داخلی امور اور امداد باہمی کے مرکزی وزیر جناب امت شاہ 5 جولائی 2025 کو گجرات  میں آنند کے مقام پر  'بھومی پوجن' کریں گے اور ملک کی پہلی قومی سطح کی کوآپریٹو یونیورسٹی "تری بھوون" سہکاری یونیورسٹی (ٹی ایس یو) کا سنگ بنیاد رکھیں گے ۔  گجرات کے وزیر اعلی جناب بھوپیندر بھائی پٹیل اور اسمبلی اسپیکر جناب شنکر چودھری اس موقع پر موجود ہوں گے ۔  امداد باہمی کے مرکزی وزیر مملکت جناب کرشن پال گرجر اور جناب مرلی دھر موہول ، گجرات حکومت کے تعلیم کے وزیر جناب رشی کیش پٹیل اور امداد باہمی کے وزیر جناب جگدیش وشوکرما ، امداد باہمی کی وزارت کے سکریٹری ڈاکٹر آشیش کمار بھوٹانی ، ٹی ایس یو کے وائس چانسلر ڈاکٹر  جے ایم  ویاس اور دیگر کئی ممتاز شخصیات بھی اس تقریب میں موجود ہوں گی ۔

وزیر اعظم جناب نریندر مودی کی قیادت اور مرکزی وزیر داخلہ اور امداد باہمی کے وزیر جناب امت شاہ کی رہنمائی میں "تری بھوون" کوآپریٹو یونیورسٹی کے قیام کا فیصلہ کوآپریٹو سیکٹر میں صلاحیت سازی اور "سہکار سے سمردھی" کے وژن کو عملی جامہ پہنانے کے لیے ایک تاریخی اور بصیرت انگیز پہل ہے ۔  یہ یونیورسٹی تعاون ، اختراع اور روزگار کی تریوینی کو عملی جامہ پہنانے کی سمت میں ایک اہم سنگ میل ثابت ہوگی ۔

مرکزی وزیر داخلہ اور امداد باہمی کے وزیر جناب امت شاہ "ایک پیڑ  ماں کے نام" مہم کے تحت شجرکاری میں بھی شرکت کریں گے ، جو وزیر اعظم جناب نریندر مودی کی اپیل پر ایک عوامی تحریک بن گئی ہے ، اس پہل سے ماحولیاتی تحفظ اور ثقافتی اقدار کے لیے ذمہ داری کا احساس پیدا ہوتا ہے ۔  اس کے علاوہ ، جناب شاہ اسکول کے طلباء کو تعاون کے اصولوں اور ہندوستان میں تعاون پر مبنی تحریک کے اثرات سے واقف کرانے کے لیے نیشنل سینٹر فار ایجوکیشن ریسرچ اینڈ ٹریننگ (این سی ای آر ٹی) کے تیار کردہ ایک تعلیمی ماڈیول کی بھی نقاب کشائی کریں گے ۔

وزیر اعظم جناب نریندر مودی کی قیادت میں "تری بھوون" کوآپریٹو یونیورسٹی کے قیام کا مقصد کوآپریٹو سیکٹر کی بڑھتی ہوئی ضروریات کو پورا کرنے کے لیے پیشہ ورانہ اور تربیت یافتہ افرادی قوت تیار کرنا ہے ۔  یہ یونیورسٹی کوآپریٹو مینجمنٹ ، فنانس ، قانون اور دیہی ترقی جیسے شعبوں میں خصوصی تعلیم ، تربیت اور تحقیق کے مواقع فراہم کرے گی ۔  یہ یونیور سٹی اختراع ، صلاحیت سازی اور بہترین طریقوں کو فروغ دے کر ، حکمرانی کو بہتر بنا کر اور جامع اور پائیدار دیہی اقتصادی ترقی کو تیز کرکے نچلی سطح پر تعاون پر مبنی اداروں کو بااختیار بنائے گی۔

یونیورسٹی کا تعلیمی ڈھانچہ پی ایچ ڈی، قومی تعلیمی پالیسی 2020 کی بنیاد پر ،  انتظامی سطح پر ڈگریاں ، نگران سطح پر ڈپلوما  اور آپریشنل سطح پر سرٹیفکیٹ سمیت متعدد لچکدار اور کثیر شعبہ جاتی پروگرام پیش کرے گا ۔  یہ اپنے کیمپس اور دیگر ریاستوں میں مضامین کے لیے مخصوص اسکول قائم کرے گا اور کوآپریٹو تعلیم اور تربیت کے معیار کو اعلی سطحی اور معیاری بنانے کے لیے ایک قومی نیٹ ورک تیار کرے گا ۔  ایک قومی نیٹ ورک بنانے کے لیے یونیورسٹی اگلے چار برسوں میں 200 سے زیادہ موجودہ کوآپریٹو اداروں کو جوڑنے کی کوشش کرے گی ۔

ہندوستان کے تقریبا 40 لاکھ کوآپریٹو اہلکاروں اور 80 لاکھ بورڈ ممبروں کی ہنر مندی کے فروغ اور صلاحیت سازی کی ضروریات کو پورا کرنے کے لیے ، یونیورسٹی اگلے پانچ سالوں میں کوآپریٹو سوسائٹیوں، جیسے پرائمری ایگریکلچرل کریڈٹ سوسائٹیز (پی اے سی ایس) ڈیری ، فشریز وغیرہ کے تقریبا 20 لاکھ اہلکاروں کو تربیت دے گی ۔

اہل اساتذہ کی کمی کو دور کرنے کے لیے یونیورسٹی کوآپریٹو اسٹڈیز پر مبنی پی ایچ ڈی پروگراموں کے ذریعے ایک مضبوط اساتذہ کی بنیاد تیار کرے گی ۔  فی الحال کوآپریٹو تعلیم چند ریاستوں تک محدود ہے اور مختلف اداروں میں پھیلی ہوئی ہے ، جو اس شعبے میں بڑھتی ہوئی مانگ کو پورا کرنے کے لیے ناکافی ہے ۔

کوآپریٹیو میں ، خاص طور پر دیہی علاقوں کے لیے ، اختراع اور سستی ٹیکنا لوجیوں پر مرکوز تحقیق اور ترقی کی حمایت کرنے کے لیے فی الحال ہندوستان میں کوئی ادارہ جاتی طریقہ کار موجود نہیں ہے ۔  اس بات کو ذہن میں رکھتے ہوئے یونیورسٹی میں ایک مخصوص ریسرچ اینڈ ڈیولپمنٹ کونسل قائم کی جائے گی، جو کوآپریٹو سیکٹر میں تحقیق اور ترقی کرے گی اور اس سے منسلک اداروں میں بھی اسے فروغ دے گی ۔  اس کے علاوہ یہ ہندوستان میں دنیا کے بہترین طور طریقوں کو قائم کرنے کے لیے قومی اور بین الاقوامی  اہمیت کے حامل معروف اداروں کے ساتھ تال میل بھی قائم کرے گی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(ش ح –ش م۔ ق ر)

U. No.2439