2025 ജൂൺ 24 മുതൽ 2025 ജൂലൈ 25 വരെ ബിഹാറിൽ നടന്ന വോട്ടർപട്ടിക പ്രത്യേക തീവ്ര പുനഃപരിശോധന(SIR)യുടെ എന്യൂമെറേഷൻ ഘട്ടം വിജയകരമായി പൂർത്തിയാക്കിയതിനെത്തുടർന്ന് 2025 ഓഗസ്റ്റ് ഒന്നിന് കരട് വോട്ടർ പട്ടിക പ്രസിദ്ധീകരിച്ചു. 2025 ഓഗസ്റ്റ് 1 മുതൽ സെപ്റ്റംബർ 1 വരെയാണ് അവകാശവാദങ്ങളും എതിർപ്പുകളും രേഖകളും സമർപ്പിക്കുന്നതിനുള്ള കാലാവധി.

ബിഹാർ CEO, 38 ജില്ലകളിലെയും DEO-മാർ, 243 ERO-മാർ, 2976 AERO-മാർ, 90,712 BLO-മാർ, ലക്ഷക്കണക്കിനു സന്നദ്ധപ്രവർത്തകർ, 12 പ്രധാന രാഷ്ട്രീയ കക്ഷികളിലെ ജില്ലാ അധ്യക്ഷരുള്‍പ്പെടെയുള്ള മേഖലാ പ്രതിനിധികൾ, അവർ നിയമിച്ച 1.60 ലക്ഷം BLA-മാർ എന്നിവരുടെ നിരന്തര പരിശ്രമങ്ങളെ ഇന്ത്യൻ തെരഞ്ഞെടുപ്പ് കമ്മീഷൻ അഭിനന്ദിക്കുന്നു.

കരട് വോട്ടർ പട്ടികയിൽ എന്തെങ്കിലും തെറ്റുകൾ ഉണ്ടെങ്കിൽ അവ തിരുത്താൻ മാത്രമല്ല, എന്യൂമെറേഷൻ ഫോം സമർപ്പിക്കുമ്പോൾ നൽകിയിട്ടില്ലാത്ത ആവശ്യമായ രേഖകൾ സമർപ്പിക്കാനും പരാതി-അവകാശവാദ കാലയളവ് വോട്ടർമാർക്ക് അവസരം നൽകുന്നു. ബിഹാർ CEO-യുടെ ഓഫീസിൽനിന്ന് ലഭിച്ച വിവരങ്ങൾ അനുസരിച്ച്, ഇന്നുവരെ 98.2% വോട്ടർമാരുടെയും രേഖകൾ ലഭിച്ചു.

അതായത്, 2025 ജൂൺ 24 മുതൽ ഓഗസ്റ്റ് 24 വരെയുള്ള 60 ദിവസത്തിൽ, 98.2% പേർ അവരുടെ രേഖകൾ സമർപ്പിച്ചു. അതായത് പ്രതിദിനം ശരാശരി 1.64%. സെപ്റ്റംബർ 1 വരെ ഇനിയും 8 ദിവസം ബാക്കിയുണ്ട്. രേഖകൾ സമർപ്പിക്കാൻ 1.8% വോട്ടർമാർ മാത്രമേ ശേഷിക്കുന്നുള്ളൂ. BLO-മാരുടെയും സന്നദ്ധപ്രവർത്തകരുടെയും സഹായത്തോടെ അവരുടെ രേഖകൾ ശേഖരിക്കുന്നതിനുള്ള നടപടിക്രമങ്ങൾ പുരോഗമിക്കുകയാണ്. അതിനാൽ, എന്യൂമെറേഷൻ ഫോം ശേഖരിക്കുന്നതുപോലെ, രേഖകൾ ശേഖരിക്കുന്നതുമായി ബന്ധപ്പെട്ട ജോലികളും നിശ്ചയിച്ച സമയത്തിന് മുമ്പ് പൂർത്തിയായേക്കും.

2025 ജൂൺ 24-ലെ SIR ഉത്തരവുപ്രകാരം, ബന്ധപ്പെട്ട 243 ERO-മാരും 2976 AERO-മാരും രേഖകളുടെ പരിശോധനയും ഇതോടൊപ്പം നടത്തുന്നു.

കരടുപട്ടികയിലുള്ള 7.24 കോടി വോട്ടർമാരിൽ, ഇതുവരെ ലഭിച്ചത് 0.16% അവകാശവാദങ്ങളും എതിർപ്പുകളുമാണ്. ബിഹാറിലെ 12 അംഗീകൃത രാഷ്ട്രീയ കക്ഷികളുടെ BLA-മാരിൽനിന്ന് 10, തങ്ങളുടെ നിയമസഭാ മണ്ഡലത്തിലെ വോട്ടർമാരിൽനിന്ന് 1,21,143 എന്നിങ്ങനെയാണ് ലഭിച്ചവയുടെ എണ്ണം. ബന്ധപ്പെട്ട നിയോജകമണ്ഡലത്തിലെ വോട്ടർമാരല്ലാത്തവരിൽനിന്നു പരാതികളേതും ലഭിച്ചിട്ടില്ല.

ജൂലൈ 1-ന് 18 വയസ്സും അതിൽ കൂടുതലും പ്രായമുള്ളവരോ ഒക്ടോബർ 1-ന് 18 വയസ്സും അതിൽ കൂടുതലും പ്രായമുള്ളവരോ ആയ 3,28,847 പുതിയ വോട്ടർമാരും അവരുടെ ഫോം 6-ഉം പ്രഖ്യാപനപത്രവും സമർപ്പിച്ചിട്ടുണ്ട്.

ബിഹാറിലെ SIR നിശ്ചിത സമയക്രമപ്രകാരം മുന്നേറുന്നു. ലഭിച്ച എല്ലാ അവകാശവാദങ്ങളുടെയും എതിർപ്പുകളുടെയും തീരുമാനവും യോഗ്യത രേഖകളുടെ പരിശോധനയും ബന്ധപ്പെട്ട ERO-മാർ/AERO-മാർ 2025 സെപ്റ്റംബർ 25-നകം പൂർത്തിയാക്കണം. അന്തിമ പരിശോധനയ്ക്കുശേഷം, 2025 സെപ്റ്റംബർ 30-ന് അന്തിമ വോട്ടർ പട്ടിക പ്രസിദ്ധീകരിക്കും.

****

AT