نائب صدر جمہوریہ ہند جناب سی پی رادھا کرشنن نے جے ایس ایس اکیڈمی آف ہائر ایجوکیشن اینڈ ریسرچ (جے ایس ایس اے ایچ ای آر) کی 16 ویں کنووکیشن تقریب میں شرکت کی جو آج سری شیوارتریشور نگر، میسورو میں منعقد ہوئی ۔

اپنے کنووکیشن خطاب میں، نائب صدر نے کامیابی کی کلید کے طور پر مستقل مزاجی کی اہمیت پر زور دیا ، اور ہر گریجویٹ پر زور دیا کہ وہ اپنی منفرد صلاحیتوں کو پہچانیں اور کامیابی کی اپنی لے کے مطابق ذاتی اہداف طے کریں۔  سوامی وویکانند کے لافانی الفاظ کو دہراتے ہوئے، انہوں نے گریجویٹس طلباء کو چیلنجوں کا سامنا کرتے ہوئے استقامت اور لچک پر زور دیتے ہوئے ’’اٹھو ، جاگ جاؤ ، اور اس وقت تک نہ رکو جب تک کہ مقصد حاصل نہ ہو جائے‘‘ کی ترغیب دی۔

کرناٹک کے بھرپور ثقافتی ورثے اور کلاسیکی زبان کے طور پر کنڑ کو تسلیم کیے جانے پر روشنی ڈالتے ہوئے، انہوں نے بین مضامین تعلیم اور لچک پر زور دینے کے لیے قومی تعلیمی پالیسی (این ای پی 2020) کی تعریف کی، جو محنتی طلباء کو موافقت اور مہارت حاصل کرنے کے لیے بااختیار بناتی ہے۔

نائب صدر جمہوریہ نے سوشل میڈیا کے معقول استعمال پر بھی زور دیا ، نوجوان گریجویٹس کو خود نظم و ضبط برقرار رکھنے اور اپنی آن لائن موجودگی کو حقیقی دنیا کی ذمہ داریوں کے ساتھ متوازن رکھنے کی یاد دلائی ۔  انہوں نے ان سے اپیل کی کہ وہ اپنے والدین کا احترام کریں اور ان کی طرف توجہ دیں اور منفی باتوں پر توجہ دینے کے بجائے دوسروں کی مثبت خصوصیات کو اپنائیں۔

اپنے اختتامی کلمات میں، نائب صدر جمہوریہ نے قدیم حکمت کا حوالہ دیا کہ ’’علم ہی حقیقی دولت ہے‘‘ ، گریجویٹس کو حکمت کی روشنی کو آگے بڑھانے، آنے والی نسلوں کو تحریک دینے  اور وکست بھارت 2047 کے وژن کے مطابق قوم کی تعمیر میں عاجزی کے ساتھ لیکن فیصلہ کن طور پر تعاون کرنے کی ترغیب دی۔

کنووکیشن تقریب کے دوران کل 2,925 طلباء کو ڈگری ، ڈپلوما اور فیلوشپ سے نوازا گیا۔  مختلف تعلیمی شعبوں سے تعلق رکھنے والے سولہ گولڈ میڈلسٹوں کو بھی نائب صدر جمہوریہ نے اعزاز سے نوازا۔

تقریب میں کرناٹک کے گورنر جناب تھاور چند گہلوت، جے ایس ایس اے ایچ ای آر کے چانسلر، عزت مآب جگد گرو سری شیوارتری دیشکیندر مہاسوامی جی، سپریم کورٹ کے سابق جج جسٹس سری شیوراج وی پاٹل اور دیگر معزز مہمانوں سمیت ممتاز شخصیات نے شرکت کی۔

******

ش ح۔ ف ا۔ م ر

U-NO. 995