കാര്യക്ഷമത, സുതാര്യത, സഹാനുഭൂതി എന്നിവ ഇപിഎഫ്ഒയുടെ പരിവർത്തനത്തിൻ്റെ പ്രേരകശക്തികളായി തുടരണമെന്ന് ഡോ. മാണ്ഡവ്യ ഊന്നിപ്പറഞ്ഞു. "ഓരോ പരിഷ്കാരത്തിൻ്റെയും ഗുണം തൊഴിലാളികൾക്ക്  അവരുടെ ജീവിതത്തിൽ നേരിട്ട് അനുഭവപ്പെടുന്ന തരത്തിൽ വ്യക്തവും ലളിതവുമായ രീതിയിൽ എത്തിച്ചേരണം"-അദ്ദേഹം പറഞ്ഞു. പ്രൊഫഷണലിസത്തിലൂടെയും അനുകമ്പയിലൂടെയും വിശ്വാസം ഉയർത്തിപ്പിടിക്കാൻ ഉദ്യോഗസ്ഥരോട് അദ്ദേഹം ആഹ്വാനം ചെയ്തു. "സേവന വിതരണത്തിൽ നീതി, വേഗം, കരുതൽ എന്നിവയ്ക്ക് ഊന്നൽ നൽകി   പൗരന്മാരുടെ വിശ്വാസം ഊട്ടിയുറപ്പിക്കുന്ന പ്രവർത്തനം ഇപിഎഫ്ഒ തുടരണം. 'വികസിത  ഭാരതം 2047' എന്ന ലക്ഷ്യസാക്ഷാത്ക്കാരത്തിനായി നാം മുന്നേറുമ്പോൾ സാമൂഹിക സുരക്ഷയിൽ ആഗോള മാനദണ്ഡങ്ങൾ നിലനിർത്താൻ ഇപിഎഫ്ഒയ്ക്ക് കഴിയണം"-മന്ത്രി കൂട്ടിച്ചേർത്തു.

ഈ അവസരത്തിൽ, യോഗ്യരായ ജീവനക്കാരെ സ്വമേധയാ പ്രഖ്യാപിക്കാനും എൻറോൾ ചെയ്യാനും തൊഴിലുടമകളെ പ്രോത്സാഹിപ്പിക്കുകയെന്ന ലക്ഷ്യത്തോടെ, ഡോ. മാണ്ഡവ്യ എംപ്ലോയി എൻറോൾമെൻ്റ് സ്കീം 2025ന് തുടക്കം കുറിച്ചു. 2025 നവംബർ ഒന്നു മുതൽ പ്രാബല്യത്തിൽ വരുന്ന ഈ പദ്ധതി പ്രകാരം, തൊഴിലുടമകൾ, ജീവനക്കാരുടെ വിഹിതം നേരത്തെ കുറച്ചിട്ടില്ലെങ്കിൽ അത് അടയ്ക്കേണ്ടതില്ല, കൂടാതെ 100 രൂപയെന്ന നാമമാത്രമായ പിഴ മാത്രമേ ബാധകമാകൂ. ഈ പദ്ധതി തൊഴിൽ മേഖലയുടെ ഔപചാരികത വർദ്ധിപ്പിക്കുന്നതിനും ബിസിനസ് എളുപ്പമാക്കുന്നതിനും ലക്ഷ്യമിടുന്നുവെന്നും മന്ത്രി പറഞ്ഞു.

ചടങ്ങിൽ, ഇപിഎഫ്ഒയുടെ യാത്രയും നേട്ടങ്ങളും വിശദീകരിക്കുന്ന കോഫി ടേബിൾ ബുക്ക്, സ്റ്റേറ്റ് പ്രൊഫൈൽ 2025, റീഇമാജിനിംഗ് ഗവേണൻസ് എന്നീ  പ്രസിദ്ധീകരണങ്ങളും ഡോ. മാണ്ഡവ്യ പുറത്തിറക്കി. ചടങ്ങിൻ്റെ ഭാഗമായി ഒരു പ്രത്യേക തപാൽ കവറും പുറത്തിറക്കി.

ഡിജിറ്റൽ ലൈഫ് സർട്ടിഫിക്കറ്റ് സമർപ്പണത്തിനായി ഇന്ത്യ പോസ്റ്റ് പേയ്‌മെൻ്റ്സ് ബാങ്കുമായും (IPPB), ഡാറ്റ പങ്കിടലിനായി ഗവൺമെൻ്റ് ഇ-മാർക്കറ്റ് പ്ലേസുമായും (GeM) ഇപിഎഫ്ഒ ധാരണാപത്രങ്ങൾ കൈമാറി. മാതൃകാപരമായ പ്രകടനങ്ങളും  നവോത്‌ഥാന പ്രവർത്തനങ്ങളും കാഴ്ച വെച്ച റീജിയണൽ, സോണൽ, ജില്ലാ ഓഫീസുകൾക്ക് 2025 ലെ ഭവിഷ്യ നിധി അവാർഡുകളും ഡോ. മൻസുഖ് മാണ്ഡവ്യ സമ്മാനിച്ചു.