उद्योग आणि अंतर्गत व्यापार प्रोत्साहन विभागाने सुरू केलेल्या  व्हाईट गुड्स साठीच्या (एसी आणि एलईडी लाईट्स)  उत्पादन संलग्न प्रोत्साहन (पीएलआय) योजनेअंतर्गत चौथ्या फेरीत एकूण 13 कंपन्यांनी 1,914 कोटी रुपयांच्या निव्वळ गुंतवणुकीच्या बांधिलकीसह अर्ज दाखल केले आहेत. यासाठी अर्ज करण्याची मुदत 15 सप्टेंबर 2025 ते 10 नोव्हेंबर 2025 अशी होती.
विशेष म्हणजे यापैकी सुमारे 50 टक्के अर्जदार हे सूक्ष्म, लघु आणि मध्यम उद्योग असून यातून एसी आणि एलईडी घटक निर्मितीच्या मूल्य साखळीत योगदान देण्यासाठी लघु आणि मध्यम उद्योजकांचा वाढता आत्मविश्वास दिसून येतो. ही प्रस्तावित गुंतवणुक 13 जिल्ह्यांमध्ये विविध 23 ठिकाणी होणार असून त्याद्वारे प्रादेशिक स्तरावर उद्योगवृद्धी आणि रोजगार निर्मितीमध्ये योगदान मिळणार आहे.
व्हाईट गुड्स साठीच्या पीएलआय योजनेअंतर्गत आतापर्यंत एकूण 80 मान्यताप्राप्त लाभार्थ्यांकडून 10,335 कोटी रुपयांची गुंतवणूक केली जाणार आहे. या योजनेच्या माध्यमातून 1.72 लाख कोटी रुपयांचे  उत्पादन होण्याची अपेक्षा असून देशभरात सुमारे 60,000 प्रत्यक्ष रोजगार निर्माण होतील.
पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने 7 एप्रिल 2021 मध्ये  6,238 कोटी रुपये खर्चाच्या व्हाईट गुड्स साठीच्या पीएलआय योजनेला मंजुरी दिली होती, ज्याचा उद्देश भारतात एसी आणि एलईडी लाईट्ससाठी आवश्यक घटकांची एक परिपूर्ण परिसंस्था निर्माण करणे आहे. 

***

SushamaKaneBhaktiSontakke/DineshYadav

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai