2025 ഒക്ടോബർ 01-ന് ന്യൂഡൽഹിയിൽ നടക്കുന്ന ഡിഫെൻസ് അക്കൗണ്ട്സ് വകുപ്പിന്റെ 278-ാമത് വാർഷിക ദിനാഘോഷത്തിൽ രാജ്യരക്ഷാ മന്ത്രി ശ്രീ രാജ്‌നാഥ് സിംഗ് പങ്കെടുക്കും. പ്രതിരോധ മന്ത്രാലയത്തിന്റെ പരിഷ്‌കാര വർഷ (Year of Reforms) സംരംഭങ്ങളുടെ ഭാഗമായി, കൺട്രോളർ ജനറൽ ഓഫ് ഡിഫൻസ് അക്കൗണ്ട്സിന്റെ (CGDA) സ്ഥാപന ശേഷി ശക്തിപ്പെടുത്തുന്നതിനും സേവന വിതരണം വർദ്ധിപ്പിക്കുന്നതിനും ലക്ഷ്യമിട്ടുള്ള പുതിയ പ്രസിദ്ധീകരണങ്ങളുടെ ഒരു പരമ്പര രാജ്യരക്ഷാ മന്ത്രി പുറത്തിറക്കും. ആധുനികവൽക്കരണം, മെച്ചപ്പെടുത്തിയ സുതാര്യത, പ്രതിരോധ സേവനങ്ങൾക്കുള്ള കൂടുതൽ പിന്തുണ എന്നിവയ്ക്കുള്ള വകുപ്പിന്റെ തുടർച്ചയായ പ്രതിബദ്ധത ഈ സമാരംഭങ്ങൾ അടിവരയിടുന്നു.

ഈ അവസരത്തിൽ, പ്രധാന വകുപ്പുതല പദ്ധതികളിലും പരിഷ്കാരങ്ങളിലും മികച്ച സംഭാവനകൾ നൽകിയതിനെ അംഗീകരിച്ച് ശ്രീ രാജ്‌നാഥ് സിംഗ് CGDA ഉദ്യോഗസ്ഥർക്ക് 2025-ലെ രക്ഷാ മന്ത്രി അവാർഡുകൾ സമ്മാനിക്കും. നവീകരണം, പ്രൊഫഷണൽ മികവ്, പ്രതിരോധ സാമ്പത്തിക നിർവ്വഹണത്തിലെ കാര്യക്ഷമത എന്നിവയ്ക്ക് വകുപ്പ് നൽകുന്ന പ്രാധാന്യം ചടങ്ങ് എടുത്തുകാണിക്കും.
 

*********************