وزیر دفاع  جناب راج ناتھ سنگھ 21 اکتوبر 2025 کو  پولیس یادگاری دن کے موقع پر نئی دہلی میں نیشنل پولیس میموریل پرگل دائرہ  نذر کریں گے ۔  21 اکتوبر 1959 کو لداخ کے ہاٹ اسپرنگس میں بھاری ہتھیاروں سے لیس چینی فوجیوں کے گھات لگا کر کیے گئے حملے میں 10 بہادر پولیس اہلکاروں نے اپنی جانوں کی عظیم قربانی دی تھی ۔  تب سے ہر سال 21 اکتوبر کو پولیس یادگاری دن کے طور پر منایا جاتا ہے ۔

اس تقریب کے حصے کے طور پر سنٹرل آرمڈ پولیس فورسز (سی اے پی ایف) اور دہلی پولیس کی مشترکہ پریڈ منعقد کی جائے گی ۔  وزیر دفاع ، مرکزی وزیر مملکت برائے امور داخلہ ، پولیس پس منظر کے حامل ممبران پارلیمنٹ ، سی اے پی ایف/سی پی اوز کے سربراہان اور دیگر افراد بھی گل دائرہ نذر کریں  گے ۔  ریٹائرڈ ڈی جی ، پولیس برادری کے افسران اور دیگر معززین بھی اس تقریب میں شرکت کریں گے ۔  وزیر دفاع اجتماع  سے بھی خطاب کریں گے ۔

پولیس اہلکاروں کی قربانیوں اور قومی سلامتی اور سالمیت کے تحفظ میں ان کے اہم کردار کے اعتراف میں ، وزیر اعظم جناب نریندر مودی نے پولیس یادگاری دن 2018 کے موقع پر چانکیہ پوری ، نئی دہلی میں نیشنل پولیس میموریل کو ملک کے نام وقف کیا تھا ۔  اس میوزیم  کا تصور ہندوستان میں پولیسنگ پر ایک تاریخی اور ابھرتی ہوئی نمائش کے طور پر کیا گیا ہے ۔  یہ پیر کے علاوہ تمام دنوں میں عوام کے لیے کھلا رہتا ہے ۔  سی اے پی ایف ہر سنیچر اور اتوار کی شام نیشنل پولیس میموریل میں بینڈ ڈسپلے ، پریڈ اور ریٹریٹ تقریب کا اہتمام کرتے ہیں ، جو غروب آفتاب سے ایک گھنٹہ پہلے شروع ہوتا ہے ۔

اپنی جانوں کو داؤ پر لگاتے ہوئے ملک کی سلامتی کے لیے ان کے عزم کو تقویت دینے کے ساتھ ساتھ یہ میموریل پولیس فورسز کو قومی شناخت ، فخر ، مقصد کے اتحاد ، مشترکہ تاریخ اورمقدر  کا احساس دلاتا ہے ۔  اس میں ایک مرکزی علامت ، بہادری کی دیوار اور ایک میوزیم  شامل ہے ۔  مرکزی علامت  ، جو 30 فٹ اونچی گرینائٹ کی ہے ، پولیس اہلکاروں کی طاقت ، لچک اور بے لوث خدمت کا مظہر ہے ۔  بہادری کی دیوار جس پر شہیدوں کے نام کندہ ہیں ، ان پولیس اہلکاروں کی بہادری اور قربانی کے مستقل اعتراف کے طور پر کھڑی ہے جنہوں نے آزادی کے بعد سے ڈیوٹی کے دوران اپنی جانیں قربان کیں ۔

یادگاری تقریبات کے ایک حصے کے طور پر ، سی اے پی ایف/سی پی او 22 سے 30 اکتوبر تک نیشنل پولیس میموریل میں مختلف یادگاری تقریبات کا انعقاد کرتے ہیں ، جن میں اپنی جانیں قربان کرنے والے کے اہل خانہ سے ملاقات، پولیس بینڈ ڈسپلے، موٹر سائیکل ریلیاں، شہیدوں کے لیے دوڑ، خون کے عطیہ کے کیمپ، بچوں کے لیے مضمون/پینٹنگ کے مقابلے اور پولیس اہلکاروں کی قربانی ، بہادری اور خدمات کی نمائش کرنے والی ویڈیو فلموں کی نمائش شامل ہے ۔  اسی طرح کے پروگرام اس مدت کے دوران ملک بھر کی تمام پولیس فورسز کے ذریعے منعقد کیے جاتے ہیں ۔

*****

ش ح-ا ع خ  ۔ر  ا

U-No- 70

(Release ID: 2180761) Visitor Counter : 11