ભારત 6 થી 8 ઓગસ્ટ, 2025 દરમિયાન નવી દિલ્હીમાં પ્રતિષ્ઠિત WHO-ઇન્ટરનેશનલ રેગ્યુલેટરી કોઓપરેશન ફોર હર્બલ મેડિસિન્સ (IRCH) વર્કશોપનું આયોજન કરશે. આયુષ મંત્રાલય દ્વારા વિશ્વ આરોગ્ય સંગઠન (WHO) અને ફાર્માકોપીયા કમિશન ફોર ઇન્ડિયન મેડિસિન એન્ડ હોમિયોપેથી (PCIM&H)ના સહયોગથી આયોજિત, ત્રણ દિવસીય આંતરરાષ્ટ્રીય વર્કશોપ હર્બલ દવાઓના નિયમન માટે ક્ષમતાને મજબૂત બનાવવા માટે વૈશ્વિક નિષ્ણાતો અને નિયમનકારોને એકસાથે લાવશે.

આ કાર્યક્રમનું ઉદ્ઘાટન આયુષ મંત્રાલયના સચિવ વૈદ્ય રાજેશ કોટેચા અને WHO-IRCHના અધ્યક્ષ ડૉ. કિમ સુંગચોલ દ્વારા કરવામાં આવશે. ભૂતાન, બ્રુનેઈ, ક્યુબા, ઘાના, ઇન્ડોનેશિયા, જાપાન, નેપાળ, પેરાગ્વે, પોલેન્ડ, શ્રીલંકા, યુગાન્ડા અને ઝિમ્બાબ્વે સહિતના દેશો વ્યક્તિગત રીતે ભાગ લે તેવી અપેક્ષા છે, જ્યારે બ્રાઝિલ, ઇજિપ્ત અને યુનાઇટેડ સ્ટેટ્સ વર્ચ્યુઅલી જોડાશે.

આ વર્કશોપ આંતરરાષ્ટ્રીય સહયોગ અને તકનીકી વિનિમય માટે એક પ્લેટફોર્મ તરીકે સેવા આપશે, જેમાં પાંચ મુખ્ય ઉદ્દેશ્યો છે: સહયોગને પ્રોત્સાહન આપવું, સલામતી અને અસરકારકતા પદ્ધતિઓ વધારવી, નિયમનકારી સંકલનને ટેકો આપવો અને વૈશ્વિક સ્તરે પરંપરાગત દવા પ્રણાલીઓને સશક્ત બનાવવી.

હાઇલાઇટ્સમાં WHO-IRCH કાર્યકારી જૂથો 1 અને 3ની સમીક્ષાઓ સામેલ છે - જે હર્બલ દવાઓની સલામતી, નિયમન, અસરકારકતા અને હેતુપૂર્વકના ઉપયોગ પર ધ્યાન કેન્દ્રિત કરશે - તેમજ પ્રી-ક્લિનિકલ સંશોધન, નિયમનકારી માળખા અને સલામતી કેસ સ્ટડીઝ પર સત્રો, જેમાં અશ્વગંધા (વિથાનિયા સોમ્નિફેરા) પર ધ્યાન કેન્દ્રિત કરીને ચર્ચાનો સમાવેશ થાય છે.

PCIM&H પ્રયોગશાળાઓમાં HPTLC તકનીકનો ઉપયોગ કરીને હર્બલ દવા ઓળખ, ભારે ધાતુ વિશ્લેષણ અને કીમો-પ્રોફાઇલિંગમાં વ્યવહારું તાલીમનો લાભ સહભાગીઓને મળશે. આ વર્કશોપ આયુષ સુરક્ષા (ફાર્માકોવિજિલન્સ) કાર્યક્રમ પણ શરૂ કરશે, જેનો હેતુ પરંપરાગત દવાઓની સલામતી દેખરેખને મજબૂત બનાવવાનો છે.

ભારતના સંકલિત આરોગ્યસંભાળ ઇકોસિસ્ટમની ઊંડાણપૂર્વકની સમજ પૂરી પાડવા માટે, પ્રતિનિધિઓ PCIM&H, નેશનલ ઇન્સ્ટિટ્યૂટ ઓફ યુનાની મેડિસિન (NIUM), ગાઝિયાબાદ અને ઓલ ઇન્ડિયા ઇન્સ્ટિટ્યૂટ ઓફ આયુર્વેદ (AIIA), નવી દિલ્હીની મુલાકાત લેશે.

વિવિધ ખંડોના નિયમનકારી અધિકારીઓ અને નિષ્ણાતોની ભાગીદારી સાથે, આ વર્કશોપ વૈશ્વિક ધોરણોના સુમેળમાં અને મુખ્ય પ્રવાહની જાહેર આરોગ્ય પ્રણાલીઓમાં પરંપરાગત દવાના સલામત, અસરકારક એકીકરણને પ્રોત્સાહન આપવામાં નોંધપાત્ર યોગદાન આપશે તેવી અપેક્ષા છે.

AP/NP/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com