غیر فاسٹ ٹیگ والے صارفین کے لیے قومی شاہراہوں پر ڈیجیٹل ادائیگیوں کو فروغ دینے اور نقدی لین دین کو ختم کرنے کے مقصد سے حکومتِ ہند نے قومی شاہراہ فیس (شرحوں کے تعین اور وصولی) قواعد، 2008 میں ترمیم کی ہے۔ نئے قاعدے کے تحت، اگر کوئی گاڑی بغیر درست اور فعال فاسٹ ٹیگ کے فیس پلازہ میں داخل ہوتی ہے تو نقد ادائیگی کی صورت میں اس سے قابلِ اطلاق فیس کی دوگنی رقم وصول کی جائے گی۔ تاہم اگر وہی صارف یونائیفائیڈ پیمنٹ انٹرفیس (یو پی آئی) کے ذریعے ادائیگی کرتا ہے تو اس سے گاڑی کی متعلقہ زمرہ جاتی فیس کا صرف 1.25 گنا لیا جائے گا۔ مثال کے طور پر اگر کسی گاڑی پر فاسٹ ٹیگ کے ذریعے 100 روپے کی فیس واجب الادا ہے تو نقد ادائیگی کرنے پر فیس 200  روپے ہوگی جبکہ یو پی آئی کے ذریعے ادائیگی کرنے پر صرف  125 روپے ادا کرنے ہوں گے۔

یہ ترمیم فیس وصولی کے نظام کو مزید مؤثر، شفاف اور آسان بنانے کے ساتھ ساتھ قومی شاہراہوں پر سفر کو آسان بنانے کے مقصد سے کی گئی ہے۔ یہ حکم نامہ 15 نومبر 2025 سے نافذ العمل ہوگا۔ قومی شاہراہ فیس (شرحوں کے تعین اور وصولی) قواعد، 2008 میں کی گئی یہ تازہ ترین ترمیم ٹیکنالوجی کے مؤثر استعمال، ٹول پلازوں پر بھیڑ میں کمی، شفافیت کے فروغ اور ڈیجیٹل ادائیگیوں کے فروغ کے لیے حکومتِ ہند کے عزم کی عکاسی کرتی ہے۔ نئے قواعد سے شاہراہ صارفین کو ایک بہتر اور ہموار سفری تجربہ حاصل ہوگا۔

******

ش ح۔ ش ا ر۔ ول

Uno-7057