కేంద్ర సిబ్బంది, ప్రజా ఫిర్యాదులు, పింఛన్లు, పీఎంవో, అణుశక్తి, అంతరిక్ష శాఖల సహాయ మంత్రి, సైన్స్ అండ్ టెక్నాలజీ, భూభౌతిక శాస్త్ర సహాయం మంత్రి (స్వతంత్ర) డాక్టర్ జితేంద్ర సింగ్ ఈ రోజు న్యూఢిల్లీలోని విజ్ఞాన భవన్లో జరిగిన పెన్షన్ అదాలత్‌కు అధ్యక్షత వహించారు.

‘‘కుటుంబ పింఛనుదారులు, సూపర్ సీనియర్ పింఛనుదారులు’’ ఇతివృత్తంతో పింఛను, పింఛనుదారుల సంక్షేమ విభాగం (డీవోపీపీడబ్ల్యూ) ఈ అదాలత్‌ను చేపట్టింది. 21 విభాగాలు, మంత్రిత్వశాఖలకు సంబంధించి దీర్ఘకాలంగా పెండింగులో ఉన్న మొత్తం 894 ఫిర్యాదులను పరిష్కారం కోసం స్వీకరించారు.

14వ పెన్షన్ అదాలత్‌ను ప్రారంభిస్తూ.. సంబంధిత విభాగాలు, మంత్రిత్వ శాఖలు, సంస్థలను ఒకే వేదికకు తీసుకువచ్చిన ప్రత్యేకమైన ఏకోన్ముఖ ప్రభుత్వ విధానాన్ని డాక్టర్ జితేంద్ర సింగ్ ప్రశంసించారు.

ఫిర్యాదుల పరిష్కారాన్ని ఈ అదాలత్ వేగవంతం చేసిందని, విధానపరమైన జాప్యాలను తగ్గించిందని డాక్టర్ సింగ్ తెలియజేశారు. తమకు న్యాయంగా దక్కాల్సిన బకాయిల కోసం ఏళ్ల తరబడి ఎదురు చూస్తున్న పెన్షనర్లకు ఇది సకాలంలో న్యాయం అందించింది. అలాగే పింఛనుదారులను లబ్ధిదారులుగా మాత్రమే కాకుండా.. సమాజానికి చురుకైన భాగస్వామ్యం అందిస్తున్నవారిగా గుర్తిస్తూ, వృద్ధాప్యంలో గౌరవానికి, ఆర్థిక భద్రతకు అర్హులని తెలియజేస్తూ వారి పట్ల ప్రభుత్వ నిబద్దతను పునరుద్ఘాటింటింది.
వందల మంది పింఛనుదారులు, వారి కుటుంబాలకు ఈ అదాలత్ ఉపశమనాన్ని అందించింది. వారిలో చాలా మంది ఎన్నో ఏళ్లుగా ఇబ్బందులు ఎదుర్కొంటున్నారు. పరిష్కరించిన వాటిలో కొన్ని ముఖ్యమైన కేసులు

1. హానరరీ లెఫ్టినెంట్ బల్వీర్ సింగ్ (పంజాబ్ రెజిమెంట్) - 2024, ఏప్రిల్ 30న జమ్మూ నుంచి పదవీ విరమణ చేశారు. ప్రక్రియలో జాప్యాల అనంతరం, చివరకు రూ. 46,04,537 సొమ్మును దివ్యాంగ, కమ్యూటేషన్ పెన్షన్‌గా స్వీకరించారు.

2. లెఫ్టినెంట్ కల్నల్ ప్రతాప్ చంద్ సూద్ - 1994, ఆగస్టు 31న పదవీ విరమణ చేశారు. ఆయనకు 2006 జనవరి 1 నుంచి పింఛను బకాయిలను చెల్లించలేదు. ఈ కేసును పరిష్కరించడం వల్ల ఆయనకు రూ.18,89,331 అందాయి.

3. శ్రీమతి చంపా రౌతేలా, 84 ఏళ్ల వయసున్న ఈమె మాజీ కానిస్టేబుల్ నారాయణ్ సింగ్ (బీఎస్ఎఫ్) భార్య. ఆయన 2014, ఫిబ్రవరి 26న మరణించారు. అప్పటి నుంచి ఆమెకు కుటుంబ పింఛను అందలేదు. ఆమె కేసు చివరకు పరిష్కారమైంది. రూ. 15 లక్షల కుటుంబ పెన్షన్ బకాయి ఆమెకు అందాయి.

ఈ విజయ గాథలు ఆర్థిక పరిష్కారాలుగా మాత్రమే పరిమితం కాకుండా.. పింఛనుదారులు, వారి కుటుంబాలకు గౌరవాన్ని, న్యాయాన్ని. ఉపశమనాన్ని అందించాయి.

వివిధ విభాగాలు, మంత్రిత్వ శాఖలకు సంబంధించిన 894 ఫిర్యాదులను స్వీకరించారు. వాటిలో ఎక్కువ భాగం రక్షణ, రైల్వేలు, హోం వ్యవహారాలు నుంచే ఉన్నాయి. విభాగాల వారీగా వివరాలు:

ఇప్పటి వరకు జరిగిన పెన్షన్ అదాలత్‌లను సమీక్షిస్తూ.. 2025 జూన్లో జరిగిన 13వ పెన్షన్ అదాలత్ వరకు మొత్తం 25,831 కేసులు చేపట్టామని, వాటిలో 18,481 కేసులను వివిధ మంత్రిత్వ శాఖలు, విభాగాలు విజయవంతంగా పరిష్కరించాయని డాక్టర్ జితేంద్ర సింగ్ వెల్లడించారు.

పెన్షన్ అదాలత్‌లు కేవలం ఫిర్యాదుల పరిష్కార వేదికలు మాత్రమే కాదని, ముఖ్యంగా వితంతువులు, సూపర్ సీనియర్ సిటిజన్లు, కుటుంబ పింఛనుదారులకు న్యాయాన్ని అందించే వ్యవస్థ అని డాక్టర్ జితేంద్ర సింగ్ పేర్కొన్నారు.

ఆరంభ దశలోనే తమ సమస్యలను పరిగణనలోకి తీసుకుంటున్నారనే హామీని పెన్షనర్లకు అందించడానికి, భవిష్యత్తులో జాప్యాలను నివారించడానికి డిజిటల్ ఫిర్యాదు పర్యవేక్షణ వ్యవస్థలను బలోపేతం చేయడానికి ప్రతి విభాగం/మంత్రిత్వ శాఖలో ఫిర్యాదుల సహాయక కేంద్రాన్ని ఏర్పాటు చేయాల్సిన అవసరాన్ని ఆయన తెలియజేశారు.

పాతవైన, సంక్లిష్టమైన కేసులను పరిష్కరించాలనే ప్రభుత్వం చిత్తశుద్ధిని 14వ పెన్షన్ అదాలత్ ప్రతిబింబించింది. లక్షల రూపాయల విలువైన బకాయిలను చెల్లించి, ఏళ్ల తరబడి ఎదురు చూస్తున్నవారికి న్యాయం అందించి వ్యవస్థపై నమ్మకాన్ని ఈ అదాలత్ తిరిగి నిలబెట్టింది. అలాగే పింఛనుదారుల పట్ల ప్రభుత్వం అనుసరిస్తున్న సున్నిత విధానాన్ని స్పష్టం చేసింది.

‘ప్రతి కేసు డబ్బు కోసం మాత్రమే కాదని, దేశానికి సేవలు అందించిన వారికి లేదా దేశ సేవ చేయడంలో కుటుంబాలకు తోడ్పడిన వారికి గౌరవం, మర్యాద, న్యాయం గురించి’’ అని డాక్టర్ జితేంద్ర సింగ్ అన్నారు.

***