ਆਈਐੱਫਸੀ-ਆਈਓਆਰ ਦੁਆਰਾ ਗੁਰੂਗ੍ਰਾਮ ਵਿੱਚ ਆਯੋਜਿਤ ਤਿੰਨ-ਦਿਨਾਂ ਐੱਮਆਈਐੱਸਡਬਲਿਊ-25 ਵਿੱਚ, 30 ਦੇਸ਼ਾਂ ਦੇ 57 ਭਾਗੀਦਾਰਾਂ ਨੇ ਹਿੱਸਾ ਲਿਆ, ਤਾਂ ਜੋ ਕੇਂਦ੍ਰਿਤ ਵਿਚਾਰ-ਵਟਾਂਦਰੇ ਅਤੇ ਸਵਦੇਸ਼ੀ ਮੰਤਰਾ ਸੌਫਟਵੇਅਰ ਦੀ ਵਰਤੋਂ ਕਰਕੇ ਇੱਕ ਵਿਵਹਾਰਿਕ ਟੇਬਲ-ਟੌਪ ਅਭਿਆਸ ਰਾਹੀਂ ਅਸਲ-ਸਮੇਂ ਦੇ ਤਾਲਮੇਲ, ਅੰਤਰ-ਕਾਰਜਸ਼ੀਲਤਾ ਅਤੇ ਸੂਚਨਾ ਸਾਂਝਾਕਰਣ ਨੂੰ ਵਧਾਇਆ ਜਾ ਸਕੇ ।

ਸਮੁੰਦਰੀ ਸੂਚਨਾ ਸਾਂਝਾਕਰਣ ਵਰਕਸ਼ੌਪ (ਐੱਮਆਈਐੱਸਡਬਲਿਊ-25) 25 ਦੇ ਹਿੱਸੇ ਵਜੋਂ ਆਯੋਜਿਤ ਸਮੁੰਦਰੀ ਸੁਰੱਖਿਆ ਸੈਮੀਨਾਰ, 4 ਨਵੰਬਰ 25 ਨੂੰ ਸਮਾਪਤ ਹੋਇਆ। "ਹਿੰਦ ਮਹਾਸਾਗਰ ਖੇਤਰ ਵਿੱਚ ਅਸਲ ਸਮੇਂ ਦੇ ਤਾਲਮੇਲ ਅਤੇ ਸੂਚਨਾ ਸਾਂਝਾਕਰਣ ਨੂੰ ਵਧਾਉਣਾ" ਵਿਸ਼ੇ 'ਤੇ ਚੱਲ ਰਹੀ ਤਿੰਨ-ਦਿਨਾ ਵਰਕਸ਼ੌਪ (3-5 ਨਵੰਬਰ 25) ਆਈਐੱਫਸੀ-ਆਈਓਆਰ ਦੁਆਰਾ ਆਯੋਜਿਤ ਕੀਤੀ ਜਾ ਰਹੀ ਹੈ ਅਤੇ ਇਸ ਵਿੱਚ 30 ਦੇਸ਼ਾਂ ਦੇ 57 ਤੋਂ ਵੱਧ ਭਾਗੀਦਾਰਾਂ ਨੇ ਹਿੱਸਾ ਲਿਆ ਹੈ, ਜਿਨ੍ਹਾਂ ਵਿੱਚ ਆਈਓਆਰਏ, ਡੀਸੀਓਸੀ/ਜੇਏ ਅਤੇ ਬੀਆਈਐੱਮਐੱਸਟੀਈਸੀ (BIMSTEC) ਦੇ ਪ੍ਰਤੀਨਿਧੀ ਸ਼ਾਮਲ ਹਨ।

ਸੈਮੀਨਾਰ ਦੀ ਸ਼ੁਰੂਆਤ ਵਾਈਸ ਐਡਮਿਰਲ ਤਰੁਣ ਸੋਬਤੀ, ਨੇਵਲ ਸਟਾਫ ਦੇ ਉਪ ਮੁਖੀ ਦੇ ਭਾਸ਼ਣ ਨਾਲ ਹੋਈ, ਜਿਨ੍ਹਾਂ ਨੇ ਹਿੰਦ ਮਹਾਸਾਗਰ ਖੇਤਰ ਵਿੱਚ ਉੱਭਰ ਰਹੀਆਂ ਸਮੁੰਦਰੀ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਸਹਿਯੋਗ, ਅੰਤਰ-ਕਾਰਜਸ਼ੀਲਤਾ ਅਤੇ ਵਿਸ਼ਵਾਸ-ਅਧਾਰਿਤ ਭਾਈਵਾਲੀ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਇਸ ਤੋਂ ਬਾਅਦ ਸ਼੍ਰੀ ਸੁਸ਼ੀਲ ਮਾਨਸਿੰਘ ਖੋਪੜੇ, ਆਈਪੀਐੱਸ, ਐਡੀਸ਼ਨਲ ਡਾਇਰੈਕਟਰ ਜਨਰਲ, ਡਾਇਰੈਕਟੋਰੇਟ ਜਨਰਲ ਆਫ਼ ਸ਼ਿਪਿੰਗ ਦੁਆਰਾ ਇੱਕ ਮੁੱਖ ਭਾਸ਼ਣ ਦਿੱਤਾ ਗਿਆ, ਜਿਸ ਵਿੱਚ ਉਨ੍ਹਾਂ ਨੇ ਸਹਿਯੋਗੀ ਸ਼ਮੂਲੀਅਤ ਅਤੇ ਰੈਗੂਲੇਟਰੀ ਤਾਲਮੇਲ ਰਾਹੀਂ ਖੇਤਰ ਦੇ ਸਮੁੰਦਰੀ ਸੁਰੱਖਿਆ ਢਾਂਚੇ ਨੂੰ ਮਜ਼ਬੂਤ ​​ਕਰਨ ਲਈ ਭਾਰਤ ਦੀਆਂ ਸਮੁੰਦਰੀ ਪਹਿਲਕਦਮੀਆਂ ਅਤੇ ਯਤਨਾਂ ‘ਤੇ ਚਾਨਣਾ ਪਾਇਆ। 

ਸੈਮੀਨਾਰ ਦੇ ਦੋ ਦਿਨਾਂ ਦੌਰਾਨ, ਭਾਗੀਦਾਰਾਂ ਨੇ ਸਮੁੰਦਰੀ ਸੁਰੱਖਿਆ ਦ੍ਰਿਸ਼ਟੀਕੋਣ ਨੂੰ ਆਕਾਰ ਦੇਣ ਵਾਲੇ ਵਿਭਿੰਨ ਵਿਸ਼ਿਆਂ 'ਤੇ ਵਿਚਾਰ-ਵਟਾਂਦਰਾ ਕੀਤਾ, ਜਿਸ ਵਿੱਚ ਖੇਤਰੀ ਸੁਰੱਖਿਆ ਗਤੀਸ਼ੀਲਤਾ, ਸੂਚਨਾ ਨੈੱਟਵਰਕਾਂ ਦੀ ਭੂਮਿਕਾ, ਸੰਚਾਲਨ ਤਾਲਮੇਲ, ਸਮੁੰਦਰੀ ਕਾਨੂੰਨ, ਉਦਯੋਗ ਦੇ ਦ੍ਰਿਸ਼ਟੀਕੋਣ ਅਤੇ ਅੰਤਰ-ਰਾਸ਼ਟਰੀ ਸਮੁੰਦਰੀ ਅਪਰਾਧ ਵਰਗੇ ਪਹਿਲੂ ਸ਼ਾਮਲ ਸਨ। ਸੈਸ਼ਨਾਂ ਨੇ ਇੱਕ ਮਜ਼ਬੂਤ ​​ਅਤੇ ਜਵਾਬਦੇਹ ਸਮੁੰਦਰੀ ਸੁਰੱਖਿਆ ਢਾਂਚੇ ਦੇ ਨਿਰਮਾਣ ਵਿੱਚ ਤਕਨੀਕੀ ਏਕੀਕਰਣ, ਡੇਟਾ ਅੰਤਰ-ਕਾਰਜਸ਼ੀਲਤਾ ਅਤੇ ਸਮੂਹਿਕ ਵਚਨਬੱਧਤਾ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਸੈਮੀਨਾਰ ਦਾ ਸਮਾਪਨ ਰੀਅਰ ਐਡਮਿਰਲ ਨਿਰਭੈ ਬਾਪਨਾ (ਸੀਐੱਸ ਐੱਨਸੀਓ) ਦੇ ਸੰਬੋਧਨ ਨਾਲ ਹੋਇਆ, ਜਿਨ੍ਹਾਂ ਨੇ ਖੇਤਰੀ ਜਾਣਕਾਰੀ-ਸਾਂਝਾਕਰਣ ਢਾਂਚਿਆਂ ਵਿੱਚ ਤਾਲਮੇਲ ਦੀ ਜ਼ਰੂਰਤ ‘ਤੇ ਚਾਨਣਾ ਪਾਇਆ ਅਤੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਸੁਰੱਖਿਅਤ ਸਮੁੰਦਰੀ ਖੇਤਰ ਨੂੰ ਯਕੀਨੀ ਬਣਾਉਣ ਵਿੱਚ ਸਹਿਯੋਗ ਅਤੇ ਨਿਰੰਤਰ ਸੰਵਾਦ ਕੇਂਦਰੀ ਭੂਮਿਕਾ ਨਿਭਾਉਂਦੇ ਹਨ।

05 ਨਵੰਬਰ 25 ਨੂੰ, ਐੱਮਆਈਐੱਸਡਬਲਿਊ -25 ਵਿੱਚ ਆਈਐੱਫਸੀ-ਆਈਓਆਰ ਵਿੱਚ ਇੱਕ ਟੇਬਲ ਟੌਪ ਐਕਸਰਸਾਈਜ਼ (ਟੀਟੀਐੱਕਸ) ਹੋਵੇਗੀ, ਜਿੱਥੇ ਸੂਚਨਾ ਸਾਂਝੀ ਕਰਨ, ਅੰਤਰ-ਕਾਰਜਸ਼ੀਲਤਾ, ਅਤੇ ਤਾਲਮੇਲ ਪ੍ਰਤੀਕਿਰਿਆ ਦੇ ਸਿਧਾਂਤਾਂ ਨੂੰ ਸਿਮੂਲੇਟਿਡ ਸਮੁੰਦਰੀ ਸੁਰੱਖਿਆ ਦ੍ਰਿਸ਼ਾਂ ਰਾਹੀਂ ਅਮਲ ਵਿੱਚ ਲਿਆਂਦਾ ਜਾਵੇਗਾ। ਟੀਟੀਐੱਕਸ ਨੂੰ ਸਵਦੇਸ਼ੀ ਤੌਰ 'ਤੇ ਵਿਕਸਿਤ ਮੈਰੀਟਾਈਮ ਐਨਾਲਿਟਿਕਲ ਟੂਲ ਫਾਰ ਰੀਜਨਲ ਅਵੇਅਰਨੈੱਸ (ਮੰਤਰਾ) ਸੌਫਟਵੇਅਰ ਦੀ ਵਰਤੋਂ ਕਰਕੇ ਕਰਵਾਇਆ ਜਾਵੇਗਾ। ਡੈਲੀਗੇਟਾਂ ਨੂੰ ਸਿਮੂਲੇਟਿਡ ਸਮੁੰਦਰੀ ਸਥਿਤੀਆਂ ਦਾ ਜਵਾਬ ਦੇਣ ਦਾ ਕੰਮ ਸੌਂਪਿਆ ਜਾਵੇਗਾ, ਜਿਸ ਵਿੱਚ ਸਮੁੰਦਰੀ ਡਾਕੂਆਂ, ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ, ਅਨਿਯਮਿਤ ਮਨੁੱਖੀ ਪ੍ਰਵਾਸ, ਅਤੇ ਸਮੁੰਦਰ ਵਿੱਚ ਸੰਕਟ ਦ੍ਰਿਸ਼ਾਂ ਦੀਆਂ ਘਟਨਾਵਾਂ ਸ਼ਾਮਲ ਹਨ। ਇਹ ਅਭਿਆਸ ਬਹੁ-ਏਜੰਸੀ ਤਾਲਮੇਲ, ਤੁਰੰਤ ਸੂਚਨਾ ਸਾਂਝਾਕਰਣ, ਅਤੇ ਤਾਲਮੇਲ ਪ੍ਰਤੀਕਿਰਿਆ ਯੋਜਨਾਬੰਦੀ 'ਤੇ ਕੇਂਦ੍ਰਿਤ ਹੋਵੇਗਾ। ਅਭਿਆਸ ਦਾ ਉਦੇਸ਼ ਇਕਸਾਰ ਸਮੁੰਦਰੀ ਸੁਰੱਖਿਆ ਨਤੀਜਿਆਂ ਨੂੰ ਪ੍ਰਾਪਤ ਕਰਨ ਲਈ ਅਸਲ-ਸਮੇਂ ਦੀ ਸੂਚਨਾ ਸਾਂਝਾਕਰਣ ਨੂੰ ਬਿਹਤਰ ਕਰਨਾ ਹੈ।

************

ਵੀਐੱਮ/ਐੱਸਕੇਵਾਈ 

(Release ID: 2186954) Visitor Counter : 4