صدر جمہوریہ ہند محترمہ دروپدی مرمو نے آج (19 نومبر 2025) نئی دہلی میں نیشنل انسٹی ٹیوٹ آف ٹیکنالوجی دہلی کےپانچویں جلسۂ تقسیم اسناد( کنووکیشن ) میں شرکت کی ۔

اس موقع پر خطاب کرتے ہوئے صدر جمہوریہ نے کہا کہ این آئی ٹی دہلی نے بہت کم وقت میں قومی سطح پر خود کو قائم کیا ہے ۔ انہیں یہ جان کر خوشی ہوئی کہ یہ ادارہ جدید بنیادی ڈھانچے اور تعلیمی مہارت پر توجہ مرکوز کر رہا ہے ۔ انہوں نے کہا کہ کثیر شعبہ جاتی تعلیم ، اختراع ، تحقیق ، کاروباری اداروں کے ساتھ تعاون اور مہارت پر مبنی تعلیم کو فروغ دے کر یہ ادارہ طلباء کو مستقبل کی ضروریات کو پورا کرنے کے لیے لیس کر رہا ہے ۔

صدر جمہوریہ کو یہ جان کر خوشی ہوئی کہ این آئی ٹی دہلی نے صنعت کاری اور اختراع کو فروغ دینے کے لیے ایک اسٹارٹ اپ سینٹر قائم کیا ہے ، جو طلباء اور اساتذہ کو ان کے اسٹارٹ اپس کے لیے ضروری وسائل ، رہنمائی اور نیٹ ورکنگ کے مواقع فراہم کرتا ہے۔ یہاں ایک انکیوبیشن سینٹر بھی قائم کیا جا رہا ہے ، جو جدید خیالات کو قابل عمل کاروبار میں تبدیل کرنے کے لیے ضروری سہولیات اور ماہر انہ رہنمائی فراہم کرتا ہے ۔ انہوں نے اس اعتماد کا اظہار کیا کہ اس طرح کی کوششیں طلباء کو بااختیار بنائیں گی اور خود کےروزگار کے کلچر کو فروغ دیں گی ۔

صدر جمہوریہ نے کہا کہ ہم ترقی یافتہ ہندوستان کے ہدف کی طرف اعتماد کے ساتھ آگے بڑھ رہے ہیں ۔ یہ عزم اقتصادی ترقی تک محدود نہیں ہے بلکہ اس میں جامع ترقی ، تکنیکی ترقی ، ماحولیاتی تحفظ اور پائیدار ترقی بھی شامل ہے ۔ ڈیجیٹل انڈیا ، میک ان انڈیا ، اسٹارٹ اپ انڈیا ، اسکل انڈیا ، سوگمّیہ بھارت ابھیان  اور اُنّت بھارت ابھیان جیسے حکومتی اقدامات یہ ظاہر کرتے ہیں کہ عوامی شراکت داری کے ساتھ ہندوستان اپنے ہدف کی طرف تیزی سے آگے بڑھ رہا ہے ۔ ان تمام قومی کوششوں کا مقصد ایک ایسے ہندوستان کی تعمیر کرنا ہے جہاں ہر شہری کو مساوی مواقع اور وقار حاصل ہو  اور جہاں انفرادی صلاحیتوں کی پرورش کے لیے سازگار ماحول دستیاب ہو ۔ انہوں نے کہا کہ این آئی ٹی جیسے اعلی تکنیکی تعلیمی ادارے ماڈل ڈیجیٹل گاؤں بنانے میں اہم کردار ادا کر سکتے ہیں ۔ ایسے تعلیمی ادارے آسان تکنیکی حل تیار کر سکتے ہیں، لوگوں کو ڈیجیٹل مہارتیں سکھا سکتے ہیں اور دیہاتوں میں بہتر سہولیات فراہم کرنے کے لیے صنعتوں کے ساتھ مل کر کام کر سکتے ہیں ۔

صدر جمہوریہ نے کہا کہ فارغ التحصیل طلباء اب ہندوستان کی سائنسی اور تکنیکی افرادی قوت کے اہم رکن ہیں ۔ انہوں نے انہیں سیکھتے رہنے ، تحقیق جاری رکھنے اور اختراعی طریقے تلاش کرتے رہنے کا مشورہ دیا ۔ انہوں نے کہا کہ انہیں نئی ٹیکنالوجیز تیار کرنے میں ہمت دکھانی چاہیے ۔ انہوں نے طلباء پر زور دیا کہ وہ یہ یاد رکھیں کہ حقیقی ترقی کا پیمانہ صرف ایجاد نہیں ہے بلکہ معاشرے پر اس کے مثبت اثرات ہیں ۔ انہوں نے کہا کہ چاہے وہ پائیدار توانائی کے نظام تیار کریں ، قابل رسائی ٹیکنالوجی بنائیں ، یا دیہی اور پسماندہ طبقات کے لیے حل تلاش کریں ، ان کے خیالات اور اقدامات سے عدم مساوات کو کم ہونا چاہیے اور لوگوں کی زندگیوں میں نئی امید پیدا ہونی چاہیے ۔ انہوں نے اعتماد کا اظہار کیا کہ وہ اپنے کام سے این آئی ٹی دہلی اور ہندوستان کے لیے فخر کا باعث بنیں گے۔

صدر جمہوریہ کی تقریر ملاحظہ کرنےکے لیے براہ کرم یہاں کلک کریں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح –م–م،ص –ج)

U. No. 1484