ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (ಎಂಇಐಟಿವೈ) ಅಡಿಯಲ್ಲಿ ಬರುವ ರಾಷ್ಟ್ರೀಯ ಇ-ಆಡಳಿತ ವಿಭಾಗ (ಎನ್ ಇಜಿಡಿ) ಡಿಜಿಲಾಕರ್ ಮತ್ತು ಇ-ಡಿಸ್ಟ್ರಿಕ್ಟ್ ಪ್ಲಾಟ್ ಫಾರ್ಮ್ ಗಳಲ್ಲಿ ಇ-ಸರ್ಕಾರಿ ಸೇವೆಗಳ ಪ್ಯಾನ್-ಇಂಡಿಯಾ ಏಕೀಕರಣವನ್ನು ಸಕ್ರಿಯಗೊಳಿಸುವ ಮೂಲಕ ಮತ್ತೊಂದು ಮಹತ್ವದ ಮೈಲಿಗಲ್ಲನ್ನು ಸಾಧಿಸಿದೆ. ಈ ಸಾಧನೆಯೊಂದಿಗೆ, ಎಲ್ಲಾ 36 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ನಾಗರಿಕರು ಈಗ ಯಾವುದೇ ಸಮಯದಲ್ಲಿ, ಎಲ್ಲಿಯಾದರೂ 2,000 ಡಿಜಿಟಲ್ ಸೇವೆಗಳನ್ನು ತಡೆರಹಿತವಾಗಿ ಪ್ರವೇಶಿಸಬಹುದು.

ಸಮಗ್ರ ಸೇವೆಗಳು ಪ್ರಮಾಣಪತ್ರಗಳು, ಕಲ್ಯಾಣ ಯೋಜನೆಗಳು, ಯುಟಿಲಿಟಿ ಪಾವತಿಗಳು ಮತ್ತು ಇತರ ಅಗತ್ಯ ಸೌಲಭ್ಯಗಳು ಸೇರಿದಂತೆ ನಾಗರಿಕರ ಅಗತ್ಯಗಳ ವ್ಯಾಪಕ ವ್ಯಾಪ್ತಿಯನ್ನು ಒಳಗೊಳ್ಳುತ್ತವೆ, ಆ ಮೂಲಕ ವಿತರಣೆಯಲ್ಲಿ ಅನುಕೂಲತೆ, ದಕ್ಷತೆ ಮತ್ತು ಪಾರದರ್ಶಕತೆಯನ್ನು ಖಚಿತಪಡಿಸುತ್ತದೆ. ಈ ಬೆಳವಣಿಗೆಯು ಡಿಜಿಟಲ್ ಇಂಡಿಯಾ ಕಾರ್ಯಕ್ರಮದ ದೃಷ್ಟಿಕೋನವನ್ನು ಸಾಕಾರಗೊಳಿಸುವಲ್ಲಿ, ಕಾಗದರಹಿತ ಮತ್ತು ಮೊಬೈಲ್ ಆಡಳಿತವನ್ನು ಉತ್ತೇಜಿಸುವಲ್ಲಿ ಮತ್ತು ಸುಸ್ಥಿರ ಅಭಿವೃದ್ಧಿ ಗುರಿಗಳಿಗೆ (ಎಸ್ ಡಿಜಿ) ನೇರವಾಗಿ ಕೊಡುಗೆ ನೀಡುವಲ್ಲಿ ಪ್ರಮುಖ ಹೆಜ್ಜೆಯನ್ನು ಸೂಚಿಸುತ್ತದೆ.

ಇಂಟರ್ ಆಪರೇಬಿಲಿಟಿ, ಡೇಟಾ ಭದ್ರತೆ ಮತ್ತು ಬಹು-ಮಧ್ಯಸ್ಥಗಾರರ ಸಮನ್ವಯದ ಸವಾಲುಗಳನ್ನು ಯಶಸ್ವಿಯಾಗಿ ಎದುರಿಸುವ ಮೂಲಕ ಡಿಜಿಲಾಕರ್ ಭಾರತದ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯದ ಬಲವಾದ ಆಧಾರಸ್ತಂಭವಾಗಿ ಹೊರಹೊಮ್ಮಿದೆ. ಇದರ ನವೀನ ಮತ್ತು ಸ್ಥಿತಿಸ್ಥಾಪಕ ಚೌಕಟ್ಟು ಸುಲಭ ಪ್ರವೇಶ, ಒಳಗೊಳ್ಳುವಿಕೆ ಮತ್ತು ವಿಶ್ವಾಸಾರ್ಹತೆಯನ್ನು ಶಕ್ತಗೊಳಿಸಿದೆ, ವಿಶ್ವಾಸಾರ್ಹ ಡಿಜಿಟಲ್ ಸೇವೆಗಳೊಂದಿಗೆ ದೇಶಾದ್ಯಂತದ ನಾಗರಿಕರನ್ನು ಸಬಲೀಕರಣಗೊಳಿಸಿದೆ.

ಈ ವಿಸ್ತರಣೆಯೊಂದಿಗೆ, ಮಹಾರಾಷ್ಟ್ರದ ನಾಗರಿಕರು ಈಗ ಗರಿಷ್ಠ ಸಂಖ್ಯೆಯ ಸೇವೆಗಳಿಗೆ ಪ್ರವೇಶವನ್ನು ಹೊಂದಿದ್ದಾರೆ.  ನಂತರ ದೆಹಲಿ 123, ಕರ್ನಾಟಕ 113, ಅಸ್ಸಾಂ 102 ಮತ್ತು ಉತ್ತರ ಪ್ರದೇಶ 86. ಇದಲ್ಲದೆ, ಕೇರಳ ಮತ್ತು ಜಮ್ಮು ಮತ್ತು ಕಾಶ್ಮೀರ ತಲಾ 77 ಸೇವೆಗಳನ್ನು ಒದಗಿಸಿದರೆ, ಆಂಧ್ರಪ್ರದೇಶ 76 ಮತ್ತು ಗುಜರಾತ್ 64 ಸೇವೆಗಳನ್ನು ಒದಗಿಸುತ್ತದೆ. ಅಂತೆಯೇ, ತಮಿಳುನಾಡು ಮತ್ತು ಗೋವಾ ತಲಾ 63 ಸೇವೆಗಳನ್ನು ವಿಸ್ತರಿಸಿದರೆ, ಹರಿಯಾಣ 60 ಮತ್ತು ಹಿಮಾಚಲ ಪ್ರದೇಶ 58 ಸೇವೆಗಳನ್ನು ಒದಗಿಸುತ್ತದೆ. ಒಟ್ಟಾರೆಯಾಗಿ, 1,938 ಸೇವೆಗಳು ಪ್ರಸ್ತುತ ದೇಶಾದ್ಯಂತ ನಾಗರಿಕರಿಗೆ ಲಭ್ಯವಿದೆ.

ಈ ಯಶಸ್ಸನ್ನು ಆಧರಿಸಿ, ಎಐ-ಚಾಲಿತ ವಿಧಾನದ ಮೂಲಕ ಉದಯೋನ್ಮುಖ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಇ-ಸರ್ಕಾರಿ ಸೇವೆಗಳ ಪೋರ್ಟ್ ಪೋಲಿಯೊವನ್ನು ಮತ್ತಷ್ಟು ವಿಸ್ತರಿಸಲು ಎನ್ಇಜಿಡಿ ಯೋಜಿಸಿದೆ. ರಾಜ್ಯ ಮಟ್ಟದಲ್ಲಿ ಜಾಗೃತಿಯನ್ನು ಬಲಪಡಿಸಲು ರಚನಾತ್ಮಕ ತರಬೇತಿ ಕಾರ್ಯಕ್ರಮಗಳು ಮತ್ತು ಕಾರ್ಯಾಗಾರಗಳನ್ನು ನಡೆಸಲಾಗುವುದು, ಆದರೆ ನಿರಂತರ ನಾವೀನ್ಯತೆಯು ಹೆಚ್ಚಿನ ಒಳಗೊಳ್ಳುವಿಕೆ ಮತ್ತು ಸೇವೆಗಳ ಸುಧಾರಿತ ಕೊನೆಯ ಮೈಲಿ ವಿತರಣೆಯನ್ನು ಖಚಿತಪಡಿಸುತ್ತದೆ.

ಈ ಮೈಲಿಗಲ್ಲು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಡಿಜಿಟಲ್ ಶಕ್ತ ಮತ್ತು ಅಂತರ್ಗತ ಭಾರತದ ದೃಷ್ಟಿಕೋನಕ್ಕೆ ಅನುಗುಣವಾಗಿ ನಾಗರಿಕರನ್ನು ಸಬಲೀಕರಣಗೊಳಿಸಲು ಮತ್ತು ಆಡಳಿತವನ್ನು ಪರಿವರ್ತಿಸಲು ತಂತ್ರಜ್ಞಾನವನ್ನು ಬಳಸಿಕೊಳ್ಳುವ ಸರ್ಕಾರದ ಬದ್ಧತೆಯನ್ನು ಒತ್ತಿಹೇಳುತ್ತದೆ.

ಎನ್ ಇಜಿಡಿ ಬಗ್ಗೆ

2009ರಲ್ಲಿ, ರಾಷ್ಟ್ರೀಯ ಇ-ಆಡಳಿತ ವಿಭಾಗವನ್ನು ಎಲೆಕ್ಟ್ರಾನಿಕ್ಸ್(ವಿದ್ಯುನ್ಮಾನ) ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಡಿಜಿಟಲ್ ಇಂಡಿಯಾ ಕಾರ್ಪೊರೇಷನ್ ಅಡಿಯಲ್ಲಿ ಸ್ವತಂತ್ರ ವ್ಯವಹಾರ ವಿಭಾಗವಾಗಿ ರಚಿಸಿತು. 2009 ರಿಂದ, ಕಾರ್ಯಕ್ರಮ ನಿರ್ವಹಣೆ ಮತ್ತು ಇ-ಆಡಳಿತ ಯೋಜನೆಗಳ ಅನುಷ್ಠಾನದಲ್ಲಿ ಎಂಇಐಟಿವೈ ಅನ್ನು ಬೆಂಬಲಿಸುವಲ್ಲಿ ಎನ್ಇಜಿಡಿ ಪ್ರಮುಖ ಪಾತ್ರ ವಹಿಸುತ್ತಿದೆ; ಇತರ ಸರ್ಕಾರಿ ಸಂಸ್ಥೆಗಳೊಂದಿಗೆ ಕೇಂದ್ರ ಮತ್ತು ರಾಜ್ಯ ಮಟ್ಟದಲ್ಲಿ ಸಚಿವಾಲಯಗಳು / ಇಲಾಖೆಗಳಿಗೆ ತಾಂತ್ರಿಕ ಮತ್ತು ಸಲಹಾ ಬೆಂಬಲವನ್ನು ಒದಗಿಸುವುದು.

ಎನ್ಇಜಿಡಿಯ ಪ್ರಮುಖ ಕಾರ್ಯಾಚರಣೆಯ ಕ್ಷೇತ್ರಗಳಲ್ಲಿ ಕಾರ್ಯಕ್ರಮ ನಿರ್ವಹಣೆ, ಯೋಜನಾ ಅಭಿವೃದ್ಧಿ, ತಂತ್ರಜ್ಞಾನ ನಿರ್ವಹಣೆ, ಸಾಮರ್ಥ್ಯ ವರ್ಧನೆ, ಜಾಗೃತಿ ಮತ್ತು ಸಂವಹನ ಸಂಬಂಧಿತ ಚಟುವಟಿಕೆಗಳು ಸೇರಿವೆ. ಡಿಜಿಲಾಕರ್, ಎಂಟಿಟಿ ಲಾಕರ್, ಉಮಾಂಗ್, ಓಪನ್ ಫೇರ್ಜ್, ಎಪಿಐ ಸೇತು, ಮೈಸ್ಕೀಮ್, ಇಂಡಿಯಾ ಸ್ಟ್ಯಾಕ್ ಗ್ಲೋಬಲ್, ಮೇರಿ ಪೆಹ್ಚಾನ್, ಯುಎಕ್ಸ್ 4 ಜಿ ಮುಂತಾದ ಹಲವಾರು ರಾಷ್ಟ್ರೀಯ ಸಾರ್ವಜನಿಕ ಡಿಜಿಟಲ್ ಪ್ಲಾಟ್ ಫಾರ್ಮ್ ಗಳನ್ನು ಎನ್ಇಜಿಡಿ ಅಭಿವೃದ್ಧಿಪಡಿಸಿದೆ ಮತ್ತು ನಿರ್ವಹಿಸುತ್ತಿದೆ.

ರಾಜ್ಯಗಳು / ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಲಭ್ಯವಿರುವ ಸೇವೆಗಳು

*****