ہاکی لیجنڈ میجر دھیان چند کے یوم پیدائش کے موقع پر کھیل کے قومی دن کی مناسبت سے نوجوانوں کے امور اور کھیلوں کے مرکزی وزیر مملکت محترمہ رکشا نکھل کھڈسے نے چھترپتی سمبھاجی نگر میں اسپورٹس اتھارٹی آف انڈیا (ایس اے آئی) کے نیشنل سینٹر آف ایکسیلینس (این سی او ای) کا دورہ کیا۔

تقریب کے دوران وزیر کھڈسے نے این سی او ای کا سرکاری نام اورنگ آباد سے این سی او ای، چھترپتی سمبھاجی نگر میں تبدیل کرنے کی نقاب کشائی کی۔ ان کے ساتھ رکن پارلیمنٹ اور سابق وزیر مملکت برائے خزانہ ڈاکٹر بھگوت کراڈ کے علاوہ ڈپٹی ڈائریکٹر مونیکا گھوگے اور اسسٹنٹ ڈائریکٹر سومیش تاروڈیکر سمیت ایس اے آئی کے عہدیدار بھی موجود تھے۔

مثال کے ساتھ قیادت: فٹنس کی اپیل

مثال کے ساتھ قیادت کرنے اور فٹ انڈیا تحریک کے تئیں حکومت کے عزم کو تقویت دینے کے لیے ایک پرجوش قدم اٹھاتے ہوئے محترمہ کھڈسے نے ملک کے چوٹی کے ایتھلیٹس اور اسپورٹس سائنس دانوں کے ساتھ ایک منظم فٹنس سیشن میں سرگرمی سے حصہ لیا۔ اس سیشن میں جسمانی تندرستی کے لیے ایک سائنسی تناظر کا مظاہرہ کیا گیا اور اس میں پیشہ ورانہ وارم اپ مشقیں، جدید اسٹریچنگ تکنیک، اور بنیادی طاقت اور کنڈیشننگ مشقیں شامل تھیں۔ ان کی شرکت کا مقصد ہر عمر کے شہریوں کو جسمانی سرگرمی کو اپنی روزمرہ زندگی کا لازمی حصہ بنانے کی ترغیب دینا تھا۔

وزیر موصوف نے اس مرکز کے کھیل کے شعبوں اور اسپورٹس سائنس لیبز کا بھی دورہ کیا اور رہائشی کھلاڑیوں اور کوچز سے ان کی تربیت کے طریقہ کار کو سمجھنے کے لیے گفت و شنید کی۔ انھوں نے وزیر اعظم مودی کے ’’نو اوبیسٹی انڈیا‘‘ کے وژن کا اعادہ کیا، جس میں قومی ترقی کے سنگ بنیاد کے طور پر ہر فرد کی زندگی میں فٹنس کی اہمیت پر زور دیا گیا۔

بھارتی کھیلوں کے لیے ایک نیا باب

مجمع سے خطاب کرتے ہوئے محترمہ کھڈسے نے ’کھیلو بھارت نیتی‘ نامی ایک جامع فریم ورک کو نمایاں کیا جو نچلی سطح سے ایلیٹ سطح تک کھیلوں کی ایک متحرک ثقافت تخلیق کرنے کے لیے ڈیزائن کیا گیا ہے۔ کھلاڑیوں پر زور دیتے ہوئے کہ وہ اسپورٹس سائنس میں ترقی سے فائدہ اٹھائیں، انھوں نے کہا: ’’ہمارے ایتھلیٹس سے، میں یہ کہتی ہوں: آپ کی لگن اور سخت محنت آپ کی کام یابی  کا قلب ہے، لیکن اسپورٹس سائنس آپ کا دماغ ہے۔‘‘

وزیر کھڈسے نے کارپوریٹ سیکٹر سے بھی اپیل کی کہ وہ سائی چھترپتی سمبھاجی نگر کی ترقی میں مدد کریں اور کہا کہ صحت مند طرز زندگی ایک مضبوط فرد اور مضبوط قوم کی بنیاد ہے۔

عمدگی کی میراث

اس تقریب میں این سی او ای کی اہم کام یابیوں اور کھیلوں کی معروف سہولت کے طور پر اس کی صلاحیت کو بھی نمایاں کیا گیا۔ مرکز کے پاس اعلی درجے کے ایتھلیٹس پیدا کرنے کی ایک مضبوط وراثت ہے، جس کے کھلاڑیوں نے اپنی زندگی میں مجموعی طور پر 87 تمغے جیتے ہیں۔ صرف گذشتہ دو برسوں میں انھوں نے 32 بین الاقوامی تمغے حاصل کیے ہیں۔ سینٹر میں کھلاڑیوں نے باکسنگ، ویٹ لفٹنگ، فینسنگ، تیر اندازی، جمناسٹک اور ہاکی کے ساتھ ساتھ پیرا آرچری اور پیرا فینسنگ سمیت مختلف کھیلوں میں حصہ لیا۔

تقریب کے دوران ڈاکٹر بھگوت کراڈ نے مرکز کی ستائش کی اور اسے مہاراشٹر میں کھیلوں کی بہترین سہولیات میں سے ایک اور ممکنہ اولمپک تربیتی مرکز قرار دیا اور خطے میں ’’فٹ انڈیا موومنٹ‘‘ کو فروغ دینے میں اس کے اہم کردار کی توثیق کی۔

تقریب کے بعد محترمہ کھڈسے نے رہائشی کھلاڑیوں اور کوچوں سے بھی گفت و شنید کی اور سہولیات کا جائزہ لیا اور ان کے تربیتی طریقوں کو سمجھا۔ یہ سیشن جدید کھیلوں کی سائنس کے درمیان ہم آہنگی اور ہمارے ایتھلیٹس کی عمدہ کارکردگی کے حصول کے لیے لگن کو اجاگر کرنے کا ایک انوکھا موقع تھا۔

***

(ش ح – ع ا)

U. No. 5456

(Release ID: 2162050) Visitor Counter : 9