नवी दिल्ली, 17 ऑक्टोबर 2025

नेटवर्क प्लॅनिंग ग्रुपने आज एकूण पाच पायाभूत प्रकल्पांचा सविस्तर आढावा घेतला. यामध्ये रस्ते वाहतूक आणि महामार्ग मंत्रालयाचे दोन महामार्ग प्रकल्प, रेल्वे मंत्रालयाचे दोन प्रकल्प आणि गृहनिर्माण व शहरी व्यवहार मंत्रालयाचा एक मेट्रो रेल्वे प्रकल्प यांचा समावेश होता. या प्रकल्पांचे मूल्यांकन प्रधानमंत्री गतिशक्तीच्या तत्त्वांनुसार करण्यात आले, ज्यात एकात्मिक बहुआयामी नियोजन, आर्थिक व सामाजिक केंद्रांशी सक्षम अंतिम जोडणी आणि ‘संपूर्ण शासन दृष्टिकोन’ या घटकांवर विशेष लक्ष केंद्रित करण्यात आले.

कर्नाटक राज्यातील होसपेट आणि बल्लारी या स्थानकांदरम्यान 65 किलोमीटरचा चौपदरी लोहमार्ग उभारण्याचा प्रस्ताव रेल्वे मंत्रालयाने सादर केला असून, यामुळे प्रदेशातील मालवाहतूक आणि प्रवासी वाहतुक क्षमता वाढणार आहे.

गोंदिया–जबलपूर रेल्वेमार्ग दुपदरीकरण प्रकल्प  

रेल्वे मंत्रालयाने महाराष्ट्र आणि मध्य प्रदेश या दोन राज्यातील गोंदिया–जबलपूर रेल्वेमार्गाच्या 230.5 किलोमीटर लांबीच्या दुपदरीकरणाचा प्रस्ताव मांडला आहे. हा महत्त्वपूर्ण रेल्वे पायाभूत प्रकल्प मध्य भारतातील एक धोरणात्मक रेल्वे कॉरिडॉर म्हणून ओळखला जाणार असून, रेल्वे वाहतूक क्षमता वाढविणे, सध्याच्या एकेरी मार्गावरील ताण कमी करणे, तसेच प्रवासी आणि मालवाहतूक प्रवास अधिक सुलभ करणे या उद्दिष्टांसाठी राबविण्यात येणार आहे. या प्रस्तावित मार्गाचा आराखडा पाच जिल्ह्यांमधून जातो.  महाराष्ट्रातील गोंदिया, आणि मध्य प्रदेशातील बालाघाट, मंडला, सिवनी आणि जबलपूर या जिल्ह्यांचा समावेश आहे. हा मार्ग कृषी, खाणकाम आणि औद्योगिक क्षेत्रांना जोडणारा असून, गोंदिया–जबलपूर विभागाला एक आर्थिक आणि वाहतूकदृष्ट्या अत्यावश्यक जीवनवाहिनी म्हणून अधिक बळकटी देईल.

बल्लारशाह –गोंदिया–जबलपूर रेल्वे मार्गावर मालवाहतूक आणि प्रवासी वाहतुकीत मोठी वाढ अपेक्षित आहे. विशेषतः कोळसा, पोलाद, सिमेंट आणि इतर वस्तूंच्या वाहतुकीत लक्षणीय वाढ होईल. विद्यमान एकेरी मार्गामुळे अनेक ठिकाणी वाहतुकीतील अडथळे आणि विलंब होत असून, या कॉरिडॉरच्या दुपदरीकरणामुळे पूर्व आणि मध्य भारतातील औद्योगिक आणि कृषी क्षेत्रांना अधिक सुलभ जोडणी मिळेल.

शैलेश पाटील/राज दळेकर/प्रिती मालंडकर

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

 

(Release ID: 2180359) Visitor Counter : 7