ପଞ୍ଜାବ, ହରିୟାଣା, ଉତ୍ତରପ୍ରଦେଶର କୃଷି ମନ୍ତ୍ରୀ ଏବଂ ଦିଲ୍ଲୀର ପରିବେଶ ମନ୍ତ୍ରୀ ଭର୍ଚୁଆଲ ମାଧ୍ୟମରେ ଯୋଗ ଦେଇଥିଲେ

କେନ୍ଦ୍ର କୃଷିମନ୍ତ୍ରୀ କହିଛନ୍ତି ଯେ, ଆର୍ଥିକ ସହାୟତା ପସମେତ ବିଭିନ୍ନ ମାଧ୍ୟମରେ କୃଷକମାନଙ୍କୁ ସଚେତନ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ

କୃଷକମାନଙ୍କ ମଧ୍ୟରେ ସଚେତନତା ବୃଦ୍ଧି ପାଇଁ ପଞ୍ଚାୟତ, ଜନ ପ୍ରତିନିଧିଙ୍କ ଅଂଶଗ୍ରହଣ କରନ୍ତୁ-ଶ୍ରୀ ଚୌହାନ

ନଡ଼ା ପୋଡ଼ିବାର ଘଟଣା ହ୍ରାସ କରିବା ପାଇଁ ଉପଯୁକ୍ତ ତଦାରଖ ଆବଶ୍ୟକ-ଶ୍ରୀ ଶିବରାଜ ସିଂହ

ସିଧା ଫସଲ ବୁଣିବା, ବିବିଧକରଣ, ବ୍ୟବହାରିକ ଯୋଜନା ଦ୍ୱାରା ଉତ୍ତମ ଫଳାଫଳ ମିଳିବ-ଶ୍ରୀ ଚୌହାନ

ସମନ୍ୱିତ ପ୍ରୟାସ ଦ୍ୱାରା ନଡ଼ା ପୋଡ଼ିବାର ଘଟଣା ନିଶ୍ଚିତ ଭାବେ ହ୍ରାସ ପାଇବ-ଶ୍ରୀ ଚୌହାନ

ଶ୍ରୀ ଚୌହାନ କୃଷି ମନ୍ତ୍ରୀମାନଙ୍କୁ ମଧ୍ୟ ଆହ୍ୱାନ କରିଥିଲେ ଯେ ସେମାନେ ରାଜ୍ୟଗୁଡ଼ିକରେ ସିଧା ଫସଲ ବୁଣବାକୁ ପ୍ରୋତ୍ସାହିତ କରନ୍ତୁ

 

କେନ୍ଦ୍ର କୃଷି ଏବଂ କୃଷକ କଲ୍ୟାଣ ମନ୍ତ୍ରୀ ଶ୍ରୀ ଶିବରାଜ ସିଂ ଚୌହାନ ଏବଂ କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଶ୍ରୀ ଭୂପେନ୍ଦ୍ର ଯାଦବଙ୍କ ମଧ୍ୟରେ ମିଳିତ ଭାବେ ଆଜି ନୂଆଦିଲ୍ଲୀର କୃଷି ଭବନରେ ନଡ଼ା ପରିଚାଳନା ଉପରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ପଞ୍ଜାବର କୃଷି ମନ୍ତ୍ରୀ ଶ୍ରୀ ଗୁରମିତ ସିଂ ଖୁଦିଆନ୍, ହରିୟାଣାର କୃଷି ମନ୍ତ୍ରୀ ଶ୍ରୀ ଶ୍ୟାମ ସିଂ ରାଣା, ଉତ୍ତର ପ୍ରଦେଶର କୃଷି ମନ୍ତ୍ରୀ ଶ୍ରୀ ସୂର୍ଯ୍ୟ ପ୍ରତାପ ଶାହୀ ଏବଂ ଦିଲ୍ଲୀର ପରିବେଶ ମନ୍ତ୍ରୀ ଶ୍ରୀ ମଞ୍ଜିନ୍ଦର ସିଂ ସିରସା ଭର୍ଚୁଆଲ ମାଧ୍ୟମରେ ଯୋଗ ଦେଇଥିଲେ। ଏହି ବୈଠକରେ ନଡ଼ା ପୋଡ଼ିବାରୁ ବାୟୁ ପ୍ରଦୂଷଣ ହ୍ରାସ କରିବା ଏବଂ ଧାନ ନଡ଼ା ଉନ୍ନତ ଉପଯୋଗ ପାଇଁ ସକ୍ରିୟ ପଦକ୍ଷେପ ନେବା ଉପରେ ବ୍ୟାପକ ଆଲୋଚନା ହୋଇଥିଲା, ଯେଉଁଥିରେ କୃଷକମାନଙ୍କ ମଧ୍ୟରେ ସଚେତନତା, ଆର୍ଥିକ ସହାୟତା, ପ୍ରଭାବଶାଳୀ ତଦାରଖ, ଫସଲ ପରିଚାଳନା ଏବଂ ବିବିଧତା ଅନ୍ତର୍ଭୁକ୍ତ ଥିଲା।

ଏହି ବୈଠକରେ ପଞ୍ଜାବ, ହରିୟାଣା ଏବଂ ଉତ୍ତର ପ୍ରଦେଶର କୃଷି ମନ୍ତ୍ରୀମାନେ ପ୍ରଥମେ କେନ୍ଦ୍ର କୃଷିମନ୍ତ୍ରୀ ଶ୍ରୀ ଶିବରାଜ ସିଂହଙ୍କୁ ନିଜ ନିଜ ରାଜ୍ୟରେ ନଡ଼ା ପରିଚାଳନାର ସ୍ଥିତି ବିଷୟରେ ଅବଗତ କରାଇଥିଲେ ଏବଂ ସୂଚନା ଦେଇଥିଲେ, ଯେ ନଡ଼ା ପରିଚାଳନା ଯୋଜନାକୁ ସମ୍ପୂର୍ଣ୍ଣ ଶକ୍ତି ଏବଂ ସତର୍କତାର ସହ କାର୍ଯ୍ୟକାରୀ କରାଯାଉଛି। ସେ କହିଛନ୍ତି ଯେ ଅଧିକାରୀ, କର୍ମଚାରୀଙ୍କ ସମେତ ସମଗ୍ର ବିଭାଗ ମଧ୍ୟ ଏହି କାର୍ଯ୍ୟରେ ଗମ୍ଭୀରତାର ସହ ନିୟୋଜିତ ଅଛନ୍ତି।

ଏହି ବୈଠକରେ ହରିୟାଣା କୃଷିମନ୍ତ୍ରୀ ସୂଚନା ଦେଇଥିଲେ ଯେ, ଆର୍ଥିକ ସହାୟତା ମାଧ୍ୟମରେ ରାଜ୍ୟରେ ନଡ଼ା ନ ଜାଳିବା ପାଇଁ କୃଷକମାନଙ୍କୁ ପ୍ରୋତ୍ସାହିତ କରାଯାଉଛି, ଯାହାର ପ୍ରଭାବ ବ୍ୟାପକ ହୋଇଛି। ଏହାଦ୍ୱାରା କୃଷକମାନେ ନଡ଼ା ପରିଚାଳନା ପାଇଁ ବିକଳ୍ପ ପଦକ୍ଷେପ ଆଡ଼କୁ ଅଗ୍ରସର ହେଉଛନ୍ତି।

ରାଜ୍ୟଗୁଡ଼ିକର ପ୍ରୟାସକୁ ପ୍ରଶଂସା କରି କେନ୍ଦ୍ର କୃଷି ମନ୍ତ୍ରୀ କହିଥିଲେ ଯେ, ରାଜ୍ୟରେ ନଡ଼ା ପରିଚାଳନା କ୍ଷେତ୍ରରେ ଭଲ କାର୍ଯ୍ୟ କରାଯାଉଛି, କିନ୍ତୁ ନିରନ୍ତର ପ୍ରୟାସର ଆବଶ୍ୟକତା ରହିଛି। ସେ କହିଥିଲେ ଯେ କୃଷକମାନଙ୍କ ମଧ୍ୟରେ ଜନ ସଚେତନତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏଥିପାଇଁ ଯଦି ପଞ୍ଚାୟତ ଏବଂ ଗ୍ରାମ ସ୍ତରରେ ଜନ ପ୍ରତିନିଧି ଏବଂ ନୋଡାଲ ଅଧିକାରୀଙ୍କ ଅଂଶଗ୍ରହଣ ମଧ୍ୟ ସୁନିଶ୍ଚିତ କରାଯାଏ, ତେବେ ଉନ୍ନତ ଫଳାଫଳ ହାସଲ କରାଯାଇପାରିବ।

ଶ୍ରୀ ଚୌହାନ ଏହି ବୈଠକରେ ଫସଲ ପରିଚାଳନା, ସିଧା ବିହନ ବୁଣିବା, ବିବିଧକରଣ, ରାଜ୍ୟଗୁଡ଼ିକ ଦ୍ୱାରା କାର୍ଯ୍ୟ ଯୋଜନା ପାଣ୍ଠିର ଉପଯୁକ୍ତ ଉପଯୋଗ, ପ୍ରଭାବଶାଳୀ ତଦାରଖ ତଥା ଲକ୍ଷ୍ୟବଦ୍ଧ ଢଙ୍ଗରେ କାର୍ଯ୍ୟ ଯୋଜନା ପ୍ରସ୍ତୁତ କରିବା ଉପରେ ମଧ୍ୟ ଆଲୋଚନା କରିଥିଲେ। କେନ୍ଦ୍ରମନ୍ତ୍ରୀ କହିଥିଲେ ଯେ ବିଭିନ୍ନ ପଦକ୍ଷେପ ଗ୍ରହଣ କରିବା ସମୟରେ ମିଳିତ ଭାବେ କାର୍ଯ୍ୟ କରିବା ଦ୍ୱାରା ନିଶ୍ଚିତ ଭାବେ ଫଳପ୍ରଦ ସୁଫଳ ମିଳିବ।

ନିଜ ନିଜ ରାଜ୍ୟରେ ସିଧାସଳଖ ବିହନ ବୁଣିବାକୁ ପ୍ରୋତ୍ସାହିତ କରିବା ଲାଗି ଶ୍ରୀ ଚୌହାନ କୃଷି ମନ୍ତ୍ରୀମାନଙ୍କୁ ଅନୁରୋଧ କରିଥିଲେ। ସେ କ୍ଷେତରେ ସିଧାସଳଖ ବୁଣିବା ବିଷୟରେ କହିଛନ୍ତି, ଯାହା ଫଳସ୍ୱରୂପ ନଡାର ଉପଯୁକ୍ତ ପରିଚାଳନା ଏବଂ ଉପଯୋଗ ହେବ। ଅକ୍ଟୋବର ୧୨ ତାରିଖରେ ମୁଁ ନିଜ କ୍ଷେତରୁ ଏହାର ଶୁଭାରମ୍ଭ କରିବି ବୋଲି ଶ୍ରୀ ଚୌହାନ କହିଛନ୍ତି। ମୁଁ ମୋ କ୍ଷେତର ଧାନ ଅମଳ କରିବା ପରେ ସିଧା ଗହମ ବୁଣିଦେବି। ସେ କହିଥିଲେ ଯେ ଏପରି କରିବା ଦ୍ୱାରା କୃଷକମାନେ ମଧ୍ୟ ସିଧାସଳଖ ବୁଣିବା ପାଇଁ ପ୍ରେରିତ ହେବେ। କେନ୍ଦ୍ରମନ୍ତ୍ରୀ କହିଥିଲେ ଯେ, ରୋଟାଭେଟର ହେଲିକପ୍ଟର, ବାୟୋ ଡି-କମ୍ପୋଜର, ମଲଚିଙ୍ଗ ଇତ୍ୟାଦି ବ୍ୟବହାର କରିବାକୁ ଚେଷ୍ଟା କରନ୍ତୁ। ଶ୍ରୀ ଚୌହାନ ଜୈବ ସିଏନଜି ଇଥାନଲ ପ୍ଲାଣ୍ଟ ଏବଂ ଅନ୍ୟାନ୍ୟ ଉପକରଣର ବ୍ୟବହାରକୁ ପ୍ରୋତ୍ସାହିତ କରିବା ବିଷୟରେ ମଧ୍ୟ କହିଥିଲେ।

କେନ୍ଦ୍ରମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ରାଜ୍ୟଗୁଡ଼ିକ ସୁନିଶ୍ଚିତ କରିବା ଉଚିତ ଯେ ନଡ଼ା ପରିଚାଳନା ପାଇଁ ଉପଲବ୍ଧ ପାଣ୍ଠି ଯେପରି ଖର୍ଚ୍ଚ ହୁଏ, ଯାହାଦ୍ୱାରା ମେସିନ୍ଗୁଡ଼ିକର ଉପଲବ୍ଧତା ଏକ ସମସ୍ୟା ହେବ ନାହିଁ। ଫସଲ ବିବିଧକରଣ ଏକ ସୁଦୂରପ୍ରସାରୀ ପ୍ରୟାସ ବୋଲି ସେ ଉଲ୍ଲେଖ କରିଥିଲେ। ଶ୍ରୀ ଚୌହାନ କହିଥିଲେ ଯେ ନଡ଼ା ଆଧାରିତ ବାୟୋ ସି. ଏନ୍. ଜି. ପେଲେଟ ଚାହିଦା ଥିବା କମ୍ପୋଷ୍ଟ ୟୁନିଟ ଏବଂ ଶିଳ୍ପ ଏବଂ ତାପଜ ପ୍ଲାଣ୍ଟଗୁଡ଼ିକୁ ସଂଯୋଗ କରିବା ଲାଗି ପ୍ରୟାସ କରାଯିବା ଉଚିତ, ଯାହାଦ୍ୱାରା ନଡ଼ା ଗୁଡ଼ିକର ଉପଯୁକ୍ତ ନିଷ୍କାସନ କରାଯାଇପାରିବ।

ଶେଷରେ, ଶ୍ରୀ ଚୌହାନ ତାଲିମ ସଚେତନତା ସହିତ କ୍ଷମତା ନିର୍ମାଣ ଏବଂ ନିରନ୍ତର ତଦାରଖ ଉପରେ ପୁନର୍ବାର ଗୁରୁତ୍ୱାରୋପ କରିଥିଲେ। କେନ୍ଦ୍ରମନ୍ତ୍ରୀ କହିଥିଲେ ଯେ, ମୋର ବିଶ୍ୱାସ ଯେ କେନ୍ଦ୍ର ଏବଂ ରାଜ୍ୟର ସମନ୍ୱିତ ପ୍ରୟାସ ଦ୍ୱାରା ଆଗାମୀ ସମୟରେ ନଡ଼ା ପୋଡ଼ିବାର ଘଟଣା ନିଶ୍ଚିତ ଭାବେ ଆହୁରି ହ୍ରାସ ପାଇବ। ରିଅଲ୍ ଟାଇମ୍ ମନିଟରିଂ ଅର୍ଥାତ୍ ଆଖି ସାମ୍ନାରେ ମନିଟରିଂ ଜରୁରୀ। ମୁଁ ଆଶା କରୁଛି ଯେ, ଆଗକୁ ଆହୁରି ଭଲ କାମ ହେବ ଏବଂ ଆମେ ପରିବେଶ ଏବଂ ଜଳବାୟୁର ସଂରକ୍ଷଣ କରିବାରେ ସଫଳ ହେବୁ।

ଏହି ବୈଠକରେ କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଶ୍ରୀ ଭୂପେନ୍ଦ୍ର ଯାଦବ ମଧ୍ୟ ସମ୍ବୋଧିତ କରିଥିଲେ ଏବଂ ନଡ଼ା ପରିଚାଳନା ଦିଗରେ ରାଜ୍ୟଗୁଡ଼ିକର ପ୍ରୟାସକୁ ପ୍ରଶଂସା କରିଥିଲେ। ଆଗାମୀ ୧୦ ଦିନ ମଧ୍ୟରେ କୃଷି ମନ୍ତ୍ରଣାଳୟ ଏବଂ ରାଜ୍ୟ ସରକାରଙ୍କ ମଧ୍ୟରେ ଉତ୍ତମ ସମନ୍ୱୟ ପାଇଁ ସେ ଆହ୍ୱାନ କରିଥିଲେ। ସେ କହିଥିଲେ ଯେ ନଡ଼ା ସଂଗ୍ରହ ଏବଂ ସଂରକ୍ଷଣ ସବୁଠାରୁ ଗୁରୁତ୍ୱପୂର୍ଣ୍ଣ, ଯାହାଦ୍ୱାରା ଏହାକୁ ଶିଳ୍ପ ୟୁନିଟରେ ଉପଯୁକ୍ତ ଭାବେ ବ୍ୟବହାର କରାଯାଇପାରିବ। ଇଟାଭାଟି, ତାପଜ ବିଦ୍ୟୁତ କେନ୍ଦ୍ରରେ ନଡ଼ାର ସଂରକ୍ଷଣ କ୍ଷମତା ଉପରେ ସେ ଗୁରୁତ୍ୱାରୋପ କରିଥିଲେ।

କୃଷି ସଚିବ ଶ୍ରୀ ଦେବେଶ ଚତୁର୍ବେଦୀ, ଭାରତୀୟ କୃଷି ଗବେଷଣା ପରିଷଦର ମହାନିର୍ଦ୍ଦେଶକ ଡକ୍ଟର ଏମ୍.ଏଲ୍. ଜାଟ ଏବଂ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ବୈଠକରେ ଉପସ୍ଥିତ ଥିଲେ।

HS

(Release ID: 2176074) Visitor Counter : 3