸುವಲ್ಲಿ ಇದುವರೆಗೆ ಗಡಿ ಭದ್ರತಾ ಪಡೆಯ 2013 ವೀರ ಯೋಧರು ತಮ್ಮ ಪ್ರಾಣವನ್ನೇ ಮುಡಿಪಾಗಿಟ್ಟು ಅತ್ಯುನ್ನತ ಬಲಿದಾನ ನೀಡಿದ್ದಾರೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಬಿ.ಎಸ್‌.ಎಫ್ ಸಿಬ್ಬಂದಿ ಕೇವಲ ಗಡಿ ರಕ್ಷಣೆಯಲ್ಲಿ ಮಾತ್ರವಲ್ಲದೆ, ವಿಶ್ವಸಂಸ್ಥೆಯ ಹಲವಾರು ಶಾಂತಿಪಾಲನಾ ಕಾರ್ಯಾಚರಣೆಗಳಲ್ಲಿ ಹಾಗೂ ದೇಶದೊಳಗಿನ ಅಸಂಖ್ಯಾತ ಆಂತರಿಕ ತುರ್ತು ಪರಿಸ್ಥಿತಿಗಳಲ್ಲಿ ಎಂದಿಗೂ ಹಿಂಜರಿದಿಲ್ಲ. ಅದು ಭಯೋತ್ಪಾದನೆಯನ್ನು ಎದುರಿಸುವುದಾಗಿರಲಿ ಅಥವಾ ನಕ್ಸಲಿಸಂ ಅನ್ನು ನಿರ್ಮೂಲನೆ ಮಾಡುವ ರಾಷ್ಟ್ರೀಯ ಗುರಿಯನ್ನು ಸಾಕಾರಗೊಳಿಸುವುದಾಗಿರಲಿ, ಅವರು ಯಾವಾಗಲೂ ಕರ್ತವ್ಯವನ್ನೇ ಎಲ್ಲಕ್ಕಿಂತ ಮಿಗಿಲಾಗಿ ಪರಿಗಣಿಸಿ ಮುನ್ನಡೆದಿದ್ದಾರೆ. ಇದೇ ಕಾರಣದಿಂದಾಗಿ ಇಂದು ಭಾರತದ ಪೂರ್ವ ಮತ್ತು ಪಶ್ಚಿಮ ಗಡಿಗಳು ಅಚಲವಾಗಿ ಮತ್ತು ಸಂಪೂರ್ಣ ಸುರಕ್ಷಿತವಾಗಿ ತಲೆ ಎತ್ತಿ ನಿಂತಿವೆ ಎಂದು ಶ್ರೀ ಶಾ ತಿಳಿಸಿದರು. ಇದರ ಅತಿದೊಡ್ಡ ಶ್ರೇಯಸ್ಸು ಬಿ ಎಸ್‌ ಎಫ್‌ ನ ವೀರ ಯೋಧರಿಗೆ ಸಲ್ಲುತ್ತದೆ.

ಕಚ್‌ ನ ಈ ವೀರ ಭೂಮಿಯು ಅದಮ್ಯ ಧೈರ್ಯದ ಪ್ರತೀಕವಾಗಿದೆ ಎಂದು ಶ್ರೀ ಅಮಿತ್ ಶಾ ಬಣ್ಣಿಸಿದರು. ಶತಮಾನಗಳಿಂದಲೂ ಪ್ರತಿಕೂಲ ಹವಾಮಾನ ಮತ್ತು ಕಠಿಣ ಸನ್ನಿವೇಶಗಳ ನಡುವೆಯೂ, ಇಲ್ಲಿನ ಜನರು ಅಚಲವಾದ ಛಲ ಮತ್ತು ಸ್ಥೈರ್ಯದಿಂದ ಈ ಪ್ರದೇಶವನ್ನು ಪೋಷಿಸಿ, ಅಭಿವೃದ್ಧಿಯ ಉತ್ತುಂಗಕ್ಕೆ ಕೊಂಡೊಯ್ದಿದ್ದಾರೆ ಎಂದು ಅವರು ಹೇಳಿದರು. 1970ರ ದಶಕದಿಂದ ಇಂದಿನವರೆಗೂ ನಡೆದ ಪ್ರತಿಯೊಂದು ಆಕ್ರಮಣಕ್ಕೂ ಕಚ್‌ ನ ಜನತೆ ಅತ್ಯಂತ ಪ್ರಬಲವಾದ ಪ್ರತಿರೋಧವನ್ನು ಒಡ್ಡಿದ್ದಾರೆ, ಇದಕ್ಕೆ ಇಡೀ ದೇಶವೇ ಸಾಕ್ಷಿಯಾಗಿದೆ ಎಂದು ಅವರು ಸ್ಮರಿಸಿದರು. ಅನೇಕ ಯುದ್ಧಗಳಲ್ಲಿ ಕಚ್‌ ನ ಜನತೆ ಸೇನೆ ಮತ್ತು ಬಿ ಎಸ್‌ ಎಫ್‌ ನೊಂದಿಗೆ ಹೆಗಲಿಗೆ ಹೆಗಲು ಕೊಟ್ಟು ಮುನ್ನಡೆದಿದ್ದಾರೆ ಹಾಗೂ ಅಸಾಧಾರಣ ಪಾತ್ರವನ್ನು ನಿರ್ವಹಿಸಿದ್ದಾರೆ ಎಂದು ಶ್ರೀ ಶಾ ತಿಳಿಸಿದರು. ವಿಶೇಷವಾಗಿ, ಯುದ್ಧದ ಸಮಯದಲ್ಲಿ ಹಾನಿಗೊಳಗಾದ ಏರ್‌ ಸ್ಟ್ರಿಪ್‌ ಗಳನ್ನು (ವಿಮಾನ ರನ್‍ವೇ) ರಾತ್ರೋರಾತ್ರಿ ದುರಸ್ತಿಗೊಳಿಸಿ, ಕೆಲವೇ ಗಂಟೆಗಳಲ್ಲಿ ಅವುಗಳನ್ನು ಮತ್ತೆ ಕಾರ್ಯರೂಪಕ್ಕೆ ತರುವ ಮೂಲಕ, ಈ ಭಾಗದ ವೀರ ವನಿತೆಯರು ದೇಶದ ರಕ್ಷಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದನ್ನು ಅವರು ಪ್ರಶಂಸಿಸಿದರು. ಕಚ್ ಭೂಮಿಯು ಶತಮಾನದ ಅತ್ಯಂತ ವಿನಾಶಕಾರಿ ಭೂಕಂಪವನ್ನೂ ಎದುರಿಸಿ ನಿಂತಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. 'ಇಲ್ಲಿನ ಜನರ ಅವಿರತ ಶ್ರಮದ ಫಲವಾಗಿ, ಈ ಪ್ರದೇಶವು ಕೇವಲ ಭೂಕಂಪದಿಂದ ಚೇತರಿಸಿಕೊಂಡಿದ್ದಲ್ಲದೆ, ಹಿಂದೆಂದಿಗಿಂತಲೂ 100 ಪಟ್ಟು ಹೆಚ್ಚು ಸುಂದರವಾಗಿ ಮತ್ತು ಅಭಿವೃದ್ಧಿ ಹೊಂದಿದ ಪ್ರದೇಶವಾಗಿ ರೂಪುಗೊಂಡಿದೆ. ಇದು ಕಚ್ ಜನರ ಅದಮ್ಯ ಚೈತನ್ಯ ಮತ್ತು ಸ್ಥೈರ್ಯಕ್ಕೆ ಒಂದು ಜ್ವಲಂತ ನಿದರ್ಶನವಾಗಿದೆ,' ಎಂದು ಅವರು ಹೆಮ್ಮೆಯಿಂದ ಘೋಷಿಸಿದರು.

1965ರ ಡಿಸೆಂಬರ್ 1 ರಂದು ಸ್ಥಾಪನೆಯಾದಾಗಿನಿಂದ, ಗಡಿ ಭದ್ರತಾ ಪಡೆಯು (ಬಿ.ಎಸ್‌.ಎಫ್) ಶ್ರೇಷ್ಠತೆಯ ಪ್ರತಿಯೊಂದು ಶಿಖರವನ್ನು ಯಶಸ್ವಿಯಾಗಿ ಏರಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಎಲ್ಲಾ ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ (ಸಿ.ಎ.ಪಿ.ಎಫ್) ಪೈಕಿ, ಭೂಮಿ, ನೀರು ಮತ್ತು ವಾಯು ಗಡಿಗಳ ಮೂಲಕ ದೇಶವನ್ನು ರಕ್ಷಿಸಲು ಮೀಸಲಾಗಿರುವ ಏಕೈಕ ಪಡೆ ಬಿ.ಎಸ್‌.ಎಫ್ ಎಂದು ಅವರು ತಿಳಿಸಿದರು. ಅದು ವಾಯು ಗಡಿಗಳಾಗಿರಲಿ, ಅತ್ಯಂತ ದುರ್ಗಮವಾದ ಭೂಗಡಿಗಳಾಗಿರಲಿ ಅಥವಾ ಅಸಂಖ್ಯಾತ ಅಡೆತಡೆಗಳ ನಡುವಿನ ಜಲ ಗಡಿಗಳಾಗಿರಲಿ, ಬಿ.ಎಸ್‌.ಎಫ್ ಸಿಬ್ಬಂದಿ ಈ ಮೂರೂ ಕಡೆಗಳಲ್ಲಿ ಸದಾ ಜಾಗರೂಕರಾಗಿ ನಿಯೋಜನೆಗೊಂಡಿದ್ದಾರೆ. 'ಭಾರತದ ಗಡಿಗಳನ್ನು ಸುರಕ್ಷಿತವಾಗಿರಿಸುವ' ಏಕೈಕ ಗುರಿಯನ್ನು ಸಾಧಿಸುವಲ್ಲಿ, ಬಿ.ಎಸ್‌.ಎಫ್ ಜವಾನರು ಇಂತಹ ವೈವಿಧ್ಯಮಯ ಸವಾಲುಗಳು ಮತ್ತು ಪ್ರಕೃತಿಯ ಕಠಿಣ ಪರಿಸ್ಥಿತಿಗಳಿಗೆ ಹೊಂದಿಕೊಂಡು ತೋರುತ್ತಿರುವ ಧೈರ್ಯ ಮತ್ತು ಕೌಶಲ್ಯ ನಿಜಕ್ಕೂ ಶ್ಲಾಘನೀಯ ಎಂದು ಶ್ರೀ ಶಾ ಮೆಚ್ಚುಗೆ ವ್ಯಕ್ತಪಡಿಸಿದರು. ಜಲ, ಸ್ಥಲ ಮತ್ತು ಆಗಸದಲ್ಲಿ ಬಿಎಸ್‌ಎಫ್ ಯಾವಾಗಲೂ ಒಂದೇ ಗುರಿಯನ್ನು ಹೊಂದಿದೆ, ಅದುವೇ 'ಭಾರತದ ಭದ್ರತೆ'. ಇಂದು 193 ಬೆಟಾಲಿಯನ್‌ ಗಳು ಮತ್ತು 2.76 ಲಕ್ಷಕ್ಕೂ ಹೆಚ್ಚು ಸಿಬ್ಬಂದಿಯ ಬಲದೊಂದಿಗೆ, ಬಿ.ಎಸ್‌.ಎಫ್ ಪಾಕಿಸ್ತಾನದೊಂದಿಗಿನ 2,279 ಕಿ.ಮೀ ಮತ್ತು ಬಾಂಗ್ಲಾದೇಶದೊಂದಿಗಿನ 4,096 ಕಿ.ಮೀ ಉದ್ದದ ಗಡಿಯನ್ನು ಸಂಪೂರ್ಣವಾಗಿ ರಕ್ಷಿಸುತ್ತಿದೆ ಮತ್ತು ಕಣ್ಗಾವಲು ಇರಿಸಿದೆ ಎಂಬುದು ತಮಗೆ ಹೆಮ್ಮೆಯ ವಿಷಯ ಎಂದು ಅವರು ಹೇಳಿದರು.

ಮುಂಬರುವ ವರ್ಷವು ಬಿ ಎಸ್‌ ಎಫ್‌ ನ ಸಂಪೂರ್ಣ ಆಧುನೀಕರಣಕ್ಕೆ ಮುಡಿಪಾಗಿರಲಿದೆ, ಹಾಗೂ ಅದರ ಮುಂದಿನ ವರ್ಷವು ನಮ್ಮ ವೀರ ಜವಾನರು ಮತ್ತು ಅವರ ಕುಟುಂಬಗಳ ಕಲ್ಯಾಣಕ್ಕೆ ಸಂಪೂರ್ಣವಾಗಿ ಮೀಸಲಾಗಿರುತ್ತದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಈ ಅವಧಿಯಲ್ಲಿ, ಬಿ.ಎಸ್‌.ಎಫ್ ಮತ್ತು ಗೃಹ ಸಚಿವಾಲಯವು ಸಿಬ್ಬಂದಿ ಮತ್ತು ಅವರ ಕುಟುಂಬಗಳ ಹಿತದೃಷ್ಟಿಯಿಂದ ಹಲವಾರು ಯೋಜನೆಗಳನ್ನು ಜಾರಿಗೆ ತರಲಿದ್ದು, ದೃಢವಾದ ಕ್ರಮಗಳನ್ನು ಕೈಗೊಳ್ಳಲಿವೆ. ಪ್ರಧಾನ ಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ, ಮುಂದಿನ ಐದು ವರ್ಷಗಳಲ್ಲಿ ಬಿ.ಎಸ್‌.ಎಫ್ ಅನ್ನು ವಿಶ್ವದ ಅತ್ಯಂತ ಆಧುನಿಕ ಮತ್ತು ಅತ್ಯಂತ ಸಮರ್ಥ ಗಡಿ ಭದ್ರತಾ ಪಡೆಯನ್ನಾಗಿ ರೂಪಿಸಲು ಗೃಹ ಸಚಿವಾಲಯವು ಸಂಕಲ್ಪ ಮಾಡಿದೆ ಎಂದು ಅವರು ತಿಳಿಸಿದರು. ಮುಂದಿನ ದಿನಗಳಲ್ಲಿ ಅನೇಕ ಹೊಸ ಉಪಕ್ರಮಗಳನ್ನು ಜಾರಿಗೆ ತರಲಾಗುವುದು ಎಂದು ಅವರು ಹೇಳಿದರು. ಗಡಿಗಳಲ್ಲಿ ಕಠಿಣ ಪರಿಸ್ಥಿತಿಗಳ ನಡುವೆ ಕರ್ತವ್ಯ ನಿರ್ವಹಿಸುತ್ತಿರುವ ಜವಾನರ ಕುಟುಂಬಗಳಿಗೆ ಭರವಸೆ ನೀಡಿದ ಅವರು, 'ಪ್ರಧಾನಿ ಮೋದಿಯವರ ನೇತೃತ್ವದಲ್ಲಿ ಭಾರತ ಸರ್ಕಾರವು ನಿಮ್ಮ ಕಲ್ಯಾಣಕ್ಕಾಗಿ ಶಕ್ತಿಮೀರಿ ಶ್ರಮಿಸಲಿದೆ ಮತ್ತು ಯಾವುದೇ ಕೊರತೆಯಾಗದಂತೆ ನೋಡಿಕೊಳ್ಳಲಿದೆ,' ಎಂದು ದೃಢಪಡಿಸಿದರು.

ಪಹಲ್ಗಾಮ್‌ ನಲ್ಲಿ ನಮ್ಮ ಪ್ರವಾಸಿಗರ ಮೇಲೆ ಪಾಕಿಸ್ತಾನ ಪ್ರಾಯೋಜಿತ ಭಯೋತ್ಪಾದಕ ಗುಂಪೊಂದು ಹೇಡಿತನದ ದಾಳಿ ನಡೆಸಿ, ಅವರ ಧರ್ಮವನ್ನು ಕೇಳಿ ಅವರನ್ನು ಬರ್ಬರವಾಗಿ ಹತ್ಯೆಗೈದಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಈ ದಾಳಿಯ ನಂತರ, ಇದಕ್ಕೆ ತಕ್ಕ ಮತ್ತು ದಿಟ್ಟ ಉತ್ತರವನ್ನು ನೀಡಲಾಗುವುದು ಎಂದು ಪ್ರಧಾನ ಮಂತ್ರಿಯವರು ಹೇಳಿದ್ದರು. 'ಆಪರೇಷನ್ ಸಿಂಧೂರ್' ಮೂಲಕ ನಾವು ಸೀಮಿತ ಪ್ರತಿಕ್ರಿಯೆಯನ್ನಷ್ಟೇ ನೀಡಿದ್ದೆವು. ಆದರೂ, ಭಯೋತ್ಪಾದಕರ ಮೇಲಿನ ಈ ದಾಳಿಯನ್ನು ಪಾಕಿಸ್ತಾನವು ತನ್ನ ಮೇಲೆಯೇ ನಡೆದ ದಾಳಿ ಎಂದು ಪರಿಗಣಿಸಿತು ಎಂದು ಶ್ರೀ ಶಾ ಹೇಳಿದರು. ಯಾವಾಗ ಪಾಕಿಸ್ತಾನದ ಸೇನೆ ಕಾರ್ಯಾಚರಣೆಗೆ ಇಳಿಯಿತೋ, ಆಗ ಬಿ.ಎಸ್‌.ಎಫ್ ಜವಾನರು ಅವರಿಗೆ ತಕ್ಕ ಮತ್ತು ದಿಟ್ಟ ಉತ್ತರ ನೀಡುವಲ್ಲಿ ಎಲ್ಲೂ ಹಿಂದೇಟು ಹಾಕಲಿಲ್ಲ. ಬಿ.ಎಸ್‌.ಎಫ್ ಮತ್ತು ಸೇನೆಯ ಶೌರ್ಯ ಹಾಗೂ ಪರಾಕ್ರಮದ ಫಲವಾಗಿ, ಕೇವಲ ಕೆಲವೇ ದಿನಗಳಲ್ಲಿ ಪಾಕಿಸ್ತಾನವು ಏಕಪಕ್ಷೀಯ ಕದನ ವಿರಾಮವನ್ನು ಘೋಷಿಸುವುದು ಅನಿವಾರ್ಯವಾಯಿತು ಎಂದು ಅವರು ತಿಳಿಸಿದರು. 'ಇದರಿಂದಾಗಿ, ಯಾರೂ ಭಾರತದ ಗಡಿಗಳೊಂದಿಗೆ ಚೆಲ್ಲಾಟವಾಡಲು ಅಥವಾ ಭಾರತದ ಭದ್ರತಾ ಪಡೆಗಳಿಗೆ ಸವಾಲು ಹಾಕಲು ಧೈರ್ಯ ಮಾಡಬಾರದು; ಒಂದು ವೇಳೆ ಮಾಡಿದರೆ, ಅವರು ಕಠಿಣ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ' ಎಂಬ ಸ್ಪಷ್ಟ ಸಂದೇಶ ಇಡೀ ವಿಶ್ವಕ್ಕೆ ರವಾನೆಯಾಗಿದೆ ಎಂದು ಶ್ರೀ ಶಾ ಹೇಳಿದರು.

ʼಆಪರೇಷನ್ ಸಿಂಧೂರ್' ಅಡಿಯಲ್ಲಿ ನಮ್ಮ ಪಡೆಗಳು ಜೈಶ್-ಎ-ಮೊಹಮ್ಮದ್, ಹಿಜ್ಬುಲ್ ಮುಜಾಹಿದ್ದೀನ್ ಮತ್ತು ಲಷ್ಕರ್-ಎ-ತೊಯ್ಬಾ ಸಂಘಟನೆಗಳ ಪ್ರಧಾನ ಕಚೇರಿಗಳು, ತರಬೇತಿ ಶಿಬಿರಗಳು ಮತ್ತು ಲಾಂಚ್ ಪ್ಯಾಡ್‌ ಗಳು ಸೇರಿದಂತೆ ಒಂಬತ್ತು ಪ್ರಮುಖ ನೆಲೆಗಳನ್ನು ಧ್ವಂಸಗೊಳಿಸಿವೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಭಯೋತ್ಪಾದನೆಯ ಸಂಪೂರ್ಣ ನಿರ್ಮೂಲನೆ, ನಮ್ಮ ನಾಗರಿಕರ ಸುರಕ್ಷತೆ ಮತ್ತು ಗಡಿ ಪ್ರದೇಶಗಳ ಭದ್ರತೆಯನ್ನು ಖಚಿತಪಡಿಸುವುದೇ ಈ ಕಾರ್ಯಾಚರಣೆಯ ಪ್ರಮುಖ ಉದ್ದೇಶವಾಗಿತ್ತು ಎಂದು ಅವರು ತಿಳಿಸಿದರು. ಮುಂದುವರೆದು ಮಾತನಾಡಿದ ಗೃಹ ಸಚಿವರು, 'ಈ ಕಾರ್ಯಾಚರಣೆಯ ಸಮಯದಲ್ಲಿ ಸಬ್-ಇನ್ಸ್‌ಪೆಕ್ಟರ್ ಮೊಹಮ್ಮದ್ ಇಮ್ತಿಯಾಜ್ ಅಹ್ಮದ್ ಮತ್ತು ಕಾನ್ಸ್‌ ಟೇಬಲ್ ದೀಪಕ್ ಅವರು ಅಪ್ರತಿಮ ಶೌರ್ಯವನ್ನು ಪ್ರದರ್ಶಿಸಿ ಅತ್ಯುನ್ನತ ಬಲಿದಾನ ನೀಡಿದ್ದಾರೆ. ಈ ವೀರ ಯೋಧರಿಗೆ ನಾನು ನನ್ನ ಹೃತ್ಪೂರ್ವಕ ನಮನಗಳನ್ನು ಸಲ್ಲಿಸುತ್ತೇನೆ' ಎಂದು ಹೇಳಿದರು.

ನಕ್ಸಲ್ ಪೀಡಿತ ಪ್ರದೇಶಗಳಲ್ಲಿಯೂ ಬಿ.ಎಸ್‌.ಎಫ್ ಗಮನಾರ್ಹ ಯಶಸ್ಸನ್ನು ಸಾಧಿಸಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ನಮ್ಮ ಭದ್ರತಾ ಪಡೆಗಳ ಶೌರ್ಯ ಮತ್ತು ಅವಿರತ ಪ್ರಯತ್ನಗಳಿಂದಾಗಿ, 2026ರ ಮಾರ್ಚ್ 31 ರೊಳಗೆ ದೇಶವು ನಕ್ಸಲಿಸಂನಿಂದ ಸಂಪೂರ್ಣವಾಗಿ ಮುಕ್ತವಾಗಲಿದೆ ಎಂದು ಅವರು ತಿಳಿಸಿದರು. 2026ರ ಮಾರ್ಚ್ 31 ರೊಳಗೆ ದೇಶದಿಂದ ನಕ್ಸಲಿಸಂ ಅನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವುದು ಮತ್ತು ನಮ್ಮ ಬುಡಕಟ್ಟು ಸಹೋದರ ಸಹೋದರಿಯರ ಸರ್ವತೋಮುಖ ಅಭಿವೃದ್ಧಿಗೆ  ದಾರಿ ಮಾಡಿಕೊಡುವುದು ನಮ್ಮ ದೃಢ ಸಂಕಲ್ಪವಾಗಿದೆ ಎಂದು ಗೃಹ ಸಚಿವರು ಪುನರುಚ್ಚರಿಸಿದರು. ಒಂದು ಕಾಲದಲ್ಲಿ ಶಸ್ತ್ರಸಜ್ಜಿತ ನಕ್ಸಲರು 'ತಿರುಪತಿಯಿಂದ ಪಶುಪತಿಯವರೆಗೆ' ರೆಡ್ ಕಾರಿಡಾರ್ ನಿರ್ಮಿಸುವ ಕನಸು ಕಂಡಿದ್ದರು. ಆದರೆ ಈಗ ಆ ಕಾರಿಡಾರ್ ಅನ್ನು ಸಂಪೂರ್ಣವಾಗಿ ಸುರಕ್ಷಿತಗೊಳಿಸುವುದು ಮಾತ್ರವಲ್ಲದೆ, ಆ ಪ್ರದೇಶಗಳಲ್ಲಿ ಅಭೂತಪೂರ್ವ ಅಭಿವೃದ್ಧಿಯನ್ನು ಖಚಿತಪಡಿಸಿಕೊಳ್ಳಲಾಗುವುದು ಎಂದು ಶ್ರೀ ಶಾ ಹೇಳಿದರು. ಛತ್ತೀಸ್‌ಗಢ ಒಂದರಲ್ಲೇ, ಬಿ.ಎಸ್‌.ಎಫ್ 127 ಮಾವೋವಾದಿಗಳ ಶರಣಾಗತಿಗೆ ಅನುವು ಮಾಡಿಕೊಟ್ಟಿದೆ, 73 ಮಾವೋವಾದಿಗಳನ್ನು ಬಂಧಿಸಿದೆ ಮತ್ತು 22 ಮಾವೋವಾದಿಗಳನ್ನು ಮಟ್ಟಹಾಕಿದೆ ಎಂದು ಕೇಂದ್ರ ಗೃಹ ಸಚಿವರು ಮಾಹಿತಿ ನೀಡಿದರು.

ದೇಶದೊಳಗೆ ಮಾದಕ ವಸ್ತುಗಳ ಕಳ್ಳಸಾಗಣೆಯ ವಿರುದ್ಧ ಬಿ.ಎಸ್‌.ಎಫ್ ಅನೇಕ ಕಾರ್ಯಾಚರಣೆಗಳನ್ನು ಕೈಗೊಂಡಿದ್ದು, ಅದ್ಭುತ ಯಶಸ್ಸನ್ನು ಸಾಧಿಸಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. 2025ರಲ್ಲಿ ಇದುವರೆಗೆ ಬಿ.ಎಸ್‌.ಎಫ್ 18,000 ಕಿಲೋಗಳಿಗೂ ಹೆಚ್ಚು ಮಾದಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದು, ಇದೊಂದು 'ಐತಿಹಾಸಿಕ ಸಾಧನೆ' ಎಂದು ಅವರು ಮಾಹಿತಿ ನೀಡಿದರು. ನಮ್ಮ ಎಲ್ಲಾ ಗಡಿಗಳಲ್ಲಿ ಅಕ್ರಮ ನುಸುಳುವಿಕೆಯನ್ನು ತಡೆಯಲು ಬಿ.ಎಸ್‌.ಎಫ್ ಸಂಪೂರ್ಣವಾಗಿ ಶ್ರಮಿಸುತ್ತಿದೆ. ನುಸುಳುವಿಕೆಯನ್ನು ತಡೆಯುವುದು ಕೇವಲ ದೇಶದ ಭದ್ರತೆಗೆ ಮಾತ್ರವಲ್ಲ, ನಮ್ಮ ಪ್ರಜಾಪ್ರಭುತ್ವ ವ್ಯವಸ್ಥೆಯು ಕಲುಷಿತಗೊಳ್ಳದಂತೆ (Polluted) ರಕ್ಷಿಸಲು ಕೂಡ ಅತ್ಯಗತ್ಯವಾಗಿದೆ ಎಂದು ಅವರು ಪ್ರತಿಪಾದಿಸಿದರು. ದುರದೃಷ್ಟವಶಾತ್, ಕೆಲವು ರಾಜಕೀಯ ಪಕ್ಷಗಳು 'ನುಸುಳುಕೋರರ ಹಠಾವೋ'  ಅಭಿಯಾನವನ್ನು ದುರ್ಬಲಗೊಳಿಸಲು ಸಕ್ರಿಯವಾಗಿ ಪ್ರಯತ್ನಿಸುತ್ತಿವೆ ಎಂದು ಅವರು ಆರೋಪಿಸಿದರು. ಇದೇ ರಾಜಕೀಯ ಪಕ್ಷಗಳು, ಚುನಾವಣಾ ಆಯೋಗವು 'ಎಸ್‌.ಐ.ಆರ್' (SIR - Special Intensive Revision) ಅಡಿಯಲ್ಲಿ ನಡೆಸುತ್ತಿರುವ ಮತದಾರರ ಪಟ್ಟಿ ಪರಿಷ್ಕರಣೆ ಪ್ರಕ್ರಿಯೆಯನ್ನು ವಿರೋಧಿಸುತ್ತಿವೆ ಎಂದು ಶ್ರೀ ಶಾ ಹೇಳಿದರು. 'ಈ ದೇಶದಿಂದ ಪ್ರತಿಯೊಬ್ಬ ಅಕ್ರಮ ನುಸುಳುಕೋರನನ್ನು ಗುರುತಿಸಿ, ಒಬ್ಬೊಬ್ಬರನ್ನಾಗಿ ಗಡಿಪಾರು (Deport) ಮಾಡುವುದು ನಮ್ಮ ಪ್ರತಿಜ್ಞೆಯಾಗಿದೆ' ಎಂದು ಅವರು ದೃಢ ಸಂಕಲ್ಪದೊಂದಿಗೆ ಘೋಷಿಸಿದರು.

ಈ ದೇಶದಲ್ಲಿ ಯಾವುದೇ ರಾಜ್ಯದ ಮುಖ್ಯಮಂತ್ರಿ ಅಥವಾ ದೇಶದ ಪ್ರಧಾನ ಮಂತ್ರಿ ಯಾರಾಗಬೇಕು ಎಂಬುದನ್ನು ಕೇವಲ ಭಾರತೀಯ ಪ್ರಜೆಗಳು ಮಾತ್ರ ನಿರ್ಧರಿಸುತ್ತಾರೆ ಎಂದು ಗೃಹ ಸಚಿವರು ಸ್ಪಷ್ಟಪಡಿಸಿದರು. ನಮ್ಮ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಕಲುಷಿತಗೊಳಿಸಲು ಅಥವಾ ನಮ್ಮ ಪ್ರಜಾಸತ್ತಾತ್ಮಕ ನಿರ್ಧಾರಗಳ ಮೇಲೆ ಪ್ರಭಾವ ಬೀರಲು ಯಾವುದೇ ನುಸುಳುಕೋರನಿಗೆ ಹಕ್ಕಿಲ್ಲ ಎಂದು ಅವರು ಹೇಳಿದರು. ನುಸುಳುಕೋರರಿಂದ ನಮ್ಮ ಪ್ರಜಾಪ್ರಭುತ್ವವನ್ನು ರಕ್ಷಿಸಲು ಮತ್ತು ಅದನ್ನು ಮತ್ತಷ್ಟು ಬಲಪಡಿಸಲು 'ಎಸ್‌.ಐ.ಆರ್' (SIR) ಒಂದು ನಿರ್ಣಾಯಕ ಹೆಜ್ಜೆಯಾಗಿದೆ ಎಂದು ಅವರು ಪ್ರತಿಪಾದಿಸಿದರು. ಈ ಪ್ರಕ್ರಿಯೆಗೆ ದೇಶದ ಜನರು ತಮ್ಮ ಸಂಪೂರ್ಣ ಬೆಂಬಲ ನೀಡುವಂತೆ ಅವರು ಮನವಿ ಮಾಡಿದರು. 'ಬಿಹಾರದ ಜನರು ನೀಡಿರುವ ಜನಾದೇಶವು ಒಂದು ಸ್ಪಷ್ಟ ಸಂದೇಶವಾಗಿದೆ: ದೇಶದ ಪ್ರಜೆಗಳು ಯಾವುದೇ ಕಾರಣಕ್ಕೂ ನುಸುಳುಕೋರರನ್ನು ಒಪ್ಪಿಕೊಳ್ಳುವುದಿಲ್ಲ' ಎಂದು ಅವರು ಹೇಳಿದರು. ರಾಜಕೀಯ ಲಾಭಕ್ಕಾಗಿ ಎಸ್‌.ಐ.ಆರ್ (SIR) ಅನ್ನು ವಿರೋಧಿಸುತ್ತಿರುವ ರಾಜಕೀಯ ಪಕ್ಷಗಳಿಗೆ ಎಚ್ಚರಿಕೆ ನೀಡಿದ ಶ್ರೀ ಶಾ, 'ಆ ಪಕ್ಷಗಳಿಗೆ ನನ್ನ ಸ್ಪಷ್ಟ ಸಂದೇಶವೇನೆಂದರೆ, ನುಸುಳುಕೋರರನ್ನು ಖಂಡಿತವಾಗಿಯೂ ದೇಶದಿಂದ ಹೊರಹಾಕಲಾಗುವುದು' ಎಂದು ಹೇಳಿದರು.

ಕಳೆದ ಕೆಲವು ವರ್ಷಗಳಲ್ಲಿ, ನಾವು ಗಡಿ ಬೇಲಿ ವ್ಯವಸ್ಥೆಯನ್ನು (Border fencing) ತ್ವರಿತವಾಗಿ ಬಲಪಡಿಸಿದ್ದೇವೆ ಮತ್ತು ಅದನ್ನು ಅಭೇದ್ಯವನ್ನಾಗಿ ರೂಪಿಸಿದ್ದೇವೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಬೇಲಿಗೆ ಸಂಬಂಧಿಸಿದ ಬಹುತೇಕ ಪ್ರಾಯೋಗಿಕ ಪರೀಕ್ಷೆಗಳು ಈಗ ಪೂರ್ಣಗೊಂಡಿವೆ ಎಂದು ಅವರು ತಿಳಿಸಿದರು. 'ಮುಂಬರುವ ದಿನಗಳಲ್ಲಿ, ನಾವು 'ಇ-ಬಾರ್ಡರ್ ಸೆಕ್ಯುರಿಟಿ' (e-Border Security) ಎಂಬ ಹೊಸ ಕ್ರಾಂತಿಕಾರಕ ಪರಿಕಲ್ಪನೆಯನ್ನು ಪರಿಚಯಿಸುತ್ತಿದ್ದೇವೆ. ಈ ಪರಿಕಲ್ಪನೆಯನ್ನು ತಳಮಟ್ಟದಲ್ಲಿ ಅನುಷ್ಠಾನಗೊಳಿಸುವಲ್ಲಿ ಬಿ.ಎಸ್‌.ಎಫ್ ಅತಿದೊಡ್ಡ ಪಾತ್ರವನ್ನು ವಹಿಸಲಿದೆ ಮತ್ತು ಇದಕ್ಕಾಗಿ ಆರಂಭಿಕ ಹಂತದ ನೇತೃತ್ವವನ್ನೂ ಸ್ವತಃ ಬಿ.ಎಸ್‌.ಎಫ್ ತೆಗೆದುಕೊಂಡಿದೆ' ಎಂದು ಅವರು ಹೇಳಿದರು. ಮುಂದಿನ ಒಂದು ವರ್ಷದೊಳಗೆ ಇದನ್ನು ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ತರಲು ಎಲ್ಲ ರೀತಿಯ ಪ್ರಯತ್ನಗಳನ್ನು ಮಾಡಲಾಗುವುದು. ಮುಂದಿನ ಐದು ವರ್ಷಗಳಲ್ಲಿ, ನಮ್ಮ ದೇಶದ ಸಂಪೂರ್ಣ ಭೂಗಡಿಯು ಈ 'ಇ-ಭದ್ರತಾ ಕವಚದ' ಅಡಿಯಲ್ಲಿ ಸುರಕ್ಷಿತವಾಗಿರಲಿದೆ ಎಂಬ ಸಂಪೂರ್ಣ ವಿಶ್ವಾಸ ನನಗಿದೆ ಎಂದು ಅವರು ಭರವಸೆ ವ್ಯಕ್ತಪಡಿಸಿದರು.

ಭಾರತದ ಸಮುದ್ರ ಗಡಿಗಳನ್ನು ಅಭೇದ್ಯವಾಗಿಸುವ ನಿಟ್ಟಿನಲ್ಲಿ ಒಂದು ಐತಿಹಾಸಿಕ ಹೆಜ್ಜೆಯಾಗಿ, ಗುಜರಾತ್‌ ನ ಓಖಾದಲ್ಲಿ ದೇಶದ ಮೊದಲ 'ನ್ಯಾಷನಲ್ ಅಕಾಡೆಮಿ ಫಾರ್ ಕೋಸ್ಟಲ್ ಪೊಲೀಸಿಂಗ್' (ಎನ್.‌ಎ.ಸಿ.ಪಿ) ಅನ್ನು ಸ್ಥಾಪಿಸಲಾಗಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಹೇಳಿದರು. ಇದರ ಕಾರ್ಯಾಚರಣೆ ಮತ್ತು ನಿರ್ವಹಣೆಯ ಸಂಪೂರ್ಣ ಜವಾಬ್ದಾರಿಯು ಬಿ.ಎಸ್‌.ಎಫ್ ಮೇಲಿದೆ ಎಂದು ಅವರು ತಿಳಿಸಿದರು. ಮುಂಬರುವ ದಿನಗಳಲ್ಲಿ, ಈ ಅಕಾಡೆಮಿಯು ನಮ್ಮ ಮರೀನ್ ಪೊಲೀಸ್ ಪಡೆಗೆ ವಿಶ್ವದರ್ಜೆಯ ತರಬೇತಿಯನ್ನು ಒದಗಿಸಲಿದೆ ಮತ್ತು ರಾಷ್ಟ್ರದ ಕರಾವಳಿ ಭದ್ರತಾ ವ್ಯವಸ್ಥೆಯನ್ನು (Coastal security apparatus) ಮತ್ತಷ್ಟು ಬಲಪಡಿಸಲಿದೆ ಎಂದು ಅವರು ಹೇಳಿದರು. ಉತ್ತಮ ಆರೋಗ್ಯ ಸೇವೆಗಳು, ವಸತಿ ಸೌಲಭ್ಯಗಳ ಲಭ್ಯತೆಯಲ್ಲಿ ಸುಧಾರಣೆ ಮತ್ತು ದೀರ್ಘಾವಧಿಯ ಕರ್ತವ್ಯದ ಸಮಯ ಹೀಗೆ ಬಿ.ಎಸ್‌.ಎಫ್ ಜವಾನರ ಕಲ್ಯಾಣಕ್ಕೆ ಸಂಬಂಧಿಸಿದಂತೆ ಮೂರು ಪ್ರಮುಖ ಸವಾಲುಗಳಿದ್ದವು ಎಂದು ಶ್ರೀ ಅಮಿತ್ ಶಾ ಉಲ್ಲೇಖಿಸಿದರು. ಕಳೆದ ಕೆಲವು ವರ್ಷಗಳಲ್ಲಿ, ನಾವು ಈ ಮೂರೂ ಕ್ಷೇತ್ರಗಳಲ್ಲಿ ಹಲವಾರು ದೃಢವಾದ ಮತ್ತು ಕ್ರಾಂತಿಕಾರಕ ಕ್ರಮಗಳನ್ನು ಕೈಗೊಂಡಿದ್ದೇವೆ ಎಂದು ಅವರು ಹೇಳಿದರು.

ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್ ಶಾ ಅವರು ತಮ್ಮ ಭಾಷಣದ ವೇಳೆ, ಮಹಾನ್ ಸ್ವಾತಂತ್ರ್ಯ ಹೋರಾಟಗಾರ ಶ್ರೀ ಹರೇಕೃಷ್ಣ ಮಹತಾಬ್, ಪರಮ ವೀರ ಚಕ್ರ ಪುರಸ್ಕೃತ ಸುಬೇದಾರ್ ಜದುನಾಥ್ ಸಿಂಗ್ ಮತ್ತು ಭಾರತ ರತ್ನ ಡಾ. ಸಿ.ವಿ. ರಾಮನ್ ಅವರ ಜಯಂತಿಯ ಅಂಗವಾಗಿ ಅವರಿಗೆ ಭಾವಪೂರ್ಣ ನಮನಗಳನ್ನು ಸಲ್ಲಿಸಿದರು. ಮುಂದುವರೆದು ಮಾತನಾಡಿದ ಅವರು, ಇಂದು ನಮ್ಮ ಗಡಿ ಭದ್ರತಾ ಪಡೆಯ ಸಿಬ್ಬಂದಿಗೆ ಶೌರ್ಯಕ್ಕಾಗಿ ಒಂದು 'ಪೊಲೀಸ್ ಪದಕ' (ಮರಣೋತ್ತರ), ಎಂಟು 'ರಾಷ್ಟ್ರಪತಿ ಪದಕಗಳು', ಹಾಗೂ 'ಜನರಲ್ ಚೌಧರಿ ಟ್ರೋಫಿ', 'ಮಹಾರಾಣಾ ಪ್ರತಾಪ್ ಟ್ರೋಫಿ' ಮತ್ತು 'ಅಶ್ವಿನಿ ಕುಮಾರ್ ಟ್ರೋಫಿ'ಗಳನ್ನು ನೀಡಿ ಗೌರವಿಸಲಾಗಿದೆ ಎಂದು ತಿಳಿಸಿದರು. ಬಿ ಎಸ್‌ ಎಫ್‌ ನ ವಜ್ರ ಮಹೋತ್ಸವದ ಸಂಭ್ರಮಾಚರಣೆಯ ಅಂಗವಾಗಿ, ಇಂದು 'ಸ್ಮರಣಾರ್ಥ ಅಂಚೆ ಚೀಟಿ'ಯನ್ನು ಬಿಡುಗಡೆ ಮಾಡಲಾಗಿದೆ ಎಂದು ಶ್ರೀ ಶಾ ಮಾಹಿತಿ ನೀಡಿದರು. ಈ ಅಂಚೆ ಚೀಟಿಯು ಪಡೆಯ 60 ವರ್ಷಗಳ ವೈಭವದ ಪಯಣವನ್ನು ಮುಂಬರುವ ಶತಮಾನಗಳವರೆಗೆ ರಾಷ್ಟ್ರದ ಸ್ಮೃತಿಪಟಲದಲ್ಲಿ ಶಾಶ್ವತವಾಗಿ ಜೀವಂತವಾಗಿರಿಸಲಿದೆ ಎಂದು ಅವರು ಬಣ್ಣಿಸಿದರು.

****