नवी दिल्ली, 28 ऑगस्ट 2025

केंद्रीय कृषी आणि शेतकरी कल्याण मंत्रालयाचे सचिव देवेश चतुर्वेदी आणि भूतान सरकारच्या कृषी आणि पशुधन मंत्रालयाचे सचिव थिनले नामग्याल यांनी भूतानमध्‍ये थिंपू येथे उभय देशांमध्‍ये कृषी आणि संलग्न क्षेत्रांमध्ये सहकार्य अधिक मजबूत करण्यासाठी सामंजस्य करारावर स्वाक्षऱ्या केल्या.

भारत आणि भूतान दरम्यानच्या कायमस्वरूपी भागीदारीमध्‍ये हा करार म्हणजे  एक महत्त्वाचा टप्पा आहे. यामुळे  अन्न सुरक्षा, शाश्वत शेती आणि ग्रामीण समृद्धीसाठी दोन्ही देशांच्या सामायिक वचनबद्धता  प्रतिबिंबीत होते.सामंजस्य करारात नमूद केलेल्या विविध क्षेत्रांमध्ये सहकार्यासाठी प्रस्तुत करार एक चौकट म्हणून काम करेल.  ज्यामध्ये कृषी संशोधन आणि नवोन्मेष, पशुधन आरोग्य आणि उत्पादन, पिकांचे कापणीनंतरचे व्यवस्थापन, मूल्य साखळी विकास आणि ज्ञान, कौशल्ये आणि अनुभव  यांचे आदानप्रदान उभय देशांमध्‍ये केले जाईल. या  विविध गोष्‍टींचा या करारामध्‍ये समावेश आहे.

या सामंजस्य कराराची अंमलबजावणी करण्यासाठी ‘जेटीडब्ल्यूजी’ म्हणजेच  संयुक्त तांत्रिक कार्यगटाच्या  पहिल्या  सत्राचे  आयोजन  करण्यात आले. या सत्रामध्‍ये   दोन्ही देशांनी ‘जेटीडब्ल्यूजी’साठी संदर्भ अटी आणि तात्काळ कृतींसाठी सहकार्य करण्‍यासाठी  प्राधान्य असलेल्या क्षेत्रांवर सहमती दर्शविली. उभय  बाजूंनी कृषी आणि संलग्न क्षेत्रांमध्ये द्विपक्षीय सहकार्य अधिक दृढ करण्यासाठी एक महत्त्वाचा टप्पा म्हणून बैठकीचे महत्त्व अधोरेखित केले.

यावेळी बोलताना भारताचे सचिव चतुर्वेदी यांनी प्राधान्यक्रम, आव्हाने सामायिक केली आणि कृषी क्षेत्राला बळकटी देण्यासाठी भारत  सरकारने सुरू केलेल्या नाविन्यपूर्ण उपक्रमांच्या मालिकेचा उल्लेख केला. नवीन उपक्रमात डिजिटल उपायांचा वापर, हवामानाचा विचार करून त्यानुसार  कृषी पद्धतींमध्‍ये लवचिकता आणण्‍यासाठी  प्रोत्साहन देणे, जोखीम कमी करणे आणि शेतकऱ्यांना कर्ज देणे यांचा समावेश होता.

‘जीटीडब्ल्यूजी’ सत्रादरम्यान दोन्ही बाजूंनी कृषी, पशुधन, कृषी विपणन आणि सहकारी संस्था, अन्न प्रक्रिया,बी- बियाणे क्षेत्र, संशोधन आणि तंत्रज्ञान सहयोग आणि क्षमता बांधणी यासारख्या सहकार्याच्या प्रमुख क्षेत्रांवर सविस्तर चर्चा केली.

याप्रसंगी दोन्ही बाजूंनी परस्परांच्या सोयीनुसार योग्य  तारखेला भारतात पुढील ‘जीटीडब्ल्यूजी’ प्रतिनिधींची बैठक आयोजित करण्यासाठी  सहमती दर्शविली.

सुषमा काणे/सुवर्णा बेडेकर/प्रिती मालंडकर

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai