ಕೇಂದ್ರ ಜವಳಿ ಸಚಿವರಾದ ಶ್ರೀ ಗಿರಿರಾಜ್ ಸಿಂಗ್ ಅವರು ಇಂದು ನವದೆಹಲಿಯಲ್ಲಿ 11ನೇ ರಾಷ್ಟ್ರೀಯ ಕೈಮಗ್ಗ ದಿನವನ್ನು ಉದ್ಘಾಟಿಸಿದರು ಮತ್ತು ಪ್ರತಿಷ್ಠಿತ ಕೈಮಗ್ಗ ಪ್ರಶಸ್ತಿಗಳನ್ನು ಪ್ರದಾನ ಮಾಡಿದರು. ವಿದೇಶಾಂಗ ವ್ಯವಹಾರ ಮತ್ತು ಜವಳಿ ರಾಜ್ಯ ಸಚಿವರಾದ ಶ್ರೀ ಪಬಿತ್ರ ಮಾರ್ಘೆರಿಟಾ, ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ರಾಜ್ಯ ಸಚಿವರಾದ ಶ್ರೀಮತಿ ನಿಮುಬೆನ್  ಜಯಂತಿಭಾಯಿ ಬಂಭಾನಿಯಾ, ಸಂಸತ್ ಸದಸ್ಯೆ ಶ್ರೀಮತಿ ಕಂಗನಾ ರನೌತ್, ಜವಳಿ ಕಾರ್ಯದರ್ಶಿ ಶ್ರೀಮತಿ ನೀಲಂ ಶಮಿ ರಾವ್, ಜವಳಿ ಹೆಚ್ಚುವರಿ ಕಾರ್ಯದರ್ಶಿ ಶ್ರೀ ರೋಹಿತ್ ಕನ್ಸಾಲ್, ಡಿಸಿ ಕೈಮಗ್ಗ ಡಾ. ಎಂ ಬೀನಾ, ವಿವಿಧ ಕ್ಷೇತ್ರಗಳ ಸಂಸತ್ ಸದಸ್ಯರು ಮತ್ತು ಸಚಿವಾಲಯದ ಹಿರಿಯ ಅಧಿಕಾರಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ವಿದೇಶಿ ಖರೀದಿದಾರರು, ಗಣ್ಯ ವ್ಯಕ್ತಿಗಳು, ರಫ್ತುದಾರರು ಮತ್ತು ದೇಶಾದ್ಯಂತದ ಸುಮಾರು 650 ನೇಕಾರರು ಸಮಾರಂಭದಲ್ಲಿ ಭಾಗವಹಿಸಿದ್ದರು. ಭಾರತದ ನೇಯ್ಗೆ ಸಂಪ್ರದಾಯಗಳಲ್ಲಿನ ಸಂರಕ್ಷಣೆ, ನಾವೀನ್ಯತೆ ಮತ್ತು ಶ್ರೇಷ್ಠತೆಗೆ ನೀಡಿದ ಕೊಡುಗೆಗಳನ್ನು ಗುರುತಿಸಿ ಆರು ಮಹಿಳೆಯರು ಮತ್ತು ಒಬ್ಬ ದಿವ್ಯಾಂಗ ಕುಶಲಕರ್ಮಿ ಸೇರಿದಂತೆ 24 ಅತ್ಯುತ್ತಮ ನೇಕಾರರಿಗೆ ಪ್ರತಿಷ್ಠಿತ ಸಂತ ಕಬೀರ ಮತ್ತು ರಾಷ್ಟ್ರೀಯ ಕೈಮಗ್ಗ ಪ್ರಶಸ್ತಿಗಳನ್ನು ಪ್ರದಾನ ಮಾಡುವುದು ಈ ಕಾರ್ಯಕ್ರಮದ ಪ್ರಮುಖ ಅಂಶವಾಗಿತ್ತು.

ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಸಚಿವರಾದ ಶ್ರೀ ಗಿರಿರಾಜ್ ಸಿಂಗ್, ಭಾರತದ ಆರ್ಥಿಕತೆಯಲ್ಲಿ ಜವಳಿ ಕ್ಷೇತ್ರದ ಹೆಚ್ಚುತ್ತಿರುವ ಪ್ರಾಮುಖ್ಯತೆಯನ್ನು ಒತ್ತಿ ಹೇಳಿದರು. ಇದು ಈಗ ದೇಶದಲ್ಲಿ ಎರಡನೇ ಅತಿದೊಡ್ಡ ಉದ್ಯೋಗ ಸೃಷ್ಟಿಸುವ ವಲಯವಾಗಿ ಹೊರಹೊಮ್ಮಿದೆ ಎಂದು ಹೇಳಿದರು. ಎಲ್ಲಾ ರಾಷ್ಟ್ರೀಯ ಕೈಮಗ್ಗ ಪ್ರಶಸ್ತಿ ವಿಜೇತರಿಗೆ ಕೇಂದ್ರ ಸಚಿವರು ತಮ್ಮ ಹೃತ್ಪೂರ್ವಕ ಅಭಿನಂದನೆಗಳನ್ನು ತಿಳಿಸಿದರು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ಆತ್ಮನಿರ್ಭರ ಭಾರತ ದೃಷ್ಟಿಕೋನವನ್ನು ಪುನರುಚ್ಚರಿಸಿದ ಸಚಿವರು, ಕೈಮಗ್ಗ ವಲಯದಲ್ಲಿ ಉದ್ಯಮಶೀಲತೆಯನ್ನು ಉತ್ತೇಜಿಸುವ ಅಗತ್ಯವನ್ನು ಒತ್ತಿ ಹೇಳಿದರು, ನೇಕಾರರು ಮತ್ತು ಸಣ್ಣ ಉದ್ಯಮಿಗಳನ್ನು ಸಬಲೀಕರಣಗೊಳಿಸಲು ಮುದ್ರಾದಂತಹ ಯೋಜನೆಗಳನ್ನು ಬಳಸಿಕೊಳ್ಳಬೇಕು. ಉತ್ಪನ್ನ ವೈವಿಧ್ಯೀಕರಣ, ರಾಮಿ ಮತ್ತು ಲಿನಿನ್ ನಂತಹ ನೈಸರ್ಗಿಕ ನಾರುಗಳ ಪ್ರೋತ್ಸಾಹ ಮತ್ತು ಎರಡನೇ ತಲೆಮಾರಿನ ಕೈಮಗ್ಗ ಉದ್ಯಮಿಗಳಿಗೆ, ವಿಶೇಷವಾಗಿ ದೇಶಾದ್ಯಂತ 797 ಕೈಮಗ್ಗ ಕ್ಲಸ್ಟರ್ಗಳ ಮೂಲಕ  ಬೆಂಬಲ ನೀಡುವ ಬಗ್ಗೆ ಅವರು ಒತ್ತಿ ಹೇಳಿದರು.

ಭಾರತೀಯ ನೇಕಾರರು ಮತ್ತು ವಿನ್ಯಾಸಕರ ಬೌದ್ಧಿಕ ಆಸ್ತಿ ಹಕ್ಕುಗಳ ರಕ್ಷಣೆಯನ್ನು ಖಚಿತಪಡಿಸಿಕೊಳ್ಳಲು ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಬ್ಲಾಕ್ ಚೈನ್ ನಂತಹ ಅತ್ಯಾಧುನಿಕ ತಂತ್ರಜ್ಞಾನಗಳ ಮೂಲಕ ಸ್ಥಳೀಯ ವಿನ್ಯಾಸಗಳನ್ನು ರಕ್ಷಿಸಲು ಸರ್ಕಾರ ಕೆಲಸ ಮಾಡುತ್ತಿದೆ ಎಂದು ಸಚಿವರು ಹೇಳಿದರು. ಕೈಮಗ್ಗ ಉದ್ಯಮದಲ್ಲಿ ಯುವ ಪೀಳಿಗೆ ಸಕ್ರಿಯವಾಗಿ ತೊಡಗಿಸಿಕೊಳ್ಳಬೇಕು ಮತ್ತು ದೇಶಾದ್ಯಂತ ಯುವಕರನ್ನು ಆಕರ್ಷಿಸುವ ಸಮಕಾಲೀನ ಕೈಮಗ್ಗ ಉತ್ಪನ್ನಗಳನ್ನು ತಯಾರಿಸುವಲ್ಲಿ ವಿನ್ಯಾಸಕರು ಮತ್ತು ನೇಕಾರರು ಪರಸ್ಪರ ಸಹಕರಿಸಬೇಕು ಎಂದು ಅವರು ಕರೆ ನೀಡಿದರು. ಭಾರತೀಯ ಕರಕುಶಲತೆಯ ಶ್ರೀಮಂತ ಸಂಪ್ರದಾಯವನ್ನು ಬೆಂಬಲಿಸುವ ಮೂಲಕ ವಾರಕ್ಕೊಮ್ಮೆಯಾದರೂ ಕೈಮಗ್ಗ ಬಟ್ಟೆಗಳನ್ನು ಧರಿಸುವಂತೆ ಕೇಂದ್ರ ಸಚಿವರು ನಾಗರಿಕರಿಗೆ ಮನವಿ ಮಾಡಿದರು.

ಈ ರಾಷ್ಟ್ರೀಯ ಕೈಮಗ್ಗ ದಿನವು ಸ್ವದೇಶಿ ಚಳವಳಿಗೆ ಸಲ್ಲಿಸುವ ಗೌರವವಾಗಿದೆ ಮತ್ತು ಕೈಯಿಂದ ನೇಯ್ದ ಬಟ್ಟೆಗಳು ಪ್ರತಿರೋಧ, ಹೆಮ್ಮೆ ಮತ್ತು ಗುರುತಿನ ಸಂಕೇತವಾಗಿದೆ ಎಂದು ಜವಳಿ ಖಾತೆ ರಾಜ್ಯ ಸಚಿವ ಶ್ರೀ ಪಬಿತ್ರ ಮಾರ್ಘೆರಿಟಾ ಹೇಳಿದರು. ಗೌರವಾನ್ವಿತ ಪ್ರಧಾನ ಮಂತ್ರಿಯವರ "ವೋಕಲ್ ಫಾರ್ ಲೋಕಲ್" ಮತ್ತು "ಲೋಕಲ್ ಫಾರ್ ಗ್ಲೋಬಲ್" ಎಂಬ ದೃಷ್ಟಿಕೋನವು ಜೀವಂತ ವಾಸ್ತವವಾಗುತ್ತಿದೆ ಮತ್ತು ಕೇಂದ್ರ ಸಚಿವ ಶ್ರೀ ಗಿರಿರಾಜ್ ಸಿಂಗ್ ಅವರ ಮಾರ್ಗದರ್ಶನದಲ್ಲಿ ಜವಳಿ ಸಚಿವಾಲಯವು ಕೈಮಗ್ಗ ವಲಯದಲ್ಲಿ ಬೆಳವಣಿಗೆ ಮತ್ತು ನಾವೀನ್ಯತೆಯ ಹೊಸ ಯುಗಕ್ಕೆ ನಾಂದಿ ಹಾಡುತ್ತಿದೆ ಎಂದು ಅವರು ಹೇಳಿದರು. ಭಾರತೀಯ ಕೈಮಗ್ಗ ಬಟ್ಟೆಗಳನ್ನು ಸುಸ್ಥಿರತೆಯ ಜಾಗತಿಕ ಸಂಕೇತಗಳಾಗಿ ಪರಿವರ್ತಿಸುತ್ತಿರುವ ಹ್ಯಾಂಡ್ಲೂಮ್ ಮಾರ್ಕ್ ಮತ್ತು ಇಂಡಿಯಾ ಹ್ಯಾಂಡ್ಲೂಮ್ ಬ್ರಾಂಡ್ ನಂತಹ ಉಪಕ್ರಮಗಳನ್ನು ಶ್ರೀ ಪಬಿತ್ರ ಮಾರ್ಘೆರಿಟಾ ಒತ್ತಿ ಹೇಳಿದರು.

ಕಾರ್ಯಕ್ರಮದ ನಂತರ, ಗಣ್ಯರನ್ನು ಭಾರತೀಯ ನೇಯ್ಗೆಯ ವೈವಿಧ್ಯಮಯ ಕಲಾತ್ಮಕತೆ ಮತ್ತು ಪ್ರಾದೇಶಿಕ ಶ್ರೀಮಂತಿಕೆಯನ್ನು ಪ್ರದರ್ಶಿಸುವ ಪ್ರಶಸ್ತಿ ವಿಜೇತ ಕೈಮಗ್ಗ ಪ್ರದರ್ಶನಗಳ ಪ್ರವಾಸಕ್ಕೆ ಕರೆದೊಯ್ಯಲಾಯಿತು.

ಈ ಕಾರ್ಯಕ್ರಮದಲ್ಲಿ ಈ ಕೆಳಗಿನವುಗಳು ಸಹ ಇದ್ದವು:

• ಎನ್ ಐ ಎಫ್ ಟಿ ಮುಂಬೈನಿಂದ ಕೈಮಗ್ಗದ ಶ್ರೇಷ್ಠತೆಯ ಕುರಿತಾದ ಕಾಫಿ ಟೇಬಲ್ ಪುಸ್ತಕದ ಅನಾವರಣ
• ಪ್ರಶಸ್ತಿ ವಿಜೇತ ಕೈಮಗ್ಗ ಉತ್ಪನ್ನಗಳ ವಿಶೇಷ ಪ್ರದರ್ಶನ
• ಕೈಮಗ್ಗ ಯೋಜನೆಗಳ ಕುರಿತು ಸಹಾಯಕೇಂದ್ರ
• "ವಸ್ತ್ರ ವೇದ - ಭಾರತದ ಕೈಮಗ್ಗ ಪರಂಪರೆ" ಎಂಬ ಶೀರ್ಷಿಕೆಯ ಫ್ಯಾಷನ್ ಶೋ
• ಕೈಮಗ್ಗಗಳ ಕುರಿತು ವಿಶೇಷವಾಗಿ ರೂಪಿಸಲಾದ ಚಲನಚಿತ್ರಗಳ ಬಿಡುಗಡೆ

ರಾಷ್ಟ್ರೀಯ ಕೈಮಗ್ಗ ದಿನ ಕುರಿತು

1905ರಲ್ಲಿ ಸ್ವದೇಶಿ ಉತ್ಪನ್ನಗಳ ಬಳಕೆಯನ್ನು ಪ್ರೋತ್ಸಾಹಿಸುವ ಮತ್ತು ಕೈಮಗ್ಗ ಉದ್ಯಮವನ್ನು ಉತ್ತೇಜಿಸುವ ಸ್ವದೇಶಿ ಚಳುವಳಿಯ ಪ್ರಾರಂಭದ ಸ್ಮರಣಾರ್ಥವಾಗಿ ವಾರ್ಷಿಕವಾಗಿ ಆಗಸ್ಟ್ 7 ರಂದು ರಾಷ್ಟ್ರೀಯ ಕೈಮಗ್ಗ ದಿನವನ್ನು ಆಚರಿಸಲಾಗುತ್ತದೆ. ಮೊದಲ ರಾಷ್ಟ್ರೀಯ ಕೈಮಗ್ಗ ದಿನವನ್ನು 2015 ರಲ್ಲಿ ಚೆನ್ನೈನಲ್ಲಿ ಗೌರವಾನ್ವಿತ ಪ್ರಧಾನಿ ಶ್ರೀ ನರೇಂದ್ರ ಮೋದಿ ಉದ್ಘಾಟಿಸಿದರು.

ಭಾರತದಾದ್ಯಂತ ಕೈಮಗ್ಗ ವಲಯವು 35 ಲಕ್ಷಕ್ಕೂ ಹೆಚ್ಚು ಜನರಿಗೆ ಉದ್ಯೋಗ ನೀಡಿದ್ದು, ಅದರಲ್ಲಿ ಶೇ.70 ಕ್ಕಿಂತ ಹೆಚ್ಚು ಜನರು ಮಹಿಳೆಯರಾಗಿದ್ದಾರೆ. ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಸಂರಕ್ಷಿಸುವುದರ ಜೊತೆಗೆ, ಇದು ಸುಸ್ಥಿರ ಜೀವನೋಪಾಯ, ಮಹಿಳಾ ಸಬಲೀಕರಣ ಮತ್ತು ಪರಿಸರ ಸ್ನೇಹಿ ಉತ್ಪಾದನೆಯ ಪ್ರಮುಖ ಮೂಲವಾಗಿದೆ.

ಈ ವರ್ಷದ ಆಚರಣೆಗಳು ನೇಕಾರರು, ಕುಶಲಕರ್ಮಿಗಳು, ವಿನ್ಯಾಸಕರು, ಐ ಐ ಎಚ್ ಟಿ ಮತ್ತು ಎನ್ ಐ ಎಫ್ ಟಿ ವಿದ್ಯಾರ್ಥಿಗಳು, ಕೈಮಗ್ಗ ಹ್ಯಾಕಥಾನ್ ವಿಜೇತರು, ರಫ್ತುದಾರರು, ವಿದೇಶಿ ಖರೀದಿದಾರರು, ಹಿರಿಯ ಸರ್ಕಾರಿ ಅಧಿಕಾರಿಗಳು ಮತ್ತು ದೇಶಾದ್ಯಂತದ ಇತರ ಪಾಲುದಾರರನ್ನು ಒಟ್ಟುಗೂಡಿಸಿತು, ಭಾರತದ ಪರಂಪರೆ ಮತ್ತು ಭವಿಷ್ಯದ ರಚನೆಯಾಗಿ ಈ ವಲಯದ ಪಾತ್ರವನ್ನು ಪುನರುಚ್ಚರಿಸಿತು.

*****