ورلڈ فوڈ انڈیا 2025، جس کا اہتمام خوراک ڈبہ بندی صنعت کی وزارت(ایم او ایف پی آئی) نے کیا تھا، غیر معمولی پیمانے پر سرمایہ کاری کے وعدوں کے ساتھ ایک تاریخی طور پر اختتام پذیر ہوئی۔ چار روزہ تقریب کے دوران، 26 سرکردہ ملکی اور عالمی کمپنیوں نے کل 1,02,046.89 کروڑ روپے کی مفاہمتی عرضداشتوں (ایم او یو) پر دستخط کیے، جو ہندوستان کے فوڈ پروسیسنگ سیکٹر میں سرمایہ کاری کے سب سے بڑے اعلانات میں سے ایک ہے۔ ان مفاہمتی عرضداشتوں سے 64,000 سے زیادہ لوگوں کے لیے براہ راست روزگار پیدا کرنے اور 10 لاکھ سے زیادہ افراد کے لیے بالواسطہ مواقع پیدا کرنے کا امکان ہے، جس سے ہندوستان کو فوڈ پروسیسنگ کے لیے ایک عالمی مرکز کے طور پر پوزیشن دینے کے حکومت کے وژن کو تقویت ملے گی۔

ان مفاہمتی عرضداشتوں پر شعبے کی چند ازحد مقبول عام کمپنیوں کے ذریعہ دستخط کیے گئے ، ان میں ریلائنس کنزیومر پروڈکٹس لمیٹڈ، بھارت میں کوکاکولا سسٹم، گجرات کوآپریٹیو ملک مارکیٹنگ فیڈریشن (امول)، فیئر ایکسپورٹس (بھارت) پرائیویٹ لمیٹڈ (لولو گروپ)، نیسلے انڈیا لمیٹڈ، ٹاٹا کنزیومر پروڈکٹس لمیٹڈ، کارلس برگ انڈیا پرائیویٹ لمیٹڈ، بی ایل ایگرو انڈسٹریز لمیٹڈ، اے بی آئی ایس فوڈس اینڈ پروٹینس پرائیویٹ لمیٹڈ، اے سی ای انٹرنیشنل لمیٹڈ، پتانجلی فوڈس لمیٹڈ، گودریج ایگرو ویٹ لمیٹڈ، ایگرسٹو ماسا پرائیویٹ لمیٹڈ، تیوانا نیوٹریشن گلوبل پرائیویٹ لمیٹڈ، ہلدی رام اسنیکس فوڈ پرائیویٹ لمیٹڈ، الانا کنزیومر پروڈکٹس لمیٹڈ، اولام فوڈ انگریڈینٹس، اے بی ان بیو، کریمیکا فوڈ پارک پرائیویٹ لمیٹڈ، ڈیری کرافٹ، سنڈیکس بایوٹیک پرائیویٹ لمیٹڈ، ناسو انڈسٹریز پرائیویٹ لمیٹڈ اور بلو پرنٹ فوڈس جیسی کمپنیاں شامل ہیں۔ وعدوں کا دائرہ متنوع طبقات جیسے ڈیری، گوشت اور پولٹری، پیکڈ فوڈز، الکوحل اور غیر الکوحل والے مشروبات، مصالحے اور مصالحہ جات، کنفیکشنری، خوردنی تیل، پھل اور سبزیاں اور کھانے کے لیے تیار مصنوعات پر پھیلا ہوا ہے۔

ان شراکت داریوں کی ایک نمایاں خاصیت ان کا پین انڈیا فٹ پرنٹ ہے، جس میں سرمایہ کاری متعدد ریاستوں بشمول گجرات، مہاراشٹر، اتر پردیش، پنجاب، بہار، کرناٹک، تمل ناڈو، آندھرا پردیش، تلنگانہ، مدھیہ پردیش، اوڈیشہ، راجستھان، مغربی بنگال، آسام، چھتیس گڑھ، اتراکھنڈ، جموں و کشمیر اور شمالی علاقہ جات میں پھیلی ہوئی ہے۔ یہ وسیع جغرافیائی تقسیم اس بات کو یقینی بناتی ہے کہ ان سرمایہ کاری کے فوائد کو مساوی طور پر بانٹ دیا جائے، جس سے ملک کے متنوع خطوں میں کسانوں، کاروباری افراد اور مقامی کمیونٹیز کے لیے مواقع ملتے ہیں۔

قومی سرمایہ کاری کو فروغ دینے اور سہولت فراہم کرنے والے پارٹنر، انویسٹ انڈیا نے ان مفاہمتی عرضداشتوں پر دستخط کرنے میں خوراک ڈبہ بندی صنعت کی وزارت کی مدد کی۔

ورلڈ فوڈ انڈیا 2025 نے نہ صرف ریکارڈ سرمایہ کاری کے وعدوں کو راغب کیا ہے بلکہ فوڈ پروسیسنگ کے لیے ایک قابل اعتماد عالمی مقام کے طور پر ہندوستان کی پوزیشن کی تصدیق بھی کی ہے۔ اس تقریب نے پائیدار ترقی، اختراع اور بین الاقوامی تعاون کے لیے ایک مضبوط بنیاد رکھی ہے، جس سے خوراک کے عالمی نظام کے مستقبل کی تشکیل میں ہندوستان کی قیادت کو مزید مضبوط کیا گیا ہے۔ خوراک ڈبہ بندی کی وزارت (ایم او ایف پی آئی)، انویسٹ انڈیا کے ساتھ شراکت میں، ان سرمایہ کاریوں کو آسان بنانے اور ان کے موثر نفاذ کو یقینی بنانے کے لیے صنعت کے متعلقہ فریقوں کے ساتھ مل کر کام کرتی رہے گی۔

**********

 (ش ح –ا ب ن)

U.No:6741