تجارت اور صنعت کے مرکزی وزیر جناب پیوش گوئل نے قطر کے تجارت اور صنعت کے وزیر عزت مآب شیخ فیصل بن تھانی بن فیصل آل ثانی کے ہمراہ  اقتصادی اور تجارتی تعاون کے سلسلے میں ہندوستان-قطر مشترکہ کمیشن کی شریک صدارت کے لیے دوحہ، قطر کا سرکاری دورہ کیا۔

یہ اپ گریڈ کیے گئے مشترکہ کمیشن کا پہلا اجلاس تھا، جو کہ فروری 2025 میں قطر کے امیر کے بھارت کے دورے کے دوران لیے گئے اس فیصلے کے بعد ہوا، جس میں پہلے کے تجارتی اور کاروباری مشترکہ ورکنگ گروپ کو بڑھا کر مشترکہ کمیشن کا درجہ دیا گیا تھا۔ اس دورے نے دونوں فریقین کی دو طرفہ اقتصادی تعلقات کو مزید مضبوط بنانے اور متعدد شعبوں میں تعاون کو وسعت دینے کے لیے مضبوط عزم کا اعادہ کیا۔

کمیشن کے اجلاس کے دوران دونوں وزراء نے:

• مجموعی تجارتی حجم کا جائزہ لیا (جو 2024-25 میں 14 ارب امریکی ڈالر سے زائد ہے) اور اشیاء و خدمات کی دو طرفہ ہندوستانی تجارت کو بڑھانے اور متنوع بنانے کے اقدامات کی نشاندہی کی۔
• دو طرفہ تجارت کو 2030 تک دوگنا کرنے کا مشترکہ ہدف مقرر کیا، جس میں توانائی، انفراسٹرکچر، مینوفیکچرنگ، مالیات، ٹیکنالوجی، اور سبز ترقی کے نئے مواقع شامل ہیں۔
• ہندوستان-قطر جامع اقتصادی شراکت داری کے معاہدے ( سی ای پی اے) پر باضابطہ مذاکرات کے آغاز کے لیے شرائطِ حوالہ کی جلد تکمیل پر اتفاق کیا۔
• قطر کی طرف سے ہندوستان میں 10 ارب امریکی ڈالر کی سرمایہ کاری کے اعلان کو تسلیم کیا، جو کہ قطر کے امیر کی سرکاری دورے کے دوران کیا گیا تھا، اور باہمی فائدے کے لیے سرمایہ کاری کے نئے راستے کھولنے کے حوالے سے دونوں فریقوں کے عزم کا اعادہ کیا۔
• ڈیجیٹل معیشت، صحت کی دیکھ بھال، زراعت، سیاحت، ثقافت، اور ماحولیات جیسے ترجیحی شعبوں میں تعاون پر زور دیا۔

موقع پر، جناب گوئل نے قطر کے سینئر حکام اور کاروباری رہنماؤں کے ساتھ متعدد اعلیٰ سطحی دو طرفہ ملاقاتیں کیں تاکہ خوراک کی حفاظت، تجارتی مالیات، پروجیکٹ شراکت داری، اور بھارت کے انفراسٹرکچر اور صنعتی شعبوں میں قطر کی اداروں کے لیے سرمایہ کاری کے مواقع سمیت مختلف شعبوں میں تعاون کو بڑھانے کے ذرائع پر تبادلہ خیال کیا جا سکے۔

وزیر نے ہندوستان-قطر مشترکہ بزنس کونسل (جے بی سی) کے پہلے اجلاس سے خطاب بھی کیا، جس میں ایف آئی سی سی آئی، سی آئی آئی، ایسوچیم، اور قطر چیمبر کے سینئر کاروباری نمائندے موجود تھے، اور بعد ازاں قطر بزنس مین ایسوسی ایشن  (قیو بی اے) کے اراکین سے ملاقات کی۔ انہوں نے وکست بھارت@2047 کے وژن کے تحت بھارت کے تیز رفتاری سے بڑھتے ہوئے بڑے معاشی ملک اور جدت، مینوفیکچرنگ اور ٹیکنالوجی کے ابھرتے ہوئے مرکز کے طور پر کردار کو اجاگر کیا۔

ڈیجیٹل تعاون میں ایک اہم سنگ میل کے طور پر، جناب گوئل نے قطر میں یونائیفائیڈ پیمنٹس انٹرفیس (یو پی آئی) خدمات کا آغاز کیا، جس سے بھارتی برادری اور مقامی صارفین کے لیے آسان اور بلا رکاوٹ ڈیجیٹل لین دین ممکن ہوا۔

وزیر نے انڈین بزنس اینڈ پروفیشنلز کونسل (آئی بی پی سی)، انسٹی ٹیوٹ آف چارٹرڈ اکاؤنٹنٹس آف انڈیا (آئی سی اے آئی) کے دوحہ چیپٹر، اور قطر میں موجود متحرک بھارتی کمیونٹی کے اراکین سے بھی ملاقات کی، اور دونوں ممالک کے درمیان اقتصادی تعلقات کو فروغ دینے میں ان کی خدمات کو سراہا۔

یہ دورہ بھارت اور قطر کے مشترکہ وژن کی تصدیق کے ساتھ اختتام پذیر ہوا، جو ایک مستقبل بین، متنوع اور مضبوط اقتصادی شراکت داری ہے، جو باہمی اعتماد، توانائی کے تعاون، تکنیکی شراکت داری اور مضبوط عوامی روابط پر مبنی ہے۔

***

UR-7280

(ش ح۔اس ک  )