2025 ജൂണിൽ ആധാർ ഉടമകൾ 229.33 കോടി ആധാര്‍ അധിഷ്ഠിത സ്ഥിരീകരണ ഇടപാടുകൾ നടത്തി.  കഴിഞ്ഞ മാസത്തെയും  മുൻ സാമ്പത്തിക വർഷം ഇതേ മാസത്തെയും ഇടപാടുകളെക്കാള്‍ കൂടുതലാണിത്. ആധാറിന്റെ വ്യാപക ഉപയോഗത്തെയും പ്രയോജനത്തെയും രാജ്യത്തെ ഡിജിറ്റൽ സമ്പദ്‌വ്യവസ്ഥയുടെ അഭിവൃദ്ധിയെയും ഈ വളർച്ച അടിവരയിടുന്നു.

ഇതോടെ ആധാര്‍ സ്ഥിരീകരണത്തിന്റെ തുടക്കം മുതൽ കണക്കാക്കിയ ഇടപാടുകളുടെ ആകെ എണ്ണം 15,452 കോടി കവിഞ്ഞു. 2024 ജൂണിൽ രേഖപ്പെടുത്തിയ ഇത്തരം ഇടപാടുകളേക്കാൾ ഈ വര്‍ഷത്തെ സ്ഥിരീകരണ ഇടപാടുകൾ ഏകദേശം 7.8% അധികമാണ്. 

ക്ഷേമവിതരണം ഫലപ്രദമാക്കാനും സേവന ദാതാക്കളുടെ  വിവിധ സേവനങ്ങൾ സ്വമേധയാ ലഭ്യമാക്കാനും ആധാർ അധിഷ്ഠിത സ്ഥിരീകരണം എങ്ങനെ  സൗകര്യമൊരുക്കുന്നുവെന്ന്  വ്യക്തമാക്കുന്നതാണ് ഇടപാടുകളിലെ വളര്‍ച്ച.  ദശലക്ഷക്കണക്കിന് പേരുടെ ജീവിതം സുഗമമാക്കാന്‍ ഉത്തേജകമാണിത്. 

യുഐഡിഎഐ വികസിപ്പിച്ച എഐ/എംഎല്‍ അധിഷ്ഠിത ആധാർ മുഖനിര്‍ണയ സംവിധാനങ്ങളും സുസ്ഥിര വളർച്ച കൈവരിച്ചു. 2025 ജൂണിൽ 15.87 കോടി റെക്കോഡ് മുഖനിര്‍ണയ ഇടപാടുകളാണ്  രേഖപ്പെടുത്തിയത്. കഴിഞ്ഞ വർഷം ജൂണില്‍ ഇത് 4.61 കോടിയായിരുന്നു.

ഇതുവരെ ഏകദേശം 175 കോടി മുഖനിര്‍ണയാധിഷ്ഠിത ഇടപാടുകളാണ് നടത്തിയത്.  ഈ സ്ഥിരീകരണ രീതിയുടെ കൂടിവരുന്ന സ്വീകാര്യതയും ആധാർ ഉടമകൾക്ക് ഇതുമൂലം ലഭിക്കുന്ന പ്രയോജനവുമാണ് വര്‍ധന സൂചിപ്പിക്കുന്നത്.  

നിര്‍മിതബുദ്ധി അധിഷ്ഠിത മുഖനിര്‍ണയ രീതി ആൻഡ്രോയിഡ്, ഐഒഎസ് പ്ലാറ്റ്‌ഫോമുകളിൽ പ്രവർത്തിക്കുന്നു. കർശന സുരക്ഷാ മാനദണ്ഡങ്ങൾ പാലിക്കുന്നതിനൊപ്പം പ്രവര്‍ത്തനം സുഗമമാക്കുന്ന ഈ സംവിധാനത്തില്‍  മുഖം സ്കാന്‍ ചെയ്യുന്നതിലൂടെ ലളിതമായി തിരിച്ചറിയല്‍ സ്ഥിരീകരിക്കാം. .  

സർക്കാർ മന്ത്രാലയങ്ങൾ, വകുപ്പുകൾ, ധനകാര്യ സ്ഥാപനങ്ങൾ, എണ്ണ വിപണന കമ്പനികൾ, ടെലികോം സേവന ദാതാക്കൾ എന്നിവയടക്കം 100-ലേറെ സ്ഥാപനങ്ങൾ സേവനങ്ങളുടെയും ആനുകൂല്യങ്ങളുടെയും  സുഗമമായ വിതരണത്തിന്  മുഖനിര്‍ണയ സ്ഥിരീകരണം ഉപയോഗപ്പെടുത്തുന്നു. 

സമാനമായി 39.47 കോടിയിലധികം ഇ-കെവൈസി ഇടപാടുകളാണ് ജൂണിൽ നടന്നത്. ബാങ്കിംഗ്, ബാങ്കിംഗ് ഇതര ധനകാര്യ സേവനങ്ങൾ ഉൾപ്പെടെ  മേഖലകളിൽ ഉപഭോക്തൃ അനുഭവം മെച്ചപ്പെടുത്തുന്നതിലും നടപടികള്‍ സുഗമമാക്കുന്നതിലും ആധാർ ഇ-കെവൈസി സേവനം സുപ്രധാന പങ്കുവഹിക്കുന്നു.