چیف آف ڈیفنس اسٹاف جنرل انل چوہان نے ’آپریشن سندور‘ کی کامیابی کو تینوں افواج کے درمیان ہم آہنگی اور عملی یکجہتی کا ثبوت قرار دیا ہے۔ سیکندرآباد میں کالج آف ڈیفنس مینجمنٹ (سی ڈی ایم) میں منعقدہ 21ویں ہائیئر ڈیفنس مینجمنٹ کورس (ایچ ڈی ایم سی) کے شرکاء اور سینئر افسران سے خطاب کرتے ہوئے سی ڈی ایس نے مسلح افواج میں اشتراک اور انضمام پر اسٹریٹجک نکات پیش کیے اور مربوط آپریشنز کے مستقبل کے لائحہ عمل کے لیے اہم رہنما نکات اجاگر کیے۔

جنرل انل چوہان نے جامع صلاحیتوں کی ترقی، آتم نربھرتا (خود انحصاری) اور فوج میں جاری انقلابی تبدیلیوں کی گہری سمجھ بوجھ پر زور دیا، تاکہ ٹیکنالوجی پر مبنی جدید جنگ میں پیدا ہونے والی تغیرات اور چیلنجز سے مؤثر انداز میں نمٹا جا سکے۔

سی ڈی ایس نے ’’قومی سلامتی کا ڈھانچہ اور اعلیٰ دفاعی انتظام‘‘ کے موضوع پر ایک بصیرت افروز خطاب کیا، جس میں انہوں نے بھارت کے دفاعی نظام کے ارتقاء اور موجودہ ڈھانچے کا خاکہ پیش کیا۔ انہوں نے محکمہ عسکری امور کی کامیابیوں، فیصلہ سازی میں اہم کردار ادا کرنے والی قومی سلامتی کمیٹیوں کے کام، تنظیمی ڈھانچے میں اصلاحات سمیت جاری اقدامات اور مشترکہ صلاحیت بڑھانے کے لیے تھیئٹر کمانڈز کے نقشِ راہ پر روشنی ڈالی۔ خطاب میں بدلتے ہوئے قومی سلامتی کے چیلنجز سے نمٹنے کے لیے مسلسل اصلاحات، ہم آہنگی اور لچک کی اہمیت پر زور دیا گیا۔

مشترکہ لاجسٹکس اور انضمام کو مضبوط بنانے کی جاری کوششوں کے تحت جنرل انل چوہان نے ’’جوائنٹ پرائمر فار انٹیگریٹڈ لاجسٹکس‘‘ جاری کیا، جو سی ڈی ایم کی جانب سے تیار کردہ ایک جامع رہنما دستاویز ہے۔ انہوں نے کہا کہ لاجسٹکس فوجی آپریشنز کی ریڑھ کی ہڈی ہے اور مسلح افواج میں لاجسٹک عمل کا انضمام اسٹریٹجک اہداف کے حصول کے لیے نہایت اہم ہے۔

یہ پرائمر لاجسٹکس سسٹمز کو جدید بنانے کی جانب ایک اہم قدم ہے، جو اس بات کو یقینی بناتا ہے کہ مسلح افواج ہر وقت ساز و سامان سے لیس اور کسی بھی چیلنج کے لیے تیار رہیں۔ اس میں لاجسٹکس انضمام کے بنیادی شعبے جیسے ڈیجیٹائزیشن، مشترکہ فراہمی و خریداری اور قومی لاجسٹکس فریم ورک سے انضمام کو اجاگر کیا گیا ہے۔ اس دستاویز کا مقصد تینوں افواج میں لاجسٹکس کے ہم آہنگ تعاون کو بڑھانا، کارکردگی میں بہتری لانا اور تنظیمی مؤثریت کو مزید مؤثر بنانا ہے۔

سی ڈی ایس نے اسمارٹ بائیک پبلک بائیسکل شیئرنگ سہولت کا بھی افتتاح کیا، جو ایک انقلابی منصوبہ ہے جس کا مقصد سی ڈی ایم کے عملے کو روزمرہ آمد و رفت کے لیے ماحول دوست برقی سائیکلوں تک آسان رسائی فراہم کرنا ہے، تاکہ کاربن فٹ پرنٹ کم کیا جا سکے۔ یہ منصوبہ سی ڈی ایم نے اسمارٹ بائیک موبلٹی پرائیویٹ لمیٹڈ کے اشتراک سے مکمل کیا ہے اور یہ سی ڈی ایم کے سبز طرزِ عمل، اسمارٹ ٹیکنالوجی کے استعمال اور صحت مند طرزِ زندگی کو اپنانے کے عزم کی عکاسی کرتا ہے۔

کمانڈنٹ سی ڈی ایم میجر جنرل ہرش چھبر نے مسلح افواج کی مستقبل کی اسٹریٹجک قیادت تیار کرنے کے لیے پیشہ ورانہ فوجی تعلیم کو فروغ دینے کے حالیہ اقدامات پر ایک جامع بریفنگ دی۔

سی ڈی ایم، جو تینوں افواج کا ایک ممتاز ادارہ ہے، سینئر افسران کو اعلیٰ قیادت کے کردار کے لیے ضروری جدید انتظامی مہارتوں سے آراستہ کرنے میں کلیدی کردار ادا کرتا رہا ہے۔ جاری 44 ہفتوں پر مشتمل ایچ ڈی ایم سی میں کل 167 شرکاء شامل ہیں، جن میں دوستانہ ممالک کے 12 افسران بھی شامل ہیں، جو خطے میں تعاون اور فوجی سفارت کاری کے لیے بھارت کے عزم کو مضبوط کرتا ہے۔

*****

ش ح۔ ش ا ر۔ ول

Uno- 4455