ఫాస్టాగ్ వినియోగదారులకు సౌకర్యాన్ని పెంచి, అనుభవాన్ని మెరుగుపరచడానికి నో యువర్ వెహికిల్  (కేవైవీ) ప్రక్రియను జాతీయ రహదారుల అభివృద్ధి సంస్థ (ఎన్ హెచ్ఏఐ)  సరళతరం చేసింది. ఇండియన్ హైవేస్ మేనేజ్ మెంట్ కంపెనీ లిమిటెడ్ (ఐహెచ్ఎంసీఎల్) జారీ చేసిన సవరించిన మార్గదర్శకాల ప్రకారం, నిబంధనలు పాటించని వాహనాల ఫాస్టాగ్ సేవలను నిలిపివేయరు. కేవైవీ ప్రక్రియను పూర్తిచేసేందుకు వారికి తగిన సమయం ఇస్తారు.

సరళతరం చేసిన కేవైవీ మార్గదర్శకాల ప్రకారం, కారు, జీప్, వాన్ వాహనాల పక్కదిశ (సైడ్) ఫోటోలు ఇకపై అవసరం లేదు. వాహనం నంబర్ ప్లేట్, ఫాస్టాగ్ కనిపించే ముందు భాగం ఫోటో మాత్రమే అప్‌లోడ్ చేయాలి. వినియోగదారులు వాహన సంఖ్య, ఛాసిస్ సంఖ్య లేదా మొబైల్ నెంబరును నమోదు చేసినప్పుడు, వాహన్ ద్వారా ఆర్సీ వివరాలను ఆటోమేటిక్‌గా పొందేందుకు కూడా నిబంధనలు చేరుస్తున్నారు. ఒకే మొబైల్ నెంబరుతో బహుళ వాహనాలు రిజిస్టర్ అయి ఉంటే వినియోగదారులు తాము కేవైవీని పూర్తి చేయాలనుకుంటున్న వాహనాన్ని ఎంచుకోవలసి ఉంటుంది.

సేవలను నిరంతరాయంగా కొనసాగించడానికి వీలుగా కేవైవీ విధానం అమలుకు ముందు జారీ చేసిన ఫాస్టాగ్ లు యథావిధిగా కొనసాగుతాయి. అయితే ట్యాగ్‌ వదులుగా ఉన్నట్టు, లేదా దుర్వినియోగం అవుతున్నట్టు ఫిర్యాదులు వస్తే తగిన చర్యలు తీసుకుంటారు. అలాగే, వాటిని జారీ చేసిన బ్యాంకులు కేవైవీ ప్రక్రియను పూర్తి చేయాలని గుర్తు చేస్తూ వినియోగదారులకు ఎస్ఎంఎన్ లు పంపుతాయి.

ఒక వేళ పత్రాలు అప్‌లోడ్ చేయడంలో వినియోగదారు ఇబ్బంది ఎదుర్కొంటే, దానిని జారీ చేసిన బ్యాంకు కనెక్షన్ నిలిపివేయడానికి ముందే చురుగ్గా స్పందించి కస్టమర్‌ను సంప్రదించి, కేవైవీ ప్రక్రియను పూర్తి చేయడంలో సహాయపడుతుంది. అలాగే, వినియోగదారులు తమ బ్యాంకుతో కేవైవీ సమస్యలు ఏవైనా ఉంటే ఫిర్యాదులు లేదా సందేహాలను నేషనల్ హైవే హెల్ప్‌లైను నెంబరు - 1033  ద్వారా తెలుపవచ్చు.

వినియోగదారు అనుభవాన్ని మెరుగుపరచడం, ఫాస్టాగ్ వ్యవస్థను బలోపేతం చేయడం, దేశవ్యాప్తంగా జాతీయ రహదారుల వినియోగదారులకు సజావుగా, అంతరాయం లేని ప్రయాణ అనుభవాన్ని అందించడం పట్ల  నిబద్ధతలో భాగంగా ఎన్ హెచ్ఏఐ కేవైవీ నిబంధనలను సులభతరం చేస్తోంది. 

***