ঙসি প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা নৌনা শেমদোক্লবা নেসনেল প্রোগ্রাম ফোর দাইরি দিবলপমেন্ত (এন পি দি দি) অয়াবা পীখ্রে।

১৫ শুবা ফাইনান্স কম্মিসনগী সাইকল (২০২১-২২ দগী ২০২৫-২৬ ফাওবা) মনুংগীদমক, অহেনবা লুপা করোর ১০০০ হাপচিন্দুনা, অপুনবা লুপা করোর ২৭৯০ গী বজেত অমগা লোয়ননা কেন্দ্র সরকারগী স্কিম অমা ওইরিবা, শেমদোক্লবা নেসনেল প্রোগ্রাম ফোর দাইরি দিবলপমেন্ত (এন পি দি দি) ফগৎহল্লে। থবক অসিনা দাইরিগী ইনফ্রাষ্ট্রকচর মতমগা চুন্না শেমগৎনবা অমসুং পাকথোক-চাউথোক্নবা পান্দম থম্লি অমসুং মসিনা সেক্তর অসি লেপ্তনা চাউখৎহনগনি অমসুং পোৎথোক হেনগৎহনগনি।

শঙ্গোম লৈনবা, শেম-শানবা অমসুং হেন্না মগুন লৈহন্নবা থবক পায়খৎনবা ইনফ্রাষ্ট্রকচর শেমগৎতুনা শেমদোক্লবা নেসনেল প্রোগ্রাম ফোর দাইরি দিবলপমেন্ত (এন পি দি দি) না দাইরি সেক্তরদা ইনোৎ অমা পীগনি। লৌমীশিং অফবা কৈথেলশিং ফংনবা, মগুন হেনগৎহন্দুনা চুনবা মমলদা য়োনবা ঙম্নবা অমসুং সপ্লাই চেনগী থবক ফগৎহনবা মসিনা মতেং পাংগনি অমসুং শেন্থোক হেনগৎহনগনি অমসুং খুঙ্গং হেন্না চাউখৎহনগনি।

স্কিম অসিদা মরুওইবা মচাক অনি য়াওরি:

1.  শঙ্গোম ইংথহন্নবা প্লান্তশিং, অৱাংবা থাক্কী শঙ্গোম চাংয়েং তৌনবা লেবোরেতোরিশিং অমসুং সর্তিফিকেদ পীবগী থবকশিংগুম্বা তঙাইফদবা দাইরিগী ইনফ্রাষ্ট্রকচর শেমগৎনবা কম্পোনেন্ত এ কৎথোক্লে। মসিনা অৱাং-নোংপোক লমদমশিং অমসুং য়ু.তি অমসুং মনুং হুঞ্জিনবা মফমশিংদা অনৌবা ভিলেজ দাইরি কোওপরেতিপ সোসাইতিশিং শেম্বা অমসুং শঙ্গোম লৈবা হেনগৎহনবা অমসুং মিল্ক প্রদুসর কম্পেনি ২ শেম্বদা মতেং পাংলে।

2.   “দাইরিয়িং থ্রু কোওপরেতিপস (দি আই সি)” হায়না খঙনবা কম্পোনেন্ত বি অসিনা, এগ্রিমেন্তশিং খুৎয়েক পীনখিবগী মতুংইন্না জপান সরকার অমসুং জপান ইন্তরনেসনেল কোওপরেতিপ এজেন্সিগা লোয়ননা মখা তানা দাইরি চাউখৎহনগনি। মসিনা রাজ্য মপান হায়বদি অন্ধ্র প্রদেস, বিহার, মধ্য প্রদেস, পঞ্জাব, রাজস্থান, তেলঙ্গানা, উত্তরখন্দ, উত্তর প্রদেস অমসুং নোংচুপ বেঙ্গলদা দাইরি কোপরেতিপশিং ফগৎহনবা, পোৎথোক হেনগৎহনবা, শেম-শাবা অমসুং য়োনফমগী ইনফ্রাষ্ট্রকচর শেমগৎনবা মীৎয়েং থম্লি।

নেসনেল প্রোগ্রাম ফোর দাইরি দিবলপমেন্ত পায়খৎপদগী মাঙজৌননা লৌমীশিং লাখ ১৮.৭ হেনবগী শেন-থুমগী কান্নবশিং ফংহনখ্রে অমসুং হকথেংনবা অমসুং নাকোইনবা থবক ৩০,০০০ হেন্না ফংহনখ্রে অমসুং নোংমদা লিতর লাখ ১০০.৯৫ হেনগৎহন্দুনা শঙ্গোম লৈবা হেনগৎহল্লে। হেন্না মপুংফানা শঙ্গোম চাংয়েং তৌনবা অমসুং মগুন লৈবরা হায়না চাংয়েং তৌনবা অৱাংবা থাক্কী তেক্নোলোজি নেসনেল প্রোগ্রাম ফোর দাইরি দিবলপমেন্তনা শৌগৎলে। খুঙ্গংগী শঙ্গোম চাংয়েং তৌনবা লেব ৫১,৭৭৭ ফগৎহল্লে, লিতর লাখ ১২৩.৩৩ চনবা ব্লক মিল্ক কুলর ৫,১২৩ লিংখৎলে। মসিগী মথক্ত, ফৌরিয়র ত্রান্সফোর্ম ইনফ্রারেত মিল্ক এনালাইজরশিং হাপচিন্দুনা লেব ১৬৯ ফগৎহল্লে অমসুং হৌজিক দাইরি প্লান্ত ২৩২ দা ঈশিং য়ানশিনবা খঙদোক্নবা অফবা সিষ্টৈমশিং থম্লে।

নৌনা শেমদোক্লবা নেসনেল প্রোগ্রাম ফোর দাইরি দিবলপমেন্তনা অৱাং-নোংপোক লমদমদা অনৌবা দাইরি কোওপরেতিপস সোসাইতি ১০,০০০ লিংখৎনবা অমসুং মিল্ক প্রদুসর কম্পেনি অনি শেম্নবা থাজবা থম্লি। মসিনা হৌজিক পায়খৎলিবা নেসনেল প্রোগ্রাম ফোর দাইরি দিবলপমেন্তগী প্রোজেকশিংদা অহেনবা শেনফম থাদদুনা অহেনবা থবক লাখ ৩.২ ফংহন্নবা, মরুওইনা শিন্মীশিংগী মনুংদা চাদা ৭০ ওইরিবা নুপীশিং কান্নবা পীনবা পান্দম থম্লি।

নৌনা শেমদোক্লবা নেসনেল প্রোগ্রাম ফোর দাইরি দিবলপমেন্তনা হৱাইদ রিভোলুসন ২.০ গা চৎমিন্নদুনা ভারতকী অনৌবা ইনফ্রাষ্ট্রকচর শেমগৎকনি অমসুং অনৌবা তেক্নোলোজিশিং অমসুং অফবা তেষ্টিং লেবশিংগা লোয়ননা অনৌবা শেম্লবা কোওপরেতিপশিং শৌগৎকনি। থৌরম অসিনা খুঙ্গংগী হিংনবগী লম্বীশিং হেন্না ফংহনবা, থবক পীবা অমসুং মপাঙ্গল কনবা, খুদোংথিবা মায়োক্নবা ঙম্বা দাইরি ইন্দষ্ট্রি অমা শেমগৎতুনা লৈবাক শীনবা থুংনা লৌমী মিল্লিয়ন কয়া কান্নবা পীনবা মতেং পাংগনি। 

***