ভারতকী প্রধান মন্ত্রী শ্রী নরেন্দ্র মোদীনা চেপাউ পীরকপদগী, ন্যু জিলেন্দগী প্রধান মন্ত্রী খৃষ্টোফর লুজন, সরকারগী খোঙচৎ অমদা মার্চ ১৬-২০,২০২৫ ফাওবা ভারত্ত লৈরি। প্রধান মন্ত্রী খৃষ্টোফর লুজনগী মহাক্কী অহানবা ভারত খোঙচৎ অসিদা ন্যু দিল্লি অমসুং মুম্বাইদা চৎলি অমসুং মহাক্কা লোয়ননা তুরিজম অমসুং হোস্পিতেলিতিগী মিনিষ্টর লুইজ অপষ্টোন, ইথনিক কুম্মুনিতিস, স্পোর্তস অমসুং রিক্রিয়েসনগী মিনিষ্টর মাকর্দ মিতচেল, ত্রেদ অমসুং ইনভেষ্টমেন্ত, এগ্রিকলচর অমসুং ফোরেষ্ট্রিগী মিনিষ্টর দোদ মেক্লে অমসুং ওফিসিএলশিংগী অৱাংবা থাক্কী মীহুৎ কাংবু অমা, ললোন-ইতিক্কী মীহুৎশিং, মপান লৈবাকশিংদগী হোংলকখিবা মীওইশিং, মেদিয়া অমসুং নাৎকী কাংবু য়াওখি।

প্রধান মন্ত্রী খৃষ্টোফর লুজন ন্যু দিল্লিদা তরাম্না ওকখ্রে। প্রধান মন্ত্রী মোদীনা প্রধান মন্ত্রী খৃষ্টোফর লুজনগা লৈবাক অনিগী ওইবা ৱারি শানখ্রে। প্রধান মন্ত্রী মোদীনা মার্চ ১৭,২০২৫ দা ন্যু দিল্লিদা ১০ শুবা রাইসিনা দাইলোগ হৌদোক্কনি অমসুং প্রধান মন্ত্রী খৃষ্টোফর লুজন্না চীফ গেষ্ট ওইনা হৌদোকপগী মরুওইবা ৱারোল পীগনি। প্রধান মন্ত্রী খৃষ্টোফর লুজন্না রাজ ঘাত্ত মহাত্মা গান্ধী মেমোরিএলদা লৈ কৎখি অমসুং রাষ্ট্রপতি দ্রৌপতি মুর্মুগা উনখি।

শরুক য়ামিন্নরিবা গনতন্ত্রগী গুনশিং অমসুং অকনবা মীগা-মীগা লৈনবা মরীশিংদা য়ুম্ফম ওইরিবা ভারত অমসুং ন্যু জিলেন্দগী মরক্ত লৈনরিবা লৈবাক অনিগী মরী মখা তানা ফগৎহন্নিংবগী অপাম্বা প্রধান মন্ত্রীশিংনা অমুক হন্না ফোঙদোকখ্রে। ললোন-ইতিক অমসুং শেন থাদবা, দিফেন্স অমসুং সেকুরিতি, লাইরিক-লাইশু অমসুং থিজিনবা, সাইন্স অমসুং তেক্নোলোজি, এগ্রি-তেক, স্পেস, মীয়াম চৎথোক-চৎশিন তৌবা অমসুং শান্নবা য়াওনা হিরম কয়াদা চেৎনা মতেং পাংনবা হায়না লুচিংবা অনিমক্না য়ানরে।

লৈবাক অনিমক্না দরকার ওইবা লমদম লমদমগী অমসুং মালেমগী থৌদোক-ৱাথোকশিংগী মতাংদা লুচিংবশিং খন্নখি অমসুং মালেমগী লৈবাকশিং মতেং পাংনবা হেনগৎহনবা হায়না য়ানরে। তম্বা ঙমদবা অমসুং খুদোংথিনিঙাই ওইবা মালেম অমা মায়োক্নবা হেনগৎলক্লিবা হায়বা প্রধান মন্ত্রীশিংনা ফোঙদোকখি। সমুদ্রনা কোইশিনবা লৈবাকশিং ওইনা, মালেমগী চৎন-কাংলোনশিংদা য়ুম্ফম ওইবা, মনিং তম্বা, খুদিংমক শরুক য়াবা, তুংদু-লৈতাবা অমসুং নুংঙাই য়াইফবা ইন্দো-পেসিফিক অমদা ভারত অমসুং ন্যু জিলেন্দগী মান্নবা অপাম্বা লৈরিবা অদু মখোয়না ফোঙদোক্নখি।

য়ুনাইতেদ নেসন্স কনভেন্সন ওন লো ওফ সি, ১৯৮২ (য়ু এন সি এল ও এস) য়াওনা মালেমগী আইনগী মতুংইন্না মনিংতম্না জহাজ হোনবা অমসুং মথক লান্না ফ্লাইত পায়বা অমসুং অতোপ্পা আইন্না য়াবা থবকশিংগী সমুদ্র শীজিন্নবগী হকশিং ফংনবা প্রধান মন্ত্রীশিংনা অমুক হন্না ফোঙদোকখি। য়ুনাইতেদ নেসন্স কনভেন্সন ওন লো ওফ সি, ১৯৮২ য়াওনা মালেমগী আইনগী মতুংইন্না য়ানদবশিং শান্তি ওইনা ৱারোইশিন পুরকপগী দরকার ওইবা অদু প্রধান মন্ত্রীশিংনা অমুক হন্না ফোঙদোকখি।

ভারত্তগী হৌখিবা মীওইশিংনা ন্যু জিলেন্দগী অপুনবা মীশিংগী চাদা ৬ ওইদুনা, লৈবাক অনিগী মীয়ামগী মরক্ত অচেৎপা মরীশিং লৈনবদা প্রধান মন্ত্রী অনিনা অপেনবা ফোঙদোকখ্রে। ভারতমচাশিংনা ন্যু জিলেন্দগী পাংথোকখিবা থবকশিং অমসুং লৈবাক অনিগী মরক্ত মীগা-মীগা লৈনবা মরীশিংদা মখোয়না লৌরিবা অফবা থৌদাং মখোয়না থাগৎপা ফোঙদোকখি। ন্যু জিলেন্দদা লৈরিবা মহৈরোয়শিং য়াওনা ভারতমচাশিং অমসুং ভারত্ত লৈরিবা ন্যু জিলেন্দমচাশিং অমসুং লমকোয়বা লাকপা মীওইশিং অশোয়-অঙাম থোকহন্দবা হায়না লুচিংবা অনিমক্না য়ানরে।

ললোন-ইতিক, শেন থাদবা অমসুং শেন-থুমগী থবকশিংদা মতেং পাংনবা:

ভারত অমসুং ন্যু জিলেন্দগী মরক্ত লেপ্তনা ললোন-ইতিক অমসুং শেন থাদবগী থবকশিং চৎথবদা প্রধান মন্ত্রীশিংনা তরাম্না ওকখ্রে অমসুং নাকল অনিগী ললোন-ইতিক পাকথোক-চাউথোক্নবা খুদোংচাবশিং মখা তানা খঙদোক্নবা তকশিনখি। মরীশিং ফগৎনবা, ইকোনোমি অনি অমনা অমগী মতেং পাংন্নবা শেন-থুম অমসুং শেন থাদবগী খুদোংচাবশিং মশক খঙদোক্নবা নাকল অনিগী ললোন-ইতিক তৌরবশিং পুক্নিং প্রধান মন্ত্রীশিংনা থৌগৎখি।

হৌজিক চৎথরিবা লৈবাক অনি মতেং পাংনবগী খোঙজেল অসিগী মমি তাহন্দুনা, লৈবাক অমনা অমদা শেন হেন্না থাদনবা লুচিংবশিংনা তকশিনখি।

লেপ্তনা শেন-থুম চাউখৎপদা মতেং পাংনবা ভারত অমসুং ন্যু জিলেন্দগী মরক্ত ললোন-ইতিক অমসুং শেন থাদবা হেনগৎহনবা হায়না প্রধান মন্ত্রীশিং য়ানখ্রে।

মান্নবা, অপুনবা অমসুং নাকল অনিমক কান্নবা ফংবা ললোন-ইতিক্কী এগ্রিমেন্ত অমা লৈনবা এফ.তি.এগী ৱারি শানবা হৌবদা প্রধান মন্ত্রীশিংনা তরাম্না ওকখ্রে। অপুনবা ত্রেদ এগ্রিমেন্ত অমনা ললোন-ইতিক অমসুং শেন-থুমগী মতেং পাংনবা হেনগৎহন্নবা খুদোংচাবা কয়া পীগনি হায়বা লুচিংবশিংনা য়ানরে। লৈবাক অমমমগী মপাঙ্গলশিং শীজিন্নদুনা, মখোয় মখোয়গী খুদোংচাদবশিং কোকহন্দুনা, লৈবাক অনিগী ললোন-ইতিক্কী এগ্রিমেন্ত অমনা লৈবাক অনিমক ললোন-ইতিক অমসুং শেন থাদবা হেনগৎলকপগী খুদোংচাবশিং ফংগনি। অথুবা মতমদা ৱারি শানবা লোইশিন্নবা লমজিংনবা সেনিয়র ওইরবা মীহুৎশিং থাবা হায়না লুচিংবশিং য়ানখ্রে।

এফ.তি.এগী ৱারি শানবা মনুং চন্না, দিজিতেল পেমেন্ত সেক্তরগী লমদা অথুবা মতমদা মতেং পাংনবা হৌনবা লৈবাক অনিমক্কী ওথোরিতিশিংনা খন্নবা হৌবদা লুচিংবশিং য়ানরে।

২০২৪ দা খুৎয়েক পীনখিবা কষ্টমস কোওপরেসন এরেঞ্জমেন্ত (সি সি এ) গী মখাদা ওথোরাইজ ইকোনোমিক ওপরেতরস ম্যুচুয়েল রিকক্নিসন এরেঞ্জমেন্ত খুৎয়েক পীনবদা প্রধান মন্ত্রীশিংনা তরাম্না ওকখ্রে। মসিনা লৈবাক অনিগী কষ্টমস ওথোরিতিশিংগী মরক্ত হেন্না মতেং পাংনদুনা লৈবাক অনিগী ললোন-ইতিক চাউখৎহনগনি।

হোর্তিকলচরগী লমদা মেমোরেন্দম ওফ কোওপরেসন খুৎয়েক পীনবা অমসুং ফোরেষ্টরি কোওপরেসনগী লেত্তর ওফ ইন্তেন্ত খুৎয়েক পীনবা য়াওনা হোর্তিকলচর অমসুং ফোরেষ্টরিগী অনৌবা মতেং পাংনবদা লুচিংবশিংনা তরাম্না ওকখ্রে।

লৈবাক অনিগী মীয়াম মরক্ত ৱাখল তাবা হেনগৎহনবা অমসুং ললোন-ইতিক্কী থবকশিং হেনগৎহনবদা তুরিজম্না লৌরিবা থৌদাং লুচিংবশিংনা খঙখ্রে। ভারত অমসুং ন্যু জিলেন্দগী মরক্ত লমকোয়বা মীওইশিং মশিং হেনগৎলকপদা মখোয়না তরাম্না ওকখ্রে। লৈবাক অনিগী মরক্ত দাইরেক্ত ফ্লাইত সর্বিস হৌবদা মখোয়না য়ানখ্রে। 

রাজনিতি, দিফেন্স অমসুং সেকুরিগী থবকশিংদা মতেং পাংনবা:

লৈবাক অনিগী মরক্ত পর্লিয়ামেন্তরিগী একচেঞ্জশিংগী মরুওইবা অমসুং সংসদকী মীহুৎ কাংবুশিং চাং নাইনা চৎথোক-চৎশিন তৌহনবগী মতাংদা মখোয়না খন্নখ্রে।

হৌখিবা চহিচাদা ভারত অমসুং ন্যু জিলেন্দগী সর্বিস পর্সোনেলশিংনা লান্থেংনখিবা অমসুং কৎথোকখিবগী পুৱারি অদু প্রধান মন্ত্রী অনিনা খন্নখি।

লাল ঔরাইবশিং, ষ্টাফ কোলেজ একচেঞ্জশিং, লালগী জহাজশিং চাংনাইনা চৎথোক-চৎশিন তৌদুনা অমসুং অৱাংবা থাক্কী দিফেন্স দেলিগেসনশিংগী একচেঞ্জ শরুক য়াদুনা দিফেন্সকী থবকশিং চাউখৎলকপদা প্রধান মন্ত্রীনা তরাম্না ওকখ্রে। দিশেম্বর ২০২৪ দা ন্যু জিলেন্দগী লিত্তেলতন, খৃষ্টচর্চতা ভারত নেভিগী সেলিং ভেসেল তারিনি থুংলখিবা অদু মখোয়না নিংশিংখি। রোয়াল ন্যু জিলেন্দ নেভি সিপ ঐচ.এম.এন.জি.এস তে কয়া হন্দক মুম্বাইদা লাক্কদৌরিবা অসিগী মতাংদসু মখোয়না খন্নখি।

দিফেন্স কোওপরেসনগীদমক ভারত-ন্যু জিলেন্দ এম.ও.য়ু খুৎয়েক পীনখিবদা লুচিংবা অনিমক্না তরাম্না ওকখ্রে। মসিনা লৈবাক অনি ঙাক-শেনগী মতেং পাংনবা অমসুং চাংনাইনা ঙাক-শেনগী থবকশিং পাংথোকপা হেনগৎহনগনি। সমুদ্রগী লম্বীশিং অশোই-অঙাম লৈহন্দবা অমসুং মেরিতাইম সেফতিগী মতাংদা চাংনাইনা ৱারি শানবগী দরকার ওইবা অদু মখোয়না খঙজিনখি।

ভারতনা কম্বাইন মেরিতাইমস ফোর্স শরুক য়াবদা ন্যু জিলেন্দনা তরাম্না ওকখ্রে। ন্যু জিলেন্দ কমান্দ ওফ কমান্দ তাক্স ফোর্স ১৫০ মনুংদা ঙাক-শেনগী মরীশিং ফগৎলকপদা লুচিংবা অনিমক্না তরাম্না ওকখ্রে।

দিফেন্স কোলেজশিং য়াওনা ওফিসারশিং চাংনাইনা ত্রেনিং একচেঞ্জশিং পাংথোকপদা লুচিংবশিংনা থাগৎপা ফোঙদোকখ্রে। কেপাসিতি বিল্দিংগী মতেং পাংনবা হেনহনবদা নাকল অনিমক্না য়ানখ্রে।

ন্যু জিলেন্দনা ইন্দো-পেসিফিক ওসিন্স ইনিসিয়েতিপ শরুক য়ানিংবগী অপাম্বা ন্যু জিলেন্দগী প্রধান মন্ত্রীনা ফোঙদোকখ্রে। পার্তনরশিপ অসিদা ৱাখল মান্নবা লৈবাকশিং শরুক য়াবদা প্রধান মন্ত্রী মোদীনা ন্যু জিলেন্দ তরাম্না ওকখ্রে।  গুজরাতকী লোথালদা শেমগৎলিবা নেসনেল মেরিতাইম হেরিতেচ কমপ্লেক্সতা লৈবাক অনিগী অখঙ-অহৈশিং খন্নবা য়াওনা ভারত অমসুং ন্যু জিলেন্দগী মরক্ত সমুদ্রগী লমদা মতেং পাংনবগী খুদোংচাবশিং খঙদোক্লে।

সাইন্স অমসুং তেক্নোলোজি অমসুং দিজাষ্টর মেনেজমেন্তগী থবকশিংদা মতেং পাংনবা:

লৈবাক অনি মতেং পাংনবদা রিছার্স, সাইন্তিফিক ওইবা মরীশিং অমসুং তেক্নোলোজিগী লমদা থবক তৌমিন্নবগী মরুওইবা অদু লুচিংবা অনিনা ফোঙদোকখ্রে। ললোন-ইতিকশিং অমসুং উদ্যোগশিংগী মরক্ত মতেং পাংনদুনা তেক্নোলোজিশিং শেন তান্নবা শীজিন্নবা অমসুং তেক্নোলোজি চাউখৎহনবগী মতাংদা মখোয়না খন্নখি।

ক্লাইমেত চেঞ্জনা মখোয়গী শেন্মিৎলোনশিংদা পীরবা চৈথেংশিং নাকল অনিনা খঙখি অমসুং ইমিসন য়ামদবা ক্লাইমেতকী চৈথেং খাংবা ঙম্বা শেন্মিৎলোনশিং পুরক্নবা খন্নখি। ভারতনা ইন্তরনেসনেল সোলার এল্লাইন্স লুচিংবদা প্রধান মন্ত্রী লুজোন্না তরাম্না ওকখি অমসুং ২০২৪ দগী মেম্বর ওইদুনা ন্যু জিলেন্দনা শৌগৎপা অদু অমুক হন্না নিংশিংখি। ন্যু জিলেন্দনা কোলিএসন ফোর দিজাষ্টর রিসিলিয়েন্ত ইনফ্রাষ্ট্রকচর শরুক য়াবদা প্রধান মন্ত্রী মোদীনা তরাম্না ওকখ্রে। মসিনা এস.দি.জিশিং ফংবা, পেরিস ক্লাইমেত এগ্রিমেন্তগী পান্দমশিং অমসুং সেন্দাই ফ্রেমৱার্ক ফোর দিজাষ্টর রিক্স রিদক্সনগী পান্দমশিং ফংবদা মতেং পাংগনি।

ভারত অমসুং ন্যু জিলেন্দগী মরী লৈনবা ওথোরিতিশিংগী মরক্ত য়ুহা হাবা থেংননবগী মতাংদা মতেং পাংন্নবা এম.ও.য়ু অমা লৈনবা মাইকৈদা থবক পায়খৎপদা লুচিংবশিংনা তরাম্না ওকখ্রে।

লাইরিক-লাইশু, চৎথোক-চৎশিন অমসুং মীগা-মীগা লৈনবা মরীশিং:

ভারত অমসুং ন্যু জিলেন্দগী মরক্ত লাইরিক-লাইশু অমসুং মীয়ামগী লৈনরিবা মরীশিং মখা তানা ফগৎহনবা হায়না প্রধান মন্ত্রী অনিমক্না য়ানরে। সাইন্স, ইন্নোবেসন, অনৌবা তেক্নোলোজিশিং য়াওনা নাকল অনিনা পাম্বা হিরমশিংদা লৈবাক অনিমক্কী মহৈলোয়শঙশিং মতেং পাংনবদা মখোয়না পুক্নিং থৌগৎলে। 

ন্যু জিলেন্দদা অৱাংবা থাক্কী মহৈ তম্নবা হোৎনরিবা ভারতকী মহৈরোয়শিংগী খুদোংচাবশিং মখা তানা পীনবা মখোয়না পুক্নিং থৌগৎখি। সাইন্স, ইন্নোবেসন অমসুং নৌনা থোক্লকপা তেক্নোলোজিশিং য়াওনা হিরম কয়াদা স্কিল হেনগৎহনবা অমসুং হৈথোই-শিংথোইবা মীওইশিং চৎথোক-চৎশিন তৌবগী মরুওইবা মখোয়না খন্নখি।

ভারতকী ইজুকেসন মিনিষ্ট্রি অমসুং ন্যু জিলেন্দগী ইজুকেসন মিনিষ্ট্রিগী মরক্ত রিফ্রেস ইজুকেসন কোওপরেসন এগ্রিমেন্ত খুৎয়েক পীনবদা লুচিংবশিংনা তরাম্না ওকখ্রে। থৌরাং অসিনা ভারত অমসুং ন্যু জিলেন্দগী ইজুকেসন সিষ্টেমশিংগী মতাংদা মখা তানা ই-পাউ পীনবা হেনগৎহনগনি।

ক্রিকেত, হোক্কি অমসুং অতোপ্পা ওলেম্পিক স্পোর্তশিং য়াওনা, ভারত অমসুং ন্যু জিলেন্দগী মরক্ত শান্নবগী অচেৎপা মরীশিং লৈনরিবা অসি মখোয়না খঙখি। লৈবাক অনিগী মরক্ত শান্নবগী শীনবা লাংবা অমসুং পুন্না থবক তৌমিন্নবা হেনগৎহন্নবা শান্নবগী মতাংদা এম.ও.য়ু খুৎয়েক পীনবদা মখোয়না তরাম্না ওকখি। ভারত অমসুং ন্যু জিলেন্দগী মরক্ত শান্নবগী মরী লৈনরকপা চহি ১০০ মপুংফারকপগী থৌরম পাংথোক্নবা, ২০২৬ দা “স্পোর্তিং য়ুনিতি” থৌরমশিং পাংথোক্নবা থৌরাং তৌবদা মখোয়না তরাম্না ওকখ্রে।

ভারত অমসুং ন্যু জিলেন্দদা লৈরিবা মহৌশাগী লায়য়েং কাংলোনগী অফবা থবকশিংগী মরুওইবা অদু প্রধান মন্ত্রী অনিনা খন্নখি অমসুং ই-পাউ শরুক য়ামিন্নবা অমসুং খ্বাইদগী ফবা থবকশিং পীথোক-পীশিন তৌনবা অমসুং অখঙ-অহৈশিং চৎথোক-চৎশিন তৌনবা য়াওনা মতেং পাংনবা য়াবা হীরমশিং খঙদোক্নবা অখঙ-অহৈশিংগী মরক্ত খন্ন-নৈনবদা মখোয়না তরাম্না ওকখ্রে।

ন্যু জিলেন্দমচাশিংঈ মরক্ত য়োগা অমসুং ভারতকী জগোয় অমসুং ঈশৈ পাম্নবা হেনগৎলকপা অমসুং ভারতকী কুহ্মৈশিং  লেম্না য়েংবদা প্রধান মন্ত্রী অনিমক্না খঙজিনখ্রে। ঈশৈ, জগোয়, থিয়েতর, ফিল্মশিং অমসুং কুহ্মৈশিংগী খুৎথাংদা মখা তানা লৈবাক অনিগী মরীশিং ফগৎহনবদা মখোয়না পুক্নিং থৌগৎলে।

লমদম লমদমগী অমসুং মালেমগী থবকশিংদা মতেং পাংনবা:

মনিংতম্বা অমসুং ঙমখৈগী অপুনবা শক্তম ইকায়খুম্নবা মনিংতম্বা, খুদিংমক শরুক য়াবা, তুংদু-লৈতাবা অমসুং নুংঙাই য়াইফবা ইন্দো-পেসিফিক অমা লৈনবা মখোয়না শৌগৎপা প্রধান মন্ত্রী অনিনা অমুক হন্না ফোঙদোকখ্রে।

ইষ্ট এসিয়া সম্মিৎ, অসিয়ান দিফেন্স মিনিষ্টরস মিতিং প্লস অমসুং অসিয়ান রিজনেল ফোরমগুম্বা অসিয়ান্না লুচিংবা ফোরমশিং য়াওনা, তোঙান তোঙানবা রিজনেল ফোরমশিংদা ভারত অমসুং ন্যু জিলেন্দগী মরক্ত মতেং পাংনবগী মতাংদা মখোয়না খন্নখি। ইন্দো-পেসিফিক লমদমদা মখা তানা সেকুরিতি অমসুং নুংঙাই য়াইফবা পুরক্নবা হায়রিবা রিজনেল ফোরমশিং অমসুং অসিয়ান্না লুচিংবগী মরুওইবা মখোয়না অমুক হন্না খন্নখ্রে।

মালেমগী হৌজিক থেংনরিবা খুদোংচাদবশিং থেংনবা ঙম্বা য়ুনাইতেদ নেসন্সনা ময়াইদা লৈবা মপুংফাবা মালেমগী লুপশিংগী কাংলোন অমা লৈহনবগী মরুওইবা অদু লুচিংবা অনিমক্না খন্নখি। য়ু.এন সেকুরিতি কাউন্সিলগী মেম্বর হেনগৎহনবা য়াওনা য়ু.এন অমুক হন্না শেমদোকপগী দরকার ওইবা অদু মখোয়না তকশিনখি। ভারতনা য়ু.এন সেকুরিতি কাউন্সিলগী লেংদ্রবা মেম্বর ওইবদা ন্যু জিলেন্দনা শৌগৎপা ফোঙদোকখি। মালেমগী তোঙান তোঙানবা লুপশিংদা কেন্দিদেৎ ওইনবা অমনা অমবু শৌগৎপদা নাকল অনিনা য়ানখ্রে।

মালেমগী ওইনা ন্যুক্লিয়ার খুৎলায় থাদোকপা অমসুং শীজিন্নদবগী লৈঙাক অমা লৈহনবা অমসুং ভারতকী ক্লিন ইনর্জিগী পান্দমশিং ফংনবা ভারতনা ন্যুক্লিয়ার সপ্লাইয়রস গ্রুপ শরুক য়াবগী মরুওইবা লুচিংবা অনিনা খন্নখি।

মিদল ইষ্ট শান্তি পুরক্নবা লুচিংবা অনিনা মখোয়গী শৌগৎপা অমুক হন্না ফোঙদোকখি অমসুং জনুৱারি ২০২৫ দা সিজফয়ার অমসুং ফাজিনখিবা মীওইশিং থাদোক্নবা য়ানখিবা অদু তরাম্না ওকখি। মনিংতম্বা পেলেস্তাইন লৈবাক অমা শেম্বদা মখোয়না শৌগৎপা ফোঙদোকখি।

মালেমগী লাইনশিং ইকায়খুম্নবদা য়ুম্ফম ওইদুনা, য়ু.এন চার্তরগী ফিদমশিং অমসুং ঙমখৈগী অপুনবা শক্তম অমসুং মনিংতম্বদা য়ু্ম্ফম ওইদুনা, য়ুক্রেনদা শান্তি পুরক্নবা লুচিংবা অনিনা মখোয়গী ওইবা ৱাখল্লোনশিং ফোঙদোক্নখি। লুচিংবা অনিনা অমুক হন্না তেরোরিজম অমসুং মসিগী মওংশিং অমসুং ঙমখৈ ৱাংমদগী তেরোরিষ্ট প্রোক্সিশিং শীজিন্নবা য়াম্না কন্না য়ানিংদবা ফোঙদোকখি। তেরোরিজমদা শেন থাদবগী নেতৱার্কশিং অমসুং চঙজফম পীবশিং লাকশিন্নবা, তেরর ইনফ্রাষ্ট্রকচরশিং লৌথোক্নবা মখোয়না তকশিনখি। তেরোরিজম লাকশিন্নবা মতেং পাংনবদা প্রধান মন্ত্রী য়ানখ্রে।

হৌজিক লৈবাক অনি মতেং পাংনরিবা অসি চাউখৎলকপদা প্রধান মন্ত্রীশিংনা অপেনবা ফোঙদোকখ্রে। গ্রিন অমসুং এগ্রিকলচর তেক্নোলোজিশিং য়াওনা মতেং পাংনবা য়ানবা অনৌবা হিরমশিং খঙদোক্নবা অমসুং নাকল অনি চেৎনা মতেং পাংনবা য়াবা হিরমশিং খঙদোক্নবা মখোয়না তকশিনখি।

মহাক অমসুং মহাক্কী কাংবু ভারতকী মহাক্কী সরকারগী ওইবা খোঙচৎ মনুংদা তরাম্না ওকপগীদমক ন্যু জিলেন্দগী প্রধান মন্ত্রী লুজোন্না প্রধান মন্ত্রী মোদী অমসুং সরকার অমসুং ভারতকী মীয়াম থাগৎপা ফোঙদোকখ্রে। প্রধান মন্ত্রী মোদী ন্যু জিলেন্দদা লাক্নবা প্রধান মন্ত্রী লুজোন্না চেপাউ পীখ্রে।

***