زراعت، کسانوں کی بہبود اور دیہی ترقی کے مرکزی وزیر، جناب شیوراج سنگھ چوہان نے خریف 2025-26 کے سیزن کے لیے اتر پردیش اور گجرات میں بڑی دالوں اور تیل کے بیجوں کی خریداری کو منظوری دے دی ہے۔ جناب چوہان نے کسانوں سے اُڑد (کالی دال) اور تور کی 100 فیصد خریداری کی منظوری دی ہے، جبکہ اتر پردیش میں مونگ (سبز چنا)، تل اور مونگ پھلی اور گجرات میں سویابین، مونگ اور مونگ پھلی کی خریداری کو بھی منظوری دی ہے۔ انہوں نے دونوں ریاستوں کو کسانوں کے مفادات کے تحفظ کے لیے خریداری کے پورے عمل کو شفاف طریقے سے انجام دینے کی ہدایت دی، انہوں نے مزید کہا کہ دونوں ریاستوں میں 13,890.60 کروڑ روپے کی خریداری سے انہیں براہ راست فائدہ پہنچے گا۔

آج جناب چوہان کی صدارت میں ایک ورچوئل میٹنگ ہوئی جس میں اتر پردیش کے وزیر زراعت جناب سوریہ پرتاپ شاہی اور گجرات کے وزیر زراعت جناب راگھو جی پٹیل نے شرکت کی۔ مرکزی زراعت کے سکریٹری ڈاکٹر دیوش چترویدی، مرکز اور دونوں ریاستی حکومتوں کے زراعت کے اعلیٰ عہدیداروں کے ساتھ بھی میٹنگ میں شامل ہوئے۔ جناب چوہان نے اس بات پر زور دیا کہ خریداری کا عمل شفاف، ڈیجیٹل اور ہموار ہونا چاہیے۔ دونوں ریاستوں کے وزرائے زراعت نے یقین دلایا کہ بائیو میٹرک تصدیق اور پی او ایس مشین سسٹم کے ساتھ ڈیجیٹل پورٹل کے ذریعے خریداری کی جائے گی۔

اتر پردیش کی تجویز پر بات چیت کے بعد، جناب چوہان نے 1,777.30 کروڑ مالیت کے 2,27,860 میٹرک ٹن 100فیصد اُڑد کی خریداری کو منظوری دی۔ انہوں نے 1,13,780 میٹرک ٹن تور کی 100فیصدخریداری کو بھی منظوری دی جس کی مالیت 910.24 کروڑ روپے ہے۔ اس کے علاوہ، 17.38 کروڑ روپے کی 1,983 میٹرک ٹن مونگ کی خریداری کو منظوری دی گئی۔ وزیر نے 299.42 کروڑ روپے مالیت کے 30,410 میٹرک ٹن تل اور 722.22 کروڑ روپے کی 99,438 میٹرک ٹن مونگ پھلی کی خریداری کو بھی منظوری دی۔

گجرات کے لیے، جناب چوہان نے 47,780 میٹرک ٹن اُڑد کی خریداری کو منظوری دی، جس کی قیمت 372.68 کروڑ روپے ہے، اس کے ساتھ 585.57 کروڑ روپے کی 1,09,905 میٹرک ٹن سویا بین بھی شامل ہے۔ انہوں نے9,167.08 کروڑ مالیت کی 12,62,163 میٹرک ٹن مونگ پھلی اور 4,415 میٹرک ٹن مونگ کی خریداری کو بھی منظوری دی جس کی قیمت 38.71 کروڑ ہے۔

مرکزی وزیر زراعت نے زور دیا کہ خریداری کے عمل میں مکمل شفافیت کو یقینی بنایا جانا چاہیے تاکہ کوئی بے ضابطگی نہ ہو۔ انہوں نے ہدایت کی کہ صرف حقیقی کسان ہی فائدہ اٹھائیں اور مڈل مین فائدہ نہ اٹھائیں ۔ یہ بتایا گیا کہ تمام مراکز پر خریداری شروع ہونے سے پہلے، آدھار پر مبنی بائیو میٹرک یا چہرے کی تصدیق اورپی او ایس مشینیں تعینات کی جائیں گی ۔تقریباً 350 اتر پردیش میں اور تقریباً 400 گجرات میں۔ نیشنل ایگریکلچرل کوآپریٹو مارکیٹنگ فیڈریشن اور نیشنل کوآپریٹو کنزیومر فیڈریشن کو کسانوں کی پری رجسٹریشن کے لیے خطوط بھیجے گئے ہیں، اس بات کو یقینی بناتے ہوئے کہ صرف رجسٹرڈ کسان ہی اپنی فصلوں کوکم از کم امدادی قیمت پر فروخت کر سکیں۔ خریداری کا پورا عمل ڈیجیٹل طریقے سے ای-سمریدھی اور ای-سمیوکتی پورٹل کے ذریعے انجام دیا جائے گا، جس سے کسانوں کے بینک کھاتوں میں براہ راست ادائیگی ممکن ہو سکے گی۔

جناب چوہان نے مزید کہا کہ اگر ضرورت ہو تو خریف 2025-26 کے پہلے پیشگی تخمینوں کے جاری ہونے کے بعد منظور شدہ مقداروں پر نظر ثانی کی جا سکتی ہے، تاکہ کسانوں کو زیادہ سے زیادہ فائدہ حاصل ہو۔ انہوں نے اس بات پر زور دیا کہ ڈیجیٹل اور شفاف نظام ہر اہل کسان کو حکومت کی طرف سے مطلع شدہ قیمت پر فصل فروخت کرنے اور ان کے بینک کھاتوں میں براہ راست بروقت ادائیگی حاصل کرنے کے حق کی ضمانت دے گا۔

***

(ش ح۔اص)

UR No 6483

(Release ID: 2170294)